Kwon Jibadbad kōn Kraist
Jej jibadbad kōn Kraist n̄e jej jerbal tiljek, bōk ettā, niknik ilo jouj, jab jokod ilo jar, im bōk m̧ōttan ilo erreo.
Ro jeiū im jatū jitōn bōro, rainin ikōņaan kōnono n̄an rūm̧m̧an ded ro an Kabun̄ in ekoba mijinede ro ad rem̧m̧an. Aaet, ro jeiū im jatū ro rej em̧m̧an dettaer ilo bōro rej ruwainene in ron̄jake.
21 raan in Okwōj eo ļo̧k, Būreejtōn Russell M. Nelson ar kōjeram̧m̧on Sapporo Temple eo aiboojoj—tampeļ eo kein kajilu ilo Japan. Sapporo Temple ej ekkal ilo ituiōn̄ in Japan ilo juon jikin ņae etan Hokkaido. Āinwōt Utah, Hokkaido kar pād ie pioneer ro rekapeel kōn jerbal in pād, reniknik jerbal.
Ilo 1876, juon rikaki eo ebun̄bun̄ etan in Dr. William Clark1 kar kūri tok n̄an itok n̄an Hokkaido n̄an katakin. Eaar jokwe ilo Japan ium̧win rualitōk wōt allōn̄ ko, ak jitōb in Kūrjin eo an eaar likūt juon en̄jake eo eaar aitok kitien ippān rijikuuļ ro an rejjab-Kūrjin. M̧okta wōt jān an em̧m̧akūt, eaar leļo̧k n̄n rijikuuļ ro an juon ennaan jepļaak me em̧ōj an erom kein kakememej ilo ekjab bronze in. 2 Eaar ba, “Ļaddik raņ, kwon jibadbad!”—“kōn Kraist.”3 Kean̄ eo an n̄an “Jibadbad kōn Kraist” emaron̄ jipan̄ tōl jokālet ko raan otemjej n̄an Armej ro Rekwojarjar ilo Raan-ko Āliktata.
Ta meļeļe n̄an “jibadbad kōn Kraist”? Jibadbad kōn Kraist ej meļeļe in ikdeelel, kōļmenļo̧kjān, im wujlep n̄an jerbal eo An. Jibadbad kōn Kraist ej meļeļe in bwe jet iien jenaaj bōk kālet eo n̄an kautiej ilo lo̧bwilej. Jibadbad kōn Kraist ej meļeļe in bwe jej jerbal ilo tiljek im niknik ilo ward im branch ko ad ilo ejjeļo̧k ellotaan im kōn bōro ko relan̄lōn̄.
Mijinede ro ad rej jerbal ilo aolepān laļ in rej waanjon̄ak ko raiboojoj an ro me rej m̧ool ilo jibadbad kōn Kriast. Jet iiō ko remootļo̧k, Sister Yamashita im n̄a kar jerbal ilo Japan Nagoya Mijen. Mijinede ro am raar kanooj jibadbad kōn Kraist. Juon iaan mijinede ro eaar juon likao kar etan Elder Cowan.
Elder Cowan eaar ejjeļo̧k neen ianbwijmaron̄ kōnke kōn kar juon jorrāān jān bajkōļ ke eaar juon jo̧dikdik. Jet wiik ālkin an delo̧n̄ e mijen eo, iaar bōk juon talboon jān eo m̧ōttan. Ne kōļaak eo neen Elder Cowan eaar būlo̧k ke eaar bajkōōļ. Kōm kar bōkļo̧k n̄an juon jikin kōm̧m̧an, im ijo ilowaan juon ruum̧ emakeļo̧k, eaar kein kajuon in aō kar lo neen. Iaar kile ewi jon̄an kar metak eo eaar en̄taan kake. Ne kōļļaak eo kar kōm̧m̧ane, im eaar bar ro̧o̧l n̄an eria eo an.
Mekarta, ilo an wiik ko eļaļļo̧k, ne kōļļaak eo eaar wōnm̧aanļo̧k wōt ilo an būlo̧k im bar būlo̧k. Area Medical Adviser eo eaar kwaļo̧k bwe Elder Cowan en jepļaak n̄an ijo jikin n̄an bar juon ijjitōn̄ n̄an bar juon mijen. Iaar kowaan rejan̄ in kōnke Elder Cowan eaar juon mijinede em̧m̧an, im eaar wōr juon an ikdeelel ekajoor n̄an pād wōt ilo Japan. Jidik kōn jidik, Elder Cowan eaar jino en̄jake jon̄an ko an ilo ānbwiin. Ilo kowaan menin, eaar jab alūn̄urn̄ūr ak jekpen n̄ae.
