Kuv Puas Zoo Txaus? Kuv Puas Ua Tau?
Yog nej yuav siv zog ua thiab tsis ntxeev siab—hloov siab lees txim thiab thov kom txais tau Yexus Khetos txoj kev tshav ntuj—ces nej yeej yuav rais los ua neeg “zoo txaus.”
Cov kwv tij thiab cov muam, yog ib txoj koob hmoov uas peb koom ua ke cia tus Tswv cov tub qhe qhia peb. Yeej yog ib qho zoo uas peb Leej Txiv Saum Ntuj Ceeb Tsheej siv ntau yam kom coj peb thiab foom koob hmoov rau peb. Nws yeej xav kom peb rov qab los cuag Nws.
Los ntawm Vajtswv tej kev tshav ntuj uas Nws muab rau kuv thaum kuv yog ib tug kws kho mob uas tab tom kawm kev kho mob tiav, kuv koom ib tug txheej xwm kawm ua ib tug kws kho mob rau cov me nyuam uas nyuaj thiab muaj neeg sib tw ua. Thaum kuv ntsib lwm tus tub ntxhais kawm kev kho mob, ua rau kuv xav tias kuv yog tus tsis txawj ntse tshaj thiab tus uas tsis tau npaj hlo li. Kuv twb xav tias kuv yeej yuav tsis tsim nyog koom nrog lawv.
Tsis ntev tom qab pib lub hlis thib peb, lig lig heev thaum kuv zaum ntawm qhov chaw rau cov neeg tu mob nyob hauv lub tsev kho mob, kuv quaj thiab xav tsaug zog thaum kuv sim sau ntaub ntawv rau ib tug tub hluas uas mob ntsws. Kuv yeej tsis poob siab npaum li no tas kuv lub neej. Kuv yeej tsis tau paub kho ib tug me nyuam tub uas muaj 10 xyoo uas mob ntsws. Kuv pib xav seb vim li cas kuv ua hauj lwm li no.
Tam sim ntawd, ib tug kws kho mob tso nws txhais tes saum kuv xub pwg. Nws nug seb kuv zoo li cas, es kuv qhia nws txog kuv tej kev ntxhov siab thiab tej kev ntshai. Qhov uas nws hais twb hloov kuv lub neej. Nws qhia kuv tias nws thiab tag nrho cov kws kho mob uas ua hauj lwm nyob ntawd zoo siab rau kuv thiab lawv xav tias kuv yuav ua ib tug kws kho mob zoo kawg. Qhov no txhais hais tias, nws tso siab rau kuv thaum ib lub sij hawm uas kuv tsis tso siab rau kuv tus kheej.
Ib yam li kuv, peb cov mej zeej pheej nug hais tias, “Kuv puas yog ib tug neeg zoo txaus?” los sis “Kuv ua puas tau kom ua neeg tsim nyog nyob hauv lub nceeg vaj xilethi-aus?” Yeej tsis muaj ib tug uas yog ib tug neeg “zoo txaus.” Tsis muaj leej twg uas yuav “ua hauj lwm kom txais tau” los yog “tsim nyog txais tau” kev cawm seej, tiam sis kuv to taub tej lus nug no txhais hais tias, neeg feem coob xav paub seb tus Tswv puas lees yuav peb.
Tej lub sij hawm thaum peb koom lub koom txoos, ua rau peb poob siab thaum lwm tus caw peb kom peb ua neeg zoo dua ntxiv. Peb xav rau peb tus kheej hais tias, “Kuv ua tsis tau tag nrho tej yam no” los sis “Kuv yeej yuav tsis zoo npaum li cov neeg no.” Tej zaum peb xav zoo ib yam li kuv xav thaum nyob hauv lub tsev kho mob hmo ntawd.
