Ngak ak Bekord el Ungil? Ng sebechek el mo er sel Rengedel a Celestial?

Rodos ma rodam, ng meral klou el klengaltengat el mer kid el keldibel ea remesiungel a Rubak a olisechakl er kid. Tiang diak el ungil sel betok el teletael el betik er a rengud el Demad er a Babeluades a omekrael e omekngeltengat er kid? Ng kmal soal kid a deluut el mo kiei lobengkel.

Ngokiu a klechubechub serak dirk ngeasek el toktang el mochu merek el ngara skuul er a keltoktang, Eak milngilt el mo er a omesuub sel kltoktang er a rengalek er a ngarbab el omesuub. Sera kisterir tirkel bebil er a re intern, eak mlo melchesuar el diak sal mellomes ma diak keldmokl. A kulemdasu el kmo ngdiak el sebechek el mo uai tirkang el chad.

Ngar sel ongedei el buil, eak mle dengchokl er sel station er a re nurse el ngara osbitar ra tal kesus, ak lilangel e soal imiit e medak sera kuluches er sel babier er a admission el kirel a kekerei el buik el mle pneumonia. Meral dirkak a tal kora mle mechitechut a renguk el uaisei. Ng dimlak kudengelii a teletael el kmo ak mekerang e omkar er a teruich a rekil el pneumonia. Ak mocha omdasu el kmo ngak a mekerang.

Tiakid el taem, ea tar tirkel senior resident a ngiluu a chimal loia er a ongelngellek. Nguleker er ngak el kmo ak uangerang, mak kuluchais aikel mle chetituokel me a sebekreng er a renguk. Sel nger er ngii a ngildidechii a klengar er ngak. Ngii a dilu er ngak el kmo Ngii ma tirkel bebil er a senior resident a kmal chemat er ngak e te dirrek lomedasu el kmo ngak a kmal mo ungil toktang. Kedeb el omelchesel, Ngii a uluumerang er ngak er sel taem el ngak a dimlak a kuumerang er ngak.

Di uai tial teletael dilubech el me er ngak, kid a blechoel lorrenges er a rechad er a ikelesia el oker, “Ngak ak bekord el ungil el chad?” malechub “Ngak kmal sebechek el mo er sel Rengedel a Celestial?” Adang, ngdiak a tekoi el uasei “bekord el ungil.” Ngdiak a ngidil ta er kid el “mengerker” malechub “kmal kirel nguu”sel omktel a ungilreng, engdi uaisei el sebeched el lomdedenger alsekum a Rubak a kongei er kid, el di ua kudengelii aikal ker.

Sel bebil er a taem e de bora ikelesia, e kede mo kora mechitechut a rengud lokiu el meral siotai el mo omekduch er kid. Kede lemuk e omedasu, “Ngak a diak el sebechek el remuul aikal rokui el tekoi” malechub “Ngak a diak el sebechek el mo ungil uai tirkal betok el chad.” Maluaisei kid a omelchesiu el uasei serak ngara osbitar er sel kesus.

Adang, betik er a renguk el rodam ma rodos, ng kired el diak dongaisisiu er kid el mo er a rebebil. Ke debai di omekringel er kid e diak a ultutelel a dongaisiu er kid. Kid a bai meritel er kid el kmo ngar ngii er kid malechub eng diak el lokiu a uldesuir a rebebil er a rechad. Alskeum meng kired el mengaisisiu, e bai dongaisiu raikel mla mo merek el teleteled mora ikel teleteled er a chelechal taem—ma dirrek el kmo ngerang soad el mora ngar medad el taem. A di ta el uldasu el klou a belkul merkid sel uldesuel a Demad er a Babeluades el merkid. Kulengit me moker er a Dios el kmo ngera uldesuel er kau. Ngii a mo betik a rengul e mo mesmechokl er kid e bai diak longitechut er kid; a ongitechut a bai blekerdelel a Diablong.