Bar juon alen, raar rōjan̄ eō im ba bwe Elder Cowan emaron̄ jerbal ilo juon jikin eo me ejjab aikuj kōjerbal baajkōļ. Iaar kejōkļo̧kjeņ kōn jekjek in. Iaar ļōm̧ņak kōn Elder Cowan im an ilju im jakļaj eo an, im iaar jar kōn jekjek in. Iaar en̄jake bwilōn̄ bwe, aaet, Elder Cowan ej aikuj ro̧o̧l n̄an kapijukunen im kōttar bar juon jikin jilkinļo̧k n̄an e. Iaar kūrļo̧k e ilo taļboon im kwaļok aō iakwe im n̄ūrbōktak im kar jiron̄ e kōn jokālet eo aō. Eaar jab ba jabdewōt ilo uwaak. Iaar maron̄ in wōt ron̄ an jan̄ itujab eo juon in taļboon eo. Iaar ba, “Elder Cowan, kwōjjab aikuj in uwaake n̄a kiiō. Inaaj kūr waj eok iliju. Jouj im ļōm̧ņak kake kālet in kōn jar ilo m̧ool.”
Ke iaar kūrļo̧k e jibbon̄ eo juon, eaar ilo āttā ba bwe enaaj ļoore kapilōk eo an.
Ilo intōrpiu eo aō ippān āliktata, iaar kajjitōk ippān kajjitōk in: “Elder Cowan, kwar ke kajjitōk ilo peba in mijen eo am̧ bwe ren jilkinļo̧k eok n̄an juon mijen me kwojjab aikuj in baajkōļ?”
Eaar ba, “Aaet, Būreejtōn, Iaar.”
Iaar uwaak, “Elder Cowan, kar kūr eok n̄an Japan Nagoya Mijen ijo kwonaaj aikuj kōjerbal baajko̧ļ. Kwar ke ba men in n̄an stake bureejtōn eo am̧?”
Iaar ilbōk kōn uwaak eo an. Eaar ba, “Jaab. Iaar jab. Iaar jōk ilo ļo̧m̧ņak bwe eļan̄n̄e en̄in ej ijo Irooj eaar kūr eō n̄an e, inaaj etal n̄an gym im kamineneik anbwinnū bwe in maron̄ kōjerbal baajko̧ļ.”
Ilo jemļo̧k in intōrpiu eo am̧ro, eaar kajjitōk ippa kajjitōk in kōn dān in kemjaaļaaļ lo mejān, “Būreejtōn Yamashita, etke iaar itok n̄an Japan in? Etke ij pād ijin?”
Iaar uwaake ilo ejjeļo̧k kōm̧tālik, “Elder Cowan, ijeļā juon wun in am̧ kar itok n̄an ijin. Kwar itok n̄an ijin n̄an jeram̧m̧an eo aō. Emōj itok n̄an jeļā kwoj juon likao em̧m̧an iaar jerbal ippān. Ij jeram̧m̧an n̄an jeļā kajiōm̧.”
Ij m̧ōņōņō in kwaļo̧k bwe Elder Cowan eaar jepļaak n̄an ijo jikin em̧m̧an im kar ar jitōn̄ e n̄an juon mijen me emaron̄ kar kōjerbal wa n̄an an itok itak. Ij utiej ejjab wōt kōn Elder Cowan ak kōn aolep mijinede ro ilo aolepān laļ in me rej m̧ōņōņō ilo ejjeļo̧k alūn̄urn̄ur ak jekpen ņae. Ko̧m em̧m̧ool, elder im sister ro, kōn ami tōmak, ami m̧ōdjake, im ami jibadbad kōn Kraist ekajoor.
Bok in Mormon epād ie elōn̄ bwebwenato ko kōn ro me raar jibadbad kōn Kraist. Alma eo Edik āinwōt juon likao eaar kakkure Kabun̄ eo im ro uwaan. Tokālik eaar dipuk juon oktak eļap an bōro im jerbal āinwōt juon mijinede ekajoor. Eaar pukōt tōl eo an Irooj, im eaar jeram̧m̧an ro m̧ōttan ilo an kar jerbal ippāer. Irooj eaar kōkajoorļo̧k e, im eaar anjo̧ ioon mālejjon̄ ko eaar jelm̧ai.
