ຂ້ອຍເປັນຄົນດີພໍແລ້ວບໍ? ຂ້ອຍຈະໄປເຖິງບໍ?
ຂ້າພະເຈົ້າເປັນພະຍານຕໍ່ທ່ານວ່າ ຖ້າຫາກທ່ານຈະພະຍາຍາມອີ່ຫລີ ແລະ ຈະບໍ່ອ້າງເຫດຜົນ ຫລື ກະບົດ—ກັບໃຈເລື້ອຍໆ ແລະ ທູນຂໍພຣະຄຸນ ຫລື ຄວາມຊ່ວຍເຫລືອ ຈາກພຣະຄຣິດ—ແນ່ນອນທ່ານຈະ “ດີພໍ.”
ອ້າຍເອື້ອຍນ້ອງທີ່ຮັກແພງ ເປັນພອນອັນຍິ່ງໃຫຍ່ສຳລັບເຮົາທີ່ໄດ້ມາຮ່ວມກັນ ເພື່ອຮັບຄຳສອນຈາກຜູ້ຮັບໃຊ້ຂອງພຣະຜູ້ເປັນເຈົ້າ. ວິທີທີ່ພຣະບິດາເທິງສະຫວັນໄດ້ຮັກ, ນຳທາງ, ແລະ ອວຍພອນເຮົາ ແມ່ນໜ້າອັດສະຈັນໃຈຫລາຍ ແມ່ນບໍ? ພຣະອົງຢາກໃຫ້ເຮົາກັບໄປຫາພຣະອົງຫລາຍແທ້ໆ.
ໂດຍທີ່ໄດ້ຮັບພອນຢ່າງເມດຕາປານີ ຕອນທີ່ຂ້າພະເຈົ້າໃກ້ຈົບຮຽນເປັນນາຍໝໍ ຂ້າພະເຈົ້າໄດ້ຖືກຮັບເຂົ້າໂຄງການອັນຍາກ ເພື່ອເປັນນາຍໝໍສຳລັບເດັກນ້ອຍ. ເມື່ອຂ້າພະເຈົ້າໄດ້ພົບນາຍໝໍເຝິກງານຄົນອື່ນໆ ຂ້າພະເຈົ້າຮູ້ສຶກວ່າ ຂ້າພະເຈົ້າເປັນຄົນບໍ່ພ້ອມທີ່ສຸດໃນໝູ່. ຂ້າພະເຈົ້າໄດ້ຄິດວ່າ ຕົວເອງທຽບສູ້ກັບຄົນອື່ນບໍ່ໄດ້.
ໃນຕົ້ນຂອງເດືອນທີສາມ ເວລາເດິກໆຂອງຄືນໜຶ່ງ ຂ້າພະເຈົ້າໄດ້ນັ່ງຮ້ອງໄຫ້ ພ້ອມກັບງ້ວງນອນຂະນະທີ່ພະຍາຍາມຂຽນເອກະສານສົ່ງເດັກຊາຍນ້ອຍທີ່ມີໂຣກປອດບວມໄປເຂົ້າໂຮງໝໍ. ຂ້າພະເຈົ້າບໍ່ເຄີຍທໍ້ຖອຍໃຈຊ່ຳນີ້ມາກ່ອນ. ຂ້າພະເຈົ້າບໍ່ຮູ້ວ່າຈະເຮັດຈັ່ງໃດເລີຍ ເພື່ອປິ່ນປົວໂຣກປອດບວມ. ຂ້າພະເຈົ້າໄດ້ເລີ່ມສົງໄສວ່າ ເປັນຫຍັງຂ້າພະເຈົ້າໄດ້ຢູ່ຫັ້ນ.
