“Juon Rilolo Ejenolo̧k Inaaj Kotak E”

Ke Moronai eaar loļo̧k Josep Smith m̧oktata, eaar kakkōl bwe “etan Josep naaj watōke kōn em̧m̧an im nana ilubwiljin aolep laļ ko.”¹ Em̧ōj ad lo an kūrm̧ool kanaan jab in. Ilo pata eo ikōtaan em̧m̧an im nana, Jepļaaktok an gospel eo kōn Rikanaan Josep Smith eaar jim̧or im̧we ritōmak ro me rej ļoor e im barāinwōt illu ņae rijum̧we ro me rej ire ņae jerbal an Zaion Josep make. Pata in ejjab kāāl eaar ijjino ālkin wōt an Josep eo edik ilo̧k n̄an Bukin Wōjke eo im ej wōnm̧aanļo̧k wōt rainin kōn ļapļo̧k an internet alikkar.

Irooj make eaar kean̄ n̄an Josep Smith:

“Jem̧ļo̧k ko in laļ renaaj kajjitōk kōn etam̧, im ro rebwebwe renaaj bōk eok ilo kajjirere, im hell enaaj bwiltōn̄tōn̄ ilo illu ņae eok;

“Ijoke ro rerreo ilo bōro, im ro remālōtlōt, im ro rirajimjim, im ro rewānōk, renaaj kappukot kapilōk, im maron̄, im kōjeraam̧m̧an iien otemjej jān ium̧win peim.”²

Rainin ij lewaj naan in kam̧ool eo aō n̄an aolep ro rej pukōt n̄an kōkōm̧anm̧an ļo̧k meļeļe eo an mijen kwojarjar eo an Josep Smith Jr., Rikanaan an Jepļaaktok eo.

Jejjab aikuj jook kōn kam̧ool kōn mijen eo an Josep āinwōt rikanaan, rilolo, im ribōk revelesōn, bwe Irooj kar iien otemjej jerbal kōn rikanaan ro.³ Kōnke kōn m̧ool ko kar kōjpeļaktok kōn Josep Smith, eļap ļo̧k ad jeļā kōn Jemādwōj Ilan̄ im Rilo̧mo̧o̧r Jisōs Kraist. Jejeļā kōn piktok kwojarjar ko Aer, kadkad eo Aer n̄an doon im n̄an kōj, im karōk in lo̧mo̧o̧r eo eļap me ekōm̧m̧an bwe jān bar ro̧o̧l n̄an Im̧aan Mejāer.

Kōn Josep, Būreejtōn Brigham Young eaar kean̄: “Kar kakien ilo ko̧o̧njeļ ko an indeeo, m̧okta wōt jān an pedped ko an laļ in ejaak, bwe ej aikuj in armej eo, ilo tōre in bōk eddo eo āliktata an laļ in, n̄an bōktok naan an Anij n̄an armej im bōk tarlep in kii ko im kajoor an Priesthood eo an Nejin Anij. Irooj eaar likūt mejān ioon …[bwe e] eaar ekkapit m̧okta ilo indeeo n̄an tōl ioon tōre in bōk eddo in āliktata.”⁴

Ilo kōppopo n̄an jerbal in eļap, Josep Smith eaar ļotak ilo juon baam̧ļe em̧m̧an me raar ioon elōn̄ iaan eddo ko im mālijjon̄ ko an aolep raan an mour. Ke Josep eaar jino tak keke mo̧o̧j, en̄jake ko an ņae Anij “rekar m̧wilaļ im ekkan̄,”⁵ ,” aaet eaar pok kōn idapitōk in ļōmņak ko an kabun̄ kar katakin jān rūkaki ro ilo tōre eo an. Jeram̧m̧an, Josep eo edik eaar jab kōtļo̧k bwe kajjitōk ko an ren bōbrae. Eaar pukōt uwaak ko ilo Baibōļ im kar lo kapilōk in: “A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wujlep n̄an amrej otemjej, im jab eņo̧uk kake, im Enaaj leļo̧k n̄an e.”⁶

