Bol Blak a Rengum el Kirel a Kristo
Kede mo blak a rengud el kirel a Kristo sel dosiou loba klaumerang, e kongei loba ngariou el reng, e melemolem ngara blak el reng,e meluluuch ra bekelsils, e melai ra chedaol belsoil el klikiid.
Betik er a renguk el rodam ma rodos, chelechal sils eng soak el mengedecheduch el mo er a re ngeasek er a Ikelesia luldimukl ra re meang el missionari er kid. Ng uaisei, e rodam ma rodos el kora reng el ngalk ngongit el siotai me morenges.
Tial mlo merek el August 21, e a President Russell M. Nelson a ulterkeklii sel klebokel el Templo ra Sapporo—e longedei el templo ra Siabal. A Templo ra Sapporo a dechor ra diluches er a Siabal ra basio lomekedong er ngii el Hokkaido. Eldi ua Utah, a Hokkaido a ble le kie er ngii a re meses, e meduch a rengrir, el mileboteb.
Sera 1876, a merael a chisel el sensei el ngkel a Dr. William Clark1 a blel siotai er ngii el mora Hokkaido el molisechakl. Ng kiliei ra Siabal el di mle eiai el buil, eng di sel blekerdelel el Kristiano a ildebii a mlo medechel el luldasu el mla mo llechukl er tial deel el sintsiu.2 Ng dilu el kmo, “Re buik, bol blak a rengmiu!”—“Bol blak a rengmiu el kirel a Kristo.”3 A meirei er ngii el mo “blak a rengud el kirel a Kristo” a sebechel lolengeseu el mekedelad a dolilt ra bekl el sils ra Uriul-klebesei el Santo.
Ngera belkul sel de “blak a rengud el kirel a Kristo”? Sel de blak a rengud el kirel a Kristo a belkul e kede semeriar, klebechel, e uldelomel er a urrerel a Kristo. A de blak a rengud el kirel a Kristo a diak el belkul a kmo kede chemolt ra rebebil ra deruchall ra buai. A de blak a rengud el kirel a Kristo a belkul a kmo kede mekedung el mesiou e blak a rengud er a ikelesia er kid el ka doumondai e mui ra deureng.
A re missionari er kid el mesiou el meliuekl ra beluulechad a ungil lokesiu er tirkel meral blak a rengrir el kirel a Kristo. Kesai el rak ra mla memong, e a Sister Yamashita me ngak a milesiou er a Siabal ra Nagoya Mission. A re missionary er kid a kmal mle blak a rengrir el kirel a Kristo. A ta er tirkel missionary a ngeasek el chad el ngklel a Elder Cowan.
A Elder Cowan a di mlak a bita el lochil ra klisichel leng mlara rrat e metemall ra le ngeasek. Uriul ra le siseb er a mission, e ak ngiluu a dengua el mlara keldemel. A Elder Cowan a miltemall tial lochil ra le ngara rrat. Aki ngiluu el mora ungil el basio ra ripeir, e ngara elsel a ileakl el rum, e ak milsa ochil ra kot el taem. Ak milchesuar ra klungel a ringel el ilarem er ngii. Tial telemall e lochil a le biltechir, e ngii loueta el mo ureor.
E ng di, tial lorael a taem el mong, e tial lochil a milemolem el di obebruud. Ng kel lou ngerachel a tekoi ra ukeruul a ulurimel el kmo a Elder Cowan le bo rei me le bo ra tara mission. Ng mle etik tial tekoi le Elder Cowan a kmal lungil el missionari, e ngii a mle mesisiich el soal el di ngara Siabal. Eng di lorael mong, e a Elder Cowan a kmal dikeang. Meng mle uaisei, di ngii a di mlak el longeremrum malechub el loumondai.
Me te liluut el melekoi er ngak el kmo a Elder Cowan bol sebechel el mesiou ra basio el diak el kirel el ngara rrat. Ak milebedebek er tial blekeradel. A kulumdasu er a Elder Cowan ma ngarmedal el taem, mak miluluuch el kirel tial tekoi. Ma kuldengua el morngii e lou beltik el reng el bekikl ma blak tibir ra renguk. Ng di mlak a ngera lolekoi. Ak di rirengesii el lmangel ra bita el dengua. Ak dilu el kmo, “Elder Cowan, ng diak el kirem el henzi er ngak er chelechang. Ak mo omekedong er kau ra klukuk. Kulengit me momdasu er a uldesuek loba nglunguuch.”
Sera kumekedong er ngii ra bol kukuk, eng nguluu tekangel el kmul kmo ng mo otireklii a uldesuek.
Meng ngorokiolel el kungedecheduch er ngii, e ak kuleker er ngii er tial ker: “Elder Cowan, ng di mlak ke molengit ersel babilngem ra mo missionary el modurokl el mora mssion ra basio el diak kem ngara rrat?”
Meng dilu el kmo, “Choi, e President, ng uaisei.”
Mak dulang el kmo, “Elder Cowan, ke mlo kedong el mora Japan Nagoya Mission el kirem el ngara rrat. Ke silbedii a stake president er kau er tial tekoi?”