ໃນເວລານັ້ນເອງ ມີນາຍໝໍຜູ້ຊັ້ນສູງ ໄດ້ວາງມືໃສ່ບ່າໄຫລ່ຂອງຂ້າພະເຈົ້າ. ເພິ່ນຖາມວ່າ ຂ້າພະເຈົ້າເປັນຈັ່ງໃດ ແລະ ຂ້າພະເຈົ້າໄດ້ສະແດງຄວາມທໍ້ຖອຍ ແລະ ຄວາມຢ້ານຂອງຕົນ. ຄຳເວົ້າຂອງເພິ່ນໄດ້ປ່ຽນຊີວິດຂອງຂ້າພະເຈົ້າ. ເພິ່ນບອກຂ້າພະເຈົ້າວ່າ ເພິ່ນ ແລະ ນາຍໝໍຜູ້ຊັ້ນສູງທຸກຄົນພູມໃຈນຳຂ້າພະເຈົ້າ ແລະ ພວກເພິ່ນຮູ້ສຶກວ່າ ຂ້າພະເຈົ້າຈະເປັນນາຍໝໍທີ່ດີ. ໂດຍສະຫລຸບ ເພິ່ນມີຄວາມໝັ້ນໃຈໃນຕົວຂອງຂ້າພະເຈົ້າ ຕອນທີ່ຂ້າພະເຈົ້າບໍ່ໝັ້ນໃຈກັບຕົວເອງ.
ຕາມປະສົບການຂອງຂ້າພະເຈົ້າ, ສະມາຊິກຂອງພວກເຮົາ ມັກຖາມເລື້ອຍໆວ່າ, “ຂ້ອຍເປັນຄົນດີພໍແລ້ວບໍ?” ຫລື “ຂ້ອຍໄປເຖິງອານາຈັກຊັ້ນສູງໄດ້ແທ້ບໍ?” ທີ່ຈິງກໍບໍ່ມີ “ດີພໍ.” ບໍ່ມີຜູ້ໃດທີ່ສາມາດ “ຊື້” ຫລື “ເໝາະສົມ” ກັບຄວາມລອດຂອງເຮົາ, ແຕ່ເປັນສິ່ງທຳມະດາທີ່ສົງໄສວ່າ ຕົວເຮົາເອງຈະເປັນທີ່ຍອມຮັບຕໍ່ພຣະຜູ້ເປັນເຈົ້າຫລືບໍ່, ຊຶ່ງແມ່ນຄວາມເຂົ້າໃຈຂອງຂ້າພະເຈົ້າກ່ຽວກັບຄຳຖາມນີ້.
ບາງເທື່ອຕອນທີ່ເຮົາໄປໂບດ ເຮົາຈະທໍ້ຖອຍໃຈແມ່ນແຕ່ຈາກການເຊື້ອເຊີນອັນຈິງໃຈ ເພື່ອໃຫ້ປັບປຸງຕົວເອງ. ເຮົາມັກຄິດຢ່າງງຽບໆວ່າ “ຂ້ອຍເຮັດທັງໝົດນີ້ບໍ່ໄດ້” ຫລື “ຂ້ອຍຊິດີເທົ່າກັບຜູ້ຄົນເຫລົ່ານີ້ບໍ່ໄດ້ເລີຍ.” ບາງທີເຮົາຮູ້ສຶກຄ້າຍຄືກັນກັບ ຕອນທີ່ຂ້າພະເຈົ້າຮູ້ສຶກໃນຄືນນັ້ນຢູ່ຄະລີນິກ.
ກະລຸນາ, ອ້າຍເອື້ອຍນ້ອງທີ່ຮັກແພງ ເຮົາຕ້ອງຢຸດປຽບທຽບຕົວເອງໃສ່ກັບຄົນອື່ນ. ເຮົາທໍລະມານຕົວເອງຢ່າງບໍ່ຈຳເປັນ ເມື່ອເຮົາແຂ່ງຂັນກັນ ແລະ ປຽບທຽບ. ເຮົາຕັດສິນຄຸນຄ່າຕົວເອງໂດຍ ສິ່ງ ທີ່ເຮົາມີ ບໍ່ມີ ແລະ ໂດຍ ຄວາມຄິດເຫັນຂອງຄົນອື່ນ. ຖ້າເຮົາຕ້ອງປຽບທຽບ ຂໍໃຫ້ເຮົາປຽບທຽບອະດີດຂອງເຮົາເອງ ໃສ່ກັບຕົວເຮົາໃນປະຈຸບັນ—ແລະ ກັບຕົວເຮົາຢາກເປັນໃນອະນາຄົດ. ຄວາມຄິດເຫັນອັນດຽວທີ່ສຳຄັນແມ່ນພຣະບິດາເທິງສະຫວັນຄິດເຖິງເຮົາຈັ່ງໃດ. ໃຫ້ທູນຖາມພຣະອົງດ້ວຍຄວາມຈິງໃຈ ວ່າພຣະອົງຄິດກັບທ່ານຢ່າງໃດ. ພຣະອົງຈະຮັກ ແລະ ຈະແກ້ໄຂເຮົາ ແຕ່ບໍ່ເຄີຍເຮັດໃຫ້ເຮົາທໍ້ຖອຍໃຈເລີຍ; ນັ້ນຄືວິທີການຫລອກຕົ້ມຂອງຊາຕານ.
