“Tumau i Lo’u Alofa”

Ua ta’u mai e le Tusi Paia ia i tatou o le “Atua o le alofa lava ia.”¹ O Ia o le faatusa atoatoa o le alofa, ma e tatou te faalagolago atoa i le aapa mai faifai pea o lena alofa i tagata uma. E pei ona faailoa mai e Peresitene Thomas S. Monson e faapea: “Ua i ai le alofa o le Atua iina mo outou e tusa lava pe ua outou lagona lo outou manaomia pe leai foi se alofa. E i ai lava iina i taimi uma.”²

E tele lava auala e faamatala ai ma talanoa ai e uiga i le alofa paia. O se tasi o faaupuga ua tatou faalogo soo i ai i nei ona aso e faapea, o le alofa o le Atua e “le faatuaoia.” E ui i se tasi lagona e moni ai, ae o le faamatalaga le faatuaoia e le o maua i tusitusiga paia. Ae, o Lona alofa ua faamatalaina i tusitusiga paia o le “alofa tele ma le ofoofogia,”³ “alofa atoatoa,”⁴ “alofa togiola,”⁵ ma le “alofa e faavavau.”⁶ O loo i ai isi faaupuga sili atu ona o le upu le fatuaoia e mafai ona avatu ai ni manatu sese e uiga i le alofa paia, e pei o le, e faatagaina ma tuusaunoa e le Atua soo se mea tatou te faia ona o Lona alofa le faatuaoia; po o le, e le faia e le Atua ni poloaiga ia i tatou, ona o Lona alofa le faatuaoia; po o le, e faaolaina tagata uma i le malo faalelagi o le Atua ona o Lona alofa le faatuaoia. O le alofa o le Atua e le mafuatia ma o le a tumau pea e faavavau, ae o lona uiga mo i tatou taitoatasi e faalagolago lea i le auala tatou te tali atu ai i Lona alofa.

Sa fetalai mai Iesu:

“Faapei ona alofa mai o le Tama ia te au, e faapea lava ona ou alofa atu ia te outou; ia tumau pea outou i lo’u alofa.”

“Afai tou te tausia a’u poloaiga, ona tumau lea o outou i lo’u alofa; pei ona ou tausia poloaiga a lo’u Tama, ma ou tumau i lona alofa.”⁷

O le “faaauau pea i le” po o le “tumau i le” alofa o le Faaola o lona uiga ia maua Lona alofa tunoa ma ia faaatoatoa ai.⁸ Ina ia maua Lona alofa tunoa, e tatau ona tatou maua le faatuatua ia Iesu Keriso ma tausi Ana poloaiga, e aofia ai le salamo i a tatou agasala, papatisoina mo le faamagaloga o agasala, taliaina o le Agaga Paia, ma le faaauau pea i le ala o le usiusitai.⁹

O le a alofa pea le Atua ia i tatou, ae e le mafai ona Ia laveai i tatou i a tatou agasala.¹⁰ Manatua upu a Amoleka ia Seseroma o le a le laveaia e le Faaola Lona nuu i a latou agasala ae mai a latou agasala,¹¹ o le mafuaaga o lena mea ona o le agasala tatou te eleelea ai ma “e le mafai e se mea ua le mama ona mautofi i le malo o le lagi”¹² pe nofo foi i le afioaga o le Atua. “Ma ua ia [Keriso] le mana na tuuina mai ia te ia mai le Tamā e togiola ai i latou mai ia latou agasala ona o le salamo; o lea na ia auina mai ai ana agelu e talai mai tala o tuutuuga o le salamo, lea e aumai ai i latou i le mana o le Togiola, mo le olataga o o latou agaga.”¹³

Mai le Tusi a Mamona ua tatou aoao ai o le faamoemoega o puapuaga o Keriso—o le faailoaga sili lea o Lona alofa—e “aumai ai loto o le alofa mutimutivale, ia ua faumalo i le faamasinotonu, ma aumai ai ala i tagata e mafai ai ona latou maua o le faatuatua e salamo ai.

“Ma faapea ona mafai ai e le alofa mutimutivale ona faamalie manaoga o le faamasinotonu, ma siosiomia ai i latou i lima o le saogalemu, aʼo ia o le na te le faaaoga se faatuatua e salamo ai, ua tualiali i le tulafono atoa o manaoga o le faamasinotonu; o lea ua nao ia o le ua i ai le faatuatua e salamo ai, ua aumai ai le fuafuaga tele ma faavavau o le togiolaina.”¹⁴

O le salamo la, o Lana meaalofa lea ia i tatou, na faatauina i se tau taugata tele.

