“O Le A Ou Faatu Mai Se Tagatavaai Filifilia”

Ina ua oo muamua atu Moronae ia Iosefa Samita, sa ia lapatai atu e faapea, o le “igoa [o Iosefa] o le a lauiloa mo mea lelei ma mea leaga i atunuu uma.”¹ Ua tatou vaai i le faataunuuina o lena valoaga. I le taua i le va o le lelei ma le leaga, ma le Toefuataiga o le talalelei e ala i le Perofeta o Iosefa Samita ua musuia uma ai le au talitonu o ē mulimuli ia te ia faapea ai foi ma le faaitaina o fili o ē tau ma le ita tele e faasaga i le galuega a Siona ma faasaga ia Iosefa lava ia. E le fou le taua lea. Sa amata tonu ina ua mavae le savali atu o le taulealea o Iosefa i totonu o le Vao Paia ma o loo faaauau ai pea i aso nei faatasi ai ma se vaaiga faaopoopo i luga o le Initoneti.

Sa folafola atu patino e le Alii ia Iosefa Samita:

“O le a fesilisili tuluiga o le lalolagi i lou igoa, ma o le a fai oe ma tauemuga a tagata valelea, ma o le a ʼatigu seoli e faasaga ia te oe;

“Aʼo e loto mamā ma e atamamai, ma e agamalu, ma e amiomama, o le a saili fautuaga, ma le pule, ma faamanuiaga mai lou lima e lē aunoa.”²

O le asō, ou te tuu atu ai la’u molimau i tagata uma ia saili ia malamalama atili i le misiona paia a Iosefa Samita le Itiiti, le Perofeta o le Toefuataiga.

E le manaomia ona tatou popolevale e molimau atu i le misiona a Iosefa o se perofeta, tagatavaai, ma talifaaaliga, aua e galue pea le Alii e ala mai i perofeta.³ Ona o upumoni na toefuatai mai e ala ia Iosefa Samita, ua tele atu ai lo tatou iloa e uiga i lo tatou Tama Faalelagi ma le Faaola o Iesu Keriso. Ua tatou iloa o La uiga paia, lo La sootaga i le tasi ma le isi faapea ma i tatou, ma le fuafuaga sili o le togiola lea ua mafai ai ona tatou toe foi atu i lo Laua afioaga.

Sa tautino mai Peresitene Polika Iaga e uiga ia Iosefa: “Sa filifilia i le aufono o le faavavau, ae le i taitai faataatitia faavae o le lalolagi, e tatau ona avea o ia ma tagata, i le tisipenisione mulimuli o lenei lalolagi, na te aumaia le afioga a le Atua i tagata ma maua le atoaga o ki ma le mana o le Perisitua o le Alo o le Atua. Sa silasila mai fofoga o le Alii ia te ia … [aua o ia] sa muai faauuina i le faavavau e pulefaamalumalu i lenei tisipenisione mulimuli.”⁴

I sauniuniga mo lenei galuega tele, sa soifua mai ai Iosefa Samita i se aiga agaalofa na oo i le tele o avega ma tofotofoga o le olaga i aso uma. A o faasolo matua Iosefa, o ona lagona i le Atua “sa loloto ... ma malosi i le tele o taimi,”⁵ ae sa ia le mautonu i manatu feteenai faalelotu sa aoao e faifeau o ona aso. O le mea e lelei ai, sa lei faatagaina e le taulealea o Iosefa ana fesili e faamateina lona faatuatua. Sa ia saili i ni tali i le Tusi Paia ma sa maua ai le fautuaga lenei: “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua, ona foaiina mai ai lea ia te ia.”⁶

Sa faamatalaina e Iosefa: “E leai lava se mau o tusitusiga paia na oo i le tagata ma le mana tele nai lo o lenei mau i lo’u loto i lea taimi. Sa foliga ua ulu mai ma se mana tele i lagona uma o loʼu loto. Sa ou mafaufau ma saga mafaufau pea i ai.”⁷

Faatasi ma se faatuatua faatauvaa, sa faatino ai e Iosefa nei lagona faaleagaga. Sa ia maua se nofoaga tuufua, sa tootuli i lalo, ma “amata ona tuu atu o manaoga o [lona] loto i le Atua”⁸ O loo i ai se mana tele i le faamatalaga a Iosefa i le mea na tupu.

“Na ou vaaia ai se malamalama faaniutu i luga ae tonu lava o lou ulu, ua sili atu le pupula i le la, ua alu ifo malie lava seia oo mai i ou luga.