ຂ້າພະເຈົ້າຂໍເວົ້າຊື່ຕົງ ແລະ ແຈ່ມແຈ້ງ. ຄຳຕອບຕໍ່ຄຳຖາມທີ່ວ່າ “ຂ້ອຍເປັນຄົນດີພໍແລ້ວບໍ?” ແລະ “ຂ້ອຍຈະໄປເຖິງບໍ?” ກໍຄື “ແມ່ນແລ້ວ! ທ່ານຈະເປັນຄົນດີພໍ” ແລະ “ແມ່ນແລ້ວ ທ່ານຈະໄປເຖິງ ຖ້າຫາກທ່ານກັບໃຈຕະຫລອດ ແລະ ບໍ່ອ້າງເຫດຜົນ ຫລື ກະບົດ.” ພຣະເຈົ້າແຫ່ງສະຫວັນບໍ່ແມ່ນກຳມະການແຫ່ງສະຫວັນທີ່ກຳລັງຫາເຫດຜົນໃດໜຶ່ງທີ່ຈະໄລ່ເຮົາອອກເລີຍ. ພຣະອົງເປັນພຣະບິດາຂອງເຮົາທີ່ຮັກຢ່າງບໍລິບູນ ຜູ້ທີ່ຫລາຍກວ່າສິ່ງອື່ນ ຢາກໃຫ້ລູກຂອງພຣະອົງທຸກຄົນກັບບ້ານ ແລະ ໄປຢູ່ກັບພຣະອົງໃນຖານະເປັນຄອບຄົວຊົ່ວນິລັນດອນ. ພຣະອົງໄດ້ມອບພຣະບຸດອົງດຽວທີ່ຖືກຳເນີດຂອງພຣະອົງ ເພື່ອເຮົາຈະບໍ່ຕາຍ ແຕ່ມີຊີວິດອັນຕະຫລອດໄປເປັນນິດ!1 ກະລຸນາເຊື່ອ ແລະ ກະລຸນາຮັບເອົາຄວາມຫວັງ ແລະ ຄວາມປອບໂຍນຈາກຄວາມຈິງອັນນິລັນນັ້ນ. ອ້າຍເອື້ອຍນ້ອງ ພຣະບິດາເທິງສະຫວັນມີເຈດຕະນາໃຫ້ເຮົາໄປເຖິງພຣະອົງ. ນັ້ນຄືວຽກງານຂອງພຣະອົງ ແລະ ລັດສະໝີພາບຂອງພຣະອົງ.2
ຂ້າພະເຈົ້າຮັກວິທີທີ່ປະທານກໍດອນ ບີ ຮິງລີ ສອນຫລັກທຳນີ້. ຂ້າພະເຈົ້າໄດ້ຍິນເພິ່ນເວົ້າຫລາຍເທື່ອວ່າ, “ອ້າຍເອື້ອຍນ້ອງທັງຫລາຍ ສິ່ງດຽວທີ່ພຣະຜູ້ເປັນເຈົ້າຄາດຫວັງຈາກເຮົາ ແມ່ນໃຫ້ພະຍາຍາມເທົ່ານັ້ນ, ແຕ່ທ່ານຕ້ອງພະຍາຍາມ ອີ່ຫລີ!”3
ການ “ພະຍາຍາມອີ່ຫລີ” ໝາຍຄວາມວ່າ ເຮົາເຮັດດີທີ່ສຸດ ໂດຍຮັບຮູ້ສິ່ງທີ່ເຮົາຕ້ອງປັບປຸງ ແລ້ວພະຍາຍາມອີກ. ໂດຍການເຮັດຢ່າງນີ້ຊ້ຳໆ ເຮົາໄດ້ເຂົ້າໃກ້ພຣະຜູ້ເປັນເຈົ້າຫລາຍຂຶ້ນ; ເຮົາຮູ້ສຶກເຖິງພຣະວິນຍານຂອງພຣະອົງຫລາຍຂຶ້ນ,4 ແລະ ເຮົາຮັບເອົາພຣະຄຸນ ຫລື ຄວາມຊ່ວຍເຫລືອຂອງພຣະອົງຫລາຍຂຶ້ນ.5
