“Emen Ohl Sarawi Pilipil I Pahn Kesepwilada”

Ni ansou me Moroni tepin pwarohng Joseph Smith, e kepehmki me eden Josepho “uhdahn pahn sansal ong dahme mwahu oh suwed nan pwungen wehi laud kan.”¹ Kitail kilangehr pweidahn kokohpo. Nan mahwin nan pwungen mwahu oh suwed, Kopwurupwurdohn rongamwahu sang rehn Soukohp Joseph Smith kaperendahr irail me kin idawehn ih oh pil kelingeringeriada irail me uwong kan me kin men peiki lingeringer me mih rehrail oh sapwungki doadoahk en Zion oh uwong Joseph Smith. Uhpene wet sohte kapw. E tepda mwurinte mwahnakapw Joseph eh kohla wasa Nanwel Sarawio oh pepeusdohr lel rahn wet ni eh wehwehpesengehr nan internet.

Pein Kauno ketin mahsanihengehr Joseph Smith:

“Imwilahn sampah pahn kepehse sang ni mwarei, oh aramas likamw akan pahn kolkumwaildi ni lemei, oh kahpwal pahn kaweikumwailla;

“Ni mwohngiong mwakelekel, oh me marain kan, oh me lapalap akan, oh sohte diparail kan, pahn rapahki kaweid, oh mweimwei, oh kapai kan pahn poatoapoat sang ni wahn ahmw doadoahk.”²

Rahn wet I kihwei ahi kadehde ong koaros me kin rapahki ren wehwehkihla mwahu kapwukoah sarawi me kohiengehr Joseph Smith Jr., Soukohp en Kapwuropwurdohu.

Kitail sohte anahne periki duwen kadehdehki ahn Joseph kapwukoah en wia soukohp, ohl sarawi, oh soun koudial pwehki Kauno kin kalap ketin doadoahngki soukohp akan.³ Pwehki mehlel akan me kopwurupwurodohr sang rehn Joseph Smith, kitail inenen wehwehkiher duwen Samatail Nanleng oh Sounkomour Sises Krais. Kitail wehwehki Sapwellimara koasoandi sarawi kan, Sapwellimara kadokodok en nan pwungen ira oh kitail, oh koasoandi kaselel en komourla me kin mweidohng kitail en pwuralahng Pahn Kupwur.

Ong me pid Joseph, President Brigham Young kalohki me e koasoandier nan pwihn kan en mour wet, ansou reirei mwohn poahsoan kan en sampah eh koasoansoandi, me iei ih aramas me uhdahn pahn, nan kemwseklahng irair en ansou wet sampah, kalelehdo mahsen en Koht rehn aramas oh alehdi unsek en kih kan oh manaman en Priesthood en Sapwellimen Koht Iehroso. Kauno ketkihengehr sihlangio powe … [pwe e] kamanamanlahr nan ansou sohimwi wet en tapwih keimwseklahn irair en ansou wet.”⁴

Ni duwen kaunop ong doadoahk kesempwal wet, Joseph Smith ahpw ipwidier rehn peneinei limpoak ehu me lelohng kotoutou oh kasongosong ngeder rahn koaros oh songen kahpwal en mour teikan. Ni Joseph eh mwur laudehr, ah pepehm kan ong Koht me inenen loal oh kalap kamwasik,”⁵ahpw e ahnikihda peikasal sang ni sapairair en madamadau kan me pid mwomwohdiso me sounpadahk kan en ah ansouo kin padahngki. Paiamwahu, Joseph me pwulopwulo sohte mweidehng ah sawehwe kan en kaluwetehla ah pwoson. E rapahkiher pasapeng kan nan Pwuhk Sarawi oh diar kaweid wet me ketihtihki: Ma mie rehmwail sohte erepit reh, en peki rehn Koht, me kin ketin kesempwaliki ahn aramas koaros madamadau, oh sohte kinoh sohte kin uhwongada, e ahpw pahn kasansal ieng ih.”⁶

Joseph eri katamando: “Saik pak ehu ekei ire nan pwuhk sarawi kasalehieng mohngiong en aramas manaman laud sang dahme met wiahiengehr mohngiongiet ansou wet. E mwomwen kohdohngie oh me kehlail ong ahi pepehm koaros en mohngiongiet. I kin kalap tamanda.”⁷

Ni pwoson karakarahk, Joseph ahpw tepda doadoahngki pepehm en palingehn pwukat. E diarada wasa kis me totohrohr, keipwekidi, oh tepda kasapwildahla rehn Koht anahn akan me mie nan ah mohngiongo.”⁸ Mie manaman laud nan ahn Joseph kawehwe me pid dahme wiawio:

“I kilangada kehndake marain ieu me uhdihdo pohn moangeiet, pohnangin marain en ketipino, me kohdihdo lao e leledihdo pohi.

