2010-2019
“Magpabilin sa Akon Gugma”
Oktubre 2016


“Magpabilin sa Akon Gugma”

Ang gugma sang Dios wala sing katapusan kag magapadayon sa katubtuban, pero ang kahulugan sini sa aton magadepende kon paano kita magsabat sa Iya gugma.

Ang Biblia nagasiling nga ang “Dios gugma.”1 Sia ang perpekto nga modelo sang gugma, kag nagasandig kita sa kapag-on kag kasangkad sinang gugma. Ginpahayag ni Pangulong Thomas S. Monson: “Ang gugma sang Dios yara lang bisan sa pamatyag mo bagay ka ukon indi sa sina nga gugma. Yara lang gid ini pirme.”2

Madamo sing paagi sa paglaragway kag paghambal parte sa diosnon nga gugma. Isa sa mga termino nga masami naton mabatian sa karon amo nga ang gugma sang Dios “wala sing kondisyones.” Samtang sa isa ka bahin matuod ini, ang tinaga nga wala sing kondisyones indi ninyo makit-an bisan diin sa balaan nga kasulatan. Sa baylo, ang Iya gugma ginalaragway sa kasulatan bilang ang “dako kag manami nga gugma,”3 “himpit nga gugma,”4 “nagatubos nga gugma,”5 kag “gugma nga dayon.”6 Mas maayo ining mga termino tungod ang tinaga nga wala sing kondisyones sarang maghatag sang lain nga kahulugan parte sa diosnon nga gugma, pareho sang, ginatolerar sang Dios ang tanan nga butang kag wala kita ginahukman, tungod ang Iya gugma wala sing kondisyones, ukon ang Dios wala sing ginapaabot sa aton tungod ang Iya gugma wala sing kondisyones, ukon nga tanan maluwas sa ginaharian sang Dios tungod ang gugma sang Dios wala sing kondisyones. Ang gugma sang Dios wala sing katapusan kag magapadayon sa katubtuban, pero ang kahulugan sini sa aton magadepende kon paano kita magsabat sa Iya gugma.

Si Jesus nagsiling:

“Subong nga ang Amay nagahigugma sa akon, ako man naghigugma sa inyo: pabilin kamo sa akon gugma.

“Kon magbantay kamo sang akon mga sugo, magapabilin kamo sa akon gugma; subong nga ako nagbantay sang mga sugo sang akon Amay kag nagapabilin sa iya gugma.”7

Ang “magpadayon sa” ukon “magpabilin sa” gugma sang Manluluwas nagakahulugan sang pagbaton sang Iya grasya kag pagahimpiton sini.8. Agud mabaton ang Iya grasya, kinahanglan naton nga magtuo kay Jesucristo kag magtuman sang Iya mga kasuguan, lakip na ang maghinulsol sang aton mga sala, magpabunyag para sa kapatawaran sang aton mga sala, magbaton sang Balaan nga Espiritu, kag magpadayon sa banas sang pagkamatinumanon sa Iya mga kasuguan.9

Ang Dios magahigugma sa aton pirme, pero indi Niya kita pagaluwason sa aton mga sala.10 Panumduma ang mga pulong ni Amulek kay Zisrom nga ang Manluluwas indi magaluwas sang Iya katawhan sa ila mga sala kundi gikan sa ila mga sala,11 ang rason amo nga “wala sang di-matinlo nga butang nga makapanubli sang ginharian sang langit”12 ukon makapuyo sa atubang sang Dios. “Kag may gahum Sia [si Cristo] nga ginhatag sa iya gikan sa Amay sa pagtubos [sang Iya katawhan] gikan sa ila mga sala tungod sang ila paghinulsol; gani ginpadala niya ang iya mga anghel sa pagpahayag sang balita sang mga kondisyon sang paghinulsol, nga nagadala sang katawhan padulong sa gahum sang Manunubos, padulong sa kaluwasan sang ila mga kalag.”13

Gikan sa Libro ni Mormon matun-an naton nga ang tuyo sang pag-antos ni Cristo—ang pinakamataas nga pagpahayag sang Iya gugma—amo ang “pagtuga sang tagipusuon sang kaawa, nga magadaug sang hustisya, kag magatuga sang mga paagi sa mga tawo agud makaangkon sila sang pagtuo padulong sa paghinulsol.