ຂ້າພະເຈົ້າຄິດວ່າ ບາງເທື່ອເຮົາບໍ່ຮັບຮູ້ວ່າ ພຣະຜູ້ເປັນເຈົ້າຢາກຊ່ວຍເຮົາຫລາຍເທົ່າໃດ. ຂ້າພະເຈົ້າມັກຄຳຂອງແອວເດີ ເດວິດ ເອ ແບ໊ດນາ, ທີ່ວ່າ:
“ພວກເຮົາສ່ວນຫລາຍເຂົ້າໃຈວ່າ ການຊົດໃຊ້ແມ່ນເພື່ອຄົນເຮັດບາບ. ແຕ່ຂ້າພະເຈົ້າບໍ່ແນ່ໃຈວ່າ ເຮົາຮູ້ ແລະ ເຂົ້າໃຈຫລືບໍ່ວ່າ ການຊົດໃຊ້ກໍແມ່ນເພື່ອຄົນດີເໝືອນກັນ. …
“... ການຊົດໃຊ້ຍ່ອມຊ່ວຍເຫລືອພວກເຮົາໃຫ້ເອົາຊະນະ ແລະ ຫລີກເວັ້ນຈາກຄວາມຊົ່ວ ແລະ ເພື່ອເຮັດ ແລະ ກາຍເປັນຄົນດີ. …
“‘… ມັນກໍ ... ເປັນໂດຍທາງພຣະຄຸນຂອງພຣະຜູ້ເປັນເຈົ້າທີ່ຄົນ ... ໄດ້ຮັບກຳລັງ ແລະ ຄວາມຊ່ວຍເຫລືອເພື່ອເຮັດສິ່ງທີ່ດີ ຊຶ່ງທຳມະດາເຂົາເຈົ້າຊິບໍ່ສາມາດເຮັດໄດ້ ... ພຣະຄຸນດັ່ງກ່າວນີ້ແມ່ນອຳນາດທີ່ຊ່ວຍເຮັດ …’ [Bible Dictionary, “ພຣະຄຸນ”; ເນັ້ນຄຳເນີ້ງ] … ຫລື ແມ່ນຄວາມຊ່ວຍເຫລືອຈາກສະຫວັນ ທີ່ພວກເຮົາທຸກຄົນຕ້ອງການ ເພື່ອຈະເໝາະສົມສຳລັບອານາຈັກຊັ້ນສູງ.”6
ສິ່ງທີ່ເຮົາຕ້ອງເຮັດເພື່ອຮັບຄວາມຊ່ວຍເຫລືອຈາກສະຫວັນດັ່ງກ່າວນີ້ ແມ່ນທີ່ຈະຂໍ ແລ້ວຕ້ອງເຮັດຕາມຄວາມຮູ້ສຶກອັນຊອບທຳທີ່ເຮົາໄດ້ຮັບ.
ຂ່າວດີແມ່ນ ຖ້າຫາກເຮົາໄດ້ກັບໃຈຢ່າງຈິງຈັງ ບາບເກົ່າຂອງເຮົາຈະບໍ່ກີດກັນເຮົາຈາກຄວາມສູງສົ່ງ. ໂມໂຣໄນບອກເຮົາກ່ຽວກັບຄົນເຮັດບາບໃນສະໄໝຂອງເພິ່ນວ່າ, “ແຕ່ວ່າທຸກເທື່ອທີ່ເຂົາກັບໃຈ ແລະ ສະແຫວງຫາການຍົກໂທດດ້ວຍເຈດຕະນາອັນແທ້ຈິງ, ເຂົາກໍໄດ້ຮັບການອະໄພ.”7
ແລະ ພຣະຜູ້ເປັນເຈົ້າເອງໄດ້ກ່າວກ່ຽວກັບຜູ້ເຮັດບາບວ່າ:
“ຖ້າຫາກເຂົາສາລະພາບບາບທີ່ເຂົາໄດ້ກະທຳມານັ້ນຕໍ່ໜ້າເຈົ້າ ແລະ ຕໍ່ໜ້າເຮົາ, ແລະ ກັບໃຈດ້ວຍຄວາມຈິງໃຈຂອງເຂົາ, ແລ້ວເຈົ້າຈົ່ງໃຫ້ອະໄພແກ່ເຂົາ, ແລະ ເຮົາຈະໃຫ້ອະໄພແກ່ເຂົາຄືກັນ.
