2010–2019
Au sa Vinaka Li? Au na Rawata Li?
Okotova 2016


Au sa Vinaka Li? Au na Rawata Li?

Kevaka o ni na tovolea vakaidina ka sega ni veivakaduiduitaki se veivorati—veivutuni voli ka kerea tiko na loloma soliwale—sa na rawa vei iko mo na “vinaka kaya.”

Kemuni na ganequ kei na taciqu, sa veivakalougatataki dina meda soqoni vata ka vakatavulici mai vei ira na italai ni Turaga. E sega li ni ka totoka na sala e vuqa e tuberi keda ka vakalougatataki keda kina na Tamada Vakalomalagi? E vinakati keda vakaidina o Koya meda lesu yani ki vale.

Donuya na veigauna ni kune loloma niu a vuniwai gone voli ka biubiu mai na koronivuli ni vulivuniwai, au a vakadonui ki na dua na parokaramu veibolei ena tabana ni veituberi vakavuniwai kivei ira na lalai ena dua na parokaramu veiqali vinaka. Niu sotavi ira na vulivuniwai tale e so, au vakila ni vaka me a lailai duadua na noqu kilaka kei na vakavakarau. Au vakananuma ni sa sega na sala au na rawa ni veiraurau kina kei na vo ni ilawalawa.

Ena ikatolu ni neimami vula, au a dabe toka ena siteseni ni nasi e valenibula ena dua na bogi levu, mai tagi voli yani ka moce sara ena noqu a tovolea tiko meu vakalewena na ivolatara ni nona vakacurumi e dua na gonetagane lailai tauvi niumonia. Au a sega mada ni se bau yalolailai ena noqu bula. Au sega ni vakasamataka rawa na iwalewale meu na qarava kina na niumonia kivua e dua na yabaki 10. Au sa tekivu vakananuma na cava au cakava tiko ekea.

Ena gauna vataga oya, a vakataqara ki tabaqu na ligana e dua na vuniwai qasecake. A torogi au seu sa vakaevei tiko, kau mani talaucaka na noqu nuiqawaqawa kei na rere. Na ka e tukuna a veisautaka na noqu bula. A tukuna o koya vei au na levu ni nodra dokai au o ira taucoko na vuniwai qasecake tale e so kei na nodra nanuma ni na yaco meu na dua na vuniwai vakairogorogo. Vakalekaleka, a vakabauti au o koya ena dua na gauna au a sega tu madaga ni vakabauti au.

Me vakataka na ka au sotava, era dau taroga wasoma na noda lewenilotu, “Au sa vinaka li vakaiau?” se “Au na rawata li vakaidina na matanitu vakasilesitieli?” Sa vakakina, sa sega na ka e “vinaka kaya.” Sega ni dua vei keda e rawa ni “rawata” se “ganita” na nona vakabulai, ia sa matau tu meda vatavatairalagotaka kevaka eda na vakadonui mai vua na Turaga, oya na vuna au kila vakamatata kina na veitaro oqo.

So na gauna ni da laki lotu, eda sa yalolailai mai na veisureti yalovinaka sara madaga meda vakavinakataki keda. Eda vakasamataka lo, “Au sega ni rawa ni cakava taucoko na veika oqo” se “Au na sega ni vinaka cake me vakataki ira taucoko oqo.” De dua ena tautauvata cake na ka eda vakila me vakataki au ena valenibula ena bogi oya.

Yalovinaka, na taciqu kei na ganequ daulomani, sa dodonu meda kakua na vakatauvatani keda ki vei ira tale e so. Eda na vakararawataki keda wale tu ga ena veisivisivi kei na veivakatauvatani. Eda vakatulewataka cala na keda yaga mai na veika e tiko se sega vei keda kei mai na nodra nanuma tale e so. Kevaka meda na veivakatauvatani, meda vakatautauvatataka mada na keda ituvaki ena gauna eliu ki na kena nikua—kei na ituvaki eda na via vakakina ena veigauna mai muri. Na vakanananu duadua ga e manata me baleti keda oya na ka e nanuma na Tamada Vakalomalagi me baleti keda. Yalovinaka tarogi Koya mada se cava e nanuma tu o Koya me baleti iko. Ena veivakadodonutaki o Koya ka sega ni vakayalolailaitaki keda; oqori na ivadi nei Setani.

