Yac Nga Wo Fal? Yac Ngwac Fal?

Tamuhlwel ac tahmtahel sacohk, mwe insewowo na luhlahp kuht in toeni in lutiyuck sin mwet kuhlwacnsap luhn Leum. Yac tiac wolacna pihsen ohiyac ma Pahpah luhngse tuhmwacsr Inkuhsrao El kol ac ahkinsewowoye kuht? El arulacna ke kuht in fohlohk nuh yohrohl.

Ke ohiyac pahkotwen ekahsr ma orek ke nga sie taktuh fuhsr tuhfahna sro ke medical school ah, nga lwelahyuck in wi lutlut ke ono ke tuhlihk ke sie prokracm ma fokoko, yurin mwet suhmaht puhs. Ke pacl nga ohsun nuh sin mwet lutlut sahyac ah, nga puhla muh etuh ac ahko luhk uh srihk liki mwet nuh kwewa sahyuck. Nga puhla muh wacngihn ma nga kuh in oruh in sun luhpan suhmaht luhn mwet sahyac in u sacn.

Pacl sa ke mahlwem ahktolu lasr ah, nga muhta ke acn luhn nuhsr ke lohm ono ah ke sie fong, tuhng kuhtuh sihk sifacna ac mwetkweli ke nga srihke orwaclah pwepuh in utyak luhn sie tuhlihk mukul suc maskihn pneumonia. Nga soenna puhla kain wacngihn finsrak inge in moul luhk. Nga nihkihn nuh pwacye ohiyacn onwelah tuhlihk yac 10 suc maskihn pneumonia. Nga muhtwacwacack motko lah efuh nga oasr inge.

Ke na pacl sacn, sie sin mwet lutlut mahtuh ah el sang pahol nuh ke fin pihsuck. El siyuck sihk lah nga fuhkah, ac nga fahkwack fohs ac sahngweng luhk. Top lal ah ekuhllah moul luhk. El sruhmuhn nuh sihk luhpan kaksyak lal ac luhn mwet lutlut mahtuh sahyac ah keik ac lah elos puhla muh ngwac taktuh wowo se. In fototo, el luhlahlfongi keik ke pacl se ma nga tiac luhlahlfongi keik sifacna.

Oacna ohiyac se luhk inge, mempucr lasr uh kwacna siyuck, “Yac nga mwet wo fal se?” kuh “Yac ngwac fal nuh ke tohkohsrahi celestial?” Pwacyena, wacngihn na ohiyac ma “wo fal.” Wacngihn sie sesr fah kuh in “sifacna eis” kuh “fal” ke molwelah lasr uh, tuhsruhk inkaiyacsr uh motko lah kuht insesekihnyuck ye muhtuhn Leum, ac pa inge kalmacn kihsen siyuck inge sihk.

Kuhtuh pacl ke kuht wi alu uh, finsrak lasr uh srihkweni finne ke solsol pwacye in ahkwoye kuht sifacna. Kuht nuhnkuh, “Nga tiac kuh in oruh ma inge nohfohn” kuh “Nga fah tiac eklac wo oacna mwet inge.” Sahp kuht puhla yohk oacna nga tuh puhla ke lohm ono ke fong sacn.

Nuhnak muhnahs, tamuhlwel ac tahmtahel sacohk wiyuck, kuht enenuh in tui tiac kapsrwe kuht sifacna nuh sin mwet sahyac. Kuht ahkngalye kuht sifacna ke wacngihn srihpac ke kuht akuhtuhn ac kapsra. Kuht sesuwohs in nuhnuhnkuh sacohkiyacsr ke ma ma oasr lasr kuh wacngihn lasr kuh ke nuhnak luhn mwet sahyac. Kuht fin enenuh kapsra, lwelah kuht in kapsrwe ohiyacsr met ah nuh ke ohiyacsr mihsenge—ac finne nuh ke ohiyac kuht luhngse eklac nuh kac tok. Nuhnak sefanna kacsr ma yohk srihpac uh pa nuhnak luhn Pahpah tuhmwacsr Inkuhsrao kacsr. Nuhnak muhnahs siyuck Sel ke inse pwacye lah meac El nuhnkuh keiwos. El ac luhngse ac ahksuwohsye kuht tuhsruhk tiac ahksrihkye finsrak lasr; pa ngwacn mwe suhlallacl luhn Satan.

