Kuv Yuav Tsa Ib tug Pom Tau uas Tseem Ceeb Heev Sawv

Thawj zaug uas Maulaunais tuaj rau Yauxej Xamiv, nws ceeb toom tias yuav muab Yauxej “lub npe mus rau qhov zoo thiab qhov phem nyob hauv txhua haiv neeg.”¹ Peb twb pom tias tau muaj raws li kev qhia tej uas yuav muaj los yav tom ntej ntawd. Nyob hauv kev tsov rog uas qhov zoo tawm tsam qhov phem, muaj ib txhia uas ntseeg tus Yaj Saub Yauxej Xamiv tau Muab txoj Moo Zoo Txum Tim Rov Qab Los thiab coj raws li nws thiab muaj cov uas chim siab tawm tsam Xi-oos thiab tawm tsam Yauxej. Kev ua tsov rog no tsis tau nyuam qhuav pib. Kev tsov rog no pib tsis ntev tom qab Yauxej taug mus rau hauv lub Koog Ntoo Dawb Ceev thiab tseem ua tsov rog no niaj hnub no nyob hauv Internet.

Tus Tswv hais rau Yauxej Xamiv hais tias:

“Neeg thoob lub ntiaj teb yuav nug txog nws lub npe, thiab tej neeg ruam yuav thuam nws, thiab ntuj txiag teb tsaus yuav sib zog tawm tsam nws;

“Tiam sis cov neeg huv huv, thiab cov neeg txawj ntse, thiab cov neeg uas ntxim qhuas, thiab cov neeg tsim txiaj yuav xav tau nws cov lus qhuab qhia thiab txoj cai thiab tej koob hmoov tsis tu tsis tseg.”²

Hnub no kuv ua tim khawv rau tag nrho cov uas xav to taub Yauxej Xamiv tus Hluas lub luag hauj lwm dawb ceev, tus Yaj Saub ntawm Kev Muab txoj Moo Zoo Txum Tim Rov Qab Los.

Peb tsis tas ntshai ua tim khawv txog Yauxej lub luag hauj lwm ua ib tug yaj saub, tus pom tau, thiab tus txais kev tshwm sim, vim tus Tswv yeej ib txwm ua hauj lwm dhau los ntawm cov yaj saub.³ Vim Yexus Khetos tau muab tej yam tseeb txum tim rov qab los, peb thiaj paub ntxiv txog peb Leej Txiv Saum Ntuj Ceeb Tsheej thiab tus Cawm Seej Yexus Khetos. Peb paub txog Nkawd tej cwj pwm, Nkawd txoj kev txheeb ze, thiab txoj kev txhiv dim uas qhib kev rau peb rov qab mus cuag Nkawd.

Thawj Tswj Hwm Brigham Young hais txog Yauxej hais tias: “Ua ntej ntuj tsim teb raug, nyob hauv kev sab laj saum ntuj ceeb tsheej, lawv tau hais tias nws yuav yog tus txiv neej, hauv lub caij nyoog kawg ntawm lub ntiaj teb no, uas yuav muab Vajtswv txoj lus rau cov neeg thiab txais tag nrho cov yuam sij thiab lub hwj chim ntawm Vajtswv Leej Tub lub Pov Thawj Hwj. Tus Tswv tau saib xyuas nws … [vim] tau tsa nws ua ntej ntuj tsim teb raug kom tswj hwm lub caij nyoog kawg no.”⁴

Xwv kom npaj nws rau txoj hauj lwm tseem ceeb no, Yauxej Xamiv yug los rau hauv ib tsev neeg uas sib hlub uas tau ris tej nra hnyav thiab raug kev sim siab ntawm lub neej no. Thaum Yauxej loj hlob tuaj, nws “muaj tej kev xav tob tob,”⁵ tiam sis nws tsis to taub txog tej lub tswv yim txog kev teev ntuj uas cov xib hwb qhia thaum ntawd. Zoo siab uas Yauxej tsis tau cia nws tej lus nug ua rau nws txoj kev ntseeg ploj mus. Nws nrhiav tej lus teb nyob hauv phau Npainpaum thiab nrhiav tau lus ntuas no: “Yog nej leej twg tsis muaj tswv yim, kom nws cia li thov ntawm Vajtswv, Vajtswv yuav pub tswv yim rau nws, rau qhov Vajtswv yog tus muaj siab dawb siab zoo pub ib puas tsav yam rau sawv daws, nws tsis khuv xim li.”⁶

