“Nga Fah Tuhfahlah Sie Mwet Liyactwen”

Ke Moroni el tuhkuh pacl se emet nuh yohrohl Joseph Smith, el sensenkackihn lah “inel Joseph ac motkweyuck nuh ke ma wo ac ma koluk inmahsrlon muhtuhnfacl nuhkwewa.”¹ Kuht liye fohnlah luhn pahluh se ingacn. Ke fohs inmahsrlon ma wo ac koluk, Fohlohkyak luhn wosasuc sel Mwet Pahluh Joseph Smith moklweack kwewana mwet luhlahlfongi suc fahsr tohkohl ac oacyacpac ahktoasrye mwet lokoalok suc kasrkuhsrak lain srihpac luhn Saion ac Joseph sifacna. Mweun se inge tiac ma sasuc se. Muhtwacwacack tukun na mwet fuhsr Joseph el som nuh lun Insack Muhtahl sac ac tuhtahflah mihsenge ke yohkwelihk akihlenyac ke internet uh.

Leum El sifacna fahk nuh sel Joseph Smith:

Leum el fahk nuh sel Joseph lah sahflahiyacn facluh fah siyuck ke inel, mwet lahlfon fah ahkkasrkuhsrakyacl ac isrucnuhl, ac acn sin ma koluk fah ahkkolukyacl.

Tuhsruhk mwet nwacsnwacs insiyac, mwet lahlmwetmwet, ac mwet wo fah kalweni in suk kahsruh ac kuh ac mwe ahkinsewowo ye kohkoh luhn Pahol.²

Mihsenge nga fahkwack luhlahlfongi luhk nuh suwos kwewa suc suk in kahlwem wo ke misin muhtahl lal Joseph Smith Jr., Mwet Pahluh ke Fohlohkyak sac.

Tiac enenuh in muhnahs esacsr kuht in fahkwack ke misin lal Joseph lah el mwet pahluh, mwet liyactwen, mwet eis fwackyuck, mweyen Leum El kwacna orekma sin mwet pahluh uh.³ Ke srihpen ma pwacye fohlohkyak sel Joseph Smith, yohkwaclihk etuh lasr kacl Pahpah tuhmasr Inkuhsrao ac Mwet Lahngo Jisus Kraist. Kuht etuh ke ohiyac wolacna Lalos, kuhpahsr Lalos nuh sin sie sin sie ac nuh sesr, ac plwacn wolacna luhn molwelah lwelah nuh sesr in fohlohk nuh ke acn Selos.

Sruhmuhnyacl Joseph, Prestuhn Brigham Young el fahk: “Sapkihnyuck eke toeni ma pahtpaht sac, loes met liki pwelucng luhn facluh oakiyucki, lah el pa mwet se, ke fihl sahflah se ke facluh se inge, in us tuhkuh kahs luhn God nuh sin mwet uh ac eis ke fohnlah ke ki ac kuh luhn Pristut luhn Wen nuhtin God. Leum El liye kuht ke muhtahl … [tuh el] sollac met liki pacl mihsenge uh in karihngihn fihl sahflah se inge nuh tok ma pahtpaht.”⁴

In ahkolah nuh ke mukwikwi yohk se inge, Joseph Smith el isuslac nuh ke sucu wowo se suc moulkihn mwe ahktoasr ac mwe srihkasrak pucspucs ke lwen nuh kwewa ke moul uh. Ke Joseph el muhtwacwacack in mahtuhlah, puhla lal nuh sin God uh “loal ac wacna fakfuck.”⁵el nuhkanuhllah tari ke fohsackiyacn nuhnak luhn alu lutiyuck sin mwet luti ke pacl se lal ah. Ne ohinge, mwet fuhsr Joseph el tiac na lwelah kihsensiyuck lal ah in tulokihn luhlahlfongi lal. El suk top lun Pwacpuhl ac konwacack kahsruh se inge: “Kutena suwos fin enenu in akyokye lalmwetmet lal, enenu elan pre nu sin God, su ac fah sang nu sel; mweyen God el tiac srowohsr a El insewowo in sang yohk nu sin mwet nukewa.”⁶

