Wan Witnes blong God
Mi wantem talem se yu stop blong filim rong from se yu filim se yu no inaf blong save serem gospel. Be yu prea blong stanap olsem wan witnes blong God. Hemia i wan paoa blong pusum yu we i moa gud bitim filing ia se yu rong.
Plante long ol impoten wok blong God, oli no kamaot long ae blong wol. Nambasikis senturi bifo Kraes i tekem i kam ol bigfala man blong tingting olsem Konfusus long Jaena mo Buda long Is India, be paoa blong prishud blong God i bin stap wetem Daniel, profet we i bin stap laef olsem prisena long rul blong king blong Babilon, Nebukadnesa.
From tingting blong hem i trabol long wan drim we hem i mekem long naet, King Nebukadnesa i askem ol majik man mo ol kleva man blong hem blong talem wanem drim mo mining blong drim blong hem. Yes, oli no save talem long king wanem hem i bin drim long hem mo oli toktok. “I no gat wan man long wol ia we i save talemaot long yu samting we yu wantem save.”1 King Nebukadnesa i kros bigwan se oli no save talem drim ia bakegen mo nao i talem se bae oli kilimded evri kaonsela blong hem.
Daniel, wan waes man blong King, i bin prea blong “ God i sore long hem … blong i soemaot samting ia.”2
Wan merikel i hapen. Sikret ia blong wanem king i bin drim long hem i kamaot long Daniel.
Oli tekem Daniel i go long fored blong King. “Yu save talemaot drim ia blong mi wetem mining blong hem?”
Daniel i ansa:
“I no gat wan kleva, man blong mekem majik, man we i save talemaot ol samting long fiuja, man we i lukluk long sta we i save talemaot samting ia long yu. …
“God ia nomo we i stap long heven, hem nao i save soemaot ol samting ia mo hem i soemaot long yu finis ol samting ia we bambae oli kamtru long fiuja.
Daniel i talem se: “God we i stap long Heven bambae i stanemap wan king we rul blong hem bambae i no save finis samtaem. Wan ston we i kamaot hemwan antap long wan bigfala hil, i rol i kamdaon, i go long ful wol we bae oli no save spolem hem be bae i stap blong oltaem.
“Drim ia” Daniel i talem, “ i talem stret samting, mo mi jes talemaot stret mining blong hem.”3
Nao we maen blong hem i tingtingbak mo hem i gat mining blong drim blong hem, king i toktok i klia: God blong yu i hae moa long ol narafala god, hem i Masta blong olgeta king.”4
From merikel ia we God i givim long Daniel, profesi blong fiuja blong gospel blong Jisas Kraes i kambak long wol ia, “wan kingdom bae i fulumap wol, we bae oli no blokem be bae i stap blong oltaem.”
Namba blong ol memba blong Jos long ol las dei bae i smol nomo, olsem Nifae i talemaot, be bae oli stap long evri ples blong wol, mo paoa mo ol odinens blong prishud bae i stap blong evriwan we oli wantem, mo bae oli fulumap wol olsem we Daniel i talem finis.5
Long 1831, Profet Josef Smit i kasem revelesen ia. “Ol ki blong kingdom blong God mo kam tugeta blong Isrel we oli kamaot long ol fo pat blong wol,” mi givim long man long wol, mo stat naoia i go, bae gospel i rol kasem ol en blong wol ia, semmak olsem ston we i kamaot hemwan long bigfala hil, mo i rol i kamdaon, kasem taem i kasem evri ples long wol.”6
Wan Responsabiliti we Yumi Evriwan I Serserem
Kam tugeta blong Isrel i wan merikel. Hem i olsem wan bigfala pasol we oli mas joenem ol pisis fastaem bifo ol bigfala samting blong Seken Kaming oli hapen. Semmak olsem hed i fasfas wetem hip long ol pasol pis, ol fas Sent oli bin luksave se wok blong tekem gospel we i kambak i go long ful wol, se i no posibol. Be oli stat, wan man, wan pasol pis afta narawan, oli faenem ol stret frem, mo wok blong mekem i kamgud. Smol smol i go, nao ston ia we i kamaot hemwan long hil i stat blong rol i godaon; stat long ol handred i go kasem taosen, i go kasem ol ten blong ol taosen, mo naoia ol milian kavenan Lata-dei Sent raon long evri nesen oli stap joenem ol pis blong pasol blong wok ia we i bigfala mo i wan sapraes.