“…  Ni ansou me maraino miher pohio I kilangada Aramas ekei, me marainirail oh linganarail sikisang kawehwe koaros, kesikesihnen pohi nan wehwe. Emen irail eri mahsendohngie, ekerekinie edeio oh mahsanih, idihdlahng mehteio—Nei Pwutak Kesemwpwal met. Rong Ih!”⁹

Joseph Smith kilangehr Koht, Sahm Nanleng, oh Sises Krais, Sounkomour oh Soundor en sampa. Met iei ahn Joseph Smith KeieunKairoir.Nan pahr kei mwuri, Joseph kawehwehdi Pwuhk en Mormon sang ni kisakis oh manaman en Koht. Pil ekei tohn nanleng pil pwarala reh, kapwurehdo mehlel kan oh mweimwei me pwupwilahr sounpar epwiki kei. Kapehse sarawi pwukat me wiawiheng Joseph Smith kiheng kitail atail kak alehdi kapai kan sang nanleng oh lingan akan me poatoapoat. Ahn Joseph mour wia kadehde me ma mie rehtail sohte erepit reh, kitail kak peki rehn Koht ni pwoson oh alehdi pasapeng—ekei ansou sang aramas en nanleng ahpw kin kalap sang ni manaman en Ngehn Sarawi, me kin mahseniong kitail sang ni madamadau lingan oh pepehm kan.¹⁰ E sang ni Ngehn Sarawio me kitail kak esehki mehlel en soahng koaros. .”¹¹

Me tohto rehtail, me wia ehu kadehde en Soukohp Joseph Smith kin tepda sang ni atail kin wadek Pwuhk en Mormon. I tepin wadek Pwuhk en Mormon sang ni tapi lel ni imwi ni ei wia emen tohn sukuhl pwulopwul me kin sangke seminary. Pwehki ahi madamadau me ngoang, I medewehda I en wadek ni duwen me ngehi Joseph Smith, me kin tepin dihdiar mehlel kan me sansal nan Pwuhk en Mormon. Mie lipwe laud nan ahi mour kahrehda I kin wie wadewadek Pwuhk en Mormon ni songen wiepeo. I kalap diar me ni songen mwohmw mwo e kin kalaudehla ahi wehwehki Soukohp Joseph oh mehlel kan me kapwurupwurodohr nan pwuhk kesempwal wet.

Karasepe, medewehla ahn Joseph pepehm kan ansou me e kawehwehdi ire ko me pid papdaiski lapwepen dihp akan. Joseph, me rongehr en deh iangala mwomwohdiso ko me kakaudahr ansou pwuko, mehlel ahneki peidek kei me pid tiahk sarawi en komourla wet. Ah peidek ko elehda en, pwurehng, kapakap, oh kapakapo imwikihla John Soun Papdais ah pwarek, ni eh kapwurehdo Aaronic Priesthood oh mweimwei en papdais.¹²

Kowe eri medewehla pepehm me Joseph ahneki ni eh tepin wehwehkihda me Sises Krais ketila rehn aramas oko nan Western Hemisphere—Ih eri ketin padahkihongehr irail, kapakapki irail, kamwahuiala arail soumwahu, kapaiada neirail seri kan, ketikihda mweimwei en priesthood, oh ketikiheng irail kamadipw sarawi. ¹³ Joseph kakete sohte medewehda ansouo, ahpw dahme e wehwehkihda me pid tiahk sarawi kan oh kokoudahn Sapwellimen Krais Mwomwohdiso en kawao, kaunop ong ih en sewese Kauno mwuhr ni kapwurupwurodohn soangen Mwomwohdisohute ong sampah.

Ni ansou me kawehwehpen Pwuhk en Mormon wihwiawi, Joseph oh ah pwoud Emma ahpw pahtoukihla mehlahn neira kisin pwutak pwelelo. Nan rahn pwuko sounpadahk kan kin kalap padahngki me seri kan me mehla ni arail sohte papdais pahn dipekihda erein. Douloale met, medewehla duwen ahn Joseph pepehn ni eh kawehwehdier koasoai pwukat sang rehn soukohp Mormon me: “Kisin seri kan sohte anahne koluhla, de pil papdais.  … [Pwehki] kisin seri kan wie momour rehn Krais, sangete ni wiawidahn sampah”¹⁴

Ele ire me keieu kesempwal nan Pwuhk en Mormon ong Joseph ni ah tikitiko kakete kesiluh en irelaud en 2 Nephi. Pali wet audaudki ehu kokohp en kawao me pid emen ohl sarawi pilipil me Kauno pahn ketin kasalehda nan keimwseklahn rahn akan--emen ohl sarawi me ede Joseph, adanikihla mwurin semeo. Soukohp en ehu rahn menet aramas pahn kin wiahki ih aramas lapalap men, oh e pahn wia ehu doadoahk me katapahn mehlel ong nah aramas akan. E pahn kesempwal duwehte Moses oh pahn alehdi manaman en kapwurehda [Sapwellimen Koht] mahseno. ”¹⁵ Medewe duwen ahn Joseph Smith pepehm ni eh medewehla me kokohp wet kosokosia ih! E sohte kawekawehwehte poadoapoad; e wie kawekawehwe ehu kairoir me pid keimwseklahn rahn akan, duwen Kapwurupwurodo kapwuriamwei en rongamwahu en Sises Kraiso—oh pein Joseph me pahn sewese pwe en pweida!