“… Ina ua oo mai le malamalama i oʼu luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu mai i oʼu luga aʼe i le ea. Sa fetalai mai le tasi o i laua ia te aʼu, ma fofoga mai ia te aʼu i loʼu igoa ma fetalai mai, aʼo tusi ane i le tasi—O Loʼu Atalii Pele lenei. Faalogo ia te Ia!”⁹

Sa vaai Iosefa Samita i le Atua, le Tama Faavavau, ma Iesu Keriso, le Faaola ma le Togiola o le lalolagi. O le Uluai Faaaliga lenei a Iosefa. I tausaga na mulimuli ane ai, na faaliliu ai e Iosefa Samita le Tusi a Mamona e ala i le meaalofa ma le mana o le Atua. E toatele isi tagata faalelagi na asiasi mai ia te ia, ma toefuatai mai upumoni ma le pule ia na leiloloa mo le tele o seneturi. O nei fesootaiga faalelagi ia Iosefa Samita na matala ai pupuni o le lagi faapea ai ma mamalu o le faavavau i la tatou vaai. O le soifuaga o Iosefa ua tu o se molimau lea afai e leai se poto i so tatou, e mafai ona tatou ole atu i le Atua i le faatuatua ma maua ai ni tali—o nisi taimi e mai tagata faalelagi ae o le tele o taimi e ala mai i le mana o le Agaga Paia, lea e fetalai mai ia i tatou e ala i mafaufauga ma lagona musia.¹⁰ E ala mai i le Agaga Paia e mafai ona tatou “iloa ai le moni o mea uma lava.”¹¹

Mo le toatele o i tatou, o se molimau a le Perofeta o Iosefa Samita e amata a o tatou faitauina le Tusi a Mamona. Sa ou faitauina muamua le Tusi a Mamona mai le faavaa i le faavaa a o avea au ma se tamaitiiti talavou o le seminare i le vaveao. I o’u mafaufauga tiotio faatamaitiiti, sa ou filifili ai e faitau e peiseai o au o Iosefa Samita, na mauaina upumoni i le Tusi a Mamona mo le taimi muamua lava. Sa oo ai se aafiaga i lo’u olaga lea o loo ou faitaua ai lava le Tusi a Mamona i lena ala. E tele ina ou iloaina o le faia o lena mea e faalolotoina ai lo’u talisapaiaina o le Perofeta o Iosefa faapea ai ma upumoni toefuataiina i lenei tusi taua.

Mo se faataitaiga, mafaufau i lagona o Iosefa a o ia faaliliuina fuaitau e uiga i le papatisoga mo le faamagaloga o agasala. O Iosefa, o le na faatonuina ia aua ne’i auai i soo se lotu i lena taimi, na i ai lava ni fesili e uiga i lenei sauniga faaola. O ana fesili na taitai atu ai o ia, e toe tatalo foi, ma o lena tatalo na taitai atu ai i se asiasiga mai ia Ioane le Papatiso, lea na fuata’i maia le Perisitua Arona ma le pule e papatiso atu ai.¹²

Pe mafaufau foi po o a ni lagona o Iosefa ina ua ia iloa mo le taimi muamua na asiasi atu Iesu Keriso i tagata o le Itulagi i Sisifo—ma sa Ia aoao atu ia i latou, tatalo mo i latou, faamalolo o latou ma’i, faamanuia a latou fanau, faaee atu le pule, ma faatautaia le faamanatuga ia i latou.¹³ Atonu sa lei iloaina e Iosefa i lena taimi, ae o mea na ia aoaoina e uiga i sauniga ma le faatulagaga o le Ekalesia anamua a Keriso sa saunia ai o ia ia fesoasoani mulimuli ane ai i le Alii i le toefuataiina o lena lava Ekalesia e tasi i le lalolagi.

I le taimi o le faaliliuga o le Tusi a Mamona, sa faanoanoa ai Iosefa ma lona faletua o Ema i le maliu o lo la atalii laitiiti. I na aso sa taatele ai aoaoga a faifeau e faapea o tamaiti e maliliu e aunoa ma le papatisoina o le a faasalaina e faavavau. I le mafaufau ai i lenei mea, manatu i lagona na oo ia Iosefa a o ia faaliliuina nei upu mai le perofeta o Mamona: “E le manaomia e fanau laiti se salamo, po o le papatisoga. … [Aua] o fanau laiti ua ola ia Keriso, mai lava i le faavaega o le lalolagi.”¹⁴

Masalo o le fuaitau aupito sili ona mata’ina i le Tusi a Mamona i le taulealea o Iosefa atonu o le mataupu lona tolu o le 2 Nifae. O loo i ai i lenei mataupu se valoaga anamua e uiga i le “tagatavaai filifilia” o lē o le a faatu a’e e le Alii i aso e gata ai—o se tagavaai e igoa ia Iosefa, e igoa foi i lona tama. O lenei perofeta o le lumanai o le a “taua tele” ma o le a faia se galuega “aoga tele” i lona nuu. O le a “silisili o ia e pei o Mose” ma o le a tuu atu i ai le mana e aumai ai le afioga a le [Atua].¹⁵ Mafaufau i le lagona na oo i ai Iosefa Samita ina ua ia iloaina o lenei valoaga sa faatatau ia te ia! Sa le na o se talafaasolopito na ia faaliliuina; sa ia faaliliuina foi se faaaliga o aso e gata ai, o le Toefuataiga ofoofogia o le talalelei a Iesu Keriso—ma sa fesoasoani Iosefa Samita e faataunuuina!