Josep ekar ba: “Ejjan̄in kar wōr jabdewōt eoon jān jeje ko rekwōjarjar enan̄in kar itok kōn eļap kajoor n̄an būruōn armej jān eoon in ilo iien in n̄an būruō. Āinwōt n̄e eaar deļōn̄ kōn eļap an̄in ilo aolep en̄jake an buruō. Iaar kōļmānļo̧kjeņ kake im bar kōļmānļo̧kjeņ kake.”⁷

Kōn tōmak in eļam waan, Josep eaar jerbalki en̄jake kein ilo jetōb. Eaar lo juon jikin emeļak, bukwelōlō, im “kar jino ajeļo̧k ikdeelel ko an [buruōn] n̄an Anij.”⁸ Ewōr kajoor eļap ilo kōmeļeļe eo an Josep kōn ta eo eaar waļo̧k:

Iaar lo juon jurōn meram lukkuun ioon wōt bōra, ilōn̄inļo̧k meram eo an al, eo ar wanlaļtak jidik ilo̧k jidik m̧ae an kar wōtlo̧k ioō.

“… Ke meram eo ar pād ioō iaar lo ruo Armej, ro meram im aiboojoj eo aer eaar eļļāļo̧k jān aolep wāween kōmmeļeļe, rej utak ilōn̄ū ilo mejatato. Juon iaer eaar ekkōnono n̄an eō, im kūr eō kōn eta im ba, im jitōn̄e ļo̧k eo juon—En̄in ej Nejū Jitōnbōro. Kwōn ron̄jake E!”⁹

Josep Smith eaar lo Anij, Jemān Indeeo, im Jisōs Kraist, Rilo̧mo̧o̧r im Ripinmuur eo an laļ. En̄in eaar Visōn eo M̧oktata an Josep Smith. Ilo iiō ko tok ālik, Josep eaar ukōt Bok in Mormon kōn menin letok im kajoor an Anij. Ebar lōn̄ loļo̧k ko jān rikwōj meļan in lan̄ ro n̄an e, kōjepļaktok m̧ool ko im mālim eo me raar jako ium̧win buki epepen. Loļo̧k kwojarjar kein n̄an Josep Smith rekar kōpeļļo̧k wintōn ko an lan̄ im aiboojoj ko an indeeo bwe jān loi. Mour eo an Josep ej jutak āinwōt naan in kam̧ool bwe eļan̄n̄e jabdewōt iaad aikuj mālōtlōt, jemaron̄ kajjitōk ippān Anij ilo tōmak im bōk uwaak ko—jet iien jān rikwōj meļan in lan̄ ro bōtaab ekkā wōt kōn kajoor an Jetōb Kwojarjar, eo ej kōnono n̄an kōj kōn ļōmņak ko im en̄jake ko reim̧we.¹⁰ Ej kōn Jetōb Kwojarjar me jemaron̄ “jeļā m̧ool eo an men ko otemjeļo̧k.”¹¹

N̄an elōn̄ iaad, juon kam̧ool kōn Rikanaan Josep Smith ej ijjino ilo ad riiti Bok in Mormon. Kein kajuon in aō riiti Bok in Mormon jān tum̧aan n̄an tulik āinwōt juon rijikuuļ in jemenere in jibbon̄-tata. Kōn ļōmņak in ļaddik eo aō, iaar ļōmņak in riit āinwōt eļan̄n̄e iaar Josep Smith, loi m̧ool ko ilo Bok in Mormon ilo jino in tata. Eaar juon m̧ōņōkjān ilo mour eo aō jon̄an ij wōnm̧aanļo̧k wōt im riiti Bok in Mormon eo ilo jekjek in. Emakijkij aō lo bwe kōn kōm̧m̧an āindein ekam̧wilaļ ļo̧k kam̧m̧oolol eo aō kōn Rikanaan Josep Smith im kōn m̧ool ko kōjepļaktok ilo bok aorōkrōk in.

