“Wan Sia Bae Mi Resemap we Bae Mi Jusumaot”

Long fas taem we Moronae i bin kam long Josef Smit, hem i bin givim woning se bae Josef, “plante man bae oli laekem … mo plante man bae oli no laekem nem blong [hem], long medel blong evri kantri.”¹ Yumi bin luk se profesi ia i kamtru. Long wo ia bitwin gud mo nogud, Restoresen blong gospel tru long Profet Josef Smit i bin givim insperesen long ol man we oli biliv we oli stap folem hem, be tu, i mekem sam oli no glad we oli stap faet agensem Saeon mo Josef. Faet ia i no wan niuwan. I stat stret afta we yang Joseph i bin wokbaot long Tabu Bus, mo i stap gohed yet tedei wetem moa samting we yumi luk long intanet.

Masta Hemwan i bin talem long Josef Smit:

“Evri en blong wol bae i askem abaot nem blong yu, mo ol krangke man bae oli talem nogud yu, mo hel bae i agensem yu strong;

“Be olgeta we hat blong olgeta i klin gud, mo olgeta we oli waes, mo olgeta we oli gat moa gud laef, mo olgeta we oli gat klin fasin, bae oli lukaotem oltaem advaes, mo atoriti, mo ol blesing anda long han blong yu.”²

Tedei, mi givim testemoni blong mi long yufala evriwan we i stap wantem blong andastanem gud moa tabu misin blong Josef Smit Junia, Profet blong Restoresen.

Yumi no nid blong stap sem sem blong testifae abaot misin blong Josef olsem wan profet, sia, mo reveleta, from se Masta i wok oltaem tru long ol profet … ³ From ol trutok ia we oli kambak tru long Josef Smit, yumi save moa samting abaot Papa long Heven mo Sevya Jisas Kraes. Yumi save ol tabu fasin blong Tufala, rilesensip bitwin Tufala mo yumi, mo bigfala plan blong pemaot man we i mekem se yumi save gobak stap wetem Tufala.

Abaot Josef, Presiden Brigham Yang i talem: “Oli talem ofisol toktok long ol kaonsel blong heven finis, longtaem bifo wol ia i kamtru, se bambae Hem nao i man ia, long las dispensesen blong wol ia, we bae i karem tok blong God i kamtru i go long ol pipol, mo bae i kasem evri ki mo paoa blong Prishud blong Pikinini blong God. Lod i bin stap lukluk hem finis … from se Hem i bin odenem Josef long taem we i no save finis blong i prisaed long las dispensesen ia.”⁴

Blong rere from bigfala wok ia, Josef Smit i bin bon i kam insaed long wan gud famli we i bin gotru long plante long ol hadwok mo tes blong laef. Taem Josef i stat blong kam bigwan, ol filing blong hem long God “oli bigwan mo oli strong,”⁵ yet, tingting blong hem i fasfas wetem ol aedia blong relijin we oli agensem olgeta, we ol prija blong taem blong hem oli stap tijim. Nao Josef i no bin letem ol kwestin blong hem oli blokem fet blong hem. Hem i lukaotem ol ansa long Baebol mo i faenem advaes ia: “[Sapos wan long yufala i no gat waes, hem i mas askem God blong i givim long hem, nao God bae i save givim long hem from we fasin blong God i no save tok nogud long man … be i givim long gladhat blong hem].”⁶

Josef i tokbaot: “Neva wan toktok blong skripja i kam wetem paoa long hat blong man bitim hemia we i kam long hat blong mi long tetaem ia. I luk se i kam wetem bigfala paoa insaed long evri filing blong hat blong mi.”⁷

Wetem simpol bilif, Josef i tekem aksen long ol filing long spirit ia. Hem i faenem wan ples we i haed, i nildaon, mo “stat blong talem ol tingting blong hat blong [hem] long God.”⁸ I gat bigfala paoa long wanem we Josef i tokbaot se i bin hapen:

“Mi bin luk wan laet, i saen antap i kamdaon, stret antap long hed blong mi, mo laet blong hem i saen bitim laet blong san, mo hem i saen i kamdaon gogo, i kasem mi.

