Mob Siab Heev rau Khetos
Peb mob siab rau Khetos thaum peb rau siab ua hauj lwm, txo hwj chim, nyiaj mus tom ntej, thov Vajtswv, thiab tsim nyog txais nws cov koob hmoov.
Kuv cov kwv tij thiab cov muam, hnub no kuv xav hais lus rau cov tub hluas ntxhais hluas ntawm lub Koom Txoos, tsis hais peb cov tub txib ntxhais txib los yog. Cov kwv tij thiab cov muam uas xav tias lawv hluas nyob hauv lawv lub siab mas kuv yeej caw lawv mloog thiab.
Thaum Yim Hli Ntuj 21 tas los, Txwj Laug Russell M. Nelson tau muab lub Tuam Tsev Sapporo fij tseg—yog lub tuam tsev thib peb nyob hauv Nyij Pooj Teb. Lub Tuam Tsev Sapporo nyob hauv Nyij Pooj sab qaum teb hu ua Hokkaido. Ib yam li nyob hauv Utah, ib co pioneer uas rau siab khwv ua hauj lwm tau tuaj ua vaj ua tsev.
Thaum xyoo 1876, ib tug kws qhia ntawv hu ua Dr. William Clark1 tuaj rau Hokkaido qhia ntawv. Nws nyob hauv Nyij Pooj tau yim lub hli xwb, tiam sis nws cov tub kawm ntawv tseem nco ntsoov Nws txoj kev ntseeg Khetos. Ua ntej nws rov qab mus tsev, nws hais ib zaj lus uas lawv muab kos rau ib tug mlom tooj txog nws.2 Nws hais tias, “Cov tub hluas, cia li mob siab!”—“Cia li mob siab rau Khetos.”3 Nws tej lus qhia kom “Cia li mob siab rau Khetos” yuav pab Haiv Neeg Ntseeg hauv Hnub Nyoog Kawg niaj hnub nim no pab lawv txiav txim siab txhua hnub.
Qhov uas yus “mob siab rau Khetos” txhais li cas? Kev mob siab rau Khetos txhais hais tias yus rau siab, tsom ntsoov, thiab tso siab rau Nws txoj hauj lwm. Kev mob siab rau Khetos tsis txhais hais tias cov pej xeem yuav qhuas peb. Kev mob siab rau Khetos txhais hais tias peb tsis yws yws thaum peb rau siab ua hauj lwm tas zog nyob hauv peb pawg ntseeg thiab ceg ntseeg thiab muaj kev zoo siab.
Peb cov tub txib ntxhais txib uas ua hauj lwm nyob thoob plaws lub ntiaj teb no yeej coj yam ntxwv zoo txog cov uas mob siab rau Khetos. Ob peb xyoo tas los, Muam Yamashita thiab kuv tau ua hauj lwm nyob hauv Qhov Chaw Tshaj Tawm txoj Moo Zoo Japan Nagoya. Wb cov tub txib ntxhais txib yeej mob siab rau Khetos. Ib tug tub txib uas zoo li ntawd yog ib tug tub hluas hu ua Txwj Laug Cowan.
Txwj Laug Cowan tsis tau muaj ib txhais ceg sab xis vim nws raug xwm txheej thaum nws yog ib tug tub hluas uas caij lub luv thij. Ob peb lim tiam tom qab nws tuaj rau qhov chaw tshaj tawm txoj moo zoo, nws tus khub hu tuaj rau kuv. Txwj Laug Cowan txhais ceg cuav twb piam sij thaum nws caij lub luv thij. Peb coj nws mus rau ib qho chaw kho tes taw cuav, thiab nyob hauv ib chav nyob ntawd, yog thawj zaug uas kuv pom nws txhais ceg. Kuv kawm hais tias nws raug mob npaum li cas. Lawv muab nws txhais ceg cuav kho, thiab nws rov qab mus rau nws cheeb tsam.
Tiam sis, sij hawm dhau mus es, nws txhais ceg cuav pheej rov qab piam. Tus kws saib xyuas kev kho mob hauv cheeb tsam pom zoo rau Txwj Laug Cowan rov qab mus tsev kom txib nws mus rau lwm qhov chaw tshaj tawm txoj moo zoo. Kuv tsis xav ua li no vim Txwj Laug Cowan yog ib tug tub txib zoo heev thiab nws xav xav nyob hauv Nyij Pooj Teb. Tiam sis, Txwj Laug Cowan pib tsis muaj dag zog zuj zus. Txawm li ntawd los, nws tsis tau yws yws.
