“Au na Vakatubura e Dua na Parofita Digitaki”

Ena imatai ni nona rairai o Moronai kivei Josefa Simici, a vakasalataka o koya ni na yaco vei Josefa Simici me “rogo na yacana vei ira na veimatanitu eso era na taleitaka, ka so era na vosacataka.”¹ Eda raica tu ni sa mai vakavotukana na parofisai o ya. Ena ivalu baleta na vinaka kei na ca, na Vakalesuimai ni kosipeli mai vua na Parofita, Josefa Simici sa mai vakauqeti ira ruarua na tamata vakabauta era muri koya ka vakakina nodra vakacudrui o ira na tamata veisaqasaqa era valuta vakaukauwa na inaki kei Saioni vata kei Josefa vakai koya. E sega ni ka vou na ivalu oqo. A tekivu ni oti ga na nona gole yani o Josefa ki na Veikau Tabu ka tomani tiko nikua ena kena vakaraitaki tu ena initaneti.

A kaya dina vakaoqo na Turaga vei Josefa Simici:

“Raica era na taroga na yacamu mai na iyalayala kei vuravura; ia era na vakalialiai iko ko ira na lialia ka ra vorati iko na luve i eli;

“Ia ko ira sa yalosavasava, kei ira sa vuku kei ira sa itovo vakaturaga; kei ira sa yalododonu, era na vakabauta na nomu ivakavuvuli kei na ivakaro; era na vakalougatataki kina.”²

Nikua au sa solia na noqu ivakadinadina kivei ira kece era vakasaqara me ra kila vinaka na ilesilesi tabu nei Josefa Simici Jr. na Parofta ni Vakalesuimai.

E sega ni dodonu meda yalolailai ena vakadinadinataka na ilesilesi i Josefa ni sa parofita, daurairai, ka daunivakatakila ni Turaga sa dau cakacaka mai vei ira na parofita.³ Ena vuku ni dina sa vakalesui mai vei Josefa Simici, eda sa kila vakalevu cake kina na Tamada Vakalomalagi kei na iVakabula o Jisu Karisito. Eda sa kila tu na Nodratou itovo vakalou, na Nodratou veimaliwai vakai iratou vakakina kivei keda, kei na ituvatuva cecere ni veivakabulai ka rawa kina meda lesu ki na Nodratou iserau.

Me baleti Josefa, a kaya kina o Peresitedi Brigham Young: “A lewai mai na vakatulewa ni vuravura taumada, ni se bera ni vakadavori na yavu ni vuravura oqo, ni sa i koya ga, o Josefa Simici, me qarava na veika sa virikotori mai, e na iotioti ni itabagauna kei vuravura oqo, me vakalasikati tale vei ira na tamata na nona vosa na Kalou, e soli vakakina vua na idola taucoko kei na kaukauwa ni Matabete ni Luve ni Kalou. A dau wanonovi koya mai na Turaga … ni a digitaki rawa mai [o koya] mai na vuravura tawamudu me mai veiliutaki e na iotioti ni itabagauna oqo.”⁴

Ena vakavakarau ki na cakacaka cecere oqo, a sucu o Josefa Simici ki na dua na matavuvale dauloloma ka dau sotava e vuqa na icolacola kei na veivakatovolei ena veisiga ni bula oqo. Ni sa tubu cake tiko mai o Josefa, sa “dei ka titobu sara,” na nona vakasamataka na Kalou⁵ ia a se veilecayaki tiko ena veisaqasaqa ni vakasama vakalotu era vakavulica tiko na dauvunau ena nona gauna o ya. E ka ni marau, vei cauravou Josefa ni a sega ni vakamatea na nona vakabauta na nona lomatarotaro. A vakasaqara na isau ni nona taro ena iVola Tabu ka kunea kina na ivakasala oqo: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini, ka na soli ga vua.”⁶

E nanuma kina o Josefa: “E sa sega mada ni dua na tiki ni ivola tabu e lauti au vakalevu me vaka na kena oqo. Raica sa laubasikata sara na yaloqu kau liaci au kina. Au vakasamataka vakavica na kena laulau.”⁷

Ena rawarawa ni vakabauta, a cakacaka kina o Josefa ena tuvaki vakayalo oqo. A raica e dua na vanua vakatikitiki, tekiduru, ka “vakacabora na [nona] masu vua na Kalou.”⁸ E kaukauwa sara na nona vakamacalataka o Josefa na veika a yaco:

“Au sa raica kina e cake e dua na duru bukawaqa donuya tiko na uluqu, ni sa lako sobu tiko mai ka serauni au; ia sa sivia sara na rarama ni matanisiga.