“Kag sa amo nga paagi ang kaluoy mahimo nga makasabat sang mga ginapangayo sang hustisya, kag nagalikop sa ila sa mga butkon sang kasigurohan, samtang sia nga wala nagagamit sang pagtuo padulong sa paghinulsol may katalagman sa bug-os nga layi nga ginapangayo sang hustisya; gani sa iya lamang nga may pagtuo padulong sa paghinulsol ginapahanabo ang dako kag wala’y katapusan nga plano sang pagtubos.”14

Ang paghinulsol amo ang Iya regalo sa aton, nga ginbakal sing pwerte ka mahal.

Ang iban magabais nga ang Dios nagabugay sang tanan-tanan nga wala sing pinilian—nga nagasambit, halimbawa, sang ginhambal ni Jesus sa Sermon sa Bukid: “[Ang Dios] nagapasubang sang iya adlaw sa mga malauton kag sa mga maayo, kag nagapaulan sa mga matarong kag sa mga di-matarong.”15Matuod gid, ang Dios nagapaulan sa tanan Niya nga mga kabataan sang tanan nga mga bugay nga pwede Niya mahatag—tanan nga bugay nga itugot sang gugma kag layi kag hustisya kag kaluoy. Kag ginamanduan man Niya kita nga mangin maalwan man:

“Nagasiling ako sa inyo, Higugmaa ang inyo mga kaaway kag pangamuyo kamo tungod sa mga nagahingabot sa inyo;

“Agud nga mangin-anak kamo sang inyo Amay nga yara sa langit.”16

Wala sapayan sini, ang mas dalagko nga mga bugay sang Dios nagadepende sa pagtuman. Si Pangulong Russell M. Nelson nagpaathag: “Ang nagapamukadkad nga pungpong sang gugma sang Dios—lakip na ang wala’y katapusan nga kabuhi—nagalakip sang mga bugay nga dapat angayan kita, indi sang mga bugay nga pwede lauman bisan indi kita angayan. Ang mga makasasala indi makapatiko sang Iya pagbuot suno sa ila gusto kag magpaabot nga bugayan Niya sila sa tunga sang ila kasal-anan [tan-awa sa Alma 11:37]. Kon luyag nila nga makabaton sang bug-os nga bugay, kinahanglan nila nga maghinulsol.”17

Labaw pa sa paghimo sang tawo nga matuod-tuod nga nagahinulsol nga wala’y sala kag matinlo upod ang saad nga “pagabayawon sa katapusan nga adlaw,”18 may ikaduha nga importante nga aspeto sa pagpabilin sa gugma sang Dios. Ang magpabilin sa Iya gugma magatugot sa aton nga malab-ot ang aton bug-os nga potensyal, nga mangin kasubong sa Iya.19 Pareho sang ginhambal ni Pangulong Dieter F. Uchtdorf: “Ang grasya sang Dios indi lamang magpanumbalik sa aton sa aton una nga kahimtangan nga wala’y sala. …ang Iya tinutuyo mas mataas: luyag Niya nga ang Iya mga anak mangin kasubong sa Iya.”20