Meu na vakadodonu ka vakamatata sara mada. Na isau ni veitaro “Au sa vinaka li?” kei na “Au na rawata li?” oya na “Io! O sa na qai vinaka dina” kei na “Io, o na rawata vakaidina kevaka ga o veivutuni tiko ka sega ni veidutaitaki se veileti.” Na Kalou ni lomalagi e sega ni dua na daunilewa tawaveinanumi ka vakaraica voli na veiulubale me kauti keda tani kina mai na qito. Sai Koya na Tamada lomani vinaka sara, ka gadreva tu vakalevu sara me ra lesu taucoko tale yani i vale na Luvena ka bula vata kei Koya vakamatavuvale me tawamudu. A solia vakaidina o Koya na Luvena Duabau Ga sa Vakatubura meda kakua ni rusa ia meda rawata ga na bula tawamudu!1 Yalovinaka vakadinata, ka yalovinaka tauri nuinui kei na vakacegu mai na dina tawamudu oqo. Sa gadreva tu na Tamada Vakalomalagi meda cakava vakakina! Oya na Nona cakacaka kei na Nona lagilagi.2

Au taleitaka na sala a vakayagataka o Peresitedi Gordon B. Hinckley me vakatavulica kina na ivakavuvuli oqo. Au rogoci koya ni kaya ena vuqa na gauna, “Kemuni na taciqu kei na ganequ, na ka ga e namaka na Turaga vei keda oya meda tovolea, ia mo na tovolea vakaidina!”3

Na “tovolea voli vakaidina” sa kena ibalebale na noda caka vinaka duadua, na vakilai ni vanua eda gadreva me vakavinakataki, ka qai tovolei tale. Ena kena vakamatautaki, eda sa volekata tikoga na Turaga; eda vakila vakalevu sara na Yalona,4 ka da ciqoma e levu sara na Nona loloma soliwale, se veivuke.5

Ena so na gauna, au nanuma eda sega ni vakila rawa na levu ni nona via vukei keda tu na Turaga. Au taleitaka na vosa nei Elder David A. Bednar, ka kaya:

“Levu vei keda e kila vakamatata ni Veisorovaki e sa baleti ira na cakacala. Au sega ni vakadeitaka sara, ia, eda kila vakamatatata ni Veisorovaki e sa baleti ira talega na yalododonu. …

“… Na Veisorovaki e vakarautaka na veivuke kivei keda meda ulabaleta ka vorata na ka ca ka cakacaka ka yaco meda vinaka. …

“‘… Mai na … na loloma soliwale ni Turaga era ciqoma kina na … tamata yadua na kaukauwa kei na veivuke me ra cakava na ka vinaka era a sega beka ni rawa ni cakava. … Na loloma soliwale oqo e sa dua na kaukauwa veivakacegui …’ [“Grace” ena Bible Dictionary; vakamatatataki] … se veivuke vakalomalagi eda gadreva vakalevu tu me vakadeitaki keda ki na matanitu vakasilesitieli.”6

Na ka ga meda cakava meda ciqoma kina na veivuke vakalomalagi oqo oya meda kerea ka qai cakacakataka ena veivakauqeti dodonu eda ciqoma kina.

Na itukutuku matanidavui oya ni da sa veivutuni ena yalovinaka, na noda ivalavala ca taumada ena sega ni tarova na noda vakacerecerei. Sa tukuna vei keda o Moronai me baleti ira na daucakacala ena nona gauna: “Ia era na vosoti ena veigauna kecega era sa veivutuni kina ena yalodina.”7

Ka sa tukuna vakai-Koya na Turaga me baleta na tamata ivalavala ca:

“Ia kevaka sa vakatusa na nona ivalavala ca vei iko kei au talega, ka veivutunitaka vakaidina sara, mo vosoti koya, kau na vosoti koya talega.

“Io ena veigauna kece era veivutuni kina na noqu tamata au na vosota kina na nodra talaidredre vei au.”8

Kevaka eda na veivutuni vakaidina, ena vosoti keda dina na Kalou, kevaka madaga eda vakayacora tale na cakacala vataga ena veigauna. Me vaka a kaya o Elder Jeffrey R. Holland: “Se vakacava na levu ni madigi o nanuma ni o sa calata, se vakacava na levu ni cala o nanuma ni o sa cakava … , au vakadinadinataka ni o sega ni sa lako sivita na vanua e rawa ni yacova na loloma vakalou. E sega ni rawa vei iko mo lutudromu sivita na rarama tawavakaiyalayala ni Veisorovaki i Karisito.”9