Ng soak el mo melemalt e tabesul. A nger el mo er sel ker “Ngak ak bekord el ungil?” e “Ngak sebechek el mo er sel Rengedel a Celestial?” uasei “Choi! Kau a bekord el ungil” e “Choi, kau a sebechem el mo er sel rengedel a Celestial sel blechoel ouchel a kengtim e diak momtok.” A Dios er a babeluades a diak el mekngit a rengul el ambai el osiik a ngidil teletael el mo oltobed er kid er a klekool. Ngii a cherrungel el betik a rengud el Demad, el soal kid rokui el Ngelekel a deluut el mo kiei lobengkel el telungalek el mo cherechar. Ngii a milskid ngkel di tal Ngelekel el ngar bit er a Chedam me kid a diak debo dibus e bai mo ngar ngii a diak a ulebengellel klengar!¹ Kulengit moumerang, e kulengit bol ngar ngii a klaumerang ma ungilreng el mlar, tial diak a ulebengellel klemerang. A Demad er a Babeluades a soal kid a deluut el mo er Ngii. Tiang sel Urelel e Klebkellel.²

Ng soak sel teletael el President Gordon B. Hinckley a ousbech er ngii lolisechakl er tial omesuub. Mla er ngii a bebil ra taem el krengesii el melekoi, “Rodam ma Rodos, sel longerchiil er ngii Dios er kid a mo melasm, engdi kirem el mo meral melasm!”³

“Meral melasm” a belkul a kmo ngirked el meruul el mora bkul rebab el sebeched, e medengei aikel kired el melisiich, e lemuut el melasm. Sel domelekl er tial omeruul, e kid a mo kmeed el mo er a Rubak; kede mo melchesuar er a Chedaol Reng er Ngii el mekdekudm,⁴ e kid a mo ngmai a betok el krasia, malechub eng ngesou.⁵

Bebil er a taem ea kumdasu kid a diak dolechesuar el kmo a Rubak a kmal soal longeseu er kid. Ng soak sel tekingel a Elder David A. Bednar, ng dilu:

“Betok er kid a medengei el kmo sel Tngakireng a mo er tirkel meruul a klengit. Ngdiak sal medengei, engdi, kid a medengei e l kmo a Tngakireng a dirrek el mo er a re santo. …

“… A Tngakireng a olngeseu er kid el mo mesisiich e mo cheroid er a klengit e mo meruul e mo ungil. …

“‘… Ng … okiu er a krasia era Rubak ea bek el chad … a ngmai a klisiich ma ngeseu el mo meruul a ungil ureor el alta dimlak el sebecherir el [meruul]. … Tial krasia a olisiich…’ [Bible Dictionary, “krasia”; smisichii a omsodel] … malechub ea ngeseu er a babeluades el mo er a ta ma ta er kid el kmal lousbech a ngeseu el mo er a rengedel a celestial.”⁶

Ea kired el rulii me bo denguu tial ngeseu er a babeluades a kired lolengit er ngii e mo meruul er ngii loba llemalt el reng el dobang.

Sel ungil chais a uasei alsekum kid a meral louuchel a kengtid, ea aikel mla memong el kengtid a diak el bol tomer er kid el mo suobel. A Moroni a uluuchais er kid el kirir tirkel milruul a klengit er sel temel: “Engdi a lsekum te mle blechoel merang el ngarngii er a rengrir louuchel a rengrir er a kngterir, ete musubes.”⁷

Ma Rubak a di Mlengii el melekoi er tirkel meruul a klengit:

Alsekum ngii a ocholt a kengtil el me er kau me ngak, e mo ouuchel a kengtil el meral ngara rengul, e ngii a kirem el lousubes er ngii, Engak a ousubes er ngii el dirrek.

Choi, me sel blechoel a rechedak el mo ouuchel a rengrir er a kengterir Engak a mo ousubes aikel lurruul el lometok er ngak.⁸

Alsekum kid a a meral ngar er ngii er a rengud a ouuchel a kengtid, a Dios a meral mo ousubes er kid, ma alta ke milruul er a di osisiu el klengit. A Elder Jeffrey R. Holland a dilu: “Malta aikel techall a mla mo dibus, malta betok el telemall a bla mruul … , Ak ouchais el kmo kau a dirkak morael el mo rutechii sel chedaol beltik el reng. Ng diak el sebechem el rulau el mo ngariou er sel diak a ulebengellel llomes er a Tngakireng er a Kristo el bom retechii.”⁹

