“Oanna in Luhngse Luhk”

Bible uh fahk nuh sesr muh “God El lung.”¹ El pa srihkasrak suwohs na ke luhngse, ac kuht luhlahlfongi yohk ke pwacyeiyacn oasr ac kuh wacngihn sahflahiyac luhn luhngse sacn. Oacna Prestuhn Thomas S. Monson el tuh fahk ah: “Luhngse luhn God uh oasr nuh suwos finne kowos puhla fal nuh kac kuh tiac. Pwacyena oasr pacl nuh kwewa.”²

Puhs ohiyac ma kuht kuh in ahkuhtweyac ac sramsramkihn luhngse muhtahl. Sie sin fahk ma kuht kwacna lohng mihsenge uh pa tuh luhngse luhn God uh “tiac ekyek.” Finne pwacye ke sie kalmac uh, kahs tiac ekyek uh wacngihn ke ma suhmuhslah. Sahyac na, luhngse Lal ahkuhtweyucki ke ma suhmuhslah tuh luhngse yohk ac wolacna,³ “luhngse suwohs,”⁴ “luhngse moliyucklac,”⁵ ac “luhngse kawihl.”⁶ Kahs inge uh wo liki mweyen kahs tiac ekyek uh kuh in oruh tahfonglac nuhnak ke luhngse muhtahl, oacna, wona ma nuh kwewa sin God ac El tiac insese ac ahkmuhngmuhngye kuhtwena ma kuht oruh mweyen luhngse Lal uh tiac ekyek, kuh God El tiac enenuh kuht in oruh ma, mweyen luhngse Lal uh tiac ekyek, kuh allmoliyucklac ke tohkohsrahi inkuhsrao luhn God mweyen luhngse Lal uh tiac ekyek. Luhngse luhn God uh ma pahtpaht ac fah oanna ne tok, tuhsruhk kalmac nuh sesr kais sie wiwina mukwikwi lasr nuh ke luhngse Lal.

Jisus El fahk:

“Nga lungse kowos oana ke Papa El lungse nga; kowos mutana in lungse luk.

“Kowos fin akos ma sap luk, kowos ac oanna in lungse luk, oana ke nga akos ma sap lun Papa tumuk ac mutana in lungse lal.”⁷

In “muhtana in” kuh “oanna in” luhngse luhn Mwet Lahngo uh kalmac pa in eis pahkotwen Lal ac ahksuwohsyeyucklac kac.⁸ In eis pahkotwen Lal, kuht enenuh in luhlahlfongi ke Jisus Kraist ac ahkos ma sap Lal uh, weacng auliyak ke ma koluk lasr, pacptais in elah ma koluk, eis Nguhn Muhtahl, ac fahsr na ke inkacnek luhn ahkostwen.⁹

God El fah luhngse kuht ne tok, tuhsruhk El tiac kuh in molikuhtlac ke ma koluk lasr.¹⁰ Esam kahs lal Amulek nuh sel Zeezrom tuh Mwet Lahngo El fah tiac molwelah mwet Lal in ma koluk lalos tuhsruhk from ma koluk lalos,¹¹ srihpac uh pa ke ma koluk uh kuht fohkfohk ac “wacngihn ma fohkfohk kuh in usrui tohkohsrahi inkuhsrao”¹² kuh muhta yurun God. “Ac oasr kuh [luhn Kraist] ma ituckyang nuh Sel sin Pahpah in [molwelah mwet Lal] liki ma koluk lalos ke srihpen auliyak uh; ke ma inge El suhpwaclah lipufacn Lal in sulkackihn pweng wo ke akwuck luhn auliyak; ma use nuh ke kuh luhn Mwet in Molwelah, nuh ke molwelah luhn nguhnalos.”¹³

Ke Puk luhn Mormon kuht etwaclah muh srihpen kweok luhn Kraist—mwe ahkkahlwemyeyacn luhngse yohk Lal—pa “in sang inse pahkotwen, suc kuhtanglah nuhnuhnkuh suwohs, ac sang inkacnek nuh sin mwet uh tuh elos in kuh in luhlahlfongi in auliyak.

“Ac ohinge pahkotwen kuh in ahkfalye mwe enenweyuck luhn nuhnuhnkuh suwohs, ac kuhluhsuhlosyak ke langweyucklac, ac el suc tiac moulkihn luhlahlfongi nuh ke auliyak el ikacklah nuh ke masap nuhkwewa ke ma enenweyuck luhn nuhnuhnkuh suwohs; ke ma inge nuh sel muhkwena suc luhlalfongi in auliyak ituckyang plwacn in molwelah yohk ac ma pahtpaht.”¹⁴

Na, auliyak uh mwe sang Lal nuh sesr, moliyucklac ke moul na sacohk se.