“… Ia ni sa mai toka e mataqu, au sa qai raica e rua na Tamata, ia na kedrau iserau kei na iukuuku sa sega ni vakamacalataki rawa, raica e rau sa tucake tu ena maliwa lala donuya na mataqu. A sa kacivi au e dua vei rau, dusi koya na kena ikarua ka kaya—Oqo na Noqu Gone ni Toko. Mo Rogoci Koya!”⁹

A raica na Kalou, na Tamada Tawamudu, kei Jisu Karisito, na iVakabula na Dauveivueti kei vuravura o Josefa Simici. Oqo na iMatai ni Raivotu nei Josefa Simici. Ena veiyabaki ka tarava, a vakadewataka o Josefa Simici na iVola i Momani ena isolisoli kei na kaukauwa ni Kalou. Era a rairai talega vua eso na kai lomalagi, vakalesuimai na dina kei na lewa sa mai yali tu ena veisenitiuri. Na veisotari vakalou oqo vei Josefa Simici a tadolava na katuba kei lomalagi kei na lagilagi ni veigauna tawamudu meda raica rawa. Na bula nei Josefa Simici sa tu me ivakadinadina ni kevaka e dua vei keda sa lailai vua na vuku, me kerea vua na Kalou ena vakabauta ka na ciqoma na kena isau—eso na gauna mai vei ira na talai mai lomalagi ia vakalevu ga ena kaukauwa ni Yalo Tabu, sa dau vosa vei keda ena vakauqeti ni vakasama kei na veika eda vakila.¹⁰ Sa mai vua na Yalo Tabu eda na kila “na dina ni veika kece ga.”¹¹

E vuqa vei keda, na vakadinadinataka na Parofita Josefa Simici ena tekivu ena kena wiliki na iVola i Momani. Na imatai ni gauna au a wilika tasevu kina na iVola i Momani niu a se gonevuli kina ni semineri ena mataka lailai. Niu raitayaloyalo vakacauravou lailai, au sa mani wiliwili me vaka ni o au o Josefa Simici, meu kunea rawa na dina ena iVola i Momani ena imatai ni gauna. Sa vakauqeti vakalevu kina na noqu bula kau se tomana tikoga na wilika na iVola i Momani ena sala o ya. Au raica vakavuqa niu cakava oqo ena titobu kina na noqu vakavinavinakataka na Parofita o Josefa Simici kei na dina sa vakalesuimai ena ivola vakamareqeti oqo.

Me kena ivakaraitaki, raitayalotaka mada na yaloi Josefa ni sa vakadewataka tiko na itukutuku me baleta na papitaiso me bokoci kina na ivalavala ca. Vei Josefa, ka a tukuni vua me kakua ni lewena e dua vei ira na lotu ena gauna o ya, a vakataroga voli tiko na cakacaka vakalotu ni veivakabulai oqo. Na nona vakatataro a muataki koya tale yani, me laki masu, ka yaco ena masu o ya me rairai mai o Joni na Dauveipapitaisotaki, ka a vakalesuamai na Matabete i Eroni kei na lewa ni veipapitaisotaki.¹²

Se raica mada a vakacava beka na yaloi Josefa ni sa mai vulica ena imatai ni gauna ni a rairai o Jisu Karisito vei ira na tamata mai na Ra kei Vuravura—ni a vakavulici ira, masulaki ira, vakabulai ira na tauvimate, masulaki ira na luvedra, vakatikora na lewa ni matabete, ka qaravi ira ena sakaramede.¹³ E dina beka ni a sega ni raica o Josefa ena gauna o ya, ia na veika sa vulica me baleta na cakacaka vakalotu kei na vakayavutaki na Lotu makawa i Karisito a vukei koya me na laki vukea na Turaga ena kena vakalesuimai na lotu vata ga o ya ki vuravura.

Ena gauna sa vakadewataki tiko kina na iVola i Momani, rau a lolositaka kina o Josefa kei na watina o Emma na luvedrau tagane sucu vou. Ena gauna o ya era dau vakavulica tiko na dauvunau ni o ira na gone lalai era mate ni ra sega tu ni papitaiso era na cudruvi tawamudu. Ni sa kilai toka oqo, raitayalotaka mada a vakacava beka na yaloi Josefa ni sa vakadewataka na vosa oqo nei parofita Momani: “Ia sa sega ni yaga na veivutuni, se papitaiso vei ira na gone lalai. … [Ni] ko ira na gone lalai era sa bula vei Karisito, mai na ivakatekivu kei vuravura.” ¹⁴

E rairai itukutuku mata ni davui beka ena iVola i Momani vei cauravou Josefa sai koya nai ka tolu ni wase ni ka 2 Nifai. Na wase oqo e tiko kina e dua na parofisai makawa me baleta e dua na “parofita digitaki” ena vakatubura na Turaga ena iotioti ni gauna—e dua na parofita na yacana o Josefa, ka vakatoka yaca vei tamana. Na parofita mai muri oqo ena “dokai vakalevu” ka na cakava e dua na cakacaka “e yaga vakalevu” kivei ira na nona tamata. Ena “dokai ko koya me vakataki Mosese” ka na soli vua na “kaukauwa me na kauta mai na vosa ni [Kalou].”¹⁵ Raica mada ena vakabeka evei na yaloi Josefa Simici ni sa raica ni parofisai o ya sa baleti koya! A sega walega ni vakadewataka tiko na itukutuku makawa; a vakadewataka tiko na raivotu ni iotioti ni gauna, na veivakurabuitaki ni kena Vakalesuimai na kosipeli i Jisu Karisito—ka na veivuke sara ga kina o Josefa Simici me vakavotukanataki!

