I Warohnger? I Pahn Kak Lellah?

Riei Lih oh Ohloko, e wia kapai kei pwe kitailen kohpene oh alehdi kaweid kan sang rehn sapwelimen koht ladu kan. E sou wia mehkot mwahu pweki sohngen ahlen kaweid oh kapai me samatail me limpoak kin ketkihiohng kitail? Pwe udahn E kupwurki kitail en pwurala reh.

Ni ansou me I wia toahkte pwulopwul men me ahpwtehn nek sang kaskuhl en toahkte, I iang pilipilda pwe ien iang kaiahn ohng palien pediatric me apwal oh mwomwen siai laud loale. Ni ansou me I tuhweng irail iengei me pil iang pilipildah kan, I ahneki pepehm ieu me ngehi mekeieu pweipwei oh pil sohte kaunopada mwahu. I medewe me sohte soangen wiepe ieu me I pahn kak wia pwe ien kak pahrek ohng irail.

Ni tepin kesiluhn sounpwohngo, nan likopen pwohngo I wie mwomwohd nan en nurse kan wasan komoal nan imwen winio. l men meir oh kin wie sengseng ki ieng pein ngehi pwehki ahisohlar kak intingida iren sawasa kan me kak sewese kisin pwutak kis me anehki soumwahu ieu me adaniki pneumonia. Saik pak ehu I kehn soahngen insensuwed laud nan ei mour. I sohte wehwehki dahme pahn kak kamwahuiala soumwahu en pneumonia me mihmi rehn kisin pwutak sounpar 10 o. Ihme karehda ahi tepida peikasalki karepen ahi mihmi mwo.

Ni ansouwohte, emen toahkte wasahu ahpw doahke pohn pwopwei ie. E idek ia irei, oh I kasalehiong uwen insensued oh masepwehk me I ahneki. Dahme E sapengkin ie wekidala ahi mour. E indahngie me ih oh iehnge toahkte teiko koaros udahn pereniki ahi wia emen toahkte oh ia uwen arail kehn me I kak wihala toahkte mwahu men ehu rahn. Ni mwotomwot, e koapwoaroapwoar kin ie ansou me I sohte koapwoaroapwoarki pein ngehi.

Duwete dahme lelohngiehier, mie pak me kitail kin rong iengatail toweh kan kin idek “I wia aramas mwahu men?” de “I pahn kak iahng lel nan wein celestial?”ehi, sohte me udahn pahn mwahu douluhl? Sohte emen kitail kak pein “alehdi”de “warohng”en komourla, ahpw e konehng kitail en kin medewe ma kitail kin warohng mihmi pan kupwuren Koht, Ihduehn ahi wehwehki peidek pwukat

Ekei pak ni ansou me kitail kin iang sarawi, kitail kin peikasalkihda ma aramas pahn luke kitail en kak kamwahuih kitail la. Kitail kin medewe, “ia mwomwen ahi pahn kak wiahla soahng pwukat karos?”de “I sohte pahn kak mwahula duwete aramas pwukat.”mwein met e duwete sohngen pepehm me I kehn nan nimwen winio nihpwongo.

Menlau, riei ohl oh lihoko, E kohnehng kitail en uhdisang karasahiehng kitail ekei aramas. Kitail kin pein kamedekei kitail la sang ni atail aksiai. Pwe kitail kin pein keseu sapwungih kitail ohng ni sohng kan me kitail kin wia de sohte aneki, oh sang ni pepehm en mehtei kan. Ma kitail pahn karasa, kitail karaseieng kitail ia mwomwetail mahs ohng mwomwetail met—oh pil pahn ia mwomwetail ehu rahn. Ihte kitail en pwunodki dahme Samatail Nanleng kin medewe kin kitail. Menlau sekere Ih ni mehlel dahme E ketin medewehkin kumwail. E pahn ketin poakohng oh kapwungala ahpw kaiden kaluetei kitail; pwe en Sehdan ah lidip mwo.