O le a finauina e nisi e faapea e faamanuia e le Atua tagata uma e aunoa ma se eseesega—ma ta’ua ai, mo se faataitaiga, le fetalaiga a lesu i le Lauga i luga o le Mauga: “E faaoso e le [Atua] lona la i e ua amio leaga atoa ma e ua amio lelei; ua ia faatoto ifo foi le ua i e ua amiotonu atoa ma e ua amioletonu.”¹⁵ O le mea moni, e liligi mai faaua e le Atua i luga o Ana fanau uma ia faamanuiaga uma Na te mafaia—faamanuiaga uma o le a faatagaina e le alofa ma le tulafono ma le faamasinotonu ma le alofa mutimutivale. Ma ua Ia poloaiina i tatou ia faapena foi ona tatou lotoalofa atu:

“A ou te fai atu a’u ia te outou, ia outou alolofa atu i e ua ita mai ia te outou, faamanuia i e ua fetuu mai ia te outou, ia agalelei atu i e ua inoino mai ia te outou, ma tatalo foi mo e ua tuuai fua mai ma faasaua mai ia te outou;

“Ina ia avea outou ma fanau a lo outou Tamā o lē o i le lagi.”¹⁶

E ui i lea, o faamanuiaga sili atu a le Atua ua aiaia i luga o aiaiga o le usiusitai. Sa faamalamalama mai e Peresitene Russell M. Nelson e faapea: “O le teufugalaau tele matagofie o le alofa o le Atua—e aofia ai le ola e faavavau—e aofia ai faamanuiaga ia e tatau ona tatou agavaa ai, ae le o faamanuiaga ia tatou te manatu e tatau ona tatou maua e tusa lava pe tatou te le agavaa. E le mafai e tagata agasala ona lolo’u mai Lona finagalo i o latou loto ma manaomia o Ia e faamanuia i latou a o fai le agasala [tagai Alema 11:37]. Afai latou te mananao ia olioli i faamanuiaga uma o Lana teufugalaau matagofie, e tatau la ona latou salamo.”¹⁷

I tala atu o le lagonaina e le tagata ua salamo o le le tausalaina ma le le pisia i le folafolaga o le “sii ae ... i luga i le aso gataaga,”¹⁸ o loo i ai se vaaiga taua lona lua o le tumau i le alofa o le Atua. O le tumau ai i Lona alofa o le a mafai ai ona tatou iloaina lo tatou gafatia atoatoa, e avea ai e pei o Ia.¹⁹ Sa ta’ua e Peresitene Dieter F. Uchtdorf: “O le alofatunoa o le Atua e le tau na ona fuata’i ai o i tatou i le tatou tulaga mama sa i ai muamua. ... O Lona faamoemoega e maualuga tele atu: E finagalo i Ona atalii ma afafine ina ia avea e pei o Ia.”²⁰

Ina ia tumau i le alofa o le Atua i lenei lagona o lona uiga ia gauai atu atoa i Lona finagalo. O lona uiga ia talia Ana aoaiga pe a manaomia, “aua o lē ua alofagia e le Alii, [e] aoai [e ia].”²¹ O lona uiga o le alofa ma le auauna atu i le tasi ma le isi e pei ona alofa mai Iesu ma auauna mai ia i tatou.²² O lona uiga ia aoao “e ola i le tulafono o se malo selesitila” ina ia mafai ai ona “[mau] i se mamalu selesitila.”²³ Mo Ia ina ia mafai ona faia i tatou i tagata e mafai ona tatou avea ai, ua augani mai ai lo tatou Tama Faalelagi ia i tatou ina ia gauaʼi atu “i uunaiga a le Agaga Paia, ma tuu ese le tagata natura ma [avea] ma tagata paia e ala i le togiola a Keriso le Alii, ma [avea] e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tamā.”²⁴

Na matau e Elder Dallin H. Oaks: “O le Faamasinoga Mulimuli ua le na o se iloiloga o le aofaiga atoa o amioga lelei ma amioga leaga—o mea ua tatou faia. O le faailoaina mai o aafiaga faaiu o a tatou amioga ma mafaufauga—o tagata ua tatou avea ai.”²⁵

O le tala ia Helen Keller o se faataoto ua fautua mai ai le auala e mafai ai e le alofa paia ona liliua se loto naunautai. Sa fanau mai Helen i le setete o Alapama i le Iunaite Setete i le 1880. Ina ua faatoa 19 masina le matua, sa mafatia o ia i se ma’i sa lei mailoa lea na logonoa ma tauaso ai o ia. Sa matua atamai lava o ia ma na oo ina le fiafia a o ia taumafai e malamalama ma faauiga tonu ona siosiomaga. Ina ua lagona e Helen le feminoia’i o laugutu o tagata o le aiga ma iloa ai latou te faaaogaina o latou fofoga e tautatala ai, “sa matua ita lava [ona] sa le mafai ona ia auai i talanoaga.”²⁶ E oo ifo i le ono o tausaga o Helen, o lona manaoga ia tautala ma lona le fiafia sa matua faatupulaia lea “na oso faama’imaliu ai lona ita i aso taitasi, o nisi taimi e ta’i itula [ma oso].”²⁷