Alma in eaar leļo̧k n̄an ļaddik eo nejin Hilamōn kapilōk in:
“Jabdewōt eo enaaj likūt aer lōke ilo Anij naaj rejetake er ilo mālejjon̄ ko aer, im inepata ko aer, im en̄taan ko aer. …
“… Bokake kien ko an Anij. …
“Pepe ippān Irooj ilo aolep kōm̧m̧an ko am̧, im Enaaj tōl eok n̄an aenōm̧m̧an.” 4
Ļaddik eo kein karuo nejim eaar mour eļap wōt ilo jo̧dikdik eo an ettoļo̧k jān Kabun̄ in. Ke eaar tōpar 20 iiō dettan, eaar ewōr juon an en̄jake me ekar kōm̧m̧an bwe en kōņaan ukōt mour eo an. Kōn iakwe, jar ko, im jipan̄ jān baam̧le eo an im ro uwaan Kabun̄ in, im āliktata kōn tenkwadik im jouj an Irooj, eaar bar jepļaaktok n̄an Kabun̄ in.
Tokālik eaar kūr n̄an jerbal ilo Washington Seattle Mijen. Ilo jino in eaar en̄taan eļap ebbwer. Aoelp bon̄ ium̧win allōn̄ ko jilu im̧aan, ekōn etal n̄an em̧ jidikdik eo im jar. Āinwōt Elder Cowan, eaar pukōt n̄an meļeļe, “Etke iaar pād ijin?”
Ālkin an jerbal ium̧win juon iiō, eaar bōk juon email me eaar juon uwaak n̄an jar ko am. Eaar je: “Kiiō imaron̄ lukkuun en̄jake iakwe eo an Anij im an Jisōs. Inaaj buuļ jerbal n̄an erom āinwōt rikanaan in etto ro. Men̄e ij barāinwōt ioon elōn̄ apan̄ ko, ij lukkuun in m̧ōņōņō. Jerbal n̄an Irooj ej lukkuun in men eo em̧m̧an tata ļo̧j n̄an jidik. Ejjeļo̧k jabdewōt men an aiboojoj āinwōt in. Ikanooj m̧ōņōņō.”
Eaar en̄jake āinwōt kar Alma: “Im o, ta m̧ōņōņō eo, im ta meram aiboojoj iaar loe; aaet, aō eaar obrak kōn m̧ōņōņō eaar jon̄an wōt aō metak.” 5
Ilo mour ko ad jej ioon mālejjon̄ ko, bōtaab eļan̄n̄e jej jibadbad kōn Kraist, jemaron̄ kalimjōk wōt E im en̄jake lan̄lōn̄ eo jekdo̧o̧n ilo ioļapļap mālejjon̄ ko. Ad Ripinmuur ej waanjon̄ak eo eļap. Eaar meļeļe mijen eo An ekwojarjar im eaar pokake ankilan Anij Jemān. Juon kālet ejeram̧m̧an n̄an bōktok waanjon̄ak eo An eaiboojoj n̄an ememļo̧kjeņ eo ad kajjojo wiik ilo ad bōk m̧ōttan kwojkwoj eo.
Ro jeiū im jatū jitōnbōro, jej jibadbad kōn Kraist n̄e jej jerbal tiljek, bōk ettā, niknik ilo jouj, jab jokod ilo jar, im bōk m̧ōttan ilo erreo.
Kōm̧m̧an bwe jān jibadbad kōn Kraist ilo ad bōk apan̄ ko im mālejjon̄ ko ad kōn kijenmej im tōmak im pukōt lan̄lōn̄ ilo iaļan bujen eo ad.
Ij kam̧ool bwe Irooj ejeļā kajiōm̧. Ejeļā apan̄ ko am̧ im n̄ūrbōktak ko. Ejeļā kōn ikdeelel ko am̧ n̄an jerbal n̄an E kōn wujlepļo̧k im, aaet, em̧ool jibadbad. Kōm̧m̧an bwe En tōl im kōjeram̧m̧an eok ilo am̧ kōm̧m̧ane āindein. Ilo etan Jisōs Kraist, amen.