Tus Kws Saib Xyuas Kev Kho Mob hauv Cheeb Tsam rov qab hais tias tsim nyog uas Txwj Laug Cowan ua hauj lwm hauv ib qho chaw uas tsis tas caij lub luv thij. Kuv tau xav txog qhov no. Kuv xav txog Txwj Laug Cowan thiab yav tom ntej, thiab kuv thov Vajtswv txog qhov no. Kuv txais kev tshoov siab hais tias, Txwj Laug Cowan yuav tsum rov qab mus tsev thiab tos kom lawv txib nws mus rau lwm qhov chaw. Kuv hu tuaj rau nws thiab qhia nws txog kuv tej kev txhawj thiab qhia nws tias kuv tau txiav txim li cas. Nws tsis tau teb dab tsi. Kuv tsuas hnov nws quaj xwb hauv lub xov tooj. Kuv hais tias, “Txwj Laug Cowan, koj tsis tas teb kuv tam sim no. Kuv yuav hu koj tag kis. Cia thov Vajtswv xav txog qhov kuv hais no.”
Thaum kuv hu tuaj rau nws thaum sawv ntxov, nws txo hwj chim hais tias nws yuav ua raws li kuv xav.
Thaum kuv xam phaj nrog nws zaum kawg, kuv nug nws lo lus no hais tias: “Txwj Laug Cowan, koj puas tau sau rau koj daim ntawv xav ua tub txib kom txib koj mus rau ib qho chaw tshaj tawm txoj moo zoo uas tsis tas caij lub luv thij?”
Nws hais tias, “Kuv sau li ntawd ’os, Thawj Tswj Hwm.”
Kuv hais tias, “Txwj Laug Cowan, Vajtswv hu koj rau Qhov Chaw Tshaj Tawm txoj Moo Zoo Japan Nagoya, yog ib qho chaw uas koj yuav tsum caij lub luv thij. Koj puas tau hais li no rau koj ceg txheem ntseeg tus thawj tswj hwm?”
Nws teb ua rau kuv xav tsis thoob. Nws hais tias, “Kuv tsis tau hais. Kuv txiav txim siab tias yog tus Tswv tau hu kuv mus rau qhov chaw ntawd, kuv yuav mus rau lub tsev xyaum tes taw thiab qhia kuv tus kheej txawj caij lub luv thij.”
Thaum wb xam phaj tas, nws quaj thiab nug kuv lo lus no hais tias: “Thawj Tswj Hwm Yamashita, vim li cas kuv tuaj rau Nyij Pooj Teb? Vim li cas kuv nyob no?”
Kuv teb kiag hais tias: “Txwj Laug Cowan, vim li cas koj tuaj nyob no los kuv paub ib qho xwb. Koj tuaj nyob no kom pab kuv. Kuv to taub hais tias kuv ua hauj lwm nrog ib tug tub hluas zoo npaum li cas. Kuv tau koob hmoov vim kuv paub koj.”
Kuv zoo siab qhia rau nej tias Txwj Laug Cowan rov qab mus tsev thiab lawv rov qab txib nws mus ua hauj lwm nyob hauv ib qho chaw tshaj tawm txoj moo zoo uas lawv pub nws tsav tsheb. Kuv zoo siab rau Txwj Laug Cowan thiab tag nrho cov tub txib ntxhais txib nyob thoob plaws lub ntiaj teb uas txaus siab ua hauj lwm thiab tsis yws yws. Ua tsaug ntau, cov txwj laug thiab cov muam, rau nej txoj kev ntseeg, nej txoj kev tsom ntsoov, thiab nej txoj kev mob siab rau Khetos.
Phau Ntawv Maumoos muaj ntau zaj uas hais txog cov uas mob siab rau Khetos. Thaum Amas tus Hluas yog ib tug tub hluas nws tsim txom lub Koom Txoos thiab cov mej zeej. Ces nws hloov siab loj heev thiab los ua ib tug tub txib uas muaj hwj chim heev. Nws xav tau tus Tswv txoj lus qhia, thiab nws foom koob hmoov rau nws cov khub thaum nws ua hauj lwm nrog lawv. Tus Tswv tau txhawb nws lub dag zog, thiab nws kov yeej nws tej kev sim siab.