Yauxej hais tias: “Yeej tsis muaj dua ib nqes vaj lug kub uas tau muaj hwj chim raug ib tug neeg twg lub siab ntau tshaj nqes no tau raug kuv lub siab thaum ntawd. Zoo nkaus li nqes vaj lug kub ntawd chob nkaus kuv lub siab. Kuv xav txog nqe ntawd ntau heev.”⁷

Nrog kev ntseeg, Yauxej tau ua raws li tej kev xav ntawm sab ntsuj plig no. Nws nrhiav tau ib qhov chaw uas nws nyob tau nws tus kheej, txhos caug, thiab “pib nthuav [nws] lub siab tej kev xav rau Vajtswv.”⁸ Yauxej zaj lus piav txog tej uas tshwm sim rau nws muaj hwj chim heev:

“Kuv txawm pom ib qho kaj nyob kiag saum kuv taub hau, ci ntsa iab tshaj lub hnub, qhov kaj nqi zuj zus txog thaum nyob ntawm kuv.

“… Thaum qhov kaj txog ntawm kuv, kuv tau pom ob tug Neeg, uas ci ntsa iab thiab muaj yeeb koob uas kuv tsis paub piav txog, nkawd nyob saum ib nta ntuj. Ib tug hais lus rau kuv, tuav kuv lub npe thiab taw tes rau tus ntawd, ces tau hais tias—Nov yog Kuv tus Tub uas Kuv Hlub. Cia li mloog Nws lus!”⁹

Yauxej Xamiv pom Vajtswv, Leej Txiv Nyob Mus Ib Txhis, thiab Yexus Khetos, tus Cawm Seej thiab tus Txhiv Dim ntawm lub ntiaj teb. Nov yog Yauxej Xamiv Thawj zaj Ua Yog Toog. Tom qab ntawd, Yauxej tau muab Phau Ntawv Maumoos txhais lus los ntawm Vajtswv lub txiaj ntsim thiab lub hwj chim. Muaj ntau tus tim tswv uas tuaj xyuas nws, muab tej yam tseeb thiab txoj cai txum tim rov qab los. Tej kev txuas lus nrog Yauxej Xamiv thiab Vatjswv yeej qhib rooj ntug ceeb tsheej thiab ua rau peb pom tau lub yeeb koob uas nyob mus ib txhis. Yauxej lub neej ua tim khawv hais tias yog peb leej twg tsis muaj tswv yim, peb thov tau Vajtswv thiab txais lus teb—tej lub sij hawm los ntawm cov tim tswv tiam sis feem ntau peb yuav txais los ntawm tus Vaj Ntsuj Plig Dawb Huv lub hwj chim, tus uas hais rau yus tej kev xav thiab yus lub siab.¹⁰ Yog los ntawm tus Vaj Ntsuj Plig Dawb Huv, peb yuav paub tau qhov tseeb ntawm tag nrho txhua yam.¹¹

Peb feem coob paub txog tus Yaj Saub Yauxej Xamiv thaum peb pib nyeem Phau Ntawv Maumoos. Thawj zaug kuv nyeem Phau Ntawv Maumoos tag nrho yog thaum kuv yog ib tug tub kawm ntawv seminary thaum sawv ntxov. Thaum kuv yog ib tug hluas kuv nyiam xav thiab xav, kuv thiaj li txiav txim siab tias kuv yuav nyeem zoo li kuv yog Yauxej Xamiv thiab yog thawj zaug uas kuv nyeem tej yam tseeb nyob hauv Phau Ntawv Maumoos. Qhov kuv ua li no tau hloov kuv lub neej heev kuv thiaj li tseem nyeem Phau Ntawv Maumoos zoo ib yam li ntawd. Ua li ntawd ua rau kuv ris tus Yaj Saub Yauxej Xamiv txiaj ntau zog thiab ua Vajtswv tsaug rau tej yam tseeb uas tau muab txum tim rov qab los nyob hauv phau ntawv uas muaj nqi no.

Piv txwv hais tias, cia li xav seb Yauxej xav zoo li cas thaum nws txhais lus txog kev cai raus dej kom zam txim rau yus tej kev txhaum. Yauxej, uas tau kawm hais tias nws yuav tsum tsis txhob koom ib lub koom txoos twg, yeej muaj lus nug txog txoj kab ke cawm seej no. Nws tej lus nug ua rau nws xav rov qab mus thov Vajtswv, thiab tom qab nws thov Vajtswv, Yauhas tus Muab Neeg Ua Kev Cai Raus Dej, tau muab lub Pov Thawj Hwj Aloos thiab txoj cai ua kev cai raus dej txum tim rov qab los.¹²

Thiab cia li xav seb Yauxej xav li cas thawj zaug nws kawm hais tias Yexus Khetos tau los xyuas cov neeg nyob hauv lub Ntiaj Teb Sab Hnub Poob—Nws qhia lawv, thov Vajtswv pab lawv, kho lawv cov neeg mob, foom koob hmoov rau lawv cov me nyuam, muab txoj cai pov thawj hwj rau lawv, thiab muab lub cim nco txog rau lawv.¹³ Tej zaum Yauxej tsis tau paub thaum ntawd, tiam sis tej yam uas nws kawm txog cov kab ke thiab Yexus Khetos lub Koom Txoos puag thaum ub tau npaj nws lub siab kom nws pab tau tus Tswv muab tib lub Koom Txoos ntawd txum tim rov qab los rau lub ntiaj teb.

Thaum nws muab Phau Ntawv Maumoos txhais lus, Yauxej thiab nws tus poj niam Emma nyuaj siab vim nkawd tus me nyuam mos liab tau tso lub ntiaj teb no tseg. Thaum lub caij nyoog ntawd cov xib hwb pheej qhia tias cov me nyuam uas tsis tau ua kev cai raus dej yuav raug txim mus ib txhis. Yog li ntawd, cia li xav seb Yauxej xav li cas thaum nws muab cov lus no txhais lus los ntawm tus yaj saub Maumoos: “Tej me nyuam yaus tsis tas yuav hloov siab lees txim, los sis tsis tas ua kev cai raus dej. … [Vim] tej me nyuam yaus muaj txoj sia nyob hauv Khetos, twb txij li thaum chiv keeb ntawm lub ntiaj teb los.”¹⁴

Tej zaum Yauxej xav tias zaj zoo tshaj plaws nyob hauv Phau Ntawv Maumoos yog nyob hauv tshooj peb ntawm phau 2 Nifais. Tshooj no muaj ib zaj lus qhia tej uas yuav muaj los yav tom ntej txog ib tug “pom tau uas tseem ceeb” uas tus Tswv yuav muab tsa hauv lub caij nyoog kawg—ib tug pom tau hu ua Yauxej, uas tau tis npe rau raws li nws leej txiv. Yuav “hwm” tus yaj saub no thiab nws yuav ua ib txoj hauj lwm uas muaj nqi heev rau nws cov neeg. Nws yuav “yog ib tug uas tseem ceeb zoo ib yam li Mauxes” thiab yuav muab hwj chim rau nws kom qhia Vajtswv txoj lus.¹⁵ Cia li xav seb Yauxej Xamiv xav li cas thaum nws paub hais tias tej lus qhia tej uas yuav muaj los yav tom ntej hais txog nws! Nws tsis muab ib zaj keeb kwm txhais lus xwb; nws txhais lus txog ib txoj kev ua yog toog pom hnub nyoog kawg, pom qhov uas yuav muab Yexus Khetos txoj moo zoo Txum Tim Rov Qab Los—thiab Yauxej yuav pab kom muaj raws li ntawd!

Hnub no, yuav luag 200 xyoos tom qab, yeej yooj yim rau peb paub hais tias tau muaj raws li kev qhia txog tej uas yuav muaj los yav tom ntej. Peb paub txog tej yam tseem ceeb uas Yauxej ua thaum nws yog tus Tswv tus yaj saub. Tiam sis nco ntsoov tias thaum Yauxej muab kev qhia txog tej uas yuav muaj los yav tom ntej no txhais lus, nws tsis tau ua ntau yam uas tus yaj saub no hais. Nws tseem yog ib tug tub hluas uas muaj 20 tawm xyoo xwb. Tseem tsis tau tsa lub Koom Txoos. Tsis muaj pawg ntseeg thiab ceg ntseeg, tsis muaj cov tub txib, thiab cov tuam tsev. Tsis tshua muaj leej twg hnov txog Yauxej Xamiv, thiab ib txhia ntawm cov uas hnov txog nws tau tawm tsam nws. Nim no saib txoj hauj lwm tseem ceeb uas tus Tswv tau ua los ntawm Nws tus tub qhe Yauxej txhais tes, txawm yog nws raug kev tsim txom los yog. Qhov uas tau muaj raws li txoj kev qhia tej uas yuav muaj los yav tom ntej puas yog puav pheej txog qhov uas Vajtswv tau hu Yauxej Xamiv ua ib tug yaj saub?

Rau cov uas tej zaum tsis paub lawv zaj lus tim khawv txog Yauxej Xamiv muaj tseeb los sis nyuaj rau lawv xav txog tej xov xwm tsis muaj tseeb los yog tsis tseem ceeb txog nws lub neej thiab nws cov lus qhuab qhia, kuv caw nej xav txog tej koob hmoov uas muaj dhau los ntawm Yauxej Xamiv, tus Yaj Saub ntawm Kev Muab txoj Moo Zoo Txum Tim Rov Qab Los, lub luag hauj lwm tseem ceeb.

Vim Yauxej yog ib tug yaj saub, kev tshwm sim thiab cov yaj saub tsis yog tej yam uas muaj puag thaum ub xwb. Lub caij uas muaj txuj ci tseem ceeb—xws li kev ua yog toog pom, kev kho mob, thiab cov tim tswv txoj kev los txhawb pab—tsis tu ncua.¹⁶

Vim Yauxej yog ib tug yaj saub, peb txhua tus txais tau lub hwj chim thiab cov koob hmoov los ntawm lub pov thawj hwj dawb huv, xws li kev cai raus dej, lub txiaj ntsim Vaj Ntsuj Plig Dawb Huv, thiab lub cim nco txog.

Vim Yauxej yog ib tug yaj saub, peb muaj cov koob hmoov thiab cov kab ke ntawm lub tuam tsev uas khi peb rau Vajtswv, ua rau peb rais los ua Nws haiv neeg, thiab qhia rau peb txog “Vajtswv lub hwj chim,” yog li ntawd muaj ib hnub peb thiaj yuav “pom Vajtswv lub ntsej muag thiab muaj txoj sia.”¹⁷

Vim Yauxej yog ib tug yaj saub, peb paub tias kev sib yuav thiab tsev neeg yog ib feem tseem ceeb ntawm Vajtswv txoj hau kev kom peb zoo siab. Peb paub tias dhau los ntawm cov kab ke thiab kev khi lus hauv lub tuam tsev, peb tsev neeg yuav nyob mus ib txhis.

Vim Yauxej yog ib tug yaj saub, tsis yog rooj ntug ceeb tsheej qhib rau peb pom xwb—twb qhib lub qhov rooj rau kev nyob mus ib txhis rau peb. Peb muaj peev xwm paub “Vajtswv, thiab Yexus Khetos, uas [Nws] txib los.”¹⁸ Peb yuav txais tau txoj sia nyob mus ib txhis.

Qhov tseem ceeb tshaj plaws, vim Yauxej yog ib tug yaj saub, peb muaj ntau tus neeg uas hais lus pov thawj, ntau tus neeg uas ua tim khawv, hais tias Yexus Khetos yog Vajtswv Leej Tub thiab tus Cawm Seej ntawm lub ntiaj teb. Peb muaj cov tshwj xeeb uas ua tim khawv txog Yexus Khetos, xws li peb tus yaj saub niaj hnub nim no, Thawj Tswj Hwm Thomas S. Monson; ob tug pab cuam nyob hauv Thawj Pawg Thawj Tswj Hwm; thiab cov mej zeej ntawm Pawg Kaum Ob tug Thwj Tim. Kuv txo hwj chim muab kuv zaj lus tim khawv tseeb ntxiv rau lawv zaj hais tias: Yexus Khetos muaj txoj sia nyob thiab coj Nws lub Koom Txoos. Yauxej Xamiv yog tus Yaj Saub ntawm Kev Muab txoj Moo Zoo Txum Tim Rov Qab Los. Peb rov qab muaj Vajtswv lub pov thawj hwj thiab txoj cai nyob hauv lub ntiaj teb. Thov kom peb tsis txhob ntshai hais lus tim khawv thiab ris Vajtswv txiaj rau tus Tswv tus yaj saub, tus pom tau, thiab tus txais kev tshwm sim no, kuv thov los ntawm Yexus Khetos lub npe dawb ceev, amees.