Husto Bala ka Maayo Ako? Maluwas Bala Ako?

Palangga nga mga kautoran, daw ano nga bugay nga kita nagatililipon kag matudloan sang mga alagad sang Ginuo. Indi bala matahum nga ang aton Langitnon nga Amay nagagiya kag nagabugay sa aton sa madamo nga paagi? Luyag gid Niya nga makapauli kita.

Paagi sa madamo nga mga kalooy bilang batan-on nga doktor nga bag-o lang nakatapos sa pagtuon, ginbaton ako sa isa ka pediatric residency training nga mabudlay kag madasig. Sang nasugata ko ang iban nga mga intern, pamatyagan ko ako ang pinakakulihot sa kaalam kag paghanda. Abi ko anay indi gid ako mangin kasubong nila.

Sa ikatatlo ka bulan namon, isa ka gab-i, samtang ara ako sa nurse station, pabulosbulos nga nagahibi kag daw matulogan samtang nagasulat para sa pagpasulod sa isa ka diyes anyos nga batang lalaki nga may pneumonia. Nadulaan gid ako sang kaisog kag paglaum sadto nga tion. Wala ko mabal-an ang magbulong sa isa ka bata nga may pneumonia. Nagsugod ako sa pagduda sa akon ginabuhat didto.

Sa sina gid nga higayon, ang isa sa mga senior resident nagbutang sang iya kamot sa akon abaga. Ginkamusta niya ako, kag ginsugid ko sa iya ang akon kawalay paglaum kag mga kahadlok. Ang sabat niya nagbag-o sang akon kabuhi. Ginsugiran niya ako nga sia kag ang iban pa nga mga senior resident bilib gid sa akon kag ginalauman nila nga ako mangin isa ka pinakamaayo nga doktor. Sa malip-ut nga sugid, sia nagtuo sa akon sa tion nga ako wala gani magtuo sa akon kaugalingon.

Subong sa sining inagihan ko, ang mga miyembro naton masami nga nagapamangkot, “Husto bala ako ka maayo nga tawo?” ukon “Maluwas gid bala ako sa selestiyal nga ginharian?” Sa pagkamatuod, wala sang tawo nga “husto gid ka maayo.” Wala sa aton ang masiling nga “angay” ukon “takus” sa aton kaluwasan, apang kinaandan ang magpamangkot kon bala kita batunon sang Ginuo, nga amo ang akon paghangop sining mga pamangkot.

Kon kaisa sa aton pagsimba, nagakadulaan kita sing paglaum kon mabatian ang sinsero nga mga pagdapit nga pauswagon naton ang aton mga kaugalingon. Ginapinsar naton, “Indi ko mahimo ining tanan nga mga butang” ukon “Indi gid ako mangin subong ka maayo pareho sining mga katawhan.” Siguro ini subong sang ginbatyag ko sa ospital sinang gab-i.

Palihog, pinalangga kong mga kautoran, untatan naton ang pagpaanggid sang aton mga kaugalingon sa iban. Kita nagaantus sang walay pulos paagi sa pagpaanggid kag pagkumpetensya. Indi husto ang pagtakus naton sang aton kaugalingon nga balor paagi sa mga pagkabutang nga may ara kita ukon wala kag sa mga opinyon sang iban. Kon kita dapat magpaanggid, lantawon naton kon ano kita sang nagligad kag sa karon nga adlaw—kag bisan pa gani kon ano kita luyag nga magmangin sa palaaboton. Ang opinyon parte sa aton nga importante amo ang opinyon sang aton Langitnon nga Amay. Palihog nga magpangayo sa Iya kon ano ang pagkabig Niya sa inyo. Palanggaon kag tadlongon Niya kita apang indi gid pagkuhaan sang paglaum; inang ulihi amo ang sasko ni Satanas.

Mangin direkta ako kag maathag. Ang sabat sa “Husto bala ako nga maayo?” kag “Maluwas bala ako?” amo ang “Huo! Mangin husto ikaw ka maayo” kag “Huo, maluwas ikaw basta padayon ikaw nga nagahinulsol kag indi magpanginrason ukon magrebelde.” Ang Dios indi referee nga walay balatyagon nga nagapangita sang bisan ano nga sayup agud tabugon kita paggwa sa hampang. Sia ang aton himpit kag mapinalanggaon nga Amay, nga luyag gid, labaw sa tanan, ang makit-an ang Iya mga anak nga makapauli kag mangabuhi upod sa Iya sa walay katapusan nga mga pamilya. Matuod nga gindulot Niya ang Iya Bugtong nga Anak agud indi kita malaglag apang makaangkon sang kabuhing walay katapusan!¹ Palihog magtuo, kag magbaton sang paglaum kag kasulhay halin sa sining walay katapusan nga kamatuoran. Tuyo sang aton Langitnon nga Amay nga maluwas kita! Ina ang Iya buluhaton kag ang Iya himaya.²