Wanwan long yumi i wan pis blong pasol ia, mo wanwan long yumi i stap help blong putum ol nara impoten pis long stret ples blong olgeta. Oli nidim yu long bigfala impoten wok ia. Yumi save lukluk klia i go long fored. Yumi save luk merikel i stap gohed, mo han blong Lod i stap lidim yumi taem yumi stap fulumap ol hol we oli stap. Nao, “Hae Jehova bambae i talem se wok i finis,”7 mo bae Hem i kambak wetem paoa mo glori blong Hem.
Presiden Thomas S. Monson i bin talem: “Naoia, i taem blong ol memba mo ol misinari oli kam tugeta, wok tugeta, … blong tekem ol sol oli kam long Hem. … Bambae Hem i givhan long ol wok blong yumi sapos yumi tekem aksen wetem fet blong mekem wok blong Hem i kamtru.”8
Tabu responsabiliti we Hem i bin putum long wan taem long solda blong ol fultaem misinari, naoia i stap antap long yumi evriwan. Yumi evriwan i wantem serem gospel we i kambak, mo wetem glad, ol taosen man oli stap baptaes evri wik. Be, iven wetem bigfala blesing ia, wari from ol brata mo sista blong yumi, mo tingting blong hat blong yumi blong mekem gud long God i mekem se i ejen tumas blong serem gospel mo mekem kingdom blong God raon long wol i kam strong moa.
Ol Limit blong Fasin blong Filim Sem
Iven wetem wan strong filing blong serem gospel, maet yu no hapi wetem ol hadwok blong yu we yu bin mekem finis. Maet yu filim olsem wan fren we i talem: “Mi storian finis long famli blong mi mo ol fren abaot Jos, be smol nomo oli intres, mo from oli stap sakemaot mi, mi nomo filim blong mekem. Mi save se mi mas mekem moa, be mi fas i stap, mo mi stap filim bigfala sem ia nomo i stap.”
Bae mi traem luk sapos mi save help.
Blong filim sem i wan impoten rol, from se hem i wekemap yumi blong mekem ol jenis we yumi nid blong mekem, be i gat ol limit long hamas nao sem i save helpem yumi.
Blong filim sem i olsem wan batri insaed long trak we i wok long bensin. I save givim laet long trak, statem enjin, mo givim paoa long hedlaet, be bae i no save givim bensin blong ron long longfala rod. Batri ia, hemwan, i no inaf. I semmak long sem.
Mi wantem givim tingting se yu stop blong filim sem long saed blong eni samting we yu ting se yu no gat blong serem gospel. Be, prea, olsem Alma i tijim, blong yu gat ol janis “blong stanap olsem ol witnes blong God evri taem mo long evri samting, mo long evri ples … mekem se God i save pemaot [ol narawan], mo bae oli kaontem [olgeta] wetem olgeta ia blong fasfala laef bakegen long ded, blong yufala i save kasem laef we i no save finis.”9 Hemia i wan moa strong paoa bitim hemia blong stap sem.
Blong stap olsem wan witnes blong God long evri taem mo long evri ples, i soem olsem wanem yumi stap laef mo olsem wanem yumi stap toktok.
Yu mas open blong save tokbaot fet blong yu long Kraes. Taem janis i kamaot long yu, tokbaot laef blong Hem, ol tijing blong Hem, mo presen blong Hem we i bigwan tumas long ol man. Serem ol paoa trutok blong Hem we oli stap long Buk blong Momon. Hem i givim promes ia long yumi: “man we i talemaot nem blong mi long fes blong ol man, bambae mi tu, mi talemaot … hem long fes blong Papa blong mi long heven.”10 Mi promesem yu se taem yu stap prea plante mo wetem tru tingting blong kasem ol janis blong “stanap olsem wan witnes blong God,” bambae ol janis ia oli kam, mo olgeta we oli stap lukaotem moa laet mo save, bae Hem i putum olgeta long fored blong yu. Taem yu stap mekem folem toktok blong Spirit, Tabu Spirit bae i tekem toktok blong yu i go long hat blong wan narawan, mo wan dei, Sevya bae i talemaot nem blong yu long fored blong Papa blong Hem.
Wan Wok blong Mekem Olsem Wan Grup
Wok long spirit ia, blong helpem wan blong kam long kingdom blong God, i wan grup wok. Yusum ol misinari olsem we yu save mekem, mo prea blong kasem help long heven. Be tingbaot, taem blong wan nara man i jenisim laef blong hem, bae i no folem tingting blong yu.11
Kamla Persand i blong Morises Aelan, mo i stap go long skul blong dokta long Bordo, Franis, taem mifala i mitim hem long Febwari 1991. Mifala i bin prea olsem wan famli blong save serem gospel wetem wan we i stap lukaotem trutok, mo mifala i bin tijim hem long hom blong mifala. Mi bin gat janis blong mekem baptaes blong mi, be mifala i no bin ol impoten pipol we i mekem se Kamla i joenem Jos. Ol fren, ol misinari, mo ol memba blong famli oli bin ol “witnes blong God” long homples blong hem, mo wan dei, long Franis, taem we taem i bin stret long Kamla, hem i bin mekem desisen blong baptaes. Naoia, 25 yia afta, ol blesing blong desisen ia oli stap raon long hem, mo boe blong hem i wan misinari long Madagaska.