“ແທ້ຈິງແລ້ວ, ເຖິງແມ່ນວ່າຜູ້ຄົນຂອງເຮົາຈະກັບໃຈເທົ່າໃດເທື່ອກໍຕາມ ເຮົາກໍຈະໃຫ້ອະໄພແກ່ເຂົາສຳລັບການລ່ວງລະເມີດຂອງເຂົາທີ່ມີຕໍ່ເຮົາ.”8
ຖ້າຫາກເຮົາຈະກັບໃຈຢ່າງຈິງໃຈ, ພຣະເຈົ້າຈະໃຫ້ອະໄພແກ່ເຮົາແທ້ໆ ເຖິງແມ່ນເຮົາໄດ້ເຮັດບາບອັນດຽວກັນຊ້ຳແລ້ວຊ້ຳອີກກໍຕາມ. ດັ່ງທີ່ແອວເດີ ແຈັບຟະຣີ ອາ ຮໍແລນ ໄດ້ກ່າວ: “ບໍ່ວ່າທ່ານຈະຄິດວ່າ ທ່ານພາດໂອກາດໄປແລ້ວຈັກເທື່ອ, ບໍ່ວ່າທ່ານຈະຮູ້ສຶກວ່າ ທ່ານໄດ້ເຮັດຜິດພາດຫລາຍເທົ່າໃດ … , ຂ້າພະເຈົ້າເປັນພະຍານວ່າ ທ່ານຍັງ ບໍ່ໄດ້ ເດີນທາງໄກເກີນໄປ ຈົນວ່າຄວາມຮັກແຫ່ງສະຫວັນຂອງພຣະເຈົ້າ ເອື້ອມບໍ່ເຖິງດອກ. ເປັນໄປບໍ່ໄດ້ທີ່ທ່ານຈະຈົມລົງເລິກເກີນໄປ ຈົນວ່າຄວາມສະຫວ່າງອັນບໍ່ມີຂອບເຂດແຫ່ງການຊົດໃຊ້ຂອງພຣະຄຣິດ ສ່ອງບໍ່ເຖິງດອກ.”9
ອັນນີ້ບໍ່ໝາຍຄວາມຢ່າງເດັດຂາດວ່າ ບໍ່ເປັນຫຍັງທີ່ຈະເຮັດບາບ. ບາບຈະມີຜົນສະທ້ອນທຸກເທື່ອ. ທຸກເທື່ອ ບາບຈະທຳຮ້າຍ ແລະ ເຮັດໃຫ້ທັງຄົນທີ່ເຮັດບາບ ພ້ອມດ້ວຍຄົນທີ່ຮັບເຄາະ ໄດ້ຮັບຄວາມເຈັບປວດ. ແລະ ການກັບໃຈແທ້ໆ ບໍ່ເຄີຍເປັນສິ່ງງ່າຍ.10 ຫລາຍກວ່ານັ້ນ ຂໍໃຫ້ເຂົ້າໃຈວ່າ ເຖິງແມ່ນພຣະເຈົ້າຈະເອົາຄວາມເຈັບຊ້ຳໃຈ ແລະ ຮອຍເປື້ອນແຫ່ງບາບອອກໄປ ເມື່ອໃດທີ່ເຮົາກັບໃຈຢ່າງຈິງໃຈ, ບາງເທື່ອພຣະອົງບໍ່ເອົາຜົນສະທ້ອນຈາກບາບ ອອກໄປຈາກເຮົາທັນທີ. ບາງເທື່ອຜົນສະທ້ອນດັ່ງກ່າວຈະຢູ່ນຳເຮົາຕະຫລອດຊີວິດ. ແລະ ບາບທີ່ຮ້າຍແຮງທີ່ສຸດ ແມ່ນບາບທີ່ຕັ້ງໃຈໄວ້ລ່ວງໜ້າທີ່ຈະເຮັດ ຄືຄົນຈະວ່າ, “ຂ້ອຍເຮັດບາບດຽວນີ້ກໍໄດ້ ແລ້ວຊິກັບໃຈພາຍຫລັງ.” ຂ້າພະເຈົ້າເຊື່ອວ່າ ການເຮັດຈັ່ງຊີ້ ແມ່ນການເຍາະເຍີ້ຍການເສຍສະລະ ແລະ ການທົນທຸກທໍລະມານຂອງພຣະເຢຊູຄຣິດ.