Kuv cov kwv tij thiab cov muam, thov kom peb tsis txhob muab peb tus kheej piv rau lwm tus. Peb tsim txom peb tus kheej thaum peb nrog lwm tus sib tw thiab piv peb tus kheej rau lawv. Peb txiav txim rau peb tus kheej tsis yog thaum peb saib peb tus kheej rau nqi los ntawm tej yam uas peb muaj los sis tsis muaj thiab los ntawm lwm tus tej kev xav. Yog peb yuav tsum ua li ntawd, cia peb muab peb tus kheej yav tas los piv rau peb tus kheej hnub no—thiab piv rau peb tus kheej thaum yav tom ntej. Tib tug tej kev xav uas muaj nqi tsuas yog peb Leej Txiv Saum Ntuj Ceeb Tsheej tej kev xav txog peb. Cia Nws thov Nws seb Nws xav li cas txog nej. Nws yuav hlub peb thiab Nws yuav qhuab ntuas peb tiam sis nws yeej yuav tsis ua rau peb poob siab; kev poob siab yog Dab Ntxwg Nyoog tej kev ntxias.
Kuv xav hais meej rau nej. Cov lus teb rau tej lus nug “Kuv puas zoo txaus?” thiab “Kuv ua puas tau kom ua neeg tsim nyog?” yog “Zoo txaus! Nej yeej yuav zoo txaus” thiab “Tau mas, nej yeej yuav ua tau kom ua neeg tsim nyog yog nej hloov siab lees txim thiab tsis txhob daws peb tus kheej los yog ntxeev siab.” Vajtswv yeej tsis yog ib tug txiav txim siab tawv uas nrhiav kev muab peb tso pov tseg. Nws yog peb Leej Txiv uas hlub peb kawg siab kawg ntsws, Nws yeej xav kom tag nrho Nws cov me nyuam rov qab los tsev thiab nrog Nws thiab peb tsev neeg nyob mus ib txhis. Nws twb txib Nws Tib Leeg Tub los kom peb thiaj yuav tsis tuag, tiam sis yuav tau txoj sia ntev dhawv mus ib txhis!1 Thov cia li ntseeg, thiab txais kev cia siab thiab kev nplij siab los ntawm qhov tseeb nyob mus ib txhis no. Peb Leej Txiv Saum Ntuj Ceeb Tsheej xav kom peb ua taus! Nov yog Nws txoj hauj lwm thiab Nws lub yeeb koob.2
Kuv nyiam Thawj Tswj Hwm Gordon B. Hinckley txoj kev qhia lub ntsiab cai no. Kuv twb hnov nws hais li no ob peb zaug hais tias, “Cov kwv tij thiab cov muam, tus Tswv xav kom peb siv zog xwb, tiam sis yus yuav tsum siv zog tiag tiag!”3
“Siv zog tiag tiag” txhais hais tias peb ua zoo npaum li peb ua tau, peb pom tej yam peb yuav tsum ua zoo dua, ces peb cia li rov qab sim ua ntxiv. Yog peb pheej rov qab ua li no, peb yuav los nyob ze tus Tswv, peb yuav muaj Nws tus Ntsuj Plig nrog peb nyob ntxiv,4 thiab peb yuav txais tau tus Tswv txoj kev tshav ntuj, los yog Nws txoj kev pab.5
Tej lub sij hawm kuv xav tias peb tsis paub tias tus Tswv xav pab peb npaum li cas. Kuv nyiam Txwj Laug David A. Bednar tej lus, uas hais tias:
“Peb sawv daws feem coob to taub hais tias txoj Kev Theej Txhoj yog rau cov neeg uas ua txhaum. Tiam sis, kuv tsis paub tseeb seb peb puas paub thiab to taub tias txoj Kev Theej Txhoj kuj yog rau ib tsoom haiv neeg ntseeg thiab. …
“… Kev Theej Txhoj pab peb kov yeej thiab dim kev phem thiab pab peb ua zoo thiab rais los ua neeg zoo. …
“‘… Yog … dhau los ntawm tus Tswv txoj kev tshav ntuj tib neeg thiaj li … txais tau dag zog thiab kev pab ua tej yam zoo uas lawv yuav tsis muaj hwj chim [ua] tau. … Kev tshav ntuj no yog ib lub hwj chim uas ua rau lawv muaj peev xwm …’ [Bible Dictionary, “Grace”; ntxiv qhov uas ntawv qaij] … los yog kev pab los ntawm lub ntuj ceeb tsheej uas peb txhua tus xav tau kom tsim nyog txais lub nceeg vaj xilethi-aus.”6
Thiab kom txais tau Vajtswv txoj kev pab li no peb yuav tsum thov xwb ces ua raws li tej kev tshoov siab ncaj ncees uas peb txais tau.