Ang magpabilin sa gugma sang Dios sa sini nga punto nagakahulugan sang bug-os nga pagpaidalom sa Iya pagbuot. Nagakahulugan ini sang pagbaton sang Iya pagtadlong kon kinahanglanon, ‘Kay ang ginahigugma sang Ginuo ginadisiplina niya.”21Nagakahulugan ini sang paghigugmaanay kag pag-alagad sa kada isa subong nga si Jesus naghigugma kag nag-alagad sa aton.22 Nagakahulugan ini sang pagtuon “sa pagsunod sang layi sang selestiyal nga ginharian” agud sarang kita “magpuyo sa selestiyal nga himaya.”23 Agud mahimo Niya kita sa mga tinuga nga sarang kita nga mangin, ang Amay nga Langitnon nagaalungay sa aton nga mag-paidalom “sa mga pagpangganyat sang Espiritu nga Balaan, kag [ubahon] ang kinaugali nga tawo kag [mangin] isa ka santos paagi sa pagpasag-uli ni Cristo nga Ginuo, kag [mangin] subong sang isa ka bata, nga masinulundon, mapailubon, mapainubuson, mapainumuron, puno sang gugma, handa sa pagsunod sa tanan nga mga butang nga ginatan-aw sang Ginuo nga nagakabagay nga ipatuman sa iya, bisan subong sang isa ka bata nga nagasunod sa iya amay.”24

Si Elder Dallin H. Oaks nagkomento: Ang Katapusan nga Paghukom indi lamang isa ka pagtakos sang kabug-osan sang maayo kag malain nga mga binuhatan—sang atonginhimo. Ini amo ang pagkilala sang katapusan nga epekto sang aton mga binuhatan kag panghunahuna—kon nangin ano kita.”25

Ang istorya ni Helen Keller daw isa ka paanggid nga nagapakita kon paano ang diosnon nga gugma nagabag-o sang handa nga kalag. Nabata si Helen sa estado sang Alabama sa Estados Unidos sang 1880. Sang 19 ka bulan pa lang ang pangidaron, nakaangkon sia sang wala mahibal-i nga balatian nga nagpabungol kag nagbulag sa iya. Grabe sia kaalam kag nagaugtas samtang ginatinguhaan niya nga intiendihon kag hibaluon ang iya palibot. Sang mahikapan ni Helen ang nagakutib nga mga bibig sang mga miyembro sang pamilya kag sang nahibaluan niya nga ginagamit nila ang ila bibig sa paghambal sangsa mga senyas, “nagmaoy sia [tungod] indi sia makaentra sa ila paghinambalanay.”26 Sang magpangidaron sang anum ka tuig, nagdako ang panginahanglan ni Helen sa pagpakig-angot kag ang iya pag-ugtas nagdako pa gid nga “nagamaoy sia kada adlaw, kon kaisa kada oras.”27

Nagkuha sang manunudlo ang ginikanan ni Helen para sa ila anak, isa ka babayi nga ginhingadlan nga Anne Sullivan. Pareho kay Jesucristo nga nakahangop sang aton mga kasablagan,28 si Anne nakigbato sa iya kaugalingon nga mga kabudlayan kag nahangpan ang mga kasablagan ni Helen. Sa edad nga lima ka tuig, nakaangkon si Anne sang balatian nga nagtuga sang mahapdi nga pagtig-a sang kalimutaw kag halos nagbulag sa iya. Sang walo katuig si Anne, napatay ang iya iloy; gin-abandonar sia kag ang iya manghod nga si Jimmie sang ila amay; kag ginapadala sila sa “balay dalangpan” kon sa diin tama ka makaluluoy sang ila kondisyon gani napatay si Jimmie pagligad lang sang tatlo ka bulan. Sa iya masupog na pagpaninguha, nakasulod si Anne sa Perkins School for the Blind kag may kasablagan sa panulukan, kon sa diin nakatapos sia nga matag-as ang mga grado. Isa ka operasyon ang nagpaayo sang iya panulukan amo nga nakabasa na sia sang gin-imprinta nga balasahon. Sang nagkontak ang amay ni Helen Keller sa Perkins School nga nagapangita sang magatudlo sa iya anak, ginpili si Anne.29