ພຣະຜູ້ເປັນເຈົ້າເອງໄດ້ປະກາດວ່າ, ພຣະອົງບໍ່ອາດມອງເຫັນບາບ ດ້ວຍລະດັບຄວາມຍິນຍອມແມ່ນແຕ່ໜ້ອຍດຽວ.11
ແລະ ແອລມາໄດ້ປະກາດວ່າ, “ຈົ່ງເບິ່ງພໍ່ເວົ້າກັບລູກວ່າ ຄວາມຊົ່ວຮ້າຍບໍ່ເຄີຍເປັນຄວາມສຸກເລີຍ.”12
ເຫດຜົນໜຶ່ງທີ່ຄຳເວົ້າຂອງແອວມາເປັນຄວາມຈິງກໍຍ້ອນວ່າ ເມື່ອເຮັດບາບຊ້ຳແລ້ວຊ້ຳອີກ ເຮົາໄດ້ຍອມແຍກຕົວເອງອອກຈາກພຣະວິນຍານ, ເລີ່ມທໍ້ຖອຍໃຈ, ແລ້ວຢຸດກັບໃຈ. ແຕ່ຂ້າພະເຈົ້າເວົ້າອີກວ່າ, ເປັນຍ້ອນການຊົດໃຊ້ຂອງພຣະຜູ້ຊ່ວຍໃຫ້ລອດ ເຮົາຈຶ່ງສາມາດກັບໃຈໄດ້ ແລະ ໄດ້ຮັບການໃຫ້ອະໄພຢ່າງເຕັມທີ່ ທັນທີທີ່ເຮົາກັບໃຈຢ່າງຈິງໃຈ.
ແຕ່ເຮົາບໍ່ສາມາດອ້າງເຫດຜົນແທນການກັບໃຈ. ມັນບໍ່ມີປະໂຫຍດທີ່ຈະພະຍາຍາມຫາຂໍ້ແກ້ຕົວ ໃນຕອນເຮັດບາບ ໂດຍການເວົ້າວ່າ, “ພຣະເຈົ້າຮູ້ວ່າ ມັນຍາກໂພດສຳລັບຂ້າພະເຈົ້າ ດັ່ງນັ້ນພຣະອົງຈຶ່ງຍອມຮັບຂ້າພະເຈົ້າ ຕາມທີ່ຂ້າພະເຈົ້າເປັນຢູ່.” “ການພະຍາຍາມອີ່ຫລີ” ໝາຍຄວາມວ່າ ເຮົາເຮັດເລື້ອຍໆ ຂະນະທີ່ເຮົາໄປຮອດມາດຕະຖານແທ້ໆຂອງພຣະຜູ້ເປັນເຈົ້າ, ຊຶ່ງໄດ້ຈັດໄວ້ຢ່າງແຈ່ມແຈ້ງໃນຄຳຖາມທີ່ເຮົາຖືກຖາມ ເພື່ອຈະໄດ້ໃບຮັບຮອງເຂົ້າພຣະວິຫານ.
ອີກສິ່ງໜຶ່ງທີ່ຈະກີດກັນເຮົາຈາກສະຫວັນຂອງເຮົາ ແລະ ແຍກເຮົາອອກຈາກຄວາມຊ່ວຍເຫລືອທີ່ເຮົາຕ້ອງການ ຄືການກະບົດ. ຢູ່ໃນໜັງສືໂມເຊ ເຮົາຮຽນຮູ້ວ່າ ຊາຕານໄດ້ຖືກໄລ່ອອກຈາກສະຫວັນ ຍ້ອນການກະບົດ.13 ເຮົາກຳລັງກະບົດ ເມື່ອໃດທີ່ເຮົາເວົ້າໃນໃຈວ່າ, “ເຮົາບໍ່ຕ້ອງການພຣະເຈົ້າ ແລະ ເຮົາບໍ່ຕ້ອງກັບໃຈ.”