Joseph el esamwack lah wacngihn pohloh sramsram ke ma suhmuhslah tuhkuh ke kuh luhn insiyacn mwet sahyacn ma se inge ke pacl lal uh. Sramsram ke ma suhmuhslah oacna in utyak ke kuh fokoko se nuh lun insiyacl. Joseph el kalweni na in sifil fohlohk nuhnkuh kac.⁷

Ke fihsrwacsriyacn luhlahlfongi la, Joseph el orekma nuh ke puhla muhtahl inge. El sokwack acn srwenglah se, sikuck muhtuhnteyak, ac muhtwacwacack in sang kena luhn insiyac [lal] nuh sin God.⁸ Oasr kuh fokoko se ke ahkuhtweyac lal Joseph ke ma sikyak ah:

Joseph el fahk lah el liye sie suhkan kahlwem tuhkuh lucng liki sifacl, suc kahlwem liki na faht uh, suc kahkahsrihk na puhtati ne ke na sonol.

“… Joseph el fahk lah ke kahlwem sac srwelyac ah el liye Mwet luo, suc kahlwemiyac ac wolacnaiyac ahkuhtweyac kwewa, tu lucng luhkwel yen engyeng uh. Sie selos sramsram nuh sel, pahng ke inel ac fahk—Pa inge Wen Kuloh Nuhtihk. Porongwacl!”⁹

Joseph Smith el liye God, Pahpah Ma Pahtpaht, ac Jisus Kraist, Mwet Lahngo ac Mwet Molwelah luhn facluh. Pa inge Aruhrruhma Se Met lal Joseph Smith. Yac tohkoh yang, Joseph Smith el luhngaslah Puk luhn Mormon ke mwe sang ac kuh luhn God. Oasr pac mwet inkuhsrao ohsun pac nuh sel, fohlohkohnwack ma pwacye ac wal ma tuhlac ke yac pucspucs. Sramsram wolacna nuh sel Joseph Smith inge ikacslah winto inkuhsrao in use mwe ahkinsewowo nuh sesr ac wolacna nuh tok ma pahtpaht. Moul lal Joseph ekihn luhlahlfongi kuh se lah kuhtwena suwos fin enenuh in ahkyohkye lahlmwetmwet lal, kuht kuh in siyuck sin God ke luhlahlfongi ac eis top nuh kac an—kuhtuh pacl uh tuhkuh sin mwet inkuhsrao, tuhsruhk yohkna ke kuh luhn Nguhn Muhtahl, suc sramsram nuh sesr ke mwe nuhnak ac puhla moklweyuck.¹⁰ Ac ke Nguhn Muhtahl kuht kuh in “etuh ma pwacye ke ma nuhkwewa.”¹¹

Puhs inkaiyacsr, ekihn sie mwet loh lal Mwet Pahluh Joseph Smith muhtwacwacack ke kuht riti Puk luhn Mormon. Nga riti Puk luhn Mormon muhtwacwacack ke acn met nuh ke acn tok ke pacl se nga ekihn sie tuhlihk lutlut fuhsr toang wi seminary. Ke nuhnak kahlwem luhk, nga sulaclah in riti oacna in nga pa Joseph Smith, in konwacack ma pwacye ke Puk luhn Mormon ke pacl se emet. Oasr eklac ke moul luhk uh pwacnwacng nga kalweni in riti Puk luhn Mormon ke ohiyac se ingacn. Nga kwacna konwacack lah in oruh ma ingacn ahkloalye srui luhk nuh sin Mwet Pahluh Joseph Smith ac ke ma pwacye fohlohkihnyuckyak ke kanon puk sacohk se inge.