Mweidohng ie pwe ien inen oh sansal. Pasapengpen peidek pwukat ”I wia aramas mwahu men?” I pahn lela?” iei “ ehng! ke pahn mwahusang men” oh “Ehi, ke pahn kak lela ma ansou karos ke kin koluhla oh sohte uhwong kupwurehn Koht.” Samatail me ketket nanlehng sohte kilkilang lahng te en wiada mehkot pwe kitail en lekdek iei sang nan celestial. E wia samatail me poakohng kitail ni unsek. Me kin loaloale kitail laudsang mehkaros pwe kitail en kak pwurala Reh nin duen peneinei kei kohkohlate. E ketkihieng kitail Sapwellime Ieros pwe kitail en dehr lekdekla ahpw kitail en aneki mour soutuk!¹ Menlau kamehlele, oh ahneki koapwoaroapwoar oh aneki insenamwahu sang ni mehlel wet. Samatail Nanlehng kupwurki kitail en lela. Pwe iei duwen Sapwellime doadoahk oh Sapwellime kilohri.²

I pwungki mwomwen en Presedent Gordon  B. Hinckley ah kin padahngki duwen ire wet. I kin kalap rong ah kin padahngki, “Riei ko, ihte me Kauno kin kupwurki kitail en wia iei kitail en kin soang, ahpw kumwail anahne uhdahnsoang!”³

“Soang ni mehlel” wehwehki wia wen atail kak koaros, en kak wehwehki wasa kan me konehng kitail en kamwahuwiala, oh pil pwurohng soang. Ma kitail pahn kin kapwkapwureiehng met, kitail kin karaniala Koht; kitail kin kehn sapwe;lime Ngehn Sarawi ah kin kekeirda rehtail;⁴ oh kin kalaudehla Sapwellime kalahngan de sawas ong kitail.⁵

Ekei pak, I kin medewe, uwen atail sohte wehwehki me Kauno ketin kupwurki sewese kitail. I pereniki en Elder David A Bednar padahk, me kosoia:

“Lep laud en kitail wehwehki me Tomwo e ohng me dipan akan. Ahpw I me I sohte nohn wewehki ma kitail karos wehwehki me Tomwo pil ohng kitail souleng kan. …

“… Tomwo kin sewese kitail en powehdi oh uhdihsang wia me suwed oh uhd wia me mwahu. . …

“‘… E wiawiher … me sang ni manaman en Kauno me emenemen … kin aleda kehl oh sawas en wia me pwung koaros me re sohte kin kak wia. … Kalahngan wet e wia manaman kehlail ehu …’ [Bible Dictionary, “Kalahngan”; lipw tohrohr kapatapatehng] … de sawas sang nanleng me emenemen kitail ahahne pwehn kak en warohng pidelong nan wein celestial.”⁶

Oh ihte me kitail anane wia pwe kitail en alehdi sawas en nanleng wet iei en peki oh doadoahngki pepehm pwung kan me kitail alehdi.

Ih rohng kaperen en iei ma kitail kin koluhla ni mehlel, dipatail mehn mahs akan sohte pahn kihsang kitail mour soutuk. Moroni pil koasoia duwen irail akan me kin wiahda dihp nan ah mwehi,”ahpw ansou koaros me irail kin koluhla oh rapahki mahk; ni ineng mehlel, Kauno kin mahk ohng irail.”⁷

Pein Koht masahnih ohng me dipano:

“Ma ke wehkada dipomw kan mwohn sihlangi, oh koluhkila ni mohngiong mehlel, I pahn mahk ohng uhk.

“Ehi wen dod en nei aramas kan ah pahn kohlula I pahn mahkiohng irail diparail kan.”⁸

Ma kitail pahn kin koluhla ni mehlel, Koht udahn pahn mahk ohng kitail, itarete ma kitail kin wiada dihpohte. Duwete me Elder Jeffrey R. Holland kosoia: “Itarete ahmw medewe me sohlar ahmw ansou , de ke medewe me nohn dirala sapwung me ke wiahdahr… , I men kadede iong uhk me kesaikinte daulih limpoak unseko. ke sohte kak seilok dohsahng wen marain en Sapwellimen Krais Tomwo.”⁹

