“Dali, Magsunod Kamo sa Akon” paagi sa Pagbuhat sang Kristiyanong Gugma kag Pag-alagad

Ang Nobel laureate nga si Elie Wiesel ara sa ospital pagkatapos sang operasyon sa tagipusuon sang sia ginbisita sang lima ka tuig niya nga apo nga lalaki. Samtang ang bata nagtulok sa iya, nakit-an niya ang pag-antus sang lolo. “Lolo,” siling sang bata, “kon mas palanggaon ko ikaw, [mabuhinan bala ang imo pag-antus]?” ¹ Karon nga adlaw ginapamangkot ko ang kada isa sa aton sang amo man nga pamangkot: “Kon palanggaon naton sing dugang ang Manluluwas, mabuhinan bala ang aton pag-antus?”

Sang gintawag sang Manluluwas ang Iya mga disipulo nga magsunod sa iya, sila nagatuman sa layi ni Moses, kalakip ang “mata sa mata, kag ngipon sa ngipon,”² apang ang Manluluwas nagkari agud tumanon ang layi paagi sa Iya Pagpasag-uli. Nagtudlo Sia sang bag-o nga doktrina: “Palanggaa ninyo ang inyo mga kaaway, pakamaayohon ninyo sila nga nagapakalain sa inyo, himoi sang maayo ang mga naakig sa inyo, pangamuyoi ninyo ang mga nagatonto kag nagahingabot sa inyo.”³

Ang mga disipulo gintudloan nga magtalikod halin sa mga pagginawi sang kinaandan nga tawo padulong sa nagapalangga kag nagaamuma nga mga pagginawi sang Manluluwas paagi sa pagbaylo sa pag-ilinaway sang pagpatawad, kaayo, kag kalooy. Ang “bag-o nga sugo” nga “magpalangga sa kada isa”⁴ indi dalayon nga mahapos. Sang ang mga disipulo nagkabalaka parte sa pagdapon sa mga makasasala kag iban pa nga mga sahi sang katawhan, ang Manluluwas mapinasensyahon nga nagtudlo, “Kay kon ginhimo ninyo ini sa isa ka pinakakubos ko nga mga utod, ginhimo ninyo ini sa akon.”⁵ Ukon, subong sa ginpaathag sang isa ka propeta sa Libro ni Mormon, “Kon kamo ara sa pag-alagad sang inyo isigkatawo, kamo ara lamang sa pag-alagad sang inyo Dios.”⁶

Bilang mga disipulo sang Manluluwas sa ulihing mga adlaw, nagapalapit kita sa Iya paagi sa pagpalangga kag pag-alagad sa mga anak sang Dios. Samtang ginahimo naton ini, indi naton mapaiway ang kabudlay, kapipit-an, kag pag-antus sa sining kabuhi, apang mabuhinan ang aton espirituhanon nga pag-antus. Bisan sa aton mga pagtilaw mabatyagan naton ang kasadya kag paghidaet.

Ang aton Kristiyanong gugma kag pag-alagad kinaandan nga magsugod sa aton puluy-an. Mga ginikanan, gintawag kamo nga mangin mapinalanggaon nga mga manunudlo kag mga misyonero sang inyo mga kabataan kag batan-on. Mga manugpangusisa ninyo sila. Ginadala ninyo ang responsibilidad nga buligan sila nga mahaylo—buot silingon nga mapuno sang gugma sang aton Manluluwas.

Samtang nagasunod kay JesuCristo, ang Iya gugma nagabuyok sa aton nga magsuporta sa kada isa sa aton pagpanakayon sa mortalidad. Indi naton mahimo ini nga nagaisahanon.⁷ Nabatian ninyo ako nga nagpaambit sang hurobaton sang Quaker sang una: Itib-ong mo ako, itib-ong ko ikaw, kag ululupod kita nga magsaka sa walay katubtuban.⁸ Bilang mga disipulo, nagsugod kita sa paghimo sini sang kita nabunyagano, ginpakita naton ang aton pagkaluyag nga “magbinuligay sa palas-anon sang kada isa, agud ang mga ini mangin mamag-an.”⁹

“Ang [pag]tudlo sa kada isa sang doktrina sang ginharian”¹⁰ isa ka paagi agud magpalangga kag mag-alagad sa kada isa. Mga ginikanan, mga lolo kag lola, may huyog kita nga mangasubo parte sa sitwasyon sang kalibutan—nga ang mga eskwelahan wala nagatudlo parte sa moral nga pagkatawo. Apang madamo kita sang sarang mahimo. Kita sarang makabintaha parte sa mga higayon sang pagtudlo sa aton kaugalingon nga mga pamilya—ina nagakahulogan nga karon. Indi pagpaligara ang mga ini. Kon ang oportunidad nagaabot agud magpaambit sang inyo mga pinsar parte sa ebanghelyo kag mga leksyon sang kabuhi, untati ang tanan, maglingkod, kag maghambal sa inyo kabataan kag mga apo.