Nuh ke mwe srihkasrak se, petsacelah puhla lal Joseph ke el luhngas pohloh sramsram ke pacptais ke tili otyak in elah ma koluk uh. Joseph, suc sapkihnyuck in tiac wi kuhtwena alu, pwacyena oasr kihsensiyuck lal ke akwuck in molwelah inge. Siyuck lal kohlohl, sifil pac, in pruhe, ac pruhe sac pwacnma sie muhtwacta sel John the Baptist, suc fohlohkohnwack Aaronic Pristut ac wal in pacptais.¹²

Kuh nuhnkuh lah fuhkah puhla lal Joseph ke el etwacack ke pacl se emet lah Jisus Kraist El muhtwacta nuh yurin mwet ke Western Hemisphere—lah El lotwelos, pruhe kwaclos, onwelah mwet mas lalos, ahkinsewowoye tuhlihk srihsrihk nahtuhlos, ahkkweyelah wal luhn pristut, ac ahkmuhtahlye kuhfa luhn Leum nuh selos.¹³ Sahp Joseph el tiac akihlen ke pacl sac, tuh ma el lotwelah ke akwuck ac tahklac luhn Alu mahtuh luhn Kraist ah ahkoellah in in tok kahsruh Leum sifil fohlohkohnwack Alu sac pacna nuh facluh.

Ke pacl se luhngasyucklac luhn Puk luhn Mormon, Joseph ac muhtwacn kiyacl Emma ahsorkihn misac luhn tuhlihk srihsrihk mukul se nahtuhlos. Mwet luti in pacl sacn luti lah tuhlihk srihsrihk ma tiac pacptaislac misac uh fah nuhnuhnkweyuck ma pahtpaht. Nuhnkuh ke ma se inge, petsacelah lah fuhkah puhla lal Joseph ke el luhngas kahs tuhkuh sin mwet pahluh Mormon: “Tuhlihk srihsrihk tiac enenuh in auliyak, kuh pacptaislac. … [Tuh] tuhlihk srihsrihk uh moul yurun Kraist, finne ke pwelucng luhn facluh;”¹⁴

Sahp pohloh sramsram kahto se emet ke Puk luhn Mormon nuh sel mwet fuhsr Joseph kuh pacna in pa ke sapta ahk tolu ke 2 Nephi. Sapta se inge nwacnwack kanon ma pahluh mahtuh ke sie “mwet liyactwen sacohk” se suc Leum El fah tuhfahlah nuh ke lwen sahflah—sie mwet liyactwen pahngpahng Joseph, ituckyang inel tukun pahpah tuhmwacl. Mwet pahluh nuh ke pacl fahsruh se inge fah “ahkfuhlwactyeyuck” ac fah oruh orekma “yohk srihpac” nuh sin mwet lal. El ac fah “wo na pwacye oacna Moses” ac fah ituckyang nuh sel “kuh in ahkkahlwemye kahs [luhn God].”¹⁵ Motko lah fuhkah puhla lal Joseph Smith ke el etwacack lah pahluh se inge ma kacl! El tiac luhngaslah ma mahtuh muhkwena; el luhngas aruhrruhma ke lwen sahflah uh, ke usrnguckiyacn Fohlohkyak luhn wosasuc luhn Jisus Kraist—ac Joseph sifacna fah kahsruh ahkpwacyeiyucklac!

Mihsenge, apkuhran in yac 200 tohkoh, fihsrwacsr in liyeyuck fuhkah ke ma palyeyuck inge akihlenyuck uh. Kuht etuh ke ma wowo Joseph el oraclah ekihn mwet pahluh luhn Leum. Tuhsruhk esam lah ke Joseph el luhngaslah ma palyeyuck inge, el oraclah kuhtuh srihsrihk ke ma mwet pahluh met ah fahkwack kac. El srwackna mukul fuhsr se ke el yac 20 kuhtuh. Alu uh soenna sramtweyuckyak. Wacngihn ward kuh pracns, wacngihn misineri, ac wacngihn tempuhl. Mwet uh suhkwac lohng kacl Joseph Smith, ac kuhtuh selos suc lohng kacl laenuhl upaclac. Inge liye orekma wowo Leum El ahkfahsryelah nuh sel Joseph mwet kuhlwacnsap Lal, oacna ke mwe ahkfohs sang laenuhl. Yac fohnlah luhn ma palyeyuck se inge enenuh mwe ahkpwacye nuh ke pahng palyeyuck kacl Joseph Smith?