Sa faafaigaluega e matua o Helen se faiaoga mo le la afafine, o se fafine e igoa ia Anne Sullivan. E pei lava foi ona tatou maua ia Iesu Keriso o lē e malamalama i o tatou vaivaiga,²⁸ Sa tauivi foi Anne Sullivan ma ona lava faigata ogaoga ma malamalama ai i vaivaiga o Helen. I le lima tausaga, sa aafia ai Anne i se faamai na mafua ai se mageso tiga i le afuafu o le mata ma na toetoe a tauaso atoa ai. Ina ua valu tausaga o Anne, sa maliu lona tina; sa tiai o ia ma lona tuagane laitiiti, o Jimmie; ma sa auina atu ai i laua i se “nofoaga mativa,” ma sa matua leaga lava tulaga lea na maliu ai Jimmie i le mavae ai na o le tolu masina. E ala i lona lava ia naunautaiga malosi, sa mafai ona ulufale atu ai Anne i le Aoga a Perkins mo e Tauaso ma faaletonu le vaai, lea na faamanuiaina ai faaleatamai. Sa faia se taotoga ma faaleleia ai lana vaai ma o lea na mafai ai ona ia faitaua lomiga. Ina ua faafesootai atu e le tama o Helen le Aoga a Perkins e saili mai se tasi e avea ma faiaoga mo lona afafine, sa filifilia loa Anne.²⁹

Sa le o se aafiaga fiafia i le amataga. Sa “tu’i, iini ma kiki e Helen lona faiaoga ma pa’u ese ai se tasi o ona nifo. Sa i’u lava ina mafai ona pulea e [Anne] e ala i le masii atu ma [Helen] i se tamai fale i le fanua o Kellers ma nonofo ai. E ala i le onosai ma le tumau mausali, sa i’u ai lava ina manumalo o ia i le loto ma le faatuatuaga o le teineiititi.”³⁰ E faapena foi, a oo ina tatou faatuatuaina ae le tetee atu i lo tatou Faiaoga faalelagi, o le a mafai ona Ia galue faatasi ma i tatou e faamalamalama ma siitia i tatou i se tulaga moni fou.³¹

Ina ia fesoasoani ia Helen ia aoaoina ni upu, e sipela i ai e Anne igoa o meafaitino masani i lona tamailima i luga o le alofilima o Helen. “Sa fiafia lava [Helen] i lenei ‘taaloga i tamailima,’ ae sa lei malamalama o ia seia oo i le taimi lauiloa ina ua sipela e [Anne] le ‘v-a-i’ a o pamuina le vai i lima o [Helen]. Na tusia mulimuli ane e [Helen]:

“‘Sa faafuasei ona ou iloaina se mea sa foliga mai na galo ia te au ... ma sa pei na faaalia mai ia te au le mealilo o le gagana. Sa ou iloa ai i lena taimi o le “v-a-i” o lona uiga o le mea malulu lea sa tafe i luga o lo’u lima. O lena upu mamana sa fagua ai lo’u agaga, maua ai le malamalama, faamoemoe, olioli, ma le saolotoga! ... O mea uma e i ai se igoa, ma o igoa taitasi e fanau mai ase manatu fou. A o ma toe foi atu i le fale[,] o meafaitino uma ... na ou pa’i i ai sa foliga mai na tumu i le ola.’”³²

A o tuputupu a’e Helen Keller i se tagata matua, sa lauiloa o ia mo lona fiafia i le gagana, o ona tomai o se tusitala, ma lona poto e tautala o se failauga i tagata latutele.