Indi ini nangin manami nga inagihan sang umpisa. Si Helen “nagsumbag, nagkusi, kag nagsipa sang iya maestra kag naglabog gid ang isa niya ka ngipon. Sang ulihi nakaangkon gid man si [Anne] sang kontrol paagi sa pagsaylo upod kay [Helen] sa gamay nga kamalig sa propyedad sang mga Keller. Paagi sa pasensya kag mabakod nga kaukod, nakuha gid man niya ang pagpalangga kag pagsalig sang bata.”30 Sa pareho man, kon magsalig kita imbes nga magkontra sang aton diosnon nga Manunudlo, sarang Sia nga maghikot sa aton agud pasanagon kag bayawon kita sa isa ka bag-o nga realidad.31

Para mabuligan si Helen nga magtuon sang mga tinaga, ginabatu-bato ni Anne ang mga ngalan sang pamilyar nga mga bagay gamit ang iya tudlo sa palad ni Helen. “Nasadyahan gid si [Helen] sa sini nga ‘hampang sang tudlo,’ pero wala niya ini mahangpi tubtob pag-abot sang sikat nga tion sang ginbatu-bato ni Anne ang ‘t-u-b-i-g’ samtang ginabombahan sang tubig ang kamot ni [Helen]. Ginsulat ni [Helen] sang ulihi:

“‘Gulpi ko nadumduman nga may ara gid ako nga nalimtan; … kag sa kon ano nga paagi ang misteryo sang lenggwahe nabuksan sa akon. Nahibaluan ko sadto nga ang “t-u-b-i-g” nagakahulugan sang manami nga mabugnaw nga nagailig sa akon kamot. Ang inang buhi nga tinaga nagpukaw sang akon kalag, naghatag sini sang kasanag, paglaum, kalipay, naghilway sini! … Ang tanan nga butang may ngalan, kag ang tagsa ka ngalan nagdala sang bag-o nga panghunahuna. Sa amon pagbalik sa balay[,] ang tanan nga butang … nga akon matandugan daw puno sing kabuhi.’”32

Si

Sang nagdako si Helen Keller, nakilala sia sa iya gugma sa lenggwahe, sa iya kabatid sa pagsulat, kag sa iya katahum maghambal sa publiko.

Sa isa ka pelikula parte sa kabuhi ni Helen Keller, ginpakita ang iya mga ginikanan nga kontento sa trabaho ni Anne Sullivan sang napasunod niya ang ila mauyon nga bata sa punto nga nagapungko na si Helen sing matinahuron sa panyapon, nagakaon sing normal, kag ginapiod ang iya pamahid pagkatapos magkaon. Pero nahibaluan ni Anne nga mas sobra pa ang masarangan ni Helen kag sarang sia maghimo sang makahuluganon nga binuhatan.33Sa amo man, mahimo nga kontento na kita sa aton nalab-utan sa kabuhi kag amo na kita kon ano kita subong, samtang ang aton Manluluwas nakahangop sang mas mahimayaon nga potensyal nga makita lamang naton sa “di-maathag nga salaming.”34 Ang tagsa sa aton sarang makaesksperiyensya sang kasadya sang paghumlad sinang diosnon nga potensyal sa sulod naton, pareho sang kasadya nga nabatyagan ni Helen Keller sang ang mga tinaga nakaangkon sang kabuhi, nga nagahatag sang kasanag sa iya kalag kag naghilway sini. Ang tagsa sa aton makahigugma kag makaalagad sa Dios kag makaangkon sang gahum sa pagbugay sang aton isigkatawo. “Suno sa nasulat na, ‘Ang wala makit-i sang mata, kag wala mabatii sang idulungog, ukon wala mapainu-ino sa hunahuna sang tawo, ini gin-aman sang Dios sa nagahigugma sa iya.’”35

