“Emon Chon Osini a Kefinita Upwe Seikata”

Nupwen an Moronai we keran feito churi Joseph Smith, a auroura pwe aramas repwe sinei itan pwe epwe och me ngaw me non muu meinisin. ¹ Sia fen kuna pwonuetan ena osini. Non ewe maunen och me ngaw, ewe Niwinsefaniton ewe kapas allim me ren ewe Soufos Joseph Smith a pesei chon nuku mi tapweno mwirin me asonga chon ungeni ekkewe ra fiu ngeni ewe popun Saion me ungeni pwisin Joseph. Ei maun ese minafo. A poputa mwirin chok an kukkun Joseph fetannong nein ekkewe Ira mi Pin me soposopono ikenai fiti mettoch mi pwa won kampiuter.

Ewe Samon a pwisin affata ngeni Joseph Smith:

A ureni Joseph pwe unusen ewe fonufan repwe eis usun itan, chon rese mirit repwe turunufasei me esita, me hell epwe ungeni i.

Nge ekkewe mi nimenimoch non netiper, ekkewe mi mirit, ekkewe mi tekia, me ekkewe mi nimenimoch, repwe kutta aurour me mumuta me feioch mi feito seni fan poun.²

Ikenai upwe wau ai kapasen pwarata ngeni meinisin mi kukkuta ne weweochuti ewe misin mi pin an Joseph Smith Jr., ewe Soufosun ewe Niwinsefanito.

Ese auchea sipwe saw usun ach pwarata usun an Joseph we misin pwe I emon soufos, chon osini, me chon pwarata, pokiten ewe Samon a fori An angang me ren ekkewe soufos.³ Pokiten ekkewe ennet mi niwinsefan me ren Joseph Smith, sia kan sinei usun Samach won Nang me ewe Chon Amanau Jises Kraist. Sia sinei usun Napanaper, nefinach rer, me ewe kokkotun ngaseno mi auchea ewe a mut ngenikich ach sipwe niwin ngeni mwen Meser.

Usun Joseph, Preseten Brigham Young a apasa: “A annukuno me non ekkewe mwichen esemuch, me mwen nongonongun fonufan a for, pwe I epwe ewe mwan, non amuchunon kinikinin fansoun ei fonufan, epwe wato ewe kapasen Kot ngeni ekkewe aramas me epwe angei unusen ekkewe kii me manamanen ewe Pristut an ewe Noun Kot. Ewe Samon a finata i … [pun i] a kefinita me non ewe manau mwen ach uputiw pwe epwe nemeni ei amuchunon kinikinin fansoun.”⁴

Ren ammonaten ei angang mi auchea, Joseph Smith a uputiw non ew famini mi uren tong ekkewe ra kuna weires me sossotun manau ran me ran. Nupwen Joseph a poputa ne marita, netipan ngeni Kot a anonnoneno me pochokununo,⁵ nge a osukosuk ren fitikokon ekiekin ekkewe namanam minne ekkewe chon afanafan ra afanafana fansoun we. Nge, ewe anuon Joseph ese mut ngeni an kapas eis repwe akouno an nuku. A kutta ponuen me non Paipen o a kuna ei aurour: “Ika emon me neimi ese mirit, epwe tingor ngeni God, iwe God epwe ngeni i. Pun God mi kisasew o kirekiroch ngeni aramas meinisin.”⁶

Joseph a chemeni pwe ese wor uwokisin non pukefel a ku netipen mwan ren watten pochokun nap seni ei uwokisin non ei fansoun ngeni netipei. Usun ewe uwokisin pukefel a tonong ren watten pochokun non meinisin mefiei non netipei. Joseph a ekieki usun en uwokisin.⁷

Ren nuku mi mecheres, Joseph apwonueta ekkei memefin ewe ngun. A kuna ew neni mi opono, a fotopukutiw, me a poputa ne wata mochenin netipan ngeni Kot.⁸ Mi wor watten manaman non an Joseph awewei usun met a fis:

Ua kuna ew uren saram mi wesen nom asan mokurei, mi nap seni saramen ewe akkar, minne a feitiw ekis me ekis tori a nom woi.