Indi magpalibog nga kamo di-propesyonal nga nahanas bilang manunudlo sang ebanghelyo. Wala sang paghanas ukon manwal nga subong ka mabinuligon subong sa kaugalingon nga pagtuon sang mga kasulatan, pagpangamuyo, pagbinagbinag, kag pagpangita sa paggiya sang Balaan nga Espiritu. Ang Espiritu magatuytoy sa inyo. Ginapromisa ko sa inyo: ang palangakuan nga mangin isa ka ginikanan nagalakip sa dulot nga magtudlo sa mga paagi nga husto para sa inyo kag para sa inyo mga anak. Dumdoma, ang gahum sang Dios agud mag-impluwensya sa aton sing matarong amo ang Iya gugma. “Ginpalangga naton sia, bangud una nga nagpalangga sia sa aton.”¹¹

Mga batan-on, kamo ang amon pinaka-epektibong mga manunudlo sang ebanghelyo. Nagkari kamo sa Simbahan agud manuto para makatudlo kamo sa puluy-an kag mag-alagad sa inyo pamilya, mga kasilingan, kag mga abyan. Indi magkahadlok. Mag-angkon sang pagtuo nga magpamatuod parte sa nabal-an ninyo nga matuod. Hunahunaa kon paano ang mga misyonero nagalambo bangud sila himpit nga nagapangabuhi sang ginkonsagrar nga kabuhi—nagagamit sang ila panahon kag mga talento kag nagapamatuod sa pag-alagad kag pagbugay sa iban. Samtang ginapaambit ninyo ang inyo pagpamatuod parte sa ebanghelyo, ang inyo pagtuo magadako kag ang inyo kumpiyansa magadugang!

Ang pila sang aton pinakamaimpluwensya nga pag-alagad bilang Kristiyano ginhatag paagi sa paghiwat sang pangpanimalay nga pagtuon sang kasulatan, pangamuyo sa pamilya, kag mga miting pangkonseho sa pamilya. Kapin na sa isa ka gatos ka tuig, ang mga lider sang Simbahan nagtawag sa aton nga magpain sang tion nga wala sang paghuder kada simana. Apang madamo sa aton ang sa gihapon wala makabaton sang mga bugay. Ang family home evening indi tion sang pagsermon halin sa iloy kag sa amay. Ini tion agud magpaambit sang simpleng espirituhanon nga mga konsepto kag mga inagihan, agud buligan ang aton mga anak nga manuto sa pagpalangga kag magpaambit, magsilinadya nga ululupod, magpamatuod nga ululupod, kag maglambo kag mag-uswag sing ululupod. Samtang nagahiwat kita sang family home evening kada simana, ang aton gugma sa kada isa mangin mas mabakod, kag mabuhinan sing diutay ang aton pag-antus.

Dumdomon naton, ang labing pinakaimportanteng buluhaton nga aton mahimo sa aton mga pamilya amo ang paagi sa gahum sang Balaan nga Espiritu. Kon san-o man nga kita nagaalsa-boses sa kaakig, ang Espiritu nagahalin sa mga pag-upod naton kag sa mga pamilya. Kon kita nagahambal sa gugma, ang Espiritu sarang nga ara sa aton. Dumdomon naton nga ang aton mga anak kag mga apo nagatakus sang aton pagpalangga paagi sa panahon nga lubos naton nga ginhatag sa ila. Labaw sa tanan, indi madulaan sang pasensya kag indi mag-untat!

Ang mga kasulatan nagahambal sa aton nga sang ang pila ka mga anak sa espiritu sang aton Langitnon nga Amay nagpili nga indi magsunod sa Iya plano, ang kalangitan nagtangis.¹² Ang pila ka mga ginikanan nga nagpalangga kag nagtudlo sa ila mga anak nagtangis man kon ang ila dalagko nga kabataan magpili nga indi magsunod sa plano sang Ginuo. Ano ang mahimo sang mga ginikanan? Indi naton sarang pangamuyuon nga madula ang pagbuot sang isa ka tawo. Dumdoma ang amay sang nadula nga anak nga lalaki, mapinasensyahon nga naghulat sa iya anak nga lalaki nga “[makatalupangod] sa iya kaugalingon,” sa sining panahon nagabantay sa anak. Kag “sang sia malayo pa,” nagdalagan sia padulong sa iya anak.¹³ Sarang kita magpangamuyo nga tuytoyan kita kon san-o maghambal, kon ano ang ihambal naton, kag huo, sa pila ka mga okasyon, kon san-o maghipos. Dumdoma, nga ang aton mga anak kag mga miyembro sang pamilya nagpili na sa pagsunod sa Manluluwas sa ila kabuhi antes diri. Kon kaisa paagi lamang sa ila kaugalingon nga mga inagihan sa kabuhi nga yadtong mga balatyagon nga sagrado liwat nga mabatyagan nila. Sa pinakaulihi, ang pagpili agud magpalangga kag magsunod sa Ginuo kaugalingon nga desisyon nila.