Kuhtuh fah akuhkuhin fahk muh God El ahkinsewowoye mwet nuh kwewa oacna sie—ac fah orekmakihn, ke srihkasrak, fahk luhn Jisus ke Mwe Luti Finohl ah: “[God] El oru kalmen faht lal uh in sreya mwet koluk ac mwet wo oana sie, ac El sang pac af nu fin mwet suwohs ac mwet sesuwos.”¹⁵ Pwacye, God El sang mwe insewowo nuh kwewa ma El kuh nuh sin tuhlihk Nahtuhl—mwe insewowo nuh kwewa ma luhngse ac masap ac nuhnuhnkuh suwohs ac pahkotwen fah lwelah. Ac El sap kuht in kuhlwacng oacpacna:

“Nga fahk nu suwos: Lungse mwet lokoalok lowos ac pre kaclos su kalyei kowos,

“Tuh kowos fah ku in pangpang tulik nutin Papa tomowos su inkusrao.”¹⁶

Finne ohinge, mwe insewowo yohk luhn God uh wiwina ahkostwen. Prestuhn Russell M. Nelson el tuh fahk: “Ros kahto ma pa luhngse luhn God uh—wi pac moul ma pahtpaht uh—wi pac mwe insewowo ma kuht enenuh in fal nuh kac, tiac mwe insewowo ma kuht enenuh in eis finne tiacna nwacsnwacs. Mwet koluk uh tiac kuh in oruh kena Lal in tuh kena lalos ac enenwacl in ahkinsewowoyaclos ke ma koluk uh [liye Alma 11:37]. Elos fin kena engankihn mwe insewowo nuh kwewa Lal, elos enenuh in auliyak.”¹⁷

Ahluhkwelah in oruh mwet auliyak se in wacngihn mwacta la ac in nwacsnwacs nohfohn ke olwelah se in tuh “sruhkyuckyak ke lwen sahflah,”¹⁸ oasr ma yohk srihpac se ahk luo ke oanna in luhngse luhn God. In oanna ke luhngse Lal fah oruh kuht in kuh in akihlen kuh nohfohn lasr uh, in eklac finne oacna El.¹⁹ Prestuhn Dieter F. Uchtdorf el tuh fahk: “pahkotwen luhn God uh tiac ahksasucye kuht na nuh ke ohiyacsr ke wacngihn mwacta met ah. … Srihpac Lal uh arulacna fuhlwact liki: El ke wen ac acn nahtuhl uh in eklac oacna El.”²⁰

In oanna in luhngse luhn God ke ohiyac se inge uh kalmac pa in insacnweacng nohfohn nuh ke kena Lal. Kalmac pa in insese nuh ke ahksuwohs Lal ke enenweyuck, “tuh Leum El aksuwosye mwet nukewa su El lungse.”²¹ Kalmac pa in luhngse ac kuhlwacnsapuh sie sin sie oacna Jisus El luhngse ac kuhlwacnsapuh kuht.²² Kalmac pa in etwaclah ahkos masap luhn tohkohsrahi celestial tuh kuht in kuh in muhta ke wolacna celestial.”²³ El in kuh in oruh kuht in eklac ma kuht kuh, Pahpah tuhmasr Inkuhsrao El kwacfe kuht in lohacng “nuh ke kolyuck luhn Nguhn Muhtahl, ac sislah ma luhn mwet luhngse facluh ac eklac sie mwet luhlahlfongi ke iwaclah luhn Leum Kraist, ac eklac oacna sie tuhlihk srihsrihk, fihlpacp, fakpacp, mongfihsrwacsr, muhtweng, sesseslah ke luhngse, kena ahkostwen nuh ke ma nuhkwewa suc Leum El liye fal in oruh nuh sel, oacna ke sie tuhlihk fuhsr el ahkos pahpah tuhmwacl.”²⁴

Elder Dallin H. Oaks el fahk: “Nuhnuhnkuh Sahflah uh tiac pa na srihkasrak se ke ma wo ac koluk nuh kwewa uh—ma kuht tuh oraclah. Pa sie akihlenyacn ma orek sahflah ke srihpen mukwikwi ac nuhnak lasr—ma kuht tuh eklac nuh kac.”²⁵

Sramsram soko kacl Helen Keller uh oacna puhpuhlyuck ma sruhmuhn ohiyac ma luhngse muhtahl uh kuh in ekuhllah sie mwet suc kena eklac. Helen el isuslac ke state Alabama fin acn Macrike ke 1880. Ke tuhfahnna mahlwem 19 ah, el maskihn sie mas tiac etweyuck ma oruh el in suhlohngkahs ac kun. El suhmaht na pwacye ac arlac foloyak ke el srihke in kahlwem ke ma raunwellah uh. Ke Helen el puhla mukwikwi ke inngoasron sucu lal ac akihlen lah elos orekmakihn inwacluhlos in sramsram, “el foloyak na pwacye [mweyen] el tiac kuh in wi sramsram uh.”²⁶ Ke Helen el yac ohnkohsr ah, enenuh lal in sramsram ac folo lal uh yohkwelihk oruh el “kasrkuhsrak lwen nuh kwewa, kuhtuh pacl uh ao nuh kwewa.”²⁷