 Joseph a apasa pwe nupwen ewe saram a nom won a kuna ruemon aramas, minne saramer me ar ning ese tufichin awewei, ra uta asetan non asepwan. Emon me neir a kapas ngeni, a kokkori ren itan me apasa, a itini ewe emon—Iei Nei At Achengicheng. Ausening ngeni I!⁹

Joseph Smith a kuna Kot, ewe Sam ese much, me Jises Kraist, ewe Chon Amanau me Chon Angasano ewe Fonufan. Iei an Joseph Aewin Nemasepwi. Non ekkewe ier mwirin, Joseph a chiakuni ewe Puken Mormon me ren ewe niffangen me manamanen Kot. Chommong pwan ekkoch chon nang ra churi, ra aniwinato ennet me mumuta ir mi turuno non fite ngorou ier. Ekkei fansoun chon nang ra churi Joseph Smith mi atufichikich ne angei ekkewe feioch seni nang me ningen esemuch. Manauen Joseph a fis pwe ew kapasen pwarata pwe ika emon me neich ese wor ach mirit, sia tongeni tingorei Kot non nuku me angei ponuwan—fan ekkoch epwe seni chon nang nge napengeni epwe seni manamanen ewe Ngun mi Fel, ewe a kapas ngenikich ren aurouren ekiek me memef.¹⁰ Seni ewe Ngun mi Fel sia tongeni “sinei ennetin mettoch meinisin.”¹¹

Ren chommong me neich, ach angei pwarata usun ewe Soufos Joseph Smith a poputa nupwen sia aneani ewe Puken Mormon. Ua akkaewin aneani ewe Puken Mormon seni nepoputan ngeni nesoponon nupwen ngang mi chok emon chon sukunen seminary nesosor. Ren pochokunen ai anean, ua finata ne aneani usun ita ngang Joseph Smith, ai kuna ennetin ewe Puken Mormon ren ewe fokkun aewin fansoun. A fokkun siwini manauei ina minne ua sopweno ne aneani ewe Puken Mormon non ena napanap. Ukan kuna pwe ai fori a anapano ai kinisou ren ewe Soufos Joseph me ren ekkewe ennet non ei puk mi auchea.

Ren awewe, ekieki usun an Joseph memef nupwen a chiakuni ekkewe uwokisin usun papatais ren omusomusen tipis. Joseph, ewe a fen aurour pwe esap choni ew me nein ekkewe mwichefen, a wor an kapas eis usun ei nongonongen amanau. An kapas eis a efisi sefan an epwe iotek, me ena iotek a emweni ngeni an John ewe Sou Papatais churi, ewe a aniwinato ewe Pristut seni Aaron me ewe mumutan papatais.¹²

Are ekieki ifa usunan Joseph memef nupwen a kaeo non ewe aewin fansoun pwe Jises Kraist a fen churi ekkewe aramasen Notou—pwe A aitir, iotek fan iter, achikara nour mi semwen, afeiochu nour semirit, ngenir mumutan pristut, me afeiochu ewe sakramen ngenir.¹³ Eni Joseph ese apareni non ena fansoun, nge met a kaeo usun ekkewe nongonong me tettenin an Kraist we Mwichefen me nom a ammonata i ngeni an epwe anisi ewe Samon ne aniwini sefani ena pwan chok Mwichfen ngeni ewe fonufan.

Fansoun ewe chiakun ewe Puken Mormon, Joseph me punuwan we Emma ra netipeta ren manon nour we monukon at. Non ekkewe ran sou afanafan ra kan afanafana pwe ika semirit ra mano nge rese papatais repwe muchuno fochofoch. Ekieki ifa usun Joseph mefi nupwen a chiakuni ekkei kapas seni ewe soufos Mormon: “Kukkun semirit ese auchea ar repwe aier, pwan papatias. … [Pun] kukkun semirit ra manau non Kraist, pwan mwo seni nepoputan ewe fonufan.”¹⁴

Menin ewe uwokisin mi fokkun amwarar non ewe Puken Mormon ngeni ewe anuon Joseph epwe ewe aunungatin sopun non 2 Nifai. Ei sopun a masouweni ew osinien nom usun emon “chon osini mi kefinita” minne ewe Samon epwe seikata non ekkewe ranin soponon—emon chon osini itan Joseph, a eiteit seni itan Seman we. Ei soufosun mwach epwe “wesewesen sufon” me epwe fori ew angang “mi watte auchean” ngeni noun aramas. An “napanap epwe usun Moses” me epwe angei “pochokun pwe epwe wato [an Kot] kapas”¹⁵ Ekieki ifa usun Joseph Smith a mefi nupwen a apareni pwe ei osini a kapas usun i! Ese chok chiakuni uruo; a chiakuni ew nemasepwin ekkewe ranin soponon, usun ewe Niwinsefaniton ewe kapas allimen Jises Kraist—me Joseph pwisin epwe anisi ne apwonueta!