Luyag ko gid ang paagi ni Presidente Gordon B. Hinckley sa pagtudlo sining prinsipyo. Nabatian ko sia sa pila ka beses nga nagsiling, “Mga kautoran, ang lubos nga ginalauman sang Ginuo sa aton amo ang magtinguha, apang siguradohon nga kamo matuod gid nga nagatinguha!”³

Ang “matuod gid nga nagatinguha” amo ang paghimo sang pinakalabing maayo nga masarangan naton, nabal-an kon diin kita dapat mag-uswag, kag dayon magtinguha liwat. Sa paliwatliwat nga paghimo sini, mangin mas malapit kita sa Ginuo, mas mabatyagan naton sing mas nagadugang ang Iya Espiritu,⁴ kag mabaton naton ang dugang nga grasya Niya, ukon bulig.⁵

Ginapinsar ko kon kaisa nga wala naton mabal-an kon daw ano ang Ginuo luyag nga magbulig sa aton. Luyag ko gid ang mga pulong ni Elder David A. Bednar, nga nagsiling:

“Ang laban sa aton maathag nga nakahangop nga ang Pagpasag-uli para sa mga makasasala. Indi ako lubos nga sigurado, kon bala nabal-an kag nahangpan naton nga ang Pagpasag-uli para man sa mga santos. …

“… Ang Pagpasag-uli nagahatag sang bulig para sa aton agud malutos kag malikawan ang malain kag maghimo kag mangin maayo. …

“‘… Paagi sa … grasya sang Ginuo nga ang kada tawo … makabaton sang kusog kag tabang agud maghimo sang maayo nga mga binuhatan nga kon wala ini sila indi makasarang [maghimo]. … Ining grasya amo ang nagapakasarang nga gahum …’ [Bible Dictionary, “Grace”; emphasis added] … ukon langitnon nga bulig nga ginakinahanglan gid naton agud mangin takus para sa selestiyal nga ginharian.”⁶

Ang tanan lamang nga dapat naton buhaton agud mabaton ining langitnon nga tabang amo ang magpangayo sini kag dayon buhaton ang matarong nga mga pagpabatyag nga mabaton naton.

Ang maayong balita amo nga kon sinsero kita nga naghinulsol, ang nagligad naton nga mga sala indi magpugong sa aton nga pakahitaason. Si Moroni nagasiling sa aton parte sa mga malapason sa iya panahon: “Apang subong sa kasami sang ila paghinulsol kag pagpangayo sang kapatawaran, nga may matuod nga tinutuyo, sila ginpatawad.”⁷

Kag ang Ginuo mismo nagsiling parte sa makasasala:

“Kon siya magtuad sang iya mga sala sa inyo kag sa akon, kag nagahinulsol nga may sinsero nga tagipusuon, patawaron ninyo sia, kag patawaron ko man sia.

“Huo, kag subong sa kasami nga ang akon katawhan maghinulsol sila patawaron ko sang ila mga kalapasan batok sa akon.”⁸

Kon kita sinsero nga magahinulsol, ang Dios matuod nga magapatawad, bisan nga kita nakasala sang amo man nga sala paliwatliwat. Subong sa ginhambal ni Elder Jeffrey R. Holland: “Bisan daw ano ka damo nga oportunidad ang naglipas sa inyo, bisan ano ka damo ang mga sayup nga inyo nahimo sa inyo banta … , Nagasaksi ako nga wala kamo nakalab-ot kapin sa malab-ot sang diosnon nga pagpalangga. Indi sarang matabo nga kamo maglugdang sing mas madalum sangsa masilakan sang kasanag sang Pagpasag-uli ni Cristo.”⁹

Ini wala nagakahulogan sa bisan ano nga paagi nga ang sala OK. Ang sala dalayon nga may mga bunga. Ang sala dalayon nga nagasamad kag nagapasakit angay sa makasasala kag sa yadtong naapektohan sang iya mga sala. Ang matuod nga paghinulsol indi gid mahapos.¹⁰ Dugang pa, palihog hangpa nga bisan ginakuha sang Dios ang kabasulanan kag mantsa sang aton mga sala kon sinsero kita nga nagahinulsol, basi indi Niya pagkuhaon sa gilayon ang tanan nga bunga sang aton mga sala. Kon kaisa nagapabilin ang mga ini sa nabilin naton nga mga kabuhi. Kag ang pinakamalala nga sala amo ang ginpinsar antes himuon diin ang isa ka tawo nagasiling, “Sarang ako makasala karon kag maghinulsol sa ulihi.” Nagapati ako nga ini isa ka maligdong nga pagyaguta sa sakripisyo kag mga pag-antus ni JesuCristo.