ໃນຖານະເປັນໝໍສຳລັບເດັກນ້ອຍ ຂ້າພະເຈົ້າຮູ້ວ່າ ຖ້າຫາກຄົນປະຕິເສດການປິ່ນປົວທີ່ຈະໄວ້ຊີວິດ ມັນອາດຈະນຳໄປສູ່ຄວາມຕາຍທີ່ບໍ່ຈຳເປັນ. ຄືກັນກັບສິ່ງນີ້ ເມື່ອເຮົາກະບົດຕໍ່ພຣະເຈົ້າ ເຮົາກໍປະຕິເສດຄວາມຊ່ວຍເຫລືອ ແລະ ຄວາມຫວັງອັນດຽວຂອງເຮົາ ນັ້ນຄື ພຣະເຢຊູຄຣິດ ຊຶ່ງນຳໄປສູ່ຄວາມຕາຍທາງວິນຍານ. ບໍ່ມີຜູ້ໃດເລີຍທີ່ເຮັດສິ່ງນີ້ໄດ້ໂດຍອຳນາດຂອງຕົວເອງ. ບໍ່ມີຜູ້ໃດເລີຍທີ່ຈະ “ດີພໍ” ນອກຈາກໂດຍທາງພຣະຄຸນ ແລະ ພຣະເມດຕາຂອງພຣະຄຣິດ,14 ແຕ່ເພາະພຣະເຈົ້ານັບຖືອຳເພີໃຈຂອງເຮົາ ເຮົາຈຶ່ງບໍ່ສາມາດລອດໄດ້ ຖ້າຫາກເຮົາບໍ່ພະຍາຍາມ. ນັ້ນຄືຄວາມສົມດູນລະຫວ່າງພຣະຄຸນ ແລະ ວຽກງານ. ເຮົາມີຄວາມຫວັງໃນພຣະຄຣິດໄດ້ ເພາະພຣະອົງຢາກຊ່ວຍເຮົາ ແລະ ປ່ຽນເຮົາ. ທີ່ຈິງພຣະອົງກຳລັງຊ່ວຍທ່ານຢູ່ແລ້ວ. ຈົ່ງຢຸດບຶດໜຶ່ງ ແລະ ຄິດເບິ່ງ ແລະ ຮັບຮູ້ຄວາມຊ່ວຍເຫລືອຂອງພຣະອົງໃນຊີວິດຂອງທ່ານ.
ຂ້າພະເຈົ້າເປັນພະຍານຕໍ່ທ່ານວ່າ ຖ້າຫາກທ່ານຈະພະຍາຍາມອີ່ຫລີ ແລະ ຈະບໍ່ອ້າງເຫດຜົນ ຫລື ກະບົດ—ກັບໃຈເລື້ອຍໆ ແລະ ທູນຂໍພຣະຄຸນ ຫລື ຄວາມຊ່ວຍເຫລືອ ຈາກພຣະຄຣິດ—ແນ່ນອນທ່ານຈະ “ດີພໍ” ໝາຍຄວາມວ່າເປັນທີ່ຍິນຍອມຕໍ່ພຣະຜູ້ເປັນເຈົ້າ; ທ່ານຈະໄປເຖິງອານາຈັກຊັ້ນສູງໄດ້ ໂດຍການເປັນຄົນດີພ້ອມທຸກຢ່າງໃນພຣະຄຣິດ, ແລະ ທ່ານຈະໄດ້ຮັບພອນ ແລະ ລັດສະໝີພາບທີ່ພຣະເຈົ້າປະສົງໃຫ້ລູກທຸກຄົນທີ່ລ້ຳຄ່າຂອງພຣະອົງ ໄດ້ຮັບ—ຮ່ວມທັງທ່ານ ແລະ ຂ້າພະເຈົ້າໂດຍສະເພາະ. ຂ້າພະເຈົ້າເປັນພະຍານວ່າ ພຣະເຈົ້າຊົງພຣະຊົນຢູ່ ແລະ ປະສົງໃຫ້ເຮົາກັບບ້ານ. ຂ້າພະເຈົ້າເປັນພະຍານວ່າ ພຣະເຢຊູຊົງພຣະຊົນຢູ່. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.