May ara sang isa pa ka pinasahi nga paagi nga ang mga disipulo nagapakita sang ila gugma sa Manluluwas. Karon nga adlaw luyag ko dayawon ang tanan nga mga nagaalagad sa Ginuo bilang mga manugtatap sa iban. Daw ano ka palangga kamo sang Ginuo! Sa inyo mahipos, kag wala ginaanunsyo nga pag-alagad, kamo nagasunod sa Iya nga nagpromisa, “Ang Amay nga nakakita sing likum, sia mismo ang magapadya sa imo sa atubang sang tanan.”¹⁴

Ginadumdom ko ang akon kasilingan nga ang asawa may balatian nga Alzheimer. Kada Domingo ginabuligan niya sia sa pag-ilis para sa pagtambong sa mga miting, ginahusay niya ang buhok, ginamik-apan, bisan pa gani ang magbutang sang aritus niya. Sa sining pag-alagad, sia amo ang halimbawa sang tanan sa amon Ward—sa pagkamatuod, sang kalibutan . Isa ka adlaw, ang iya asawa nagsiling sa iya, “Luyag ko lamang nga makita liwat ang akon bana kag makaupod ko sia.”

Sia nagsabat, “Ako ang imo bana.”

Kag ang iya asawa matam-is nga nagsabat, “Oh, maayo!”

Di ko mahambal ang pag-amuma nga wala ginakilala ang pinasahi nga manugtatap sa akon kabuhi—ang pinasahi nga disipulo sang Manluluwas para sa akon—ang kaupod ko sa walay katubtoban, si Mary. Ginhatag niya ang tanan sa maloloy-on nga pag-amuma kag pagpalangga. Ang iya mga kamot nagapakita sang malolo kag nagasakdag nga impluwensya sang Manluluwas. Wala ako diri kon indi bangud sa iya. Kag upod sa iya, makasarang ako nga magpadayon tubtob sa katapusan kag makaupod sia sa kabuhing walay katapusan.

Kon kamo nagaantus sing madalum, upod sa iban ukon nagaisahanon, ginasugo ko kamo nga tugotan ang Manluluwas nga mangin manugtatap ninyo. Magsandig sa Iya nagakaigo nga butkon.¹⁵ Batuna ang Iya pagpasalig: “Indi ko kamo pagbiyaan nga wala sing kasulhay: Duawon ko kamo,” Sia nagapromisa.¹⁶

Mga kautoran, kon wala pa naton lubos nga mahimo ini, magpadulong kita sing labi sa pagpatawad, kaayo, kag gugma. Sikwayon naton ang away nga masami nagaharahara sa tagipusuon sang kinaandan nga tawo kag ipahayag naton ang pag-amuma, pagpalangga, kag paghidaet ni Cristo.¹⁷

Kon “kamo nakaabot sa ihibalo parte sa himaya [kag kaayo] sang Dios”¹⁸ kag parte man sa “pagpasag-uli nga ginhanda halin sa sadsaran sang kalibutan,”¹⁹ “indi kamo makapanghunahuna sa pagsakit sa isa kag isa, kundi ang mangabuhi nga may paghidaet. … Kag indi ninyo pagtugotan ang inyo mga anak nga … sila maglapas sang mga layi sang Dios, kag mag-ilinaway kag magkinamog sa isa kag isa. … Apang tudloan ninyo sila … sa pagpalangga sa isa kag isa, kag sa pag-alagad sa isa kag isa.”²⁰

Antes lang gid sa Pagkalansang sang Manluluwas, Sia nagtudlo sa Iya mga Apostoles: “Isa ka bag-o nga sugo ang ginahatag ko sa inyo, Nga kamo magpalangga sa kada isa kag isa; subong nga ako nagpalangga sa inyo”²¹ kag “Kon palangga ninyo ako, tumanon ninyo ang akon mga sugo.”²²

Nagasaksi ako nga ang matuod nga hagyo sang Manluluwas sa aton amo ang ginapakita sang nagadaho nga mga butkon sang estatwa ni Thorvaldsen nga Christus. Sia nagapadayon sa pagdaho sang Iya mga kamot sa aton,²³  nagapang-imbitar, “Dali, magsunod kamo sa akon.” Ginasunod naton Sia paagi sa pagpalangga kag pag-alagad sa kada isa kag sa pagtuman sang Iya mga sugo.

Ginahatag ko ang pinasahi ko nga saksi nga Sia nagakabuhi kag nagapalangga sa aton sa isa ka himpit nga pagpalangga. Ini ang Iya Simbahan. Si Thomas S. Monson amo ang Iya propeta sa kalibutan karon nga adlaw. Kabay nga palanggaon naton sing mas labi ang aton Langitnon nga Amay kag ang Iya Anak, kag mag-antus sing diutay, amo ang akon pangamuyo. Sa ngalan ni JesuCristo, amen.