I se atatifaga o loo faaalia ai le olaga o Helen Keller, o loo faamatalaina ia le faamalieina o ona matua i le galuega a Anne Sullivan na faafilemuina ai lo la afafine amiolepulea lea na saofai ai ma le migao i le aiga o le afiafi, tausami faalelei, ma gaugau lana sololima i le maea ai o le meaai. Ae sa iloa e Anne e anoanoai atu isi mea e gafatia e Helen ma e tele ni ona sao e fai.³³ E faapena foi i tatou, atonu e faamalieina i mea ua tatou faia i o tatou olaga ma o tagata lava ia ua avea ai i tatou, ae e malamalama le Faaola i se gafatia mamalu lea e na o le “faanenefu i le faaata”³⁴ tatou te vaaia ai. E mafai e i tatou taitoatasi ona lagonaina se olioli naua o le gafatia paia e atiaeina i totonu o i tatou, e pei lava o le olioli na lagona e Helen Keller ina ua mamana upu ia te ia, ma tuu atu le malamalama i lona agaga, ma faasaolotoina ai. E mafai e i tatou taitoatasi ona alofa ma auauna atu i le Atua ma faamanaina e faamanuia ai o tatou uso a tagata. “E pei ona tusia, o mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia”³⁵

Ia tatou mafaufau i le tau o le alofa faapelepele o le Atua. Sa faaali mai e Iesu ina ia togiola mo a tatou agasala ma togiola i tatou mai le oti uma faaletino ma faaleagaga, o Ona mafatiaga ia na oo ai ia te Ia lava, “o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga—ma manao ai ia Ou lē inuina le ipu oona, ma maʼeʼeʼe.”³⁶ O Ona tiga i Ketesemane ma luga o le satauro sa sili atu i lo tiga e mafai e se tagata ona lavatia.³⁷ Ae ui i lea, ona o Lona alofa mo Lona Tama ma mo i tatou, sa Ia tumau ai ma, o se taunuuga, ua mafai ona ofo maia ia i tatou le tino ola pea ma le ola e faavavau.

O se faatusa loloto le “[sau] o le toto mai ona pu afu uma”³⁸ a o mafatia ai Iesu i Ketesemane, le nofoaga o le soligā vine. Ina ia gaosi le suauu olive i le taimi o le Faaola, e olopala muamua olive e ala i le faataavale ai i luga o se maa tele. O “mea ua olopalaina” sa tuu i totonu o se ato lalaga vaivai oloo matala, lea sa faaputu le tasi i luga o le isi. O lo latou mamafa e tatauina mai i fafo le suauu muamua ma sili ona lelei. Ona toe faaaoga lea o se isi mamafa faaopoopo e al ai le tuuina o se amopou tele po o se ogalaau i luga o ato ua faaputuina, ma toe maua ai nisi suauu. Mea mulimuli, ina ia tatau mai i fafo ni mataua mulimuli, e faamamafa i ai le amopou ma ni maa i le tasi pito e maua ai le mamafa sili ma le olopalaina.³⁹ Ma ioe, e mumu totototo le suauu i le taimi muamua e tafe mai ai.

Ou te mafaufau i le tala a Mataio e uiga i le Faaola a o Ia ulufale atu i Ketesemane i lena po matautia—lea na amata ai ona “tiga [o Ia] ma atuatuvale.

“Ua maliu faaitiiti atu o ia i luma, ona faapa’ū faō ai lea o Ia ma tatalo, ua faapea atu, Lo’u Tama e, afai e mafai, ia ave ese lenei ipu ia te a’u: ae ‘aua le faia lo’u loto, ao lou finagalo.”⁴⁰

Ona oo lea e pei ona ou mafaufau i ai sa faateteleina le atuatuvale, sa Ia aioi atu i le taimi lona lua mo se toomaga ma, masalo i le taimi mulimuli i le luluti ai o Ona puapuaga, o le taimi lona tolu. Sa Ia onosaia le tiga seia oo lava ina ua faamalieina le faamasinotonu i le matāūa mulimuli lava.⁴¹ Na Ia faia lenei mea e togiola ai oe ma a’u.

E maeu lenei meaalofa taua o le alofa paia! I le faatumuliaina ai i lena alofa, sa fesili ai Iesu, “Pe tou te le foi mai nei ea ia te au, ma salamo ia outou agasala, ma liliu, ina ia ou faamaloloina outou?”⁴² Sa Ia faamautinoa mai ma le agamalu, “Faauta, ua faaloaloa atu ia te outou lou lima alofa mutimutivale, ma o soo se tasi e sau, o ia lea o le a ou taliaina; ma amuia lava i latou o e e o mai ia te au.”⁴³

E te le alofa ea ia te Ia o lē na muai alofa ia te oe?⁴⁴ Tausi la Ana poloaiga.⁴⁵ E avea ea oe ma se uo ia te Ia o lē na foai mai Lona ola mo Ana uo?⁴⁶ Tausi la Ana poloaiga.⁴⁷ E te le tumau ea i Lona alofa ma maua mea uma ua Ia ofo maia ma le alofa tunoa ia te oe? Tausi la Ana poloaiga.⁴⁸ Ou te tatalo ina ia tatou tumau atoatoa i Lona alofa, i le suafa o Iesu Keriso, amene.