Lwelah ngan suwohs ac kahlwem. Top nuh ke kihsen siyuck “Yac nga wo fal?” ac “Yac ngwac fal?” uh pa “Ahok! Kom fah wo fal” ac “Ahok, kom fah fal nuh kac kom fin kalweni auliyak ac tiac muh wona ma koluk kuh fahsr liki God.” God luhn Inkuhsrao uh El tiac sie referee suhlallacl suc suk srihpac in siskuhtlac liki sritacl uh. El pa Pahpah luhngsetwen suwohsna tuhmwacsr, suc wacngihn ma El luhngse yohk liki na tuhlihk Nahtuhl nuh kwewa in fohlohk nuh yohrohl ac muhta yohrohl in sucu nwe tok. Pwacye El sang Wen Sefanna Nahtuhl tuh kuht in tiac misac tuhsruhk kuh in eis moul ma pahtpaht!¹ Nuhnak muhnahs luhlahlfongi, ac nuhnak muhnahs puhla finsrak ac mihs, ke ma pwacye ma pahtpaht se inge. Pahpah tuhmwacsr Inkuhsrao El plwacn tuh kuht in fal! Pa inge orekma Lal ac wolacna Lal.²

Nga luhngse ohiyac ma Prestuhn Gordon B. Hinckley el luti ip yohk se inge. Nga lohng el fahk pacl ekahsr, “Tamuhlwel ac tahmtahel, ma sefanna Leum El enenuh sesr pa in srihke, tuhsruhk kom enenuh in srihke nuh pwacye!”³

Kalmacn “srihke nuh pwacye” uh pa kuht sang kuhiyacsr nohfohn, akihlen ohiyac ma kuht enenuh ahkwoye, na sifilpac srihke. Ke kuht kalweni oruh ohinge, kuht fototoeni nuh sin Leum, kuht puhla Nguhn Lal yohk,⁴ ac kuht eis yohk pahkotwen Lal, kuh kahsruh lal.⁵

Kuhtuh pacl nga muh kuht tiac akihlen lah fuhkah luhpan kena luhn Leum in kahsruh kuht. Nga luhngse kahs luhn Elder David A. Bednar, suc fahk:

“Inkaiyacsr kahlwem lah Iwaclah uh ma nuh sin mwet koluk. Nga nihkihn, finne ohinge, lah kuht etuh ac kahlwem lah Iwaclah uh ma pac nuh sin mwet wo. …

“… Iwaclah uh kahsruh kuht in kuhtanglah ac sensenkihn ma koluk ac in oruh ac eklac wo. …

“‘… Pa … ke pahkotwen luhn Leum ma mwet uh … eis kuh ac kahsruh in oruh orekma wo ma sahyacn ohinge elos fah tiac kuh in [oruh]. … Pahkotwen inge uh sie mwe ahkkuh …’ [Bible Dictionary, “Grace”; ahkuhtweyac wo ituckyang] … kuh kahsruh inkuhsrao me ma kais sie sesr enenuh nuh pwacye in kuh in fal nuh ke tohkohsrahi celestial.”⁶

Ma na kuht enenuh in oruh in eis kahsruh inkuhsrao inge uh pa in siyuck kac na mukwikwi ke puhla suwohs ma kuht eis uh.

Pweng wo uh pa lah kuht fin auliyak pwacye, ma koluk lasr met ah fah tiac kosrwekuht liki moul ma pahtpaht. Moroni el fahk ke mwet koluk in lwen lal, “Tuhsruhk ke elos auliyak ac suk nuhnakmuhnahs, ke inse pwacye, elos tuhlweyucklac.”⁷

Ac Leum El sifacna fahk ke mwet koluk:

“Fin el taltal ke ma koluk lal ye motom ac Nga, ac auliyak ke pwacyeiyacn insiacl, kom fah nuhnak muhnahs nuh sel, ac Nga fah oacyacpac nuhnak muhnahs nuh sel.

“Ahok, ac mwet Luhk fin kwacna auliyak Nga fah nuhnak muhnahs nuh selos ke ma koluk lalos ma sang lainyuc.”⁸

Kuht fin auliyak pwacye, pwacye lah God El fah sang nuhnak muhnahs nuh sesr, finne kuht sifilpac oruh ma koluk se pacna. Oacna Elder Jeffrey R. Holland el fahk: “Kom finne muh puhs pacl lom tari, kom finne muh puhs tahfonglac kom orwaclah… , nga fahkwack nuh sum muh kom soenna som ahluhkwelah kuh luhn luhngse muhtahl. Kom tiac kuh in puhtati nuh ke acn ma kahlwem ma pahtpaht luhn Iwaclah luhn Kraist uh tiac kuh in kalmwelihk.”⁹

