’Ua nava’i ānei tō’u maita’i ? E manuia ānei au ?

E te mau tuahine ’e te mau taeaʻe here, e ha’amaita’ira’a rahi nō tātou o te ha’aputuputu mai ’ia ha’api’ihia e te mau tāvini o te Fatu. E ’ere ānei i te mea fa’ahiahia te mau rāve’a e rave rahi tā tō tātou Metua Here i te Ao ra i hōro’a mai nō te arata’i ’e nō te ha’amaita’i ia tātou. ’Ua hina’aro mau ’oia ’ia ho’i tātou Iāna ra.

Na roto i te tahi mau aroha mau ’ei taote ’āpī o tei fa’aoti i tāna ha’api’ira’a taote, ’ua fāri’ihia vau ’ei taote tamari’i ha’api’ipi’i i roto i te hō’ē fa’anahonahora’a tata’ura’a rahi. I tō’u fārereira’a i te tahi mau taote ha’api’ipi’i, ’ua tae mai i tō’u nei ’ā’au ē ; ’ei ta’ata vau o te hope’a i te māramarama ’ore ’e te hope’a i te ineine ’ore. ’Ua mana’o vau ē, ’aita e rāve’a nō te rirora’a vau mai te toe’a o te pupu.

I te ’omuara’a i nā ava’e e toru, ’ua pārahi au i roto i te piha tōro’a utuutura’a i roto i te fare ma’i i te maorora’a pō, ma te ta’i ’e te vare’a ta’oto ’a tamata ai i te pāpa’i i te mau parau tomora’a a te hō’ē tamaiti na’ina’i e ma’i mahaha. ’Aita roa vau i ’ite a’e nei i teie huru taiā i roto i tō’u orara’a. ’Aita roa a’e tō’u e mana’o e nāhea ra e rapa’au i te ma’i mahaha nō te hō’ē tamari’i 10 matahiti. ’Ua ha’amata vau i te uiui i’āu iho i te ’ohipa tā’u e rave nei i’ō nei.

I te reira iho taime, tāpe’a mai nei te hō’ē taote ha’api’ipi’i pa’ari i ni’a i tō’u nei tapono. Ani mai nei e aha tō’u huru ’e fa’a’ite atu ra vau i tō’u mau mana’o oto ’e mau pe’ape’a. ’Ua taui roa tō’u orara’a ’a fa’aro’o ai au i tāna pāhonora’a. Parau mai ra ’oia, ’ua fa’ahiahia roa ’ōna ’e te tā’āto’ara’a o te mau taote ha’api’ipi’i pa’ari iā’u ’e i tō rātou mana’o, e riro vau ’ei hō’ē taote ’aravihi mau. Nō te ha’apoto, ’ua ti’aturi ’ōna iā’u i te hō’ē taime ’aita vau i ti’aturi iā’u iho.

Mai teie ’ohipa i tupu iā’u, e ani pinepine tō tātou mau melo, « ’ua nava’i ānei tō’u maita’i ’ei ta’ata ? ’aore rā « e tae ānei au i te bāsileia tiretiera ? Ma te pāpū, ’aita e ’ohipa i « nava’i i te maita’i ». ’Aita te hō’ē o tātou e « fāri’i » ’aore rā e « fanaʻo » i tō tātou fa’aorara’a, ’āre’a rā e mea tano ’ia ui tātou iho, e fāri’ihia ānei tātou i mua i te Fatu, te ’itera’a ē nāhea vau i te hāroaroa i teie uira’a.

I te tahi taime ’a haere noa ai tātou i te purera’a, e fa’ataiā tātou noa atu te mau anira’a manihini ti’a ’ia riro ’ei ta’ata maita’i a’e. E feruri māmū tātou ē, « ’aita tā’u e nehenehe e rave i teie mau ’ohipa ato’a » ’aore rā « e ’ere au i te mea maita’i roa mai teie mau ta’ata ato’a ». Peneia’e e au tō tātou huru mai tō’u i terā rā pō i te fare utuutura’a ma’i.