Tiang a diak el belekul a kmo a klengit a di UNGIL. A klengit a blechoel ngar ngii a kekka er ngii. A klengit a tomelii a chad el meruul er ngii me a tirkel chad el metemall er a klengit el loruul el mo er tir. A meral ouuchel er a klengit a diak el beot.¹⁰ Maluasei, bo mungil medengei el kmo alta a Dios a choroid a klengit el reng ma chiro er a klengit sel ngar ngii a rengud a ouuchel a kengtid, Ngii a diak el dil mereched el choroid a kekka era kengtid. A bebil ra taem ea aikal kekka a di obengked el mo lemuut er a klengar er kid. Ea aikel meral mekngit el klengit aikel momdasu e melib el klengit el chad a uasei, “Ng sebechek el remuul a klengit, e mo ouuchel a kengtik ruriul.” Ak oumerang el kmo tiang sel kora oltoich a medam er sel odars ma ringel er a Jesus Kristo.

A Rubak a milekoi, “Ngak el Rubak a diak el sebechek lomes er a klengit el ua di lekekerei.”¹¹

A Alma a milekoi, “Ka morrenges a kulekoi er kau, a mekngit a diak el deulreng.”¹²

A tara uchul mesel tekingel a Alma a klemerang a uasei sel omelekl a klengit, ekid a mo cheroid era Edaol Reng, e mo mechitechut a rengud, e mo diak douuchel a kengtid. Ak lemuut el melekoi, eleng Tngakireng er a Osobel, e kid a sebeched louuchel a kengtid e mai a klausubes, sel meral ngar ngii a rengud el ouuchel a kengtid.

Ngdiak el sebeched el omdasu el kmo diak a ututelel bai kired el mo ouuchel a kengtid. Ng diak el oureor sel kau mengesebechakl a kengtim el uasei, “A Dios a medengei el kmo tiang kmal meringel er ngak, meng Ngoikak el di uaisei.” “Meringel el melasm”a belkul a kmo kede mellemolm el melasm el di merekong sel bo deuai aikel teletelel a Rubak, el ngii a ouchais aikel ker el loker er kid sel bo dolai er a temple recommend.

Sel tara teletael el ngii a mo mengeroid er kid er a babeluades maikel ngeseu el dousbech a omtok. Sel babier er a Moses, e kede milsuub el kmo a Diablong a tilobed er a babeluades eleng ngulmetok.¹³ Kid a omtok sel dolekoi era chelsel a rengud, “Ng diak kusbech er a Dios, e diak el kirek el mo ouuchel a renguk ra kengtik.”

Sel toktang er a rengalek el ngara intensive care, Eak, medengei el kmo alsekum di tal torbengii a ulekeruul, eng sebechl el mo ngar ngii a kodall er a tech. Di osisiu, sel domtok er a Dios, kede torob aikel ngeseu ma klaumerang, el ngii a Jesus Kristo, el ngii a mouchul a kodall er a reng. Ng diak ngidil ta er kid el sebechel rulii tia loba klisiched. Ngdiak a ngidil ta er kid el “bekord el ungil,” engdi ta lokiu a urelel ma klechubechub ra Jesus Kristo,¹⁴ engdi ele Dios a mengull er sel mimokl el melilt er kid, kid a diak el sebeched el mo suobel aslekum ngdiak dolasm. Tia sel mekerang a tabesul krasia ma ureor a loureor. Kid a sebeched el obang a klaumerang er a Kristo eleng Ngii a soal lolngeseu e omekngodech er kid. Meng merang, Ngii a mla olngeseu er kau. Ka di bom chelellakl e momtab e bo modengei aikel Ngesuil el ngara klengar er kau.

Ak sioning er kau el kmo alsekum ke meral melasm e diak momtok—e blechoel ouuchel er a kengtim e olengit er a krasia, malechub eng ngeseu, ra Kristo—e kmal sebechem el mo “bekord el ungil,”el ngii, a ungil ra medal a Rubak; e kau sebechem el mo er sel rengedel a Celestial el cherrungel ra Kristo; e kau a mo mai a klengaltengat ma llomes ma deuelreng el Dios a soal a rebek el betik er a Rengul rengelekel—uldimukl er kau me ngak. Ak ouchais el kmo a Dios a kiei and soal a deluut el mo remei.Ak ouchais el kmo a Dios a kiei. Loba chedaol ngklel a Jesus Kristo, amen.