Tiac kalmac pa wona ma koluk uh. Oasr ma orek tok pacl nuh kwewa ke ma koluk. Ma koluk uh ahkkolukye ac ahkngalye kwewana mwet oruh ma koluk uh ac elos suc puhlakihn ma koluk lal. Ac auliyak pwacye uh tiacna fihsrwacsr.¹⁰ Ohinge, nuhnak muhnahs kahlwem lah finne God El eislah mwacta ac fohkfohk luhn ma koluk lasr ke kuht auliyak pwacye uh, El ac sahp tiac sa eislah nohfohnna ma orek ke srihpen ma koluk lasr. Kuhtuh pacl uh ma inge oasr yohrohsr ke moul lasr nohfohn. Ac kain ma koluk ma koluk emet uh pa ma koluk plwacniyuck ma mwet se el fahk, “Nga kuh in oruh ma koluk ingena ac auliyak tok.” Nga luhlahlfongi muh pa inge sie mwe isrucn suwohs ke iwaclah ac kweok luhn Jisus Kraist.

Leum El sifacna fahk lah El tiac kuh in liye ma koluk ke kuhtwena ohiyacn lwelah.¹¹

Ac Alma el fahk, “Liye, nga fahk nuh sum, ma koluk tiacna pa engan.”¹²

Sie sin srihpac ma fahk lal Alma uh arlac pwacye pa lah ke ma koluk kalweniyuck, kuht sifacna fahsrwelihk liki Nguhn, finsrak uh wacngihnlac, na kuht tui auliyak. Tuhsruhk nga sifilpac fahk, ke srihpen Iwaclah luhn Mwet Lahngo, kuht kuh in auliyak ac tuhlweyucklac nohfohn, ke na pacl se auliyak lasr uh pwacye.

Ma se kuht tiac kuh in oruh uh pa in fahk muh wona sahyacn auliyak. Ac fah tiac fal kuht in nuhnuhnkuh tuh kuht suwohs in ma koluk lasr in fahk, “God El etuh muh upaclaclac sihk, oruh El ahokkuhnyuclac na ke ohiyuck.” Kalmacn “srihke nuh pwacye” uh pa kuht kampare nohfohn ke kuht sun ohiyac suwohs luhn Leum, suc ma ahkuhtweyucki kahlwem ke kihsen siyuck ma siyuckyuck sesr kuht in kuh in eis pwepuh in lwelah nuh ke tempuhl.

Ma se sahyac ma fah kosrwekuhtlac nuh pwacye liki inkuhsrao ac srwekuhtlac liki kahsruh ma kuht enenuh ingena uh pa ohiyacn lain. Ke puk luhn Moses, kuht etwaclah muh Satan el sisilac liki inkuhsrao ke srihpen ohiyac lain.¹³ Kuht oasr ke ohiyacn lain kuhtwena pacl kuht fahk ke insiyacsr, “Nga tiac enenuh God, ac nga tiac enenuh auliyak.”

Ke nga taktuh luhn tuhlihk ah, nga etuh lah fin mwet se suhtuhelac in srahngwesr ono in molwelah, kuh in kol ke wacngihn srihpac nuh ke misac luhn mahno. Kain ohiyac sac pacna, ke kuht lain God, kuht lain kahsruh ac finsrak sefanna, suc pa Jisus Kraist, suc ma kol nuh ke misac luhn Nguhn. Wacngihn sie sesr kuh in orwaclah ke kuh lasr sifacna. Wacngihn sie sesr fah “wo fal,” sahyacn ke orekma ac pahkotwen luhn Jisus Kraist,¹⁴ tuhsruhk mweyen God El ahkfuhlwactye kuh in sulaclah lasr uh, kuht oacyacpac tiac kuh in moliyucklac kuht fin tiac srihke. Pa inge ohiyac ma pahkotwen ac orekma uh tuhkweni orekmakihnyuck. Kuh in oasr finsrak lasr in Kraist mweyen El ke kahsruh kuht ac ikihlkuhtlac. Pwacyena, El kahsruh kom tari. Tui wihn ac motko ac akihlen kahsruh Lal in moul lom.

Nga fahkwack nuh suwos lah kowos fin ac srihke nuh pwacye ac tiac fahk muh wona ma koluk kuh lain—kwacna auliyak ac siyuck ke pahkotwen, kuh kahsruh, luhn Kraist—pwacye na lah kowos fah “wo fal,” in muh, ahokkihnyucklac ye muhtuhn Leum; kowos fah fal nuh ke tohkohsrahi celestial ahksuwohsyeyucklac in Kraist; ac kowos fah eis mwe insewowo ac wolacna ac engan ma God el kena tuh kais sie sin tuhlihk sacohk Nahtuhl in eis uh—wi pac kowos ac nga. Nga fahkwack lah God El moul ac El ke kuht in fohlohk nuh Yohrohl. Nga fahkwack tuh Jisus El moul. Ke ine muhtahl luhn Jisus Kraist, amen.