“…  Taem we laet ia i kasem mo stap saenem mi, mi bin luk tu Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi. Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan —Hem, Hem i Pikinini blong Mi we Mi Lavem Tumas. !Lisin gud long Hem!”⁹

Josef Smit i bin luk God, Papa we i no save finis, mo Jisas Kraes, Sevya mo Ridima blong wol. Hemia i fas visen blong Josef Fas Visen. Long ol yia afta, Josef i bin transletem Buk blong Momon, tru long presen mo paoa blong God. Samfala narafala man blong heven oli kam luk hem, oli putumbak ol trutok mo atoriti we i bin lus blong plante handred yia. Ol tabu toktok ia we oli kam long Josef Smit i openem ol windo blong heven mo glori blong taem we i no save finis blong yumi luk olgeta. Laef blong Josef i stap olsem wan testemoni se, sapos wan long yumi i no gat waes, hem i save askem God wetem fet, mo kasem ol ansa—samtaem, tru long ol man blong heven, be plante taem nao, tru long paoa blong Tabu Spirit, we i stap toktok long yumi tru ol tingting mo filing blong insperesen.¹⁰ Hem i tru long Tabu Spirit nao we bae yumi save kam blong save “trutok long saed blong evri samting.”¹¹

Long plante long yumi, wan witnes long saed blong Profet Josef Smit i kam taem yumi stap ridim Buk blong Momon. Fas taem we mi bin ridim Buk blong Momon, stat kasem en, i taem mi yang eli moning seminari studen. Wetem glad tingting taem mi smol boe, mi bin disaed blong ridim olsem mi nao mi Josef Smit, we mi stap faenem ol trutok insaed long Buk blong Momon blong fas taem. I mekem bigfala jenis long laef blong mi, mekem se kasem tedei, mi stap ridim Buk blong Momon long wei ia. Mi faenem plante taem se taem mi mekem, i mekem mi gat moa dip tangkyu from Profet Josef mo from ol trutok we oli kambak insaed long buk ia.

Eksampol. Traem tingbaot se filing blong Josef i olsem wanem taem hem i stap transletem ol raeting abaot baptaes blong kam klin aot long sin. Josef, oli talem hem blong no joenem eni jos we i stap, nao hem i mas gat kwestin abaot odinens ia we i sevem man. Ol kwestin blong hem i lidim hem, bakegen, blong prea; mo prea ia i lidim hem blong gat visit blong Jon Baptaes, we i bin putumbak Aronik Prishud mo atoriti blong mekem baptaes.¹²

O traem tingbaot se Josef bae i filim olsem wanem taem hem i lanem, blong fas taem, se Jisas Kraes i bin visitim ol pipol long Wes pat blong Wol—se Hem i bin tijim olgeta, i prea from olgeta, mo i hilim ol sikman, i blesem ol pikinini, i givim prishud atoriti, mo i blesem mo pasem sakramen long olgeta.¹³ Ating Josef i no bin luksave hemia long tetaem ia, be wanem hem i bin lanem abaot ol odinens mo oganaesesen blong Jos blong Kraes bifo, i mekem hem i rere blong helpem Lod, afta, blong putumbak semfala Jos ia long wol.

Long taem blong translesen blong Buk blong Momon, Josef mo waef blong hem Ema, tufala i bin krae sore from ded blong bebi boe blong tufala. Long tetaem ia, ol man blong prij oli stap tijim se ol pikinini we oli ded mo no kasem baptaes, bae oli kasem panis blong oltaem. Wetem hemia long tingting blong hem, traem ting se Josef i filim olsem wanem taem hem i transletem ol toktok blong profet Momon: “Ol smol pikinini … oli no nid blong sakem sin, o kasem baptaes. [From] ol smol pikinini oli stap laef long Kraes, we i stat long stat blong wol.”¹⁴

Maet, skripja long Buk blong Momon we i minim bigfala samting long Josef hem i nambatri japta blong 2 Nifae. Japta ia i tokbaot profesi blong bifo abaot “wan sia we oli jusum” we Lod bae i mekem i kam antap long las dei ia—wan sia we nem blong hem i Josef, we i tekem nem blong papa blong hem. Fiuja profet ia, bae man i tokbaot gud hem, mo bae i mekem wan wok we i bigwan long ol pipol blong hem. Bae hem i hae semmak olsem Moses mo bae i kasem paoa blong karem tok blong God i kam.”¹⁵ !Traem ting se Josef Smit bae i filim olsem wanem taem i luksave se profesi ia i abaot hem! Hem i no stap transletem histri ia; hem i stap transletem wan visen abaot ol las dei, wan long ol merikel blong Restoresen blong gospel blong Jisas Kraes —mo Josef hemwan bae i help blong mekem i hapen!

