“Los, Nrog Kuv Mus” Los ntawm Kev Hlub thiab Kev Pab Zoo li Khetos

Tus txais nqi zog Nobel hu ua Elie Wiesel nyob hauv lub tsev kho mob tom qab phais plawv es nws tus tub xeeb ntxwv uas muaj tsib xyoos tuaj xyuas nws. Thaum tus me nyuam tub ntsia nws yawg lub qhov muag, nws pom tias nws yawg mob heev. Nws nug hais tias, “Yawg, yog kuv hlub koj ntau zog, puas ua rau koj qhov mob tsawg me ntsis?”¹ Hnub no kuv nug peb txhua tus hais tias: “Yog peb hlub tus Cawm Seej ntau zog, puas ua rau peb raug txom nyem tsawg me ntsis?”

Thaum tus Cawm Seej hais kom Nws cov thwj tim nrog Nws mus, lawv twb ua raws li Mauxes txoj kev cai, xws li “qhov muag pauj qhov muag, hniav pauj hniav,”² tiam sis tus Cawm Seej twb los kom ua raws li kev cai ntawd tag nrho thaum Nws theej peb lub txhoj. Nws qhia ib co lus qhuab qhia tshiab: “Hlub nej tej yeeb ncuab, foom koob hmoov rau lawv cov uas foom tsis zoo rau nej, ua zoo rau lawv cov uas ntxub nej, thiab thov Vajtswv rau lawv cov uas siv tsis zoo rau nej thiab tsim txom nej.”³

Cov thwj tim tau hloov los ntawm tej yam uas neeg ntiaj teb ua mus rau tej yam uas tus Cawm Seej muaj kev hlub ua thaum lawv muab kev zam txim, kev ua siab zoo, thiab kev khuv leej pauv kev sib cav sib ceg. Kev cai tshiab kom “ib leeg hlub ib leeg,”⁴ tsis yog ib qho yooj yim rau lawv ua txhua lub sij hawm. Thaum cov thwj tim txhawj tias lawv nrog cov neeg txhaum thiab lwm haiv neeg nyob, tus Cawm Seej ua siab ntev qhia hais tias, “Thaum nej pab kuv cov kwv tij no ib tug, txawm yog tus ntawd tsis muaj hwj chim dab tsi li los yog, nej tseem pab nws thiab, qhov uas nej pab li ntawd twb yog nej pab kuv ntag.”⁵ Los sis, raws li tus yaj saub hauv Phau Ntawv Maumoos piav hais tias, “Thaum nej ua hauj lwm rau nej tej neeg nruab ze ces nej tsuas ua hauj lwm rau nej tus Vajtswv xwb.”⁶

Vim peb yog tus Cawm Seej cov pab coj hauv lub caij nyoog kawg, peb los cuag Nws thaum peb hlub thiab pab Vajtswv cov me nyuam. Thaum peb ua li ntawd, tej zaum peb tseem yuav raug kev txom nyem, kev sim siab, thiab kev mob ntawm sab cev nqaij daim tawv, tiam sis peb yuav raug txom nyem ntawm sab ntsuj plig tsawg me ntsis. Txawm peb raug kev sim siab los peb yuav muaj kev xyiv fab thiab kev kaj siab lug.

Peb txoj kev hlub thiab txoj kev pab zoo li Khetos yeej ib txwm pib nyob hauv tsev. Cov niam tsev txiv tsev, Vajtswv hu nej kom nej los ua cov kws qhia thiab cov tub txib rau nej cov me nyuam thiab cov tub hluas ntxhais hluas. Lawv yog nej cov uas kawm txog txoj moo zoo. Nej lav ris pab lawv hloov siab los ntseeg. Muaj tseeb tiag, peb txhua tus xav hloov siab los ntseeg—uas txhais hais tias peb yuav muaj tus Cawm Seej txoj kev hlub puv npo.

Thaum peb coj raws li Yexus Khetos, Nws txoj kev hlub ua rau peb ib leeg xav txhawb nqa ib leeg nyob hauv lub neej no. Peb ua tsis tau peb tus kheej.⁷ Nej tau hnov kuv hais zaj paj lug ua ntej hais tias: Koj txhawb nqa kuv thiab kuv txhawb nqa koj, ces wb mam li nce mus ua ke mus ib txhis.⁸ Vim peb yog pab coj, peb pib ua li no thaum peb ua kev cai raus dej, qhia tias peb txaus siab ib leeg ris ib leeg tej nra kom thiaj li yuav sib.⁹

Qhov uas peb ib leeg qhia ib leeg txog txoj lus qhuab qhia ntawm lub nceeg vaj¹⁰ yog ib txoj kev kom ib leeg hlub thiab pab ib leeg. Cov niam tsev txiv tsev thiab cov pog thiab yawg, ntshe peb yws yws hais tias neeg ntiaj teb coj tsis zoo—thiab cov me nyuam tsis kawm coj cwj pwm zoo hauv lub tsev kawm ntawv. Tiam sis muaj ntau yam uas peb ua tau. Peb yeej muaj cib fim qhia peb tsev neeg—tam sim no. Tsis txhob cia tej lub cib fim ntawd ploj mus. Thaum muaj cib fim qhia nej tej kev xav txog txoj moo zoo thiab tej yam uas nej tau kawm hauv nej lub neej, cia li tsum, zaum, thiab nrog nej cov me nyuam thiab cov me nyuam xeeb ntxwv tham.