Pahpah ninac kiyacl Helen ah moli sie mwe luti luhn acn nahtuhlos, sie muhtwacn pahngpahng Anne Sullivan. Oacna Jisus Kraist El sie suc kahlwem ke muhnahs lasr uh,²⁸ Anne Sullivan el tuh puhlakihn ma upac lal sifacna ac kahlwem ke muhnahs lal Helen. Ke el yac limekohsr, Anne el tuh maskihn sie mas ma oruh kihnet ngal ke ahtron muhtahl ac oruh el apkuhran in ohkohklah nohfohn. Ke Anne el yac alkohsr, ninac kiyacl ah misac; pahpah tuhmwacl ah som luhkwel ac liki tamuhlwel srihk wiyacl, Jimmie; ac elos suhpweyucklac nuh ke “lohm suhkahsruhp” se, ma ohiyac uh arulacna koluk we oruh Jimmie el misac tukunna mahlwem tolu. Ke srihke yohk lal uh, lwelah nuh sel Anne in wi Perkins School luhn Mwet Kun ac mwet tiac liye wo, yen el oruh arulacna wo we. Sie laslas oruh liye lal in wolac kuhtuh oruh el kuh in riti kahs printiyucklac uh. Ke pahpah tuhmwacl Helen Keller el sramsram nuh sin mwet ke Perkins School ah suk mwet se in kuh in mwet luti luhn acn se nahtuhl ah, Anne Sullivan pa sulweyucklac ah.²⁹

Tiacna ohiyac wo se ke muhtwacwacackiyac ah. Helen “el puok, kihnis ac futung mwet luti lal uh ac fuhlkwelah soko wihsel. Sahflahiyac [Anne] el kutong ke el som muhta yohrohl [Helen] ke sie lohm srihsrihk ke acn sin sucu Keller ah. Ke mongfihsrwacsr ac kwacna orekma uh, el eis luhlahlfongi ac luhngse luhn tuhlihk sac.”³⁰ Ke ohiyac sac pacna, ke kuht muhtwacwacack luhlahlfongi sahyacn in lain Mwet Luti muhtahl lasr uh, El kuh in orekma yohrohsr in luti kuht ac sruhkkuhtyak nuh ke ohiyac sasuc.³¹

In kahsrwel Helen etwaclah kahs uh, Anne el nuh spacli inen ma etweyuck ke kufun pahol ke lun pahol Helen. “[Helen] el luhngse ‘sritacl ke kufun po’ se inge, tuhsruhk el tiacna kahlwem nwe ke pacl pwengpweng ke [Anne] el spacli ‘k-o-f’ ke el sang kof nuh ke pahol [Helen]. Tohkoh [Helen] el sihmihs:

“‘Na, nga muhtwacwacack akihlen ke ma se ma oacna ngan tuh muhlkuhnlah … ac ke kuhtuh ohiyac ma lukmac luhn kahs uh ahkkahlwemyeyuck nuh sihk. Nga etuh ke pacl sacn muh kalmacn “k-o-f” pa ma ohu wolacna ma sohrohr nuh ke pouk. Kahs na kuh se inge okasack nguhnihk, use kahlwem, finsrak, engan, molwelah! … Ma nuh kwewa oasr ine, ac ine nuh kwewa sang moul nuh ke sie nuhnak sasuc. Ke kuht fohlohk nuh lohm ah[,] ma nuh kwewa … nga kahl uh oacna in oasr moul kac.’”³²

Ke Helen Keller el mahtuhlah, el etweyuck ke luhngse lal ke kahs, suhmaht lal ke sihm, ac suwohs lal in sramsram ye muhtuhn mwet.

Ke sie petsac ma sruhmuhn moul lal Helen Keller ah, pahpah ninac kiyacl ah ahkuhtweyucki muh elos engan ke orekma lal Anne Sullivan tukun el ahkmihsyelah acn wel se nahtuhlos fal tuh Helen elan muhta ke pacl in mongo, mongo na, ac orwaclah napkin lal in wo ke sahflahiyacn mongo uh. Tuhsruhk Anne el etuh lah Helen el kuh in oruh ma puhs sahyac ac lah oasr mo yohk el ac oruh.³³ Oacpacna, kuht kuh in puhla muh fal ma kuht oruh ke moul lasr uh ac lah kuht pa na inge, ke Mwet Lahngo lasr uh El kahlwem ke kuh wolacna ma kuht liye “ke sie selngun ohk.”³⁴ Kais sie sesr kuh in puhla engan yohk ke kuh muhtahl se inge oreklac in kuht uh, oacna engan ma Helen Keller el tuh puhla ke kahs uh oasri kalmeyac nuh sel, sang kahlwem nuh ke nguhnal ac molwelah. Kais sie sesr kuh in luhngse ac kuhlwacnsapuh God ac ahkkweyeyuck in ahkinsewowoye mwet tuhlan lasr. “In oana Ma Simusla fahk, Ma su mwet uh soenna liye ku long, Ma se su mwet uh soenna nunkauk muh ku in sikyak, Pa ma se ma God El akola nu selos su lungse El.”³⁵