O le asō, toetoe lava 200 tausaga mulimuli ane, e faigofie lava le vaaia o le auala ua iloaina ai lenei valoaga. Ua tatou iloa e uiga i mea tetele na ausia e Iosefa i le avea ai ma perofeta a le Alii. Ae ia manatua ina ua faaliliuina e Iosefa lenei valoaga, na ia faia ni mea na muai valoia e perofeta. Sa talavou lava o ia i le popofou o lona vaitau 20 tausaga. Sa lei faatulagaina le Ekalesia. Sa leai ni uarota po o ni paranesi, leai ni faifeautalai, ma leai ni malumalu. Sa seāseā i ai nisi na iloaina Iosefa Samita, ma o nisi o i latou sa matua tetee atu ia te ia. Sei tagai nei la i le galuega tele ua faatinoina e le Alii i le lima o Lana auauna o Iosefa, e ui lava i le faatautee mai o le fili ia te ia. Pe le o le faataunuuga ea o lenei valoaga ua faamautu ai le faamaoniga o le valaauga faaperofeta o Iosefa Samita?

I soo se tasi lava atonu o loo fesiligia pea a latou molimau e uiga ia Iosefa Samita pe o tauivi foi ma faamatalaga sese, fenumiai, pe le atoatoa e uiga i lona olaga ma lana auaunaga, ou te valaaulia outou ia mafaufau i fua—o faamanuiaga e tele ua oo mai ia i tatou e ala mai i le misiona ofoofogia a Iosefa Samita, le Perofeta o le Toefuataiga.

Ona o Iosefa o se perofeta, o lea, o faaaliga ma perofeta ua le o toe avea ma ni mea o aso lava la ua leva. O “aso o vavega”—o faaaliga, faamalologa, ma auaunaga a agelu—e le o taofia.¹⁶

Ona o Iosefa o se perofeta, ua tatou taufai maua uma ai le mana ma faamanuiaga o le perisitua paia, e aofia ai le papatisoga, le meaalofa o le Agaga Paia, ma le faamanatuga.

Ona o Iosefa o se perofeta, ua tatou maua ai faamanuiaga ma sauniga o le malumalu ua fusia ai tatou i le Atua, ua avea ai i tatou ma Lona nuu, ma faailoa mai ai ia i tatou “le mana o le faaleatua,” ua mafai ai e i tatou i se aso ona “vaai i fofoga o le Atua, le Tama, ma ola [ai].”¹⁷

Ona o Iosefa o se perofeta, ua tatou iloa ai o le faaipoipoga ma le aiga o se vaega taua lea o le fuafuaga a le Atua mo lo tatou fiafia. Ua tatou iloa e ala i sauniga ma feagaiga o le malumalu, e mafai ai ona tumau e faavavau a tatou mafutaga faapelepele faaleaiga.

Ona o Iosefa o se perofeta, ua sili atu ai i lo na o se faamalama i le lagi—ae o le faitotoa lava i faavavau ua matala mai ia i tatou. Ua mafai ona tatou iloa “le Atua moni e toatasi atoa ma le na Ia auina mai o Iesu Keriso lea.”¹⁸ E mafai ona avea ma tatou le ola e faavavau.

Ae e sili i mea uma, ona o Iosefa o se perofeta, ua tatou maua ai se tautinoga i luga o tautinoga, molimau i luga o molimau, o Iesu Keriso o le Alo o le Atua ma o le Faaola o le lalolagi. Ua ia i tatou se filifili le mamotusiaina o molimau faapitoa a Iesu Keriso, e aofia ai lo tatou perofeta i aso nei, Peresitene Thomas S. Monson; o fesoasoani i le Au Peresitene Sili; ma uso o le Korama a Aposetolo e Toasefululua. I a latou molimau, ou te faaopoopo atu i ai ma la’u molimau mautinoa faamaulalo: O loo soifua Iesu Keriso ma o loo taitaia Lana Ekalesia. O Iosefa Samita sa avea ma perofeta ma o le Perofeta o le Toefuataiga. O le perisitua ma le pule a le Atua ua toe i ai i luga o le fogaeleele. Ia tatou tautino atu ma le le fefe a tatou molimau ma lo tatou lotofaafetai mo lenei perofeta ofoofogia, tagatavaai ma talifaaaliga a le Alii, o la’u tatalo lea i le suafa paia o Iesu Keriso, amene.