Peb yuav tsum tsis txhob txhawj yog tias peb tsis tau kawm ua cov kws qhia txoj moo zoo. Tsis muaj ib hoob kawm los yog phau ntawv uas yuav pab npaum li kev kawm vaj lug kub, kev thov Vajtswv, kev xav ntsoov, thiab kev nrhiav tus Ntsuj Plig Dawb Huv txoj kev coj. Tus Ntsuj Plig yuav coj nej kev. Kuv cog lus rau nej tias: nej txoj kev hu los ua ib tug niam tsev txiv tsev kuj muaj lub txiaj ntsim kom paub tus txheej txheem qhia tej yam uas zoo rau nej thiab rau nej cov me nyuam. Cia li nco ntsoov tias, Vajtswv lub hwj chim kom pab peb ua ncaj ncees yog Nws txoj kev hlub. “Peb muaj kev hlub rau qhov Vajtswv twb xub hlub peb lawm.”¹¹

Cov tub hluas ntxhais hluas, nej yog ib txhia ntawm cov uas txawj qhia txog txoj moo zoo. Nej tuaj koom lub koom txoos kom kawm ntawv nej thiaj yuav muaj peev xwm mus qhia thiab pab nej tsev neeg, cov neeg zej zog, thiab phooj ywg. Tsis txhob ntshai. Muaj kev ntseeg ua tim khawv txog tej uas nej paub muaj tseeb. Cia li xav txog cov tub txib thiab ntxhais txib loj hlob vim lawv rau siab ua neej uas tau foom pub rau Vajtswv—lawv siv lawv lub sij hawm thiab tej txuj ci thiab ua tim khawv kom pab thiab foom koob hmoov rau lwm tus. Thaum nej ua tim khawv txog txoj moo zoo, nej txoj kev ntseeg thiab txoj kev ntseeg nej tus kheej yuav loj tuaj.

Tej kev pab zoo li Khetos uas zoo tshaj plaws yog tsev neeg kev kawm vaj lug kub, tsev neeg kev thov Vajtswv, thaib tsev neeg kev sib sab laj. Txij thaum ib puas xyoo tas los, cov thawj coj ntawm lub Koom Txoos tau hais kom peb siv sij hawm txhua lub lim tiam. Tiam sis peb feem coob tseem tsis tau qhov koob hmoov ntawd. Tsev neeg hmo ua ke tsis yog ib lub sij hawm rau tus niam tsev txiv tsev qhuab ntuas cov me nyuam. Yog ib lub sij hawm rau peb tsev neeg hais txog tej yam ntawm sab ntsuj plig, pab peb cov me nyuam paub sib hlub, muaj kev lom zem, ua tim khawv, thiab vam meej ua ke. Thaum peb muaj tsev neeg hmo ua ke txhua lub lim tiam, peb txoj kev hlub yuav muaj zog zuj zus tuaj, thiab peb yuav raug txom nyem tsawg me ntsis.

Xav kom peb nco ntsoov tias, txoj hauj lwm tseem ceeb tshaj plaws peb ua nyob hauv peb tsev neeg yog dhau los ntawm tus Vaj Ntsuj Plig Dawb Huv lub hwj chim. Thaum peb npau taws sib cav sib ceg, tus Ntsuj Plig ncaim peb tsev neeg. Thaum peb muaj kev hlub hais lus, tus Ntsuj Plig yuav nrog peb nyob. Xav kom peb nco ntsoov hais tias peb cov me nyuam thiab cov me nyuam xeeb ntxwv ntsuas peb txoj kev hlub nyob ntawm seb peb siv sij hawm nrog lawv npaum li cas. Qhov tseem ceeb tshaj, cia li ua siab ntev thiab tsis txhob tso tseg!

Cov vaj lug kub qhia peb tias thaum ib txhia ntawm Leej Txiv Saum Ntuj Ceeb Tsheej cov me nyuam ntsuj plig xaiv kom tsis ua raws li Nws txoj hau kev, cov nyob saum ntuj ceeb tsheej quaj.¹² Ib txhia niam tsev txiv tsev uas hlub thiab qhia lawv cov me nyuam kuj quaj thaum lawv cov me nyuam xaiv kom tsis ua raws li tus Tswv txoj hau kev. Cov niam tsev txiv tsev yuav ua li cas? Peb yeej thov tsis tau kom ib tug tsis muaj kev ywj siab xaiv. Cia li nco txog leej txiv ntawm tus tub ua txhaum, uas ua siab ntev tos nws tus tub “nco dheev,” es txhua lub sij hawm nws tseem nrhiav nws tus tub. Thiab “thaum nws los tsis tau txog uas tseem nyob hov deb”¹³ thiab dhia loo mus ntsib nws tus tub. Peb thov tau Vajtswv kom paub thaum twg peb yuav tsum hais lus thiab peb yuav hais li cas, thiab thaum twg peb yuav tsum nyob ntsiag to. Cia li nco ntsoov tias, peb cov me nyuam thiab tsev neeg twb xaiv kom coj raws li tus Cawm Seej hauv lub neej ua ntej lub neej no. Tej lub sij hawm yog los ntawm tej yam hauv lawv lub neej uas lawv rov qab xav zoo li qub. Thaum kawg, lawv yog cov uas yuav tsum xaiv kom hlub thiab ua raws li tus Tswv hais.