Oqo e sega sara ni kena ibalebale ni sa daumaka na ivalavala ca. E dau tu ga na revurevu ni ivalavala ca. Na ivalavala ca e dau vakaleqa ka vakamavoataka ruarua na tamata cakacala kei ira na rawai ena nona ivalavala ca. Na veivutuni dina e sega ni rawarawa.10 Ia, kila vakamatata mada ni dina ga e kauta tani na Kalou na cala kei na vatuka ni noda ivalavala ca ni da veivutuni ena yalodina, ena rairai sega mada ni kauta tani kusarawa taucoko o Koya na revurevu ni noda ivalavala ca. So na gauna era toka vata kei keda ena noda bula taucoko. Na ivalavala ca e ca duadua oya na ivalavala ca nakiti taumada ka kaya kina e dua, “Sa rawa niu cakacala oqo ka veivutuni malua.” Au vakabauta ni oqo e sa dua na veivakalialiai vakaitamera me baleta na solibula kei na vakararawataki i Jisu Karisito.

A tukuna vakai-Koya na Turaga, “Raica koi au na Turaga au sa sega sara ni vakadonuya nai valavala ca.”11

Ka cauraka o Alama, “Raica au sa kaya vei iko, ko na sega ni kune marau ena nomu ivalavala ca.”12

Dua na vuna e dina saraga kina na vosa nei Alama oya ena veicakacala veitaravi kece, eda sa vakayawaki keda mai vua na Yalotabu, eda yalolailai, ka qai muduka na veivutuni. Ia au tokaruataka, mai na Veisorovaki ni iVakabula, sa rawa ni da veivutuni ka vosoti vakataucoko, ena gauna ga e sa yalodina kina na noda veivutuni.

Sa sega ni dodonu meda veivakaduiduitaki ka qai veivutuni. Ena sega ni cakacaka meda vakadonui keda ena noda ivalavala ca ni tukuni, “Sa kila na Kalou ni sa rui ka dredre sara vei au, ka sa vakadonui au o Koya ena kequ ituvaki.” Na “tovolea voli vakaidina” sa kena ibalebale eda vakayacora voli ni da sa dewa cake vakaoti ki na ivakatagedegede ni Turaga, ka sa vakamacalataki vakamatata tu ena veitaro eda a tarogi kina me rawa ni tauri e dua na ivolatara ni valetabu.

Na ka tale ena kaliraki keda tani mai lomalagi ka tawasei keda mai na veivuke eda gadreva oqo oya na veivorati. Mai na ivola nei Mosese, eda vulica ni a vakasavi sobu mai o Setani baleta na veivorati.13 Eda sa veivorati ena gauna cavaga eda kaya kina ena vunilomada, “Au sega ni gadreva na Kalou, ka sa sega ni dodonu meu veivutuni.”

Ena noqui tutu vaka vuniwai ena qaravi ni lalai, au kila kevaka e dua e sega ni gadreva tu na veiqaravi ni veivakabulai, sa na rawa ni vakavuna na mate vakayago sega ni gadrevi. E tautauvata, ni da vorata na Kalou, eda sa sega ni gadreva na nona veivuke kei na inuinui duadua ga, o Jisu Karisito, ka vakavuna na mate vakayalo. Sega ni dua vei keda e rawata oqo ena nona kaukauwa walega. Sega ni dua vei keda ena rawa ni “vinaka kaya,” vakatau ga mai na isolisoli kei na loloma veivueti i Jisu Karisito,14 ia baleta ni doka na Kalou na noda galala ni digidigi, eda na sega ni rawa ni vakabulai talega kevaka eda sega ni tovolea voli. O ya na iwalewale e cakacaka kina na veidutaitaki ni loloma soliwale kei na cakacaka. Sa rawa ni da vakanuinuitaki Karisito baleta ni vinakata o Koya me veivuke ka veisautaki keda. Vakaidina, sa vukei iko rawa tiko o Koya. Cegu mada ka raicalesu ka vakila na Nona veivuke ki na nomu bula.

Au vakadinadinataka vei kemuni ni kevaka o ni na tovolea vakaidina ka sega ni veivakaduiduitaki se veivorati—veivutuni voli ka kerea tiko na loloma soliwale, se na veivuke, i Karisito—sa na rawa vei iko mo na “vinaka kaya,” o ya, mo vakadonui mai vua na Turaga; o sa na lako curuma na matanitu vakasilesitieli, ni bula savasava tu vei Karisito; ka na ciqoma na veivakalougatataki kei na lagilagi kei na reki e gadreva tu na Kalou kivei ira yadua na Luvena vakasakiti—oka vakatabakidua kina o iko kei au. Au vakadinadinataka ni bula na Kalou ka vinakati keda meda lako yani ki vale. Au vakadinadinataka ni bula tiko o Jisu Karisito. Ena yaca tabu o Jisu Karisito, emeni.