Txoj moo zoo qhia hais tias yog peb hloov siab lees txim tiag tiag, peb tej kev txhaum thaum yav tas los yeej yuav tsis tab kaum peb kom peb tsis txhob txais kev tsa nto. Maulaunais qhia peb txog cov neeg uas ua txhaum hauv nws lub caij nyoog hais tias, “Tiam sis nquag npaum li lawv hloov siab lees txim thiab nrhiav txoj kev zam txim, nrog txoj kev ua tiag tiag, lawv yuav raug zam txim.”7
Thiab tus Tswv hais txog tus neeg ua txhaum li no hais tias:
“Yog tias nws lees nws tej kev txhaum rau koj thiab kuv, thiab hloov siab lees txim tiag tiag ntawm nws lub siab, koj yuav tsum zam txim rau nws, thiab kuv los kuj yuav zam txim rau nws thiab.
Muaj tseeb tiag, thiab npaum li kuv cov neeg yuav nquag hloov siab lees txim kuv yuav zam txim rau lawv tej kev txhaum uas lawv ua rau kuv.”8
Yog peb hloov siab lees txim tiag tiag, Vajtswv yeej yuav zam txim rau peb, txawm peb pheej rov qab ua txhaum zoo ib yam li qub. Raws li Txwj Laug Jeffrey R. Holland hais tias: “Txawm nej xav tias nej lig npaum li cas, txawm nej xav tias tsis muaj cib fim ntxiv, txawm nej tau ua yuam kev npaum li cas … kuv ua tim khawv tias nej tsis tau mus deb txaus kom Vajtswv txoj kev hlub yuav ncav tsis cuag nej. Nej nyob hauv lub qhov tob npaum li cas los Yexus Khetos txoj kev Theej Txhooj tseem yuav ci ntsa iab ua tau txoj kev kaj rau nej.”9
Qhov no tsis txhais hais tias tsis ua li cas yog nej ua txhaum. Kev txhaum yeej yuav ua rau yus raug xwm txheej. Kev txhaum yeej ua tsis zoo rau tus uas ua txhaum thiab cov uas raug nws tej kev txhaum. Thiab kev hloov siab lees txim tiag tiag yeej tsis yooj yim.10 Tsis tas li ntawd xwb, thov cia li to taub tias txawm Vajtswv tshem lub txim thiab qhov ceb ntawm peb tej kev txhaum thaum peb hloov siab lees txim tiag tiag, tej zaum Nws yuav tsis tshem kiag tag nrho tej xwm txheej uas los ntawm peb tej kev txhaum. Tej lub sij hawm tej ntawd yuav nrog peb nyob tas peb lub neej. Thiab qhov txhaum phem tshaj plaws yog qhov txhaum thaum yus xav txog ua ntej hais tias, “Kuv yuav ua txhaum tam sim no thiab hloov siab lees txim thaum yav tom ntej.” Kuv ntseeg tias qhov no yog kev thuam Yexus Khetos txoj kev txi thiab kev raug txom nyem.
