“Jun aj ilol na’leb’ sik’b’il ru tinwaklesi”

Naq laj Moroni kiwulak rik’in laj Jose Smith, kixye naq taawanq xk’ab’a’ laj Jose “choq’ chaab’ilal ut choq’ maa’usilal sa’ xyanqeb’ chixjunil li tenamit.”¹ Ak xtz’aqlo’ ru li aatin a’an. Sa’ xpleet li us ut li ink’a’ us, lix k’ojob’ankil wi’chik li evangelio rik’in laj Jose Smith ak xreek’asiheb’ laj paab’anel li neke’xtaaqe jo’ wi’ eb’ laj xik’ ilonel li neke’pleetik chi anchaleb’ xmetz’ew rik’in li k’anjel re Sion ut rik’in ajwi’ laj Jose. Moko ak’ ta li pleet a’in. Kitikla chirix naq laj Jose ki’ok sa’ li Loq’laj K’iche’ ut toj yoo anajwan chi jwal ilb’il wi’chik sa’ li Internet.

Li Qaawa’ kixye re laj Jose Smith:

“Eb’ lix maril li ch’och’ te’patz’oq chirix laa k’ab’a’, ut eb’ li maak’a’eb’ xna’leb’ tate’xse’e, ut li xb’alb’a taajosq’ob’resinq chawix;

“A’ut li saqeb’ ru xch’ool, ut li chaab’ileb’ xna’leb’, ut li tiikeb’ li raam, ut li saqeb’ ru xyu’am, te’xsik’ li na’leb’, ut li wankilal ut li osob’tesink chi rajlal rub’el laa wuq’.”²

Anajwan laa’in ninye lix nawom inch’ool reheb’ chixjunil li te’raj xtawb’al ru lix loq’laj k’anjel laj Jose Smith, li profeet re lix k’ojlajik wi’chik li evangelio.

Ink’a’ na’ajman naq ka’ch’in qach’ool sa’ xch’olob’ankil xyaalal lix k’anjel laj Jose jo’ profeet, aj ilol na’leb’, ut aj k’utb’esinel, xb’aan naq li Qaawa’ junelik naxb’aanu xk’anjel rik’ineb’ li profeet.³ B’antiox re li na’leb’ li xe’k’ojob’aak wi’chik rik’in laj Jose Smith, naab’al chik li naqanaw chirix li qaChoxahil Yuwa’ ut li Jesukristo. Naqanaw chirixeb’ lix choxahilal, lix komonil chirib’ileb’ rib’ ut qik’in laa’o, ut li nimla k’uub’anb’il na’leb’ re li tojb’al-ix li nokoxkanab’ chi sutq’iik chaq rik’ineb’.

Li Awa’b’ej Brigham Young kixye chirix laj Jose: “Kixaqab’aak li aatin sa’ xch’utameb’ li junelik q’e kutan, najter chi toj maji’ nak’ojob’aak li ruch’ich’och’, naq a’anaq li winq, sa’ lix raqikil k’ojlajik li ruchich’och’ a’in, li tixk’am chaq li raatin li Dios reheb’ li tenamit ut tixk’ul lix laawil ut lix wankilal lix Tijonelil li Ralal li Dios. Li Qaawa’ kixk’e reetal laj Jose … [xb’aan naq] kik’ojob’aak sa’ li junelik q’e kutan re taajolominq sa’ lix raqikil k’ojlajik a’in.”⁴

Jo’ xkawresinkil choq’ re li nimla k’anjel a’in, laj Jose Smith kiyo’la sa’ jun li junkab’al aj rahoneleb’ li neke’xk’ul naab’al li k’a’ru ch’a’aj sa’ li yu’am a’in. Naq ki’ok chi ninqanq, li k’a’ru nareek’a choq’ re li Dios “wan naq nanumta xchamal,”⁵ a’ut toj sachso xch’ool xb’aan li wech’ok-ib’ sa’ xyanqeb’ laj jultikanel. A’b’an jwal us naq laj Jose ink’a’ xkanab’ lix patz’om chixramb’al lix paab’aal. Kixsik’ xsumenkil xpatz’om sa’ li Santil Hu, ut xtaw li aatin a’in: “Wi junaq eere moko tz’aqal ta xna’leb’, chitz’aamanq re li Dios, li nak’ehok re chixjunileb’ li winq chi numtajenaq ut ink’a’ nach’ilan; ut taak’eemanq re.”⁶

