Isa ka Saksi sang Dios
Ginapanugyan ko nga indi na kamo magbatyag nga may kabasulanan parte sa inyo kakulangan sa pagpaambit sang ebanghelyo. Sa luyo sini, magpangamuyo nga “magtindog bilang [isa ka saksi] sang Dios.” Ini mas tuman nga mabaskog nga manugbuyok sangsa kabasulanan.
Ang kadam-an sang importanteng buluhaton sang Dios di-makita sang mga mata sang kalibutan. Ang anum ka gatos ka tuig antes kay Cristo nagdala sang bantog nga mga manugpainoino subong nanday Confucius sa China kag Buddha sa Eastern India, apang ang gahum sang priesthood sang Dios ara kay Daniel, ang propeta nga ara sa pagkabihag sa panahon sang pagginahum sang hari sang Babylon nga si Nebuchadnezzar.
Gintublag sang isa ka damgo sa kagab-ihon, si Haring Nebuchadnezzar, nagmando sa iya mga mahikero kag mga babaylan nga sugiran sia angay parte sa iya damgo kag sa kahulogan sini. Ti, indi nila mahambal sa hari ang iya damgo kag sila nagreklamo. “Wala sing tawo sa ibabaw sang duta nga sarang [maghimo sini, ukon bisan sin-o nga hari nga magmando sinang] amo nga mga butang.”1 Si Haring Nebuchadnezzar na-impetu sa ila pagkapaslaw kag akig nga nagpahayag nga ang tanan niya nga manuglaygay pamatyon.
Si Daniel, isa sa maalam nga mga tinawo sang hari, nagpangamuyo para sa mga “kalooy sang … Dios … parte sa sining likum.”2
Isa ka milagro ang natabo. Ang likum parte sa damgo sang hari ginbugna kay Daniel.
Si Daniel gindala sa atubang sang hari. “Mahimo mo bala nga ipahibalo sa akon ang nakita ko nga damgo, kag ang kahulogan sini?”
Si Daniel nagsabat:
“Ang mga maalam nga tawo, mga babaylan, mga mahikero [indi makahambal sa imo sang imo gindamgo]. …
“Apang may Dios ang langit nga [sarang magbugna sining mga butang, kag Sia] magpahibalo sa kay … haring Nebuchadnezzar kon ano ang matabo sa ulihing mga adlaw. …
“Ang Dios sang langit,” siling ni Daniel, “[maga] tukod sang isa ka ginharian, [isa ka bato nga wala ginsinsil sang tawo, nga mangin isa ka dako nga bukid kag magapuno sa bilog nga kalibutan,] indi gid [ma] rumpag … [apang mag] pabilin sing padayon.
“… Ang damgo,” siling ni Daniel, “pat-ud, kag ang kahulogan sini … sigurado.”3
Ang iya damgo napaathag kag nalubad, ang hari maisog nga naghambal, “Ang imo Dios amo ang Dios sang tanan nga dios, kag Ginuo sang tanan nga hari.”4
Halin sa milagrosong tabang sang Dios kay Daniel nag-abot ang gintagna nga palaaboton sang ebanghelyo ni JesuCristo nga ginpanumbalik sa duta, ginharian nga magapuno sa bug-os nga kalibutan, “indi gid [ma] rumpag … [apang mag] pabilin sa katubtoban.”