Met sohte wehwehki me wiada dihp mwahu. Dihp udahn mie kalokepe. Me kin wiada dihp oh kin kamedekehla ih oh mehn ihmpe koaros. Koluhla ni mehlele sohte mengei.¹⁰ Menlau wehwehki me itarete Koht ah kin ketkihsang samin en dipatail kan ni ansou me kitail kin koluhla mehlel. E sohte kin mwadangete ketkihsang kalokepen dipatail kan. Ekei pak re pahn mihmi te rehtail oh lau kitail mehla. Ih dihp me keieu sakanakan iei me kitail kin pilahnehda kan soangen dihp kan me kitail kin inda, I kak wiada dihp met iapw koluhla mwuhr.” I kamehlele me met wia irehn kasohwe kanamenek ehu ohng meirong oh lokolok en Sises Krais.

Pein Koht masahni met, “E sohte kin ketin masahni dihp ni mwohmw ieu me tikitik.”¹¹

Oh Alma padahngki, “Kilang, I indahng kumwail, suwed sohte kak diar peren.”¹²

I ehu kahrepen dahme Alma masanihio ah mehlel pwe kapwukapwureh ieng te dipei kan, kin kadohwan kitaila sang ngehn sarawi, kin kareda atail peikasal, oh kareda atail sohla men koluhla. Ahpw I men kapwurehieng, pwehki Tomw en Sises Krais, kitail kak koluhla oh alehda mahk pen dipatail kan ni unsek, sang ni atail pahn koluhla mehlel.

E sohte kohnehng kitail en medewe te ahpw koluhkihla. E sohte mwahu ma kitail pahn kamwahuih dipatail kan sang ni atail pahn inda, “Koht mwahngih me udahn e apwal ohng ie, kareda e pahn aleiehda itar te ah mie ahi apwal.” “Wia wen ahi kak karos “wehwehki me kitail pahn kalusala wen atail kak ni atail kapwaiahda kupwurehn Kauno, me kin sansal mwahu nan peidek kan me kitail kin ale pwe kitail en kak alehdi neitail rekement ohng tehnpas sarawi.

Pil ehu mehkot me pahn kesei kitail sang nanleng oh katohrei kitail sang sawas kan me kitail anahne iei uhwong. Nan pwuken Moses, kitail esehla me Sehdan lekdek sang nanleng pwehki e uhwongada Koht.¹³ Kitail pil kin uhwongada Koht ansou koaros me kitail nda me,”kitail sohte anahne Koht, oh I sohte anahne koluhla.”

Nin duen ei wia pediatrician men, I ese me ma aramas uhwongada wiepen kamwahula soumwahu e kak karehda kapelsalehdala. Duwete met, ni anosu me kitail kin uhwongada Koht ,kitail kin sohte men alehda sawas oh koapwoaroapwoar, me iei Sihses Krais, me kin karehda mehlan pali ngehn. Pwe sohte emen kitail me ahneki kehl en kelehpw nan mour wet. Sohte emen kitail pahn “udahn mwahu” ahpw ihte sang ni mahk lapalap en Sises Krais,¹⁴ ahpw pwehki Koht e ketin wauneki atail mehn pilipil kan, kitail pil sohte kak mourla ma kitail sohte pahn soang. Ih mwoamwen en kalahngan oh doadoahk kin ehu pene. Kitail kak koapworopworiki Krais pwehki Ah kin ketin kupwurki sewese oh kawek kitail la. Ni mehlel, E wia seuseuweseiuk. Ihte uhdi oh kilang Sapwellime sawas kan nan ahmw mour.

I kadehde iong kumwail ma kumwail pahn soang wen ahmwail kak koaros oh sohte medewe te de uwohng, koluhla ansou koaros oh raparapaki kalahngan, de sawas, sang Krais—kumwail udahn pahn,”warohng” iei kenkenla pahn silahngin Kauno; ke udahn pahn lella nan wein Celestial ni unsek sang Sises Krais; oh ke pahn alehda kapai oh marain oh peren kan koaros me Koht kupwurki sapwelime seri koaros en ahneki—me duwete komwi oh ngehi. I kadehdehki me Koht ketin ieias oh e kupwurki kiatil en pwurala Reh, ni mwaren Sises Krais, amen.