N̄an waanjon̄ak, ļōmņak kōn en̄jake ko an Josep ke eaar ukōt eoon ko kōn peptaij n̄an joļo̧k jerawiwi ko. Josep, eo kar jiron̄ e n̄an jab koba ļo̧k ilo jabdewōt kabūn̄ ko repād, ealikkar ekar wōr kajjitōk ko kōn kain̄i in lo̧mo̧o̧r in. Kajjitōk ko an kar tōl e, bar juon alen, n̄an jar, im bwe jar eo kar tōl ļo̧k n̄an juon loļo̧k an Jon Peptaij, eo eaar kōjepļaktok Aaronic Priesthood eo im mālim eo n̄an peptaij.¹²

Ak ļōmņak kōn ekōjkan an Josep maron̄ kar en̄jake ke eaar katak kein kajuon bwe Jisōs Kraist kar loļo̧k armej ro ilo Turilik in Laļ in—bwe Eaar katakin er, jar kōn er, kemour rinan̄inmej ro aer, kōjeram̧m̧an ajri ro, leļo̧k mālim an priesthood, im kōm̧m̧an kwojkwoj eo n̄an er¹³ Josep emaron̄ in kar jab kile ilo tōre eo, bōtaab ta eo eaar katak kōn kain̄i ko im ejaak an Kabun̄ eo an Kraist etto kar kōpooj e n̄an jipan̄ Irooj tok ālik ilo kōjepļaktok ejja Kabun̄ eo wōt n̄an laļ in.

Ilo tōre in ukok eo an Bok in Mormon, Josep im lio pāleen Emma kar būrom̧ōj kōn mej an nin̄nin̄ ļaddik eo nejierro. Ilo ran ko rūkaki ro ekka aer katakin bwe ajri ro me raar mej ilo aer jab peptaij naaj kaje indeeo. Kōn menin ilo ļōmņak, ļōmņak ekōjkan an Josep kar en̄jake ke eaar ukōt naan kein jān rikanaan Mormon: “Ajri ro nejier reddik reaikuj jab ukeļo̧k, im barāinwōt peptaij. … [Bwe] ajri ro reddik remour ilo Kraist, em̧ool jān pedped an laļ”¹⁴

Bōlen eoon eo ekanooj kōļo̧kjeņan ilo Bok in Mormon n̄an Josep eo edik emaron̄ kar jebta jilu in 2 Nipai. Jepta in epād ie juon kanaan in etto kōn juon “rilolo ejenolo̧k” eo Irooj enaaj kotak e ilo raan ko āliktata—juon rilolo etan Josep, kar etōņake etan jemen. Rikanaan in an ilju jekļaj naaj “jenolo̧k tata” im naaj kōm̧m̧ane juon jerbal “aorōk” n̄an armej ro an. Enaaj “ļap āinwōt Moses” im naaj leļo̧k “kajoor n̄an bōk m̧aan tak naan an [Anij].”¹⁵ Ļōmņak ekōjkan an Josep Smith kar en̄jake ke eaar kile bwe kanaan in eaar kōn e! Eaar jab wōt ukōt bwebwenato; eaar ukōt juon visiōn an raan ko āliktata, kōn Jepļaktok kabwilōn̄lō eo an gospel eo an Jisōs Kraist—im Josep make enaaj kar jipan̄ kakūrm̧ool e!

Rainin, enan̄in 200 iiō ko tok ālik, epidodo n̄an lo ekōjkan an kanaan in kar kūrm̧ool. Jejeļā kōn men ko reļļap Josep eaar tōpari āinwōt rikanaan eo an Irooj. Bōtaab kememej bwe ke Josep eaar ukōt kanaan in, em̧ōj de an kōm̧m̧ane jet men ko rikanaan ro kar kanaan kaki. Eaar likao wōt 20 jim̧a iiō dettan. Kabun̄ in ejjan̄in de kar ejaak. Kabun̄ in ejjan̄in de kar ejaak. Eaar ejjeļo̧k ward ak branche ko, ejjeļo̧k mijenede ro, im ejjeļo̧k tampeļ ko. Ejjab aolep raar ron̄ kōn Josep Smith, im jet iaan ro me raar ron̄ kar, kanooj jum̧ae e. Kiiō lale jerbal eo eļap Irooj eaar kōtōprake kōn Eo rikarejeran Josep, mekarda jum̧ae n̄ae e. Ejjab ke kūrm̧ool eo an kanaan in kein kam̧ol ekajoor kōn kūr in rikanaan eo an Josep Smith?