Ang kadamoon sang mga miyembro sang Simbahan sa ulihing mga adlaw diutay kon ipaanggid, subong sa gintagna ni Nephi, apang sila ara sa tanan nga lugar sang kalibutan, kag ang gahum kag mga ordinansa sang priesthood ara sa tanan nga luyag sa mga ini, nagapuno sa kalibutan subong sa gintagna ni Daniel.5
Sang 1831 ang Propetang si Joseph Smith nakabaton sining bugna: “Ang mga yabi sang ginharian sang Dios [kag ang pagtipon sang Israel halin sa apat ka bahin sang kalibutan] gintugyan sa tawo diri sa duta, kag sugod diri ang ebanghelyo magadaligdig padulong sa mga punta sang kalibutan, subong sang bato sa bukid nga wala ginsinsil sang tawo magadaligdig, tubtob ini magpuno sang bug-os nga kalibutan.” 6
Responsibilidad nga Ginapaambit Naton
Ang pagtipon sang Israel isa ka milagro. Ini kaanggid sang tuman ka malapad nga puzzle nga ang mga pedaso ibutang sa lugar antes sa mahimayaon nga mga hitabo sang Ikaduhang Pagkari. Kaangay nga kita maligban sa isa ka bukid sang mga pedaso sang puzzle, ang naunang mga Santos basi naglantaw sa mando nga dal-on ang ginpanumbalik nga ebanghelyo sa bilog nga kalibutan nga halos imposible nga buluhaton. Nagsugod sila, isa ka tawo, isa ka pedaso sa isa ka tion, nagapangita sang tadlong nga mga kanto, nagaobra agud husto nga mapasad ining diosnon nga buluhaton. Amat-amat, ang bato nga wala ginsinsil sang tawo nagsugod sa pagdaligdig; halin sa ginatos padulong sa linibo, napulo ka linibo, kag karon minilyon ka may kasugtanan nga mga Santos sa Ulihing Mga Adlaw sa tabok sang kada nasyon ang nagaplastar sang mga pedaso sang puzzle sining halangdon nga buhat kag katingalahan.
Kada isa sa aton isa ka pedaso sang puzzle, kag nagabulig nga iplastar sa husto nga lugar ang iban nga mga pedaso nga kinahanglan. Importante kamo sa sining dakong kawsa. Ang palaaboton naton maathag. Makit-an naton ang milagro nagapadayon, kag ang Ginuo nagagiya sa aton samtang ginatapos naton ang nabilin nga mga lang-at. Dayon, “ang Gamhanan nga si Jehovah magasiling ang buluhaton natapos,”7 kag magabalik Sia nga harianon kag may himaya.
Si Presidente Thomas S. Monson nagsiling: “Karon amo ang tion para ang mga miyembro kag mga misyonero ululupod nga magbuylog, kag mag-obra … agud magdala sang mga kalag sa Iya. … Buligan Niya kita sa aton mga pagtrabaho kon kita magahimo sa pagtuo agud tumanon ang Iya buluhaton.”8
Ang diosnon nga responsibilidad nga sang una ginhatag sa mga misyonero karon ginahatag sa aton tanan. Luyag namon tanan nga ipaambit ang ginpanumbalik nga ebanghelyo, kag nagapasalamat ako nga linibo ang ginabunyagan kada simana. Walay sapayan sa sining maayong bugay, ang amon pagkabalaka para sa aton mga kautoran kag ang amon handom nga mapalipay ang Dios nagapadasig sa amon nga ipaambit kag pabakoron ang ginharian sang Dios sa bug-os nga kalibutan.
Ang Mga Dulonan sang Kabasulanan
Bisan may mabaskog nga handom sa pagpaambit sang ebanghelyo, basi wala kamo malipay sa kadalag-an sang inyo nagligad nga mga pagtinguha. Basi pareho kamo sang abyan ko nga nagsiling, “Naghambal ako sa akon pamilya kag mga abyan parte sa Simbahan, apang diutay lang ang interesado, kag sa kada di-pagbaton, nangin mas maluya ako. Nabal-an ko nga dapat maghimo ako sang kapin, apang wala sang natabo, kag dakong kabasulanan lamang ang akon nabatyagan.”
Lantawon ta kon makabulig ako.
Ang kabasulanan may importanteng papel kay ini nagapabugtaw sa aton agud magbag-o, apang may mga dulonan ini sa pagbulig sa aton.
Ang kabasulanan kaanggid sang baterya sa de-gasolina nga kotse. Sarang sini mapasanag ang kotse, mapaandar ang makina, kag ang suga sa unahan, apang indi ini makahatag sang gatong para sa pagbiyahe nga himuon. Ang baterya, kon ini lang, indi nagakaigo. Kag amo man ang kabasulanan.