Tus Tswv hais tias, “Tus Tswv yeej ntsia tsis taus kev txhaum li txawm yuav yog qhov me dua ntais.”11
Thiab Amas qhia hais tias: “Saib seb, kuv hais rau koj tias, txoj kev phem yeej ib txwm tsis yog txoj kev zoo siab.”12
Amas tej lus muaj tseeb vim thaum peb pheej rov qab ua txhaum, peb ua rau peb tus kheej nyob deb ntawm tus Ntsuj Plig, peb poob siab, ces peb tsis hloov siab lees txim ntxiv. Tiam sis, kuv rov qab hais tias, vim muaj tus Cawm Seej txoj Kev Theej Txhoj, peb muaj peev xwm hloov siab lees txim thiab yuav txais kev zam txim, thaum lub sij hawm uas peb hloov siab lees txim tiag tiag.
Yeej tsis tsim nyog uas peb daws peb tus kheej thiab tsis hloov siab lees txim. Yeej tsis zoo yog peb daws peb tus kheej thaum peb ua txhaum hais tias, “Vajtswv paub tias nyuaj rau kuv, Nws thiaj li txais yuav kuv zoo li no xwb.” “Siv zog tiag tiag” txhais hais tias peb pheej siv zog ua txog thaum lub sij hawm peb ua raws nraim li tus Tswv txoj kev cai, uas muaj nyob hauv tej lus nug peb teb thaum xav tau ib daim ntawv tso cai nkag tuam tsev.
Ib qho ntxiv uas yuav ua rau peb tsis tsim nyog mus saum ntuj ceeb tsheej thiab tav pev kev kom tsis txhob txais kev pab uas peb xav tau tam sim no yog kev ntxeev siab. Los ntawm phau Mauxes, peb kawm hais tias Dab Ntxwg Nyoog raug ntiab tawm ntawm lub ntuj ceeb tsheej vim nws ntxeev siab.13 Peb ntxeev siab thaum twg peb xav nyob hauv peb lub siab hais tias, “Kuv tsis xav tau Vajtswv, thiab kuv tsis tas hloov siab lees txim.”
Thaum kuv yog ib tug kws kho mob rau cov me nyuam, kuv paub tias yog yus xyeej tib txoj kev kho mob uas cawm tau yus, yus thiaj li tuag ntawm sab cev nqaij daim tawv. Zoo ib yam li ntawd, thaum peb ntxeev siab rau Vajtswv, peb xyeej tib tug uas pab tau thiab peb cia siab rau, tus uas yog Yexus Khetos, ntshe ua rau peb tuag ntawm sab ntsuj plig. Peb txhua tus yeej ua tsis tau peb tus kheej. Yeej tsis muaj leej twg uas “zoo txaus,” tsuas yog dhau los ntawm Yexus Khetos tej txiaj ntsim thiab tej kev tshav ntuj,14 tiam sis vim Vajtswv saib peb txoj kev ywj siab xaiv tseem ceeb heev, peb kuj txais tsis tau kev cawm dim yog peb tsis siv zog ua. Kev tshav ntuj thiab kev ua hauj lwm yeej zoo li no. Peb cia siab rau Khetos vim Nws xav pab thiab hloov peb lub siab. Muaj tseeb tiag, Nws tab tom pab nej tam sim no. Cia li xav thiab nco txog Nws txoj kev pab nej hauv nej lub neej.
Kuv ua tim khawv rau nej hais tias yog nej yuav siv zog ua thiab tsis ntxeev siab—hloov siab lees txim thiab thov kom txais tau Yexus Khetos txoj kev tshav ntuj, los yog txoj kev pab—ces nej yeej yuav rais los ua neeg “zoo txaus,” cov uas tus Tswv pom zoo rau; nej yeej nyob hauv lub nceeg vaj xilethi-aus thiab ua neeg uas zoo tag nrho dhau los ntawm Khetos; thiab nej yeej yuav txais cov koob hmoov ntawm lub yeeb koob thiab kev xyiv fab uas Vajtswv xav kom Nws cov me nyuam txhua tus txais tau—tsis hais nej thiab kuv los yog. Kuv ua tim khawv hais tias Vajtswv muaj txoj sia nyob thiab xav kom peb rov qab los cuag Nws. Kuv ua tim khawv tias Yexus Khetos muaj txoj sia nyob. Los ntawm Yexus Khetos lub npe dawb huv, amees.