Ang Ginuo mismo nagpahayag, “Kay Ako ang Ginuo indi makalantaw sa sala nga may pinakadiutay nga pagpasugot.”¹¹

Kag si Alma nagpahayag, “Yari karon, ginasiling ko sa inyo, ang kalautan wala pa gid nangin kalipayan.”¹²

Ang isa sa mga rason kon ngaa ang pahayag ni Alma pinasahi nga matuod amo nga ang paliwatliwat nga paghimo sang sala, nagapalayo sa aton sa Espiritu, nagadula sang paglaum, kag nagapauntat sa aton sa paghinulsol. Apang ginasulit ko, bangud sa Pagpasag-uli sang Manluluwas, sarang kita maghinulsol kag lubos nga mapatawad, sa gilayon nga ang aton paghinulsol sinsero.

Ang indi naton paghimuon amo ang magpanginrason sa luyo nga maghinulsol. Indi maayo ang magpasensya sang aton mga kaugalingon sa aton mga sala paagi sa pagsiling, “Nabal-an sang Dios nga ini tuman ka mabudlay para sa akon, gani ginabaton Niya ako nga subong sini.” Ang “matuod gid nga nagatinguha” nagakahulogan sang pagpadayon naton tubtob lubos nga malab-ot ang talaksan sang Ginuo, maayo nga ginapaathag sa mga pamangkot kon kita magkuha sang temple recommend.

Ang isa pa nga pat-ud nga magpagwa sa aton halin sa langit kag magpalayo sa aton halin sa tabang nga kinahanglan naton karon amo ang pagrebelde. Halin sa libro ni Moses, natun-an naton nga si Satanas ginpalayas sa langit bangud sang pagrebelde.¹³ Nagarebelde kita sa kada tion nga kita nagasiling sa aton mga tagipusuon, “Indi ko kinahanglan ang Dios, kag indi ko kinahanglan ang maghinulsol.”

Bilang isa ka intensive care pediatrician, nabal-an ko nga kon ang tawo di-husto nga magtamay sang makaluwas kabuhi nga bulong, ini sarang magpadulong sa walay pulos nga kamatayon. Pareho, kon nagarebelde kita batok sa Dios, ginatamay naton ang solo nga bulig kag paglaum, nga amo si JesuCristo, nga nagapadulong sa espirituhanon nga kamatayon. Wala sa aton ang makahimo sini sa aton kaugalingon nga gahum. Wala sa aton ang “husto ka maayo” luwas lamang paagi sa grasya kag kalooy ni JesuCristo,¹⁴ apang bangud ginatahud sang Dios ang aton pagpili, indi man kita maluwas kon kita wala nagatinguha. Amo ina kon paano ang balanse sa tunga sang grasya kag binuhatan nagaobra. Sarang kita mag-angkon sang paglaum kay Cristo bangud luyag Niya kita nga buligan kag pabag-ohon. Sa matuod, nagabulig na Sia sa inyo. Mag-untat kag magpainoino kag magtalupangod sang Iya bulig sa inyo kabuhi.

Nagasaksi ako sa inyo nga kon kamo matuod gid nga magtinguha kag indi magpanginrason ukon magrebelde—masami nga nagahinulsol kag nagapangayo sang grasya, ukon tabang, ni Cristo—matuod gid nga kamo mangin “husto ka maayo,” amo nga, mabaton kamo sa atubang sang Ginuo; maluwas kamo sa selestiyal nga ginharian, mangin perpekto kay Cristo; kag kamo magabaton sang mga bugay kag himaya kag kalipay nga luyag sang Dios para sa kada bilidhon Niya nga mga anak—nagalakip gid sa inyo kag sa akon. Nagasaksi ako nga ang Dios buhi kag luyag Niya nga magpauli kita. Nagasaksi ako nga si Jesus nagakabuhi, sa balaan nga ngalan ni JesuCristo, amen.