E au mau taea’e ’e mau tuahine, ’a fa’aea tātou i te fa’aau ia tātou iho i te tahi atu mau ta’ata. Tē ha’amāuiui faufa’a ’ore nei tātou ia tātou iho na roto i te tata’ura’a ’e te fa’aaura’a. Tē ha’avā hape nei tātou ia tātou iho na roto i te mau mea tā tātou e rave nei ’aore rā e ’ore e rave nei ’e na roto ato’a i te mau nioa parau o vetahi ’ē. Mai te mea e hina’aro tātou e fa’aau, e fa’aau tātou e aha tō tātou huru i te mātāmua ’e i teie nei---’e ’oia ato’a, e aha tā tātou e hina’aro ’ia riro ananahi. Te ’ohipa tā tātou e ha’apa’o noa ’oia ho’i e aha tā tō tātou Metua Here i te Ao ra e mana’o nei nō tātou. ’A ani mau na Iāna e aha Tāna e mana’o nei nō ’outou. E here ’e e fa’atītī’aifaro ’Oia ’aita roa rā e ha’aparuparu ia tātou ; na Sātane te reira rama.

E parau ’āfaro atu vau ia ’outou ma te māramarama. Te mau pahonora’a i te mau uira’a « ’ua nava’i ānei tō’u maita’i ? ’e « e manuia ānei au ?» ’e « ’Ē! ia. E ’ohipa ’oe nō te ha’anava’i i tō ’oe maita’i » ’e, « ’Ē, e nehenehe ’oe e manuia mai te mea e vai noa tō ’oe ’ā’au tātarahapa ’e ma te ’ore e fa’a’ohipa noa i te ferurira’a ’aore rā i te ’ōrurehau ». E ’ere te Atua nō te ra’i i te hō’ē ta’ata hi’o ’ā’au here ’ore, o te hi’o i te hō’ē noa a’e hape nō te tu’u ia tātou i rāpae i te ha’uti. O ’Oia tō tātou Metua here maita’i roa, o tē hina’aro pūai nei na ni’a i te mau mea ato’a, ’ia ho’i Tāna mau tamari’i i te fare ’e ’ia ’ora Iāna ra ’ei mau ’utuāfare mure ore. ’Ua hōro’a mau ’Oia i Tāna Tamaiti Fānau Tahi ’ia ore ’ia pohe ’ia roa’a rā te ora mure ’ore.¹ ’A ti’aturi i roto i te tia’ira’a ’e te māhanahana na roto mai i teie parau mau mure ’ore. ’Ua hina’aro tō tātou Metua i te Ao ra nō tātou ’ua rave i te reira ! O teie Tāna ’ohipa ’e Tōna hanahana.²

’Ua here au i te rāve’a i fa’a’ohipahia e te peresideni Gordon B. Hinckley nō te ha’api’i i teie parau tumu. ’Ua fa’aro’o vau iāna i te paraura’a e rave rahi taime, « te mau taeaʻe ’e te mau tuahine, tē hina’aro nei te Fatu ’ia tamata tātou, ’āre’a ra e mea tītauhia ’ia tamata mau ihoa.³

Te aura’a ia « tamata mau ihoa » ’oia ho’i, ia rave i te maita’i a’e e roa’a ia tātou, ma te ’ite i te vāhi i tītauhia ’ia ha’amaita’i, ’e ’ia tamata fa’ahou ā. Ma te na reira-noa-ra’a, e ha’afātata ’e e ha’afātata roa atu tātou i te Fatu ; ’e e fāri’i tātou i tōna Vārua hau e hau atu ;⁴ ’e e fāri’i tātou hau atu i Tōna aroha, ’aore rā taututu.⁵

Tē mana’o nei au, i te tahi taime, ’aita tātou e ’ite nei i te rahi o te hina’aro o te Fatu ’ia tauturu ia tātou. Tē here nei au i te mau parau a Elder David A. Bednar :

« ’Ua māramarama pāpū te rahira’a o tātou ē, nō te feiā hara te Tāra’ehara. ’Āre’a rā, ’aita vau i pāpū ē, ’ua ’ite ’e ’ua māramarama tātou ē, nō te mau feiā moʻa ato’a te Tāra’ehara …

« … ’E e hōro’a mai te Tāra’ehara ia tātou i te tauturu nō te upo’oti’a ’e te ha’apae i te ’ino ’e nō te rave ’e te rirora’a ’ei ta’ata maita’i …