Muaj lwm txoj kev uas cov pab coj qhia tias lawv hlub tus Cawm Seej. Hnub no kuv qhuas tag nrho cov uas ua hauj lwm rau tus Tswv vim lawv tu lwm tus neeg. Tus Tswv hlub nej heev! Vim nej ua nej tej hauj lwm ntsiag to thiab tsis muaj leeg twg qhuas nej, nej ua raws li tus uas tau cog lus tias, “Nej Leej Txiv tus uas pom … qhov ntsiag to, nws tus kheej mam li yuav qhib lug muab nqi zog rau nej.”¹⁴

Kuv xav txog ib tug neeg zej zog uas nws tus poj niam muaj mob Alzheimer’s. Txhua hnub Sunday nws tau pab nws tus poj niam hnav khaub ncaws mus rau lub Koom Txoos, ntsis plaub hau, pleev khob peeb, thiab coj qhws ntsej. Vim nws pab nws tus poj niam no, nws coj yam ntxwv zoo rau txhua leej txhua tus hauv peb pawg ntseeg—coj yam ntxwv rau txhua tus neeg thoob plaws lub ntiaj teb. Muaj ib hnub nws tus poj niam hais rau nws hais tias, “Kuv tsuas xav rov qab pom kuv tus txiv thiab nrog nws nyob.”

Nws hais tias, “Kuv yog koj tus txiv nev.”

Thiab nws tus poj niam teb hais tias, “Auj, zoo heev!”

Hais txog kev tu neeg, kuv yuav tsum hais txog tus uas tu kuv tshwj xeeb hauv kuv lub neej—tus pab coj tshwj xeeb ntawm tus Cawm Seej rau kuv—kuv tus khub nyob mus ib txhis, Mary. Nws twb muaj siab dawb siab zoo hlub kuv. Nws txhais tes ua rau kuv xav txog tus Cawm Seej. Kuv yeej yuav tsis nyob no yog tsis muaj nws. Thiab nrog nws, kuv yuav nyiaj kom mus txog thaum kawg thiab nrog nws muaj txoj sia nyob mus ib txhis.

Yog nej raug txom nyem heev, txawm nrog lwm tus los yog nyob nej tus kheej, kuv xav kom nej cia tus Cawm Seej los tu nej. Cia li tso siab rau Nws lub hwj chim.¹⁵ Cia li txais Nws txoj kev nplij siab. Nws cog lus tias, “Kuv yuav tsis tso nej ua ntsuag ib zaug li; kuv yuav rov qab los cuag nej.”¹⁶

Cov kwv tij thiab cov muam, yog peb tseem tsis tau ua, thov kom peb zam txim, ua siab dawb siab zoo, thiab hlub lwm tus. Xav kom peb xyeej kev tsov rog uas pheej ntaus nyob hauv neeg ntiaj teb lub siab thiab tshaj tawm txog txoj kev hlub thiab kev kaj siab lug uas los ntawm Khetos.¹⁷

Yog “nej tau los paub txog Vajtswv lub yeeb koob [thiab txoj kev zoo]”¹⁸ thiab txog “txoj kev theej txhoj uas tau npaj txij thaum chiv keeb,”¹⁹ “nej yuav tsis muaj ib lub siab ua kom lwm tus raug mob, tiam sis yuav nyob kaj siab lug. … Thiab nej yuav tsis cia kom nej tej me nyuam … ua txhaum Vajtswv tej kev cai, thiab tsis sib ntau thiab tsis sib ceg nrog lwm tus. … Tiam sis nej yuav … qhia kom lawv ib leeg hlub ib leeg, thiab ib leeg pab ib leeg.”²⁰

Ua ntej tus Cawm Seej raug ntsia saum ntoo khaub lig, Nws qhia Nws cov Thwj Tim hais tias: “Kuv yuav muab ib txoj kev cai tshiab rau nej, Nej ib leeg yuav tsum hlub ib leeg ib yam li kuv hlub nej”²¹ thiab “Yog nej hlub kuv, ua raws li kuv cov lus txib.”²²

Kuv ua tim khawv tias tus Cawm Seej sawv zoo ib yam li tus mlom Christus uas Thorvaldsen puab. Nws tseem ncav tes rau peb,²³ thov peb hais tias, “Los, nrog kuv mus.” Peb nrog