Ginapanugyan ko nga indi na kamo magbatyag sang kabasulanan parte sa bisan ano nga kakulangan nga inyo ginapinsar sa pagpaambit sang ebanghelyo. Sa lugar sini, magpangamuyo subong sa gintudlo ni Alma, para sa mga oportunidad nga “magtindog bilang [isa ka saksi] sang Dios sa tanan nga tion kag sa tanan nga butang, kag sa tanan nga lugar … nga ang [iban] matubos sang Dios, kag malakip sa yadtong upod sa unang pagkabanhaw, [kag] makaangkon sang kabuhing walay katapusan.”9 Ini mas tuman nga mabaskog nga manugbuyok sangsa kabasulanan.
Ang mangin saksi sang Dios sa tanan nga tion kag sa tanan nga lugar nagapakita angay sa kon paano kita nagapangabuhi kag nagahambal.
Ipakita ang inyo pagtuo kay Cristo. Kon may oportunidad, maghambal parte sa Iya kabuhi, mga panudlo, kag sang Iya di-matupongan nga dulot sa katawhan. Ipaambit ang Iya gamhanan nga mga kamatuoran sa Libro ni Mormon. Ini ang promisa Niya sa aton: “Kon sin-o man … ang magapakilala sa akon sa atubang sang katawhan, sia ipakilala ko… sa atubang sang akon Amay … ara sa langit.”10 Ginasaad ko sa inyo nga kon mangamuyo kamo sing masami kag sinsero para sa mga oportunidad agud “magtindog nga saksi sang Dios,” yadtong mga oportunidad magaabot, kag yadtong mga nagapangita sang dugang nga kasanag kag ihibalo ibutang sa inyo atubang. Samtang kamo nagahulag suno sa espirituhanon nga mga pagpabatyag, ang Balaan nga Espiritu magadala sang inyo mga pulong sa tagipusuon sang tawo, kag sa isa ka adlaw ang Manluluwas magapakilala sa inyo sa atubang sang Iya Amay.
Isa ka Grupong Pagtinguha
Ang espirituhanong buluhaton sang pagbulig sa isa ka tawo pasulod sa ginharian sang Dios isa ka hubon nga pagtinguha. Gamita sing maabtik ang mga misyonero, kag magpangamuyo para sa tabang sang langit. Apang dumdoma, ang tion sang pagkahaylo sang tawo indi lubos nga nagasalig sa inyo.11
Si Kamla Persand taga Mauritius island, nagaeskwela sa medical school sa Bordeaux, France, sang masugata sia namon sang February sang 1991. Nagpangamuyo kami bilang pamilya agud magpaambit sang ebanghelyo sa tawo nga nagapangita sang kamatuoran, kag gintudloan sia sa amon puluy-an. Ginbunyagan ko sia, apang indi kami ang pinakamahulogan nga mga impluwenysa sa pagbuylog ni Kamla sa Simbahan. Mga abyan, mga misyonero, kag bisan pa ang mga miyembro sang iya pamilya nangin “mga saksi sang Dios” sa iya puluy-an nga pungsod, kag sa France, sang ang tion husto kay Kamla, sia nagpabunyag. Karon, 25 anyos ang nagligad, ang mga bugay sinang desisyon nagapalibot sa iya, kag ang iya anak nga lalaki isa ka misyonero sa Madagascar.
Palihog indi pagkabiga ang inyo mga pagtinguha sa pagpaambit sang gugma sang Manluluwas sa iban bilang pasar/bagsak nga test kag ang inyo grado nagasalig kon paano ang inyo mga abyan pabor nga nagaresponder sa inyo mga balatyagon ukon pagdapit sang mga misyonero.12 Sa aton mortal nga mga mata, indi kita sarang maghusga sa bunga sang aton mga pagtinguha, ukon makatukod sang pagtalana sang tion. Kon ginapaambit ninyo ang gugma sang Manluluwas sa iban, ang inyo grado permi A+.
Ang pila ka mga gobyerno naglimiti sa buluhaton sang mga misyonero, ini naghimo sa dungganon naton nga mga miyembro sa pagpakita sang mas dugang nga kaisog nga mangin “mga saksi sang Dios sa tanan nga tion kag sa tanan … nga lugar.”