Lwelah kuht in motko luhpan molin luhngse sacohk luhn God. Jisus El ahkuhtweyac tuh in iwaclah ma koluk lasr ac molikuhtlac liki misac, kwewana luhn mahno ac luhn nguhn, kweok Lal uh oruh El sifacna, suc pa God, kuh liki nuh kwewa, in rarrar ke srihpen ngal, ac srah in kahklah ke pat srihsrihk nuh kwewa, ac in kweok kwewana ke mahno ac nguhn, ac siyuck tuh Elan tiac nihm ke kuhp mohkohl sac ac lokweni.”³⁶ Kweok Lal ke Gethsemane ac ke sahkseng ah tuh yohk liki kuhtwena ma mwet moul in mahno se kuh in puhlakihn.³⁷ Finne ohinge, ke srihpen luhngse Lal nuh sin Pahpah tuhmwacl ac nuh sesr, El kampare, ac ke srihpen ma inge, El kuh in acse nuh sesr kwewana moul kawihl ac moul ma pahtpaht.

Arulacna oasr kalmac tuh “srah tuhkuh ke pat nuhkwewa”³⁸ ke Jisus El kweok in Gethsemane, suc kalmacn ine uh pa mwe isacs olive. In orwaclah olive oil ke pacl luhn Mwet Lahngo ah, olive ah isacsyuck emet ke sie yot ipiplac fac. “Ma” oreklac kac uh ituckyang nuh ke fohtoh fihsrwacsr ma yollac. Toasriyacn yol uh orwaclah oil emet uh ma pa wo emet uh. Na mwe ahktoasr ituckyang nuh kac ke sie beam kuh sahk ituckyang nuh fin fohtoh yollac uh, ma sifil orwaclah oil. Sahflahiyac, in ituck tul sahflah kac, yot ituckyang nuh ke sahk ah in orwaclah isacs toasr, ac sahflah.³⁹ Ac ahok, oil uh sruhsrah ke sohrohr emet uh.

Nga motko ke ahkuhtweyac lal Matthew ke Mwet Lahngo ke El ilyak nuh in Gethsemane ke fong sacn—muh El “mutawauk in asor ac toasrlana. …

“El fahsr kutu nu meet, ac faksufi ac pre, ‘O Papa, fin ku, nga siyuk kom in eisla cup in keok se inge likiyu! Tusruktu in tia ou lungse luk, a in ou lungse lom.”⁴⁰

Na, ke nga nuhnkuh toasr kac uh yohkwelihk ac upaclac, El siyuck pacl se ahkluo in ahkmihsyeyuck ac, sahflahiyac, sahp ke yohkiyacn kweok Lal, ke pacl se ahktolu. El puhlakihn na waek nwe ke nuhnuhnkuh suwohs uh ahkfalyeyuck nuh ke tul sahflah.⁴¹ Ma inge El oruh in molikowoslac ac moliyuclac.

Luhngse muhtahl el sie mwe sang na sacohk! Sesseslah ke luhngse, Jisus El siyuck, “Yac kowos inge ac tiac fohlohkoh nuh Yuruk, ac auliyak ke ma koluk lowos, ac forlah eklac, tuh Nga in kuh in unwe kowoslac?”⁴² Ke ohiyac insepuhsisacl El fahk, “Liye, paho pahkotwen Luhk ahsroeyucklac nuh yuruwos, ac el suc fah tuhkuh, Nga fah eisacl; ac insewowo elos suc tuhkuh nuh Yuruk.”⁴³

Yac kowos ac tiac luhngse El suc luhngse kowos emet ah?⁴⁴ Na ahkos masap Lal.⁴⁵ Yac kowos fah tiac kawuck se nuh Sel suc fuhlwelah moul Lal ke kawuck Lal?⁴⁶ Na ahkos masap Lal.⁴⁷ Yac kowos fah tiac oanna in luhngse Lal? Na ahkos masap Lal.⁴⁸ Nga pruhe tuh kuht in puhla ac oanna nohfohn in luhngse Lal, ke inen Jisus Kraist, amen.