Plis, no luk hadwok blong yu blong serem lav blong Sevya olsem wan nara tes we yu pasem o mestem, o wetem wan mak we i folem se yes o no fren blong yu i stap akseptem filing o invitesen blong yu blong mitim ol misinari.12 Wetem ol ae blong yumi blong wol ia, yumi no save jajem risal blong hadwok blong yumi, mo yumi no save setemap taemtebol blong olgeta. Taem yumi serem lav blong Sevya wetem wan narawan, mak blong yumi, oltaem hem i A+.
Sam gavman oli limitim wok blong ol misinari, mekem se ol gudfala memba blong yumi oli mas soem moa strong paoa long tingting blong stap olsem “ol witnes blong God long evri taem mo long evri ples.”
Nadesda blong Mosku, plante taem i givim wan kopi blong Buk blong Momon insaed long wan presen bokis wetem plante loli raon long hem. Hem i talem se: “Mi talem long olgeta se hemia i wan presen we i moa swit long ol narawan we mi save givim long olgeta.”
I no longtaem afta we hem i bin baptaes long Yukren, Svetlana i bin filim blong serem gospel wetem wan man we hem i stap luk hem plante taem long bas. Taem man ia i kamaot long bas, hem i askem hem: “?Bae yu glad blong save moa abaot God?” Man ia i talem se: “Yes.” Ol misinari oli bin tijim Vikto mo hem i kasem baptaes. Hem mo Svetlana, tufala i bin sil afta long Fribeg Jemani Tempol.
Lukaot gud. Ol blesing blong yu oli save kam long sam wei we yu no ting long hem.
Seven yia i pas, Kati mo mi i mitim Diego Gomes mo naes famli blong hem long Sol Lek Siti. Tufala i go long wan tempol open haos wetem mitufala, be long naes fasin, tufala i no akseptem invitesen blong lanem moa abaot Jos. Long las manis Mei, mi kasem wan sapraes telefon kol we i kam long Diego. Sam samting i hapen long laef blong hem we i mekem se hem i mas godaon long ni blong hem. Hemwan i go faenem ol misinari, i harem ol lesen, mo i rere blong baptaes. Long las 11 Jun, mi wokbaot insaed long ol wota blong baptaes wetem fren blong mi mo disaepol, Diego Gomes. Blong hem i jenisim laef blong hem i hapen long taem blong hem, mo i kam wetem help mo sapot blong plante we oli go aot long hem olsem “ol witnes blong God.”
Wan Invitesen I Go long Ol Yut
Long ol gudfala yut mo yang adalt raon long wol, mi givim yu wan spesel invitesen mo jalenj blong stap olsem wan “witnes blong God.” Olgeta raon long yu oli open blong save ol samting long spirit. ?Tingbaot pasol ia? Yu no kam sidaon long tebol wetem emti han, be wetem teknoloji mo sosol media blong yu yusum. Mifala i nidim yu; Lod i nidim yu blong yu wok strong moa long bigfala wok ia.
Sevya i talem: “Yufala i mas go long ol man long olgeta ples long wol, [mo tijim olgeta], mo baptaesem olgeta long nem blong Papa, … blong Pikinini … , mo … blong Tabu Spirit.”13
I no from nating we yu stap laef long Afrika, Esia, Yurop, Not, Medel o Saot Amerika, Pasifik o wan nara ples long wol blong God. Gospel i mas go long “evri kantri, famli, lanwis mo pipol.”14
“God blong heven i stanemap wan kingdom, ston ia i gro i go antap we i kam wan bigfala hil we i kavremap olgeta ples long wol, mo i stap oltaem gogo i no save finis.”
“Drim ia nao mi talem, mo mining blong hem tu, mi talem.”15
Mi endem wetem ol toktok we oli kam long Doktrin mo Ol Kavenan: “Prea long Lod, se bae kingdom blong hem bae i go evri ples long wol, blong ol man we oli stap laef long hem oli save kasem kingdom ia, mo oli mekem olgeta oli rere from ol dei we oli stap kam, we Pikinini blong Man bae i aot long heven i kamdaon, wetem klos blong glori blong hem we i saen gud, blong mitim kingdom blong God … long wol ia.”16 Long nem blong Jisas Kraes, amen.