Ikenai, ukukkun 200 ier mwirin, mi mecheres ach kuna ifa usun ei osini a fen pwonuta. Sia sinei usun ekkewe mettoch mi murino Joseph a apwonueta non wisan emon soufosun ewe Samon. Nge chechemeni pwe nupwen Joseph a chiakuni ei osini, a fen fori ekkoch ekkewe mettoch ekkewe soufos ra fen osini usun. A chok emon anuon rue me fite ierin. Ewe Mwichefen ese mwo fen kauta. Ese wor wart are  pranch, ese wor misineri, me ese wor tempel. Ese chommong chon rongorong usun Joseph Smith, me ekkoch ir mi rong usun, ra ungeni. Iei nengeni ewe angang mi auchea ewe Samon a fen apwonueta seni noun chon angang Joseph, ina mwo mi wor chon ungeni. Esap pwonuetan ei osini pwe mi anetatan wisen Joseph Smith pwe wesen emon soufos?

Ngeni ion epwe tipemwaramwarei ar kapasen pwarata usun Joseph Smith are ir mi osukosuk ren poraus mi mwan, orukoruk, are rese unusoch usun manauan me an angang, ua tingor ngeni kemi ne ekieki uwan kewe—ekkewe chommong feioch ra fen feito rech seni ewe misin mi manaman an Joseph Smith, ewe Soufosun ewe Niwinsefanito.

Pokiten Joseph emon soufos, pwarata me soufos resap chiwen mettoch mi chok fis me nom. Ewe “ranin manaman” —ranin nemasepwi, echikar, me angangen chon nang—ese kouno.¹⁶

Pokiten Joseph emon soufos, emon me emon kich a wor ach mumuta ne angei ewe manaman me feiochun ewe pristut mi pin, mi pachenong papatais, ewe niffangen ewe Ngun mi Fel, me ewe sakramen.

Pokiten Joseph emon soufos, a wor rech feiochun me nongonongen ewe tempel epwe rifengeni kich ngeni Kot, forikich sipwe noun, me pwarano ngenikich ewe manamanen Kot, atufichi non ew ran ach sipwe kuna mesen Kot, pwan mwo ewe Sam, me manau.¹⁷

Pokiten Joseph emon soufos, sia sinei pwe pupunu me famini ir auchean kinikinin an Kot we kokkotun ach pwapwa. Sia sinei pwe seni nongonongen tempel me pwon mi pin, nefinach ren chon ach famini mi achengicheng epwe nikitu feinfeino.

Pokiten Joseph emon soufos, a wor rech nap seni ekis chok kaukun mumuta ngeni nang—a wor unusochun mumuta ngeni ekkewe feioch esemuch. Sia tongeni sinei “ewe emon chok Kot mi ennet o repwe sinei Jises Kraist, ewe [I a] tinato”¹⁸ Manau esemuch mi tongeni epwe ach.

Mi kan auchea, pokiten Joseph emon soufos, mi wor chommong chon pwarata, chommong kapasen pwarata, pwe Jises Kraist I ewe Noun Kot me ewe Chon Amanauen ewe fonufan. Mi wor ach nukucharen senin chon pwarata mi auchea usun Jises Kraist, mi pachenong soufos ikenai, Preseten Thomas S. Monson; ekkewe chon aninis non ewe Aewin Presetensi; ekkewe chon ewe Mwichen Engon me Ruemon Aposel. Upwe apachata ai kapasen pwarata ngeni ar: Jises Kraist mi manau me emweni An Mwichefen. Joseph Smith I ewe Soufosun ewe Niwinsefanito. Ewe pristut me mumutan Kot ra nom sefan won fonufan. Sisap nuokus ne apasa ach pwarata me ach kinisou ren ei amwararen soufos, chon osini, me chon pwaratan ewe Samon ina ai iotek non iten Jises Kraist, amen.