Ces Amas ntuas nws tus tub Hilamas li no hais tias:
“Txhua tus uas yuav tso lawv tej kev ntseeg siab rau Vajtswv yeej yuav raug pab nyob hauv lawv tej kev plaub ntug, thiab lawv tej teeb meem, thiab lawv tej kev txom nyem. …
“ … Coj Vajtswv tej lus txib. …
“Sab laj nrog tus Tswv [txog] txhua yam uas koj ua, thiab nws yuav coj koj mus rau qhov zoo.”4
Thaum kuv tus tub thib ob yog ib tug tub hluas nws tsis tshua koom lub Koom Txoos. Thaum nws muaj 20 xyoo, nws muaj xwm txheej uas ua rau nws xav hloov nws lub neej. Nws tsev neeg thiab lub Koom Txoos cov mej zeej hlub, thov Vajtswv, thiab pab nws, es thaum kawg los ntawm tus Tswv txoj kev khuv leej thiab kev tshav ntuj, nws rov qab los koom lub Koom Txoos.
Tom qab ntawd nws txais kev hu ua hauj lwm hauv Qhov Chaw Tshaj Tawm txoj Moo Zoo Washington Seattle. Thaum xub thawj nws poob siab ntau heev. Txhua hmo tau peb lub hlis, nws mus rau hauv hoob nab thiab quaj. Ib yam li Txwj Laug Cowan, nws xav to taub hais tias, “Vim li cas kuv nyob no?”
Tom qab nws ua hauj lwm tau ib xyoos, wb tau txais ib tsab ntawv uas teb wb tej lus thov. Nws sau hais tias: “Tam sim no kuv hnov tau Vajtswv thiab Yexus txoj kev hlub. Kuv yuav khwv ua hauj lwm kom los ua zoo li cov yaj saub thaum ub. Txawm kuv kuj raug tej teeb meem ntau heev, kuv zoo siab tiag tiag. Kev ua hauj lwm rau Yexus yeej yog qhov zoo tshaj plaws. Tsis muaj ib yam dab tsi zoo npaum li no. Kuv zoo siab kawg.”
Nws xav zoo ib yam li Amas hais tias: “Thiab au, txoj kev xyiv fab dab tsi, thiab txoj kev kaj zoo kawg nkaus dab tsi uas kuv tau pom; muaj tseeb tiag, kuv tus ntsuj plig tau muaj txoj kev xyiv fab puv npo heev ib yam li kuv tej kev mob thiab!”5
Nyob hauv peb lub neej peb yuav raug kev sim siab, tiam sis yog peb mob siab rau Khetos, peb yuav tsom ntsoov rau Nws thiab muaj kev xyiv fab. Peb tus Txhiv Dim yog tus uas coj yam ntxwv zoo tshaj plaws. Nws to taub Nws txoj hauj lwm thiab tau ua raws li Vajtswv Leej Txiv lub siab nyiam. Yog ib txoj koob hmoov zoo kawg uas peb nco txog nws tus yam ntxwv txhua lub lim tiam thaum peb txais lub cim nco txog.
Kuv cov kwv tij thiab cov muam, peb mob siab rau Khetos thaum peb rau siab ua hauj lwm, txo hwj chim, nyiaj mus tom ntej, thov Vajtswv, thiab tsim nyog txais nws cov koob hmoov.
Thov kom peb yuav mob siab rau Khetos thaum peb ua siab ntev thiab muaj kev ntseeg nyiaj peb tej teeb meem thiab kev sim siab thiab muaj kev xyiv fab thaum peb ua raws li peb tej kev khi lus.
Kuv ua tim khawv hais tias tus Tswv paub nej. Nws paub nej tej teeb meem thiab kev txhawj xeeb. Nws paub tias nej xav rau siab thiab mob siab ua Nws txoj hauj lwm. Thov kom Nws coj nej txoj hau kev thiab foom koob hmoov rau nej thaum nej ua li ntawd. Los ntawm Yexus Khetos lub npe, amees.