« … E mea … na roto i te aroha ’o te Fatu e fārii mai te mau ta’ata … i te pūai ’e te tauturu nō te rave i te mau ’ohipa maita’i o te ’ore e ti’a i te tahi atu [i te rave] … Teie aroha o te hō’ē mana e fa’ati’a…[Bible Dictionary, « Grace » ; reta tei fa’ahuru-’ē-hia]… ’aore rā te hō’ē tauturu nō te ra’i mai o tā tātou tāta’itahi e tītau nei nō te tomo i roto i te bāsileia tiretiera ».⁶

O te mea noa e tītauhia ia tātou nō te fāri’i i teie tauturu nō te ra’i o te anira’a ïa i te reira ’e i muri iho, ’ia fa’a’ohipa i te reira ’ia au i te mau muhumuhu tā tātou e fāri’i.

Te parau ’āpī rahi, mai te mea e tātarahapa mau tātou, ’aita ta tātou mau hara tahito e fa’aātea ia tātou i te fa’ateiteira’a. ’Ua parau mai o Moroni ia tātou nō ni’a i te mau ta’ata ’ōfati ture nō tōna ’anotau : « ’Ia tātarahapa rā rātou ’a tītau ai ’ia fa’a’orehia te hara ma te hina’aro mau, ’ua fa’a’orehia ïa te hara ».⁷

’E ’ua na ō maira te Fatu nō te ta’ata hara :

« E ’ia fā’i mai ’oia i tāna mau hara ia ’oe ’e iā’u ato’a, ’e ’ia tātarahapa ma tōna ’ā’au ato’a, e fa’a’ore ’oe i tāna ra mau hara ’e e na reira ato’a ho’i au.

« E ’ua tātarahapa ana’e tō’u mau ta’ata, e fa’a’ore au i tā rātou mau hara iā’u ».⁸

Mai te mea e tātarahapa mau tātou, e fa’a’ore mau te Atua i tā tātou mau hara, noa atu ā e rave tātou te hō’ē hara na ni’a noa ’e na ni’a noa ā. ’Ua parau Elder Jeffrey R. Holland : Noa atu te mau rāve’a tei ’erehia e ’outou, noa atu te rahira’a o te mau hape tā ’outou e mana’o ’ua rave outou … tē fa’a’ite pāpū atu nei au ē, ’aita ’outou i tere ātea ’ē roa atu i te here o te Atua. E’ita e nehenehe ia ’outou ’ia paremo hōhonu roa i te fāito e ’ore te māramarama mure ’ore o te Tāra’ehara a te Mesia e tae’a ».⁹

’Aita roa atu te reira e fa’a’ite nei ē, e mea maita’i te hara. E hope’ara’a ihoa tō te hara. I te mau taime ato’a, e fa’a’ino ’e e ha’apēpē te hara i te ta’ata hara ’e o te tā’āto’a o te ha’ape’ape’ahia e teie hara. E ’ere te tātarahapa mau i te mea ’ōhie.¹⁰ Na ni’a i te mau mea ato’a ’ia ta’a maita’i, noa atu e ’īriti ’ē atu te Atua i te mana’o hapa, ’e te pora’ora’o o tā tātou mau hara ’a tātarahapa mau ai tātou, ’aita ra ’oia e ’īriti ’ē atu i te mau hope’ara’a o tā tātou mau hara. I te tahi taime, e fa’aea roa mai rātou [hara] nō te toe’a o tō tātou orara’a. Te hara rahi roa a’e, o te hara ’ōpuahia ïa, i reira te ta’ata e parau ai, « e nehenehe iā’u ’ia hara i teie nei ’e e tātarahapa i muri iho ». Tē ti’aturi nei au ē, tē ha’avahavaha ra tātou i te tusia ’e te mau māuiui o Iesu Mesia.