Ak mlo mechas a renguk er a henzi er ngii. Ng dilu el kmo, “Ng diak, Ng di mlak. Ak lilea ra renguk el kmo alsekum sei e ak mlo kedong er a Rubak el mo rengii, e ak mora gym e melisiich er a bedengek me bol sebechek el ngara rrat.”
Uriul ra kim chadecheduch, e nguleker er ngak er tial ker e merael iuosech er a medal: “President Yamashita, ngerang mak mle ra Siabal? Ngera mak ngar tiang?”
A kulnger er ngii el di mle mereched: “Elder Cowan, ak medengelii a imol luchul e ke mle er tiang. Ke mle el kirek. Ak mlamo medengei el kmo ke meang el ngeasek el chad el bla kusiou el lobengkel. Ak ngeltengat el mla mo medengelkau.”
Ngungil a renguk el louchais el kmo a Elder Cowan a mla lemuut el mora blil e mla mora tara basio el mesiou el sebechel e lousbech er a mlai sel lorael. Ak chemat ra diak el dil Elder Cowan engdi te rokui el missionaries ra beluulechad el rokir el mesiou e lungil el diak el longeremrum malechub e toumondai. Ko mesaul e, elders ma re sisters, ra klaumerang er kemiu, el klebechel, ma mesisiich el blak el reng el kirel a Kristo.
A Babier ra Mormon a ngar ngii a betok el lomeruul ra rechad el mle blak a rengrir el kirel a Kristo. A Alma el Kekerei ra le ngeasek a ulemekcharem ra Ikelesia ma rechedal. Uriul eng siliseb er a klou e lomeldechel a reng e milesiou el mle mesisiich el missionari. Ng ulsiik er a rolel a Rubak, e ulemekngeltengat ra re keldemel ra losiou lobengterir. A Rubak a milisiich er ngii, e ngii a mlo mesisiich er a ikel longarem el ilbangel.
Tiang a Alma a uldersii mora ngelekel ra Helaman tiakid el cheldecheduch:
“Ngkel mo nguu a klaumerang er ngii lotilii ra Dios a mo ngmai a ngeseu sel le ngara ringel, te cheuarem, me toberedang. …
“… Moltirakl a llechul a Dios. …
“Mosiik a ngeseu ra Rubak ra rokui el tekoi el moruul, e ngii a mekrolau el mora ungil.”4
A ongeru el ngelekam el sechal a dim le cheroid er a Ikelesia ra le ngeasek. Sera bo lluich a rekil, ng mlo rengii a blekeradel el rirelli meng ngildechii a klengar er ngii. Ngulkiu a beltik el reng, nglunguuch, ma ngeseu ra telungalk er ngii ma rechad ra Ikelesia, e okiu a ngarbab el beltik el reng ma klebkelel a Rubak, eng liluut el mera Ikelesia.
Uriul eng mlo kedong elmo mesiou ra Washington Seattle Mission. Ng di mle mereched elmo mechitechut a rengul. Bek el klebesei er a ikel kot el ledei el buil, eng mora delmerab el lmangel. Eldi ua Elder Cowan, ng mle soal elmo medengei el kmo, “Ngera mak ngar tiang?”
Uriul ra ta el rak el losiou, e aki ngiluu a klumech el mlo nger a nglungucham. Ng miluches: “Chelechang e ak meral melchesuar ra beltik el reng ra Dios ma Jesus. Ak mo blak a renguk el di ua re profet ra ngaramong. Mal tang eng betok etiteuokel el blekeradel el ngarngii, ak meral dmeu a renguk. Mesiou ra Jesus a meral kot e lungil tekoi. Ng diak a mo uai ngii. A kuldeu ra renguk.”
Ng milchesuar eldi uai a Alma: “Meng, ngeral deurreng, e ngeral mengasireng e llomes el bla kisang; uaisei, a delebengek a mlo mui ra deurreng el klou ra ringel el kulechesuar!”5
Chelsel a klengar er kid e kede mo melchesuar a ongarem, engdi alsekum me kede blak a rengud el kirel a Kristo, eng sebeched el lomes er ngii e melchesuar ra deurreng ma de seluk ra ikal blekeradel. A Osebeled e a ngarbab el lokesiu. Ngii a medengelii sel chedaol el lomesiou blo rengii e ultirakl a soal a Dios el Chedam. Ng klou el klengeltengat el denguu sel klebokel el lokesiul elmo dobedebekii ra bekl el sandei sel dolai ra chedaol belsoil.
Betik er renguk el rodam ma rodos, kid a blak a rengud el kirel a Kristo sel de meral mesiou, bol ngariou a rengud, klou a rengud e loutekangel, mesisiich el meluluuch, e melai er a chedaol belsoil el klikiid.
A kureng me de blak a rengud el kirel a Kristo sel de kengei a chetiteuokel me a ringel e loba kellou el reng ma klaumerang e ngmai a deurreng el ngara ikel rael ra telbiil.
Ak sioning el kmo a Rubak a medengelkau. Ngii a medengei a ringel ma belkikl el reng el mngar ngii. Ngii a medengei el soam el mo mesiou er Ngii el moltirakl e, uaisei, me a blak el reng. Me Ngii bol lomtebechel e lomekngeltengat er kau sel bom moltirakl. Loba ngklel a Jesus Kristo, amen.