Rahnwet, kerenieng sounpar 200 mwuri, e mengein kilang duwen kokohp wet ah pweidahr. Kitail wehwehki duwen dahme Joseph wiadahr nan ah pwukoahn Sapwellimen Kauno soukohp. Ahpw tamataman me ni ansou me e kawehedier kokohp wet, e wiadahr ekeite soahng ko me soukohp oko kohpadahr. E wihwiahte mwahnakapw men ni ansou me e 20. Mwomwohdiso wet saikinte kokouda. Saikinte ward de  branch kan, sohte misineri, oh sohte tehnpas sarawi. Saikinte mehmen pil kin rong Joseph Smith, oh ekei irail ko me rongehr duwen Joseph Smith inenen uhong . Ansouet kilang doadoahk kesempwal me Kauno ketin wiadahr sang ni pehn Sapwellime ladu Joseph, tehn mie me uhwong . Kaidehn pweidahn kokohp wet wia kadehde kehlail me pid kokohp en kapwukoah me kohiengehr Joseph Smith?

Ong mehmen me kakete sohte kopworopworki arail kadehdehki Joseph Smith de me doadoahk laudki sapwung, sohte mehlel, de ire sapwung me pid ah mour oh ah padahk, I lukeikumwail en kamehlele dahme pahn pwarada mwuhr—kapai tohto kan me kodohng kitailehr sang ni kapwukoah kesempwal en Joseph Smith, Soukohp en Kapwurupwurodohu.

Pwehki Joseph wia soukohp men, koudiahl kan oh soukohp kan solahr wia soahng kan me mie mahso. “Rahn en manaman akan”—duwen kairoir kan, kamwahulahn soumwahu kan, oh padahk en tohnleng kan—saikinte sohrala.¹⁶

Pwehki Joseph eh wia emen soukohp, emen emen kitail ahneki pwuhng ong manaman oh kapai kan en prihsduhd sarawio, iangahki papdais, kisakis en Ngehn Sarawi, oh kamadipw sarawio.

Pwehki Joseph eh wia emen soukohp, kitail ahneki kapai kan oh tiahk sarawi kan en tehnpas sarawi me katengeikitaillahng rehn Koht, wiahkinkitailla Sapwellime aramas, oh ketikidohng kitail “manaman en duwehla koht,” kamangaiala ehu rahn pwe kitail en “kilang sihlangin Koht, duwehte Sahmo, oh mourla.¹⁷

Pwehki Joseph eh wia emen soukohp, kitail ese me pwopwoud oh peneinei wia ehu kisehn kesempwal en Sapwellimen Koht koasoandi ong atail popohl. Kitail wehwehki me sang ni tiahk sarawi kan en tehnpas sarawi oh inou kan, atail ehupenehn peneinei kak tengeteng kohkohlahte.

Pwehki Joseph eh wia emen soukohp, kitail ahneki kisin wenihmwtok ong nanleng--kitail ahneki pwuhng en kapai koaros en mour soutuk. Kitail kak esehla me “ihte Koht me mehlel, oh Sises Krais, me [E] ketikidohr.”¹⁸ Mour soutuk kak wia atail.

Me keieu kesempwal, pwehki Joseph wia soukohp men, kitail wehwehkiher kidelepen kadehde me pid Sises Krais, iangahki atail soukohp en rahnwet, President Thomas S. Monson, sounsawas akan nan Keieun Presidensy, oh irail me towe Pwihn en Wahnparon Ehk-riemeno. Ong arail kadehde kan, I kapatahieng ahi kadehde mehlel ni karakarahk ansou wet: Sises Krais ketin ieias oh kakahluwa Sapwellime Mwomwohdiso. Joseph Smith mahso oh ansou wet wia Soukohp en Kapwuropwurdohn Mwomwohdiso wet. Priesthood oh mweimwei en Koht pwurehngehr mie pohn sampah. Kitail udahn pahn ni sohte per kalohki atail kadehde oh atail kaping ong soukohp mwahu menet, ohl sarawi pilipil, oh soun koudiahl en Kauno iei ahi kapakap ni lengileng sarawi en Sises Krais, amen.