Si Nadezhda sa Moscow masami nagahatag sa iban sang isa ka kopya sang Libro ni Mormon sa kahon sang dulot nga puno sang dulce sa palibot sini. “Ginahambalan ko sila,” siling niya, “nga ini ang pinakamatam-is nga dulot ko sa ila.”
Pagkatapos lang nga mabunyagan sa Ukraine, si Svetlana may pagpabatyag nga ipaambit ang ebanghelyo sa lalaki nga masami niya makit-an sa bus. Sang nagpanaog ang tawo sa iya padulogan, namangkot sia, “Luyag mo bala makabalo sing dugang parte sa Dios?” Ang tawo nagsiling, “Huo.” Ang mga misyonero nagtudlo kay Viktor, kag sia ginbunyagan. Sia kag si Svetlana sang ulihi ginhugpong sa Freiberg Germany Temple.
Maghalong; kay basi ang inyo mga bugay mag-abot sa mga paagi nga wala ginalauman.
Sang pito ka tuig nga nagligad, si Kathy kag ako nagsugata kay Diego Gomez kag sa iya matahum nga pamilya sa Salt Lake City. Sila nagtambong sa temple open house kaupod kami apang maayo nga nagpangindi sa amon pagdapit nga manuto sing dugang parte sa Simbahan. Sining nagligad nga Mayo sorpresa nga nakabaton ako sang tawag sa telepono halin kay Diego. Ang mga hitabo sa iya kabuhi nga nagpaluhod sa iya. Ginpangita niya ang mga misyonero, nagbaton sang mga diskusyon, kag nangin handa agud bunyagan. Sining nagligad nga June 11, ginbunyagan ko ang akon abyan kag kaupod nga disipulo si Diego Gomez. Ang pagkahaylo niya may kaugalingon nga tion kag natabo upod sa bulig kag suporta sang madamo nga naglab-ot sa iya bilang mga “saksi sang Dios.”
Pagdapit sa Batan-on
Sa aton halangdon nga mga batan-on kag young adults sa bug-os nga kalibutan, pinasahi nga ginadapit ko kamo nga mangin “mga saksi sang Dios.” Yadtong mga nagapalibot sa inyo bukas sa espirituhanon nga pagpangusisa. Madumdoman bala ninyo ang puzzle? Wala kamo nagakadto sa lamesa nga wala sing dala, apang may teknolohiya kag social media kamo. Kinahanglan namon kamo; ang Ginuo nagakinahanglan sa inyo nga mas dugang nga nagabuylog sa sining dakong kawsa.
Ang Manluluwas nagsiling, “Gani maglakat kamo, kag magtudlo sa tanan nga nasyon, bunyagan sila sa ngalan sang Amay, kag sang Anak, kag sang Balaan nga Espiritu.”13
Indi nataboan lang nga kamo nagaistar sa Africa; sa Asia; sa Europe; sa North, Central, ukon South America; sa Pacific; ukon sa iban pa nga lugar sa kalibutan sang Dios, bangud ang ebanghelyo dapat maglab-ot sa “kada nasyon, linahi, hinambalan, kag katawhan.”14
“Ang Dios sang langit [nag] tukod sa isa ka ginharian, [isa ka bato nga wala ginsinsil sang tawo, nga nangin isa ka dakong bukid kag nagapuno sa bilog nga kalibutan,] indi gid [ma] rumpag …[apang mag] pabilin sa katubtoban.
“… Ang damgo pat-ud, kag ang kahulogan … sigurado.”15
Magtapos ako sa mga pulong sang Doctrine and Covenants: “Magtawag sa Ginuo, nga ang iya ginharian magpadayon sa kalibutan, nga ang mga pumoluyo sini kontani magbaton sini, kag mangin handa sa mga adlaw nga maabot, sa diin ang Anak sang Tawo magapanaog [halin] sa langit, nagabisti sa kasanag sang iya himaya, agud sugalawon ang ginharian sang Dios … sa duta.”16 Sa ngalan ni JesuCristo, amen.