Nikua, ni oti e 200 na yabaki, e rawarawa sara ni da raica ni sa mai vakadinati na parofisai oqo. Eda sa kila na veika cecere sa mai vakayacora rawa o Josefa na parofita ni Turaga. Ia me nanumi tiko ni gauna a vakadewataka kina o Josefa na parofisai oqo, sa cakava oti eso na ka era a tukuna tu mai na parofita. A se cauravou voli ka yabaki 20 vakacaca tiko. A se bera mada ni tauyavutaki na Lotu. A se sega tu na tabanalevu se  na tabana, sega na daukaulotu, ka sega na valetabu. A sega ni dua e bau rogoci Josefa Simici mada vakadua, ka so vei ira a saqati koya tikoga. Ia me da raica mada oqo na cakacaka cecere ni Turaga sa mai cakava na ligai Nona italai o Josefa, sega ni guilecavi kina na nona saqati tiko. E sega beka ni ivakadinadina qaqa na kena sa vakavotukanataki na parofisai ni veikacivi vakaparofita nei Josefa Simici?

Kivei koya ena lomatarotarotaka tiko na nodra ivakadinadina baleti Josefa Simici, se sotava rarawa tiko na itukutuku cala, veivakacalai, se lasutaki me baleta na nona bula kei na cakacaka vakalotu, au sa sureti kemuni mo ni raica mada na vuana—na veivakalougatataki levu sa yaco oqo vei keda mai na nona ilesilesi veivakurabuitaki.i Josefa Simici, na Parofita ni Vakalesuimai.

Baleta ga ni o Josefa a parofita, na ivakatakila kei ira na parofita sa sega ni ka ni veika makawa. Na siga ni cakamana—ni raivotu, veivakabulai, kei na nodra veiqaravi na agilosi—e sega ni oti rawa.¹⁶

Baleta ga ni o Josefa a parofita, sa rawa vei keda yadua meda taura na kaukauwa kei na veivakalougatataki ni matabete tabu, oka kina na papitaiso, na isolisoli ni Yalo Tabu, kei na sakaramede.

Baleta ga ni o Josefa a parofita, sa tu vei keda na veivakalougatataki kei na cakacaka vakalotu ni valetabu e vauci keda vua na Kalou, ka yaco meda Nona tamata, ka vakatakila kivei keda “na kaukauwa vakalou,” me yaco na siga eda na “raica rawa na mata ni Kalou ko Tamada, me qai bula tiko.”¹⁷

Baleta ga ni o Josefa a parofita, eda kila ni vakamau kei na matavuvale sa tiki bibi ni ituvatuva ni Kalou meda bula marau kina. Eda kila ni mai na cakacaka vakalotu ni valetabu kei na veiyalayalati, sa rawa ni tawamudu na cava ni noda veiwekani mareqeti vakamatavuvale.

Baleta ga ni o Josefa a parofita, sa sega walega ni katubaleka meda gole ki lomalagi—na kena katubalevu sara ga sa tadola vei keda ki na veigauna tawamudu. Eda sa rawa ni kila “na Kalou dina duadua ga, kei Jisu Karisito ko [Koya a] tala mai.”¹⁸ Sa rawa ni noda na bula tawamudu.

Kena cecere duadua, baleta ga ni o Josefa a parofita, era sa tiko na vakadinadina e so, kei ira era sa ivakadinadina, ni ko Jisu Karisito na Luve ni Kalou ka iVakabula kei vuravura, E sega ni cavuka rawa na isema ni daunivakadinadina i Jisu Karisito, oka kina na noda parofita nikua o Peresitedi Thomas S. Monson; rau na daunivakasala ena Mataveiliutaki Taumada, kei ira na lewe ni Kuoramu ni iApositolo Le Tinikarua. Ki na nodra ivakadinadina, au semata kina na noqu ivakadinadina tudei: ni bula tiko o Jisu Karisito ka liutaka tiko na Nona Lotu. E sa Parofita ni Veivakalesuimai o Josefa Simici. Na matabete kei na lewa ni Kalou sa tu tale oqo e vuravura. Sa noqu masu meda na vakatakila yani ena yaloqaqa na noda ivakadinadina kei na noda vakavinavinaka me baleta na parofita totoka oqo, daurairai, ka dauvakatakila ni Turaga ena yaca tabu i Jisu Karisito, emeni.