Nuh suwos suc tahfuh luo ke luhlahlfongi kuh la kacl Joseph Smith kuh kweoklac ke ma tahfonglac, ma suhfal, ac mwe ahkkahlwemye suhfas ke moul lal ac ke luti lal, nga suli kowos in nuhnkuh ke fahko—mwe ahkinsewowo pucspucs ma tuhkuh nuh sesr ke usrnguckiyacn misin lal Joseph Smith, Mwet Pahluh luhn Fohlohkyak sac.

Ke srihpen Joseph Smith el mwet pahluh se, fwackyuck ac mwet pahluh uh tiac sifil ma ke pacl met ah. “Pacl luhn ma usrnguck”—ke mwemwe, ma onweyucklac, ac luti luhn lihpufacn—tiacna tui.¹⁶

Ke srihpen Joseph el mwet pahluh se, kais sie sesr oasr lwelah lasr nuh ke kuh ac mwe ahkinsewowo luhn pristut muhtahl, weacng pacptais, mwe sang luhn Nguhn Muhtahl, ac ke kuhfa luhn Leum.

Ke srihpen Joseph el mwet pahluh se, kuht eis mwe ahkinsewowo ac akwuck ke tempuhl ma kaprikuhti nuh sin God, oruh kuht in mwet Lal, ac ahkkahlwemye nuh sesr ke “kuh fuhlwactlacna lal,” oruh fihsrwacsr nuh sesr in “liye muhtuhn God sie lwen, finne Pahpah, ac moul”.¹⁷

Ke srihpen Joseph el mwet pahluh se, kuht etuh lah pahyuck ac sucu uh pa ip yohk srihpac ke plwacn luhn God nuh ke engan lasr uh. Kuht etuh lah ke akwuck ac wuhlweacng luhn tempuhl uh, kuhpahsr sacohk ke sucu lasr uh kuh in kuhtanglah nuh tok ma pahtpaht.

Ke srihpen Joseph pa mwet pahluh se, oasr suhnuhn pacl fal lasr in ilyak nuh inkuhsrao—oasr lwelah lasr nuh ke mwe ahkinsewowo nuh kwewa nuh tok ma pahtpaht. Kuht kuh in etuh “God pwaye sefanna, ac in etu Jesus Christ, su kom supwama.”¹⁸ Kuht kuh in eis lasr Moul Ma Pahtpaht.

Yohk liki nuh kwewa, ke srihpen Joseph el mwet pahluh se, oasr mwet loh nuh ke mwet loh lasr, luhlahlfongi kuh nuh ke luhlahlfongi kuh, lah Jisus Kraist pa Wen nuhtin God ac Mwet Lahngo luhn facluh. Oasr sein tiacna muhsahllah soko lasr ke mwet loh sacohklacna luhn Jisus Kraist, weacng mwet pahluh lasr mihsenge, Prestuhn Thomas S. Monson; mwet in kahsruh ke Prestuhnsi Se Met; ac mempucr ke U luhn Mwet Singucul Luo uh. Nuh ke mwe ahkpwacye lalos, nga puhsisacl in sang pac luhlahlfongi kuh luhk: Jisus Kraist El moul ac kol Alu Lal. Joseph Smith pa Mwet Pahluh ke Fohlohkyak sac. Kuh ac wal luhn God sifilpac oasr fin facluh. Lwelah kuht in tiac sahngweng in fahkwack mwe ahkpwacye lasr ac tarilacna lasr nuh sin mwet pahluh, mwet liyactwen, ac mwet eis fwackyuck wolacna luhn God pa pruhe luhk ke ine muhtahl luhn Jisus Kraist, amen.