Binag-binagon naton ang bili sang hamili nga gugma sang Dios. Si Jesus nagpahayag nga agud magpasag-uli para sa aton mga sala kag magtubos sa aton gikan sa kamatayon, alangay nga pisikal kag espirituhanon, ang Iya pag-antos nagtuga sa Iya kaugalingon, “bisan pa nga Dios, ang pinakadako sa tanan, nga magkurog tungod sa sakit, kag magdugo sa tanan nga buho-buho sang panit, kag mag-antos alangay sa lawas kag sa espiritu—kag kon mahimo nga indi ko mainom ang mapait nga tagayan, kag mag-atras.”36 Ang Iya pag-antus sa Getsemani kag sa krus mas labaw pa sangsa masarang sang bisan sin-o nga mortal.37 Wala sapayan, tungod sang Iya gugma sa Iya Amay kag para sa aton, ginbatas Niya kag, bilang konsikwensya, sarang magtanyag sa aton sang pagka-imortal kag kabuhi nga wala’y katapusan.

Litrato
Pulugaan sang olivo

Madalom ang simbolismo sang “ang dugo [naggwa] gikan sa tagsa ka buho-buho sang panit”38 sang nagaantos si Jesus sa Getsemani, ang lugar nga pulugaan sang olivo. Agud makahimo sang lana sa panahon sang Manluluwas, ang mga olivo ginadunot anay paagi sa pagpaligid sang dako nga bato sa ibabaw sini. Ang mga “dinunot” ginabutang sa malum-ok, dalagko buho nga mga basket nga ginsampaw-sampaw. Ang bug-at sini nagapagwa sang una kag puro nga lana. Dayon ginadugangan ang bug-at paagi sa pagbutang sang tambala ukon tablon sa ibabaw sang ginhantal nga mga basket, nga nagapagwa pa gid sang dugang nga lana. Sa katapusan, para makuha ang nabilin nga mga tinulo, ginakabitan ang tambala sang mga bato sa tagsa ka punta para mapusa gid ang mga olivo.39 Kag huo, duag dugo ang lana sa una nga paggwa sini.

Litrato
Pulugaan sang olivo nga may lana sang olivo

Ginapanumdom ko ang panaysayon ni Mateo parte sa Manluluwas sa Iya pagsulod sa Getsemani sinang makahaladlok nga gab-i—nga nagsugod sia sa “pagkasubo kag pagkalisang.  …

“Kag sang nakakadto sia sa uluunhan naghapa sia kag nagpangamuyo, “Amay ko, kon mahimo, paligara sa akon ining tagayan; apang indi suno sa buot ko, kundi sa buot mo.”40

Dayon, sa akon paghunahuna sang ang kasakit nagdugang pa gid, nagpangabay Sia sa ikaduha nga tion sang kaumpawan kag, sang ulihi, ayhan sa pinakapunta sang Iya pag-antos, sa ikatlo nga tion. Gin-antos Niya ang kasakit tubtob nga natuman ang hustisya tubtob sa katapusan nga tinulo.41 Ginhimo Niya ini agud tubuson ikaw kag ako.

Daw ano kamalahalon nga regalo ang diosnon nga gugma! Nga puno sinang gugma, si Jesus nagapamangkot, “Indi bala kamo magbalik sa akon, kag maghinulsol sang inyo mga sala, kag mahaylo, agud nga mapaayo ko kamo?”42 Malulo Sia nga nagapasalig, “Yari karon, ang akon butkon sang kaluoy nauntay tuhoy sa inyo, kag kon sin-o man ang magakari … akon pagabatunon; kag bulahan yadtong mga magakari sa akon.”43

Indi bala ninyo Sia higugmaon nga una naghigugma sa aton?44 Kon amo bantayi ang Iya mga kasuguan.45 Indi bala kamo mangin abyan sa Iya nga naghatag sang Iya kabuhi para sa Iya mga abyan?46 Kon amo himua ang Iya sugo.47 Indi bala kamo magpadayon sa Iya gugma kag magbaton sang tanan nga maalwan Niya nga ginatanyag sa inyo? Kon amo magbantay sang Iya mga sugo.48 Kabay nga mabatyagan naton kag lubos gid kita nga magpabilin sa Iya gugma, sa ngalan ni Jesucristo, amen.