Tedei, kolosap 200 yia afta, hem i isi blong luk olsem wanem profesi ia i bin hapen. Yumi save abaot ol bigfala samting we Josef i bin mekem olsem profet blong Lod. Be tingbaot se taem Josef i bin transletem profesi ia, hem i bin mekem finis samfala samting we ol profet oli bin talem finis. Hem i wan yang man yet, we i gat 20 yia olsem. Jos i no oganaes yet. I no gat ol wod o ol branj, mo ol misinari mo i no gat tempol. I no gat tumas man i harem abaot Josef Smit, mo sam oli agensem hem bigwan finis. Nao, lukluk long bigfala wok we Lod i bin mekem tru long han blong wokman blong Hem, Josef, mo lukluk tu long fasin blong agens we i kam long hem. ?Yufala i no ting se profesi ia i kamtru we i tru pruf long saed blong koling blong Josef Smit olsem profet?

Long eniwan we i gat kwestin abaot testemoni blong olgeta abaot Josef Smit, o i stap traehad wetem ol rong mo defren kaen infomesen abaot laef mo seves blong hem, mi stap invaetem yufala blong lukluk long ol frut ia—ol plante blesing we yumi kasem tru long merikel misin blong Josef Smit, Profet blong Restoresen.

From se Josef i bin wan profet, ol revelesen mo ol profet, oli nomo wan samting we i blong bifo. Taem blong ol merikel—ol visen, hiling, mo seves blong ol enjel—oli no stop.¹⁶

From se Josef i bin wan profet, wanwan long yumi i save kasem paoa mo blesing blong tabu prishud, we i gat baptaes, presen we i Tabu Spirit, mo sakramen.

From se Josef i bin wan profet, yumi gat ol blesing mo ol odinens blong tempol we i joenem yumi long God, i mekem yumi ol pipol blong Hem, mo i soemaot long yumi paoa olsem hemia blong God, we i mekem i posibol blong wan dei, yumi luk fes blong God, we i Papa, mo stap laef.”¹⁷

From Josef i bin wan profet, yumi save se mared mo famli oli wan pat we yumi no save karemaot insaed long plan blong God blong stap hapi. Yumi save se tru long ol tempol odinens mo kavenan, ol famli rilesensip blong yumi bae oli save stap strong blong taem we i no save finis.

From Josef i bin wan profet, yumi gat moa bitim wan windo nomo i go long heven—doa ia blong kasem ol taem we i no save finis, i open long yumi. Yumi save kam blong save “wan tru God ia nomo, mo Jisas Kraes, we [Hem i] bin sendem.”¹⁸ Laef we i no save finis i save kam laef blong yumi.

Antap long evriwan, from se Josef i bin wan profet, yumi gat plante witnes, plante testemoni, se Jisas Kraes i Pikinini blong God, mo i Sevya blong wol. Yumi gat wan laen we i no brok, blong ol spesel witnes blong Jisas Kraes, wetem profet blong yumi tedei, Presiden Tomas S. Monson, ol kaonsela long Fas Presidensi, mo ol memba blong Kworom blong Olgeta Twelef Aposol. Long testemoni blong olgeta, mi ademap testemoni blong mi we i stap daon be i strong se: Jisas Kraes i stap laef mo i stap lidim Jos blong Hem. Josef Smit i bin, mo hem i Profet blong Restoresen. Prishud mo atoriti blong God oli stap bakegen long wol. Bae yumi no fraet mo talemaot witnes blong yumi, mo gladhat blong yumi from gudfala profet, sia mo reveleta blong Masta; hemia i prea blong mi long tabu nem blong Jisas Kraes, amen.