’Ua parau te Fatu iho, « nō te mea ’aita e ti’a iā’u, i te Fatu, ia hi’o noa atu i ni’a i te hara ma te fa’ati’a i te reira »¹¹

Fa’ahiti ihora o Alama, « Inaha, te parau atu nei au ia ’oe na ē, e ’ore roa te peu ’ino i te ’oa’oa »¹²

Hō’ē o te mau tumu e mea mau te fa’ahitira’a a Alama, ’oia ho’i, ’ia hara ana’e tātou e rave rahi taime, tē fa’aātea ra tātou ia tātou i te Vārua, ma te fa’ataiā, e tae noa atu i te fa’aeara’a i te tātarahapa. ’Āre’a rā, e parau fa’ahou vau, nō te tāra’ehara o te Fa’aora, e nehenehe tātou e tātarahapa ’e e noa’a te fa’a’orera’a hara, i te taime e mea mau tā tātou tātarahapara’a.

O tei ’ore tātou e ti’a ’ia rave, o te fa’a’ohipa noa i te ferurira’a ma te tātarahapa ’ore. ’Aita e ti’a ia tātou ’ia parau noa nō tā tātou mau hara ē, « ’ua ’ite te Atua e mea fifi nō’u, ’e e fāri’i ’Oia iā’u mai tō’u iho huru ». Te aura’a ia « tamata mau » tātou ia tae roa i te fāito a te Fatu o tei fa’a’ite-pāpū-hia i roto i te mau uira’a e uihia ia tātou nō te hō’ē parau fa’ati’a nō te hiero.

Te tahi atu ’ohipa o te vaiiho ia tātou i rāpae i te ra’i ’e o te fa’aātea pāpū ia tātou i te tauturu e hina’arohia o te ’ōrurehau ia. Na roto i te buka a Mose, ’ua ha’api’i mai tātou ē, ’ua hurihia Sātane i raro nō te ’ōrurehau.¹³ E ’ōrurehau tātou i te taime ato’a ’ia parau ana’e tātou i roto i tō tātou ’ā’au, « ’Aita vau e hina’aro i te Atua, ’e ’aita e tītauhia iā’u ’ia tātarahapa ».

’Ei taote tamari’i ha’apāpū i roto i te tuha’a aupuru, ’ua ’ite au ē ’ia pāto’i-ana’e-hia te hō’ē rapa’aura’a fa’aora, e riro i te fa’ahaere i te pohe o te tino. Hō’ē ā huru ’ia ’ōrurehau tātou i te Atua, te pato’i ra tātou i te tauturu ’e te tia’ira’a hō’ē, ’oia ho’i o Iesu Mesia, o te fa’ahaere i te pohe o te vārua. ’Aita roa te hō’ē o tātou e nehenehe e rave i te reira na roto i tōna iho pūai. ’Aita roa te hō’ē o tātou i « nava’i i te maita’i », maoti ra na roto i te mau mana ’e te aroha o Iesu Mesia,¹⁴ ’āre’a rā nō te mea tē fa’atura ra te Atua i tō tātou ti’amāra’a, ’aita tātou e fa’aorahia ma te tamata ’ore. O teie te ’aifaitora’a i roto i te aroha ’e te ravera’a i te ’ohipa. E nehenehe e vai ia tātou tia’ira’a i roto i te Mesia nō te mea tē hina’aro nei Oia e tauturu ’e ’ia taui ia tātou. Te parau mau, ’ua tauturu a’e na ’Oia ia tātou. ’A fa’afa’aea ri’i noa ’e ’a feruri ’e ’a ’ite i Tāna tauturu i roto i tō ’outou orara’a.

Tē fa’a’ite pāpū nei au ē mai te mea e tamata pāpū ’outou ma te ’ore e feruri ’aore rā e ’ōrurehau---ma te tātarahapa pinepine ’e ma te ani i te aroha ’aore rā te tauturu a te Mesia---e riro mau ’outou i te « nava’i i te maita’i », ma te fāri’ihia i mua i te Fatu ; e manuia ’outou e tae roa atu i te bāsileia tiretiera mai te Mesia i maita’i roa ra, ’e e fāri’i ’outou i te mau ha’amaita’ira’a, ’e te hanahana ’e te ’oa’oa ta te Atua e hina’aro nei nō Tāna mau tamari’i taoa rahi tāta’itahi---o ’outou ’e o vau nei ihoa ra. Tē fa’a’ite pāpū nei au ē tē ora nei te Atua ’e te hina’aro ’ia ho’i tātou i te fare. Tē fa’a’ite pāpū nei au ē te ora nei Iesu. Na roto i te I’oa mo’a o Iesu Mesia, ’āmene.