N̄an jabdewōt eo emaron̄ kajjitikin naan in kam̧ool eo aer kōn Josep Smith ak rej tarpok kōn bōd, riab, ak meļeļe ebōd kōn mour eo an im jerbal in kwaļo̧k eo an, ij kūr kom̧ n̄an ļōmņak kōn leen ko—kōjeram̧m̧an ko rellōn̄ me raar itok n̄an kōj kōn mijen kabwilōn̄lōn̄ eo an Josep Smith, Rikanaan eo an Jepļaktok eo.

Kōnke Josep eaar juon rikanaan, revelesōn ko im rikanaan ro ejako aer juon men jān etto. “Raan an menin bwilōn̄ ko”—an visiōn ko, kemour ko, im jerbal in kwaļo̧k an enjeļ ro—ejjan̄in de bōjrak.¹⁶

Kōnke Josep eaar juon rikanaan, kajjojo iaad kar bōk kajoor im kōjeram̧m̧an ko an priesthood kwojarjar eo, ekoba peptaij, menin letok eo an Jetōb Kwojarjar, im kwojkwoj eo.

Kōnke Josep eaar juon rikanaan, ewōr ad kōjeram̧m̧an ko im kain̄i ko an tampeļ me rej lukōj kōj n̄an Anij, kōm̧m̧an bwe jān armij ro An, im kwaļo̧k n̄an kōj “kajoor in āinwōt anij,” kōm̧m̧an bwe en pidodo juon raan n̄an “lo turin mejān Anij, em̧ool Jemān, im mour.”¹⁷

Kōnke Josep eaar juon rikanaan, jejeļā bwe m̧are im baam̧le rej juon m̧ōttan aorōk an karōk an Anij n̄an m̧ōņōņō eo ad. Jejeļā bwe kōn kain̄i ko an tampeļ im bujen ko, ad kaorōk kadkad ko an baam̧le remaron̄ niknik indeeo.

Kōnke Josep eaar juon rikanaan, ejjeļo̧k jon̄an—ewōr ad maron̄ n̄an būk aolep kōjeram̧m̧an ko an indeeo. Jemaron̄ jeļā “juon wōt Anij e m̧ool, im Jisōs Kraist, eo [Eaar] jilkintok.”¹⁸ Mour indeeo emaron̄ ad.

Eo eļap tata, kōnke Josep eaar juon rikanaan, ewōr ad rikam̧ool ioon rikam̧ool, naan in kam̧ool ioon naan in kam̧ool, bwe Jisōs Kraist ej Nejin Anij im Rilo̧mo̧o̧r an laļ. Ewōr ad kōro̧ro in rikam̧ool ro rōjeno̧lo̧k kōn Jisōs Kraist, ekoba rikanaan eo ad rainin, Būreejtōn Thomas S. Monson; rikakpilōklōk ro ilo Būreejtōnji eo Kein Kajuon; im ro uwaan Doulul eo an Jon̄oulruo Rijilōk ro. Ippān kam̧ool ko aer, ij kobaik naan in kam̧ool eo aō ettā, aaet em̧ool: Jisōs Kraist emour im ej tōl Kabun̄ eo An. Josep Smith eaar im ej Rikanaan eo an Jepļaktok eo. Priesthood eo im mālim an Anij rej bar juon alep pād ioon laļ in. Jej aikuj jab mijak ilo kwaļo̧k ad kam̧ool im ad kam̧m̧oolol kōn rikanaan in, rilolo, im ribōk revelesōn in em̧m̧an an Irooj ej jar eo aō ilo āt kwojarjar eo etan Jisōs Kraist, amen.