Laj Jose kixye: “Maajun sut ki’ok junaq aatin re li loq’laj hu rik’in xnimal li wankilal sa’ xch’ool junaq winq jo’ ki’ok a’in sa’ li kutan a’an sa’ inch’ool laa’in. Chanchan ki’ok rik’in nimla metz’ew sa’ chixjunil li reek’ahom inch’ool. Kink’oxla ut kink’oxla wi’chik.”⁷

Rik’in junes paab’aal, laj Jose kik’anjelak jo’ chanru li k’a’ru xreek’a. Kixtaw jun na’ajej sa’ muqmu, kiwiq’la, ut ki’ok “chixq’axtesinkil li rajom [xch’ool] chiru li Dios.”⁸ Wan nimla wankilal sa’ xch’olob’ahom laj Jose chirix li k’a’ru kixk’ul:

“Kiwil jun xaqal li saqen, tz’aqal chixb’een injolom, li naxq’ax xlemtz’unkil ru li saq’e, li kikub’e chi timil timil toj reetal naq kikana sa’ inb’een.

“… Naq kihilan sa’ inb’een li saqen, kiwil wiib’ chi Winq, li ink’a’ naru chi yeemank chanru xlemtz’unkileb’ ru ut xloq’aleb’, xaqxookeb’ chi kutankil sa’ inb’een. Jun reheb’ kinraatina, kixpatz’ ink’ab’a’, ut kixye, rik’in xk’utb’al chi ruq’ li jun chik—A’in li Walal Raaro Inb’aan. Chawab’i a’an!”⁹

Laj Jose Smith kiril li Dios, li Junelikil Yuwa’b’ej, ut li Jesukristo, aj Kolol re ut aj Tojol rix li ruchich’och’. A’an a’in li Xb’een K’utb’esink kixk’ul laj Jose Smith. Chirix a’an, laj Jose kixjaltesi ru lix Hu laj Mormon xb’aan lix maatan ut lix wankilal li Dios. Naab’aleb’ chik aj choxahil taql ke’rula’ani laj Jose, ut ke’xk’ojob’ wi’chik k’a’ru sachenaq k’iila cient chihab’ chaq. Eb’ li choxahil ula’ a’in rik’in laj Jose Smith ke’xte li choxa ut li junelik q’e kutan chiru qilob’aal. Lix yu’am laj Jose naxk’ut xyaalal naq wi moko tz’aqal ta qana’leb’, naru taqatz’aama re li Dios sa’ paab’aal ut taqak’ul xsumenkil—wan naq rik’in laj choxahil taql a’ut k’iila sut rik’in xwankil li Santil Musiq’ej, li nokoraatina sa’ qak’a’uxl ut sa’ qach’ool.¹⁰ A’an rik’in li Santil Musiq’ej naq taaruuq taqanaw “li yaal chirix chixjunil li k’a’aq re ru.”¹¹

Choq’ re naab’al sa’ qayanq, xnawb’al li yaal chirix laj Jose Smith natikla rik’in rilb’al xsa’ lix Hu laj Mormon. Laa’in kiwil xb’een sut naq jun li saaj aj tzolonelin sa’ seminario. Rik’in xsaajil lin yoob’anb’il k’oxlahom, laa’in xinb’aanu wib’ jo’ laj Jose Smith naq kiwil, jo’ yookin chixtawb’al li na’leb’ sa’ li hu xb’een sut. Jwal kaw kinixtoch rilb’al chi jo’kan, jo’kan naq toj nawil lix Hu laj Mormon chi jo’kan. K’iila sut nawil naq xb’aanunkil chi jo’kan naxnima li woxloq’ihom choq’ re li Profeet aj Jose ut choq’ re li na’leb’ sa’ li loq’laj hu a’in.

K’oxla chan raj ru li xreek’a laj Jose naq kixjaltesi ru li aatin chirix li kub’iha’ choq’ re li risinkil li maak. Laj Jose, li kixk’ul xtaqlankil naq ink’a’ taa’ok sa’ jun reheb’ li iglees, tento raj te’wanq xpatz’om chirix li kub’iha’. Lix patz’om kixk’am xb’e xkab’ sutil chi tijok, ut li tij a’an xb’oq chaq jun li ula’ rik’in laj Jwan aj Kub’sihom Ha’, li kixk’ojob’ wi’chik li Tijonelil re Aaron ut li wankilal re xb’aanunkil li kub’iha’.¹²

Malaj k’oxla chan raj ru li xreek’a laj Jose naq kixnaw xb’een sut naq li Jesukristo kirula’aniheb’ li tenamit sa’ jun xraqalil chik li ruchich’och’—naq kixtzoleb’, kitijok chirixeb’, kixk’irtesiheb’ lix yaj, kirosob’tesiheb’ lix kok’al, kixq’axtesi wankilal re tijonelil, ut kixjek’i li loq’laj wa’ak sa’ xyanqeb’.¹³ Maare laj Jose ink’a’ kixnaw sa’ tz’aqal li hoonal a’an, a’ut li kixtzol chirix lix k’anjel li najteril Iglees kixkawresi re naq moqon tixtenq’a li Qaawa’ sa’ xk’ojob’ankil wi’chik li Iglees ajwi’ a’an sa’ li ruchich’och’.

Naq yoo chixjaltesinkil ru lix Hu laj Mormon, laj Jose ut li rixaqil li xEmma ke’xnumsi li rahilal sa’ xkamik lix k’uula’al. Sa’ li kutankil a’an eb’ laj jultikanel neke’xk’ut naq li kok’al li neke’kam chi moko kub’sinb’ileb’ ta xha’ te’wanq sa’ tojb’a-maak chi junelik. Wi ta wan li na’leb’ a’in sa’ xk’a’uxl, k’oxla chan raj ru li xreek’a laj Jose naq xjaltesi ru li aatin a’in: “eb’ [li] kok’al ka’ch’ineb’ xyu’am maajun jalb’a-k’a’uxlej neke’raj ru. … [xb’aan naq] eb’ li kok’al yo’yookeb’ rik’in li Kristo, chalen ajwi’ chaq sa’ xk’ojlajik li ruchich’och’.”¹⁴

Maare li aatin jwal nim xwankil sa’ lix Hu laj Mormon choq’ re jun li saaj Jose a’an raj li rox ch’ol sa’ 2 Nefi. Sa’ li jun ch’ol a’in wan jun profeetil aatin chirix jun “aj ilol na’leb’ sik’b’il ru” li tixwaklesi li Qaawa’ sa’ roso’jikeb’ li kutan—jun aj ilol na’leb’ aj Jose xk’ab’a’, jo’ chanru xyuwa’. Li profeet a’in “taataqsiiq xwankil” ut tixb’aanu jun li k’anjel “k’a’jo’ xnimal” choq’ re lix tenamit. “Nimaq ru jo’ laj Moises” ut tixk’ul “wankilal re xk’eeb’al chi k’utmank li [raatin li Dios].”¹⁵ K’oxla chan raj ru li xreek’a laj Jose naq kixk’e reetal naq li aatin a’in naxye naq a’an li winq a’an! Ink’a’ yal jun najter esil yoo chixjaltesinkil; a’an ajwi’ jun k’utb’esink chirix li roso’jikeb’ li kutan, ut lix k’ojob’ankil wi’chik lix evangelio li Jesukristo—ut naq a’an ajwi’, laj Jose, tixtenq’a xb’aanunkil!

Anajwan, wiib’aq cient chihab’ chirix, moko ch’a’aj ta rilb’al chanru ak xtz’aqlo’ li aatin a’in. Naqanaw li xnimal ru k’anjel kixb’aanu laj Jose jo’ xprofeet li Qaawa’. A’ut k’e reetal naq sa’ li hoonal naq laj Jose kixjaltesi li aatin a’in, yal b’ab’ay li k’anjel ak xb’aanu. Toj saaj winq a’an ut toje’ naxket junmay chihab’. Maji’ k’uub’anb’il li Iglees. Maajun li teep malaj uq’ej wan, maajun li misioneer, maajun li santil ochoch. Ink’a’ naab’aleb’ li neke’xnaw li k’ab’a’ej Jose Smith, ut wankeb’ aran li ke’wech’ok rik’in. Il chik anawjan li nimla k’anjel ak xb’aanu li Qaawa’ rik’in lix moos laj Jose, us ta yoo li wech’ok-ib’ chirix. Ma ink’a’ naqil sa’ xtz’aqlojik ru li profeetil aatin a’in jun xk’utb’al xyaalal lix profeetil b’oqb’al laj Jose Smith?

Choq’ re yalaq ani li yoo ta chi wiib’ank xch’ool chirix laj Jose Smith malaj li yoo chi ch’a’ajko’k rik’in li na’leb’ li moko yaal ta malaj li yal b’ab’ay xnawom chirix laj Jose, nakatinb’oq chixtz’ilb’al rix li ruuchinihom—li k’iila osob’tesink li xe’k’ulun qik’in xb’aan lix k’anjel laj Jose Smith, li profeet re li xk’ojlajik wi’chik li evangelio.

Xb’aan naq laj Jose kiwan choq’ profeet, li k’utb’esinb’il na’leb’ ut li profeet ink’a’ chik yal najtereb’. Li “xkutankil li sachb’a ch’oolej”—li k’utb’esinb’il matk’, li k’irtesink, ut xk’anjeleb’ li anjel—moko raqenaq ta.¹⁶

Xb’aan naq laj Jose kiwan choq’ profeet, chiqajunilo naru naqak’ul li wankilal ut li osob’tesink sa’ li tijonelil, jo’ li kub’iha’, li maatan re li Santil Musiq’ej, ut li loq’laj wa’ak.

Xb’aan naq laj Jose kiwan choq’ profeet, wan qik’in li osob’tesink ut li k’anjel re li santil ochoch li nokoxb’ak’ rik’in li Dios, li nokoxk’e jo’ xtenamit, ut li naxk’utb’esi chiqu “li wankilal re choxahilal.”¹⁷

Xb’aan naq laj Jose kiwan choq’ profeet, naqanaw naq li sumlaak ut li junkab’al aajel ru sa’ xna’leb’ li Dios choq’ re xsahil qach’ool. Naqanaw naq rik’in li k’anjel ut li sumwank re li santil ochoch, li qakomonil sa’ junkab’al naru taakanaaq chi junelik.

Xb’aan naq laj Jose kiwan choq’ profeet, maawa’ yal jun rilob’aal li choxa wan chiqu—tz’aqal b’an rokeb’aal li junelik q’e kutan teeto wan chiqu. Naru taqanaw ru “li jun ajwi’ chi tz’aqal Dios, ut li Jesukristo, li [kixtaqla].”¹⁸ Naru taqak’ul li junelik yu’am.

Ut li na’leb’ jwal nim wi’chik, xb’aan naq laj Jose kiwan choq’ profeet, natam jun k’utb’esink sa’ xb’een li jun chik re xk’utb’al naq li Jesukristo a’an li Ralal li Dios ut laj Kolol re li ruchich’och’. Ink’a’ naxjuk’ rib’ lix b’ak’b’aleb’ aj yehol nawom chirix li Jesukristo, b’ar wi’ wan ajwi’ li qaprofeet anajwan, laj Thomas S. Monson; eb’ laj tenq’ aj k’ehol na’leb’ sa’ li Xb’eenil Awa’b’ejil; ut eb’ li komon sa’ lix Molameb’ li Kab’laju chi Apostol. Rochb’eeneb’ lix nawom a’an, laa’in ninye lin nawom ajwi’ laa’in, li tuulan a’ut ch’olch’o: li Jesukristo yo’yo ut naxjolomi lix Iglees. Laj Jose Smith kiwan ut toj wan choq’ li profeet re lix k’ojlajik wi’chik li evangelio. Li tijonelil ut lix wankilal li Dios wankeb’ wi’chik sa’ xb’een li ruchich’och’. Chiqaye chi maak’a’ qaxiw lix nawom qach’ool ut li qab’antioxihom choq’ re li chaab’il profeet, aj ilol na’leb’, t laj k’utb’esinel re li Qaawa’, a’an lin tz’aam sa’ lix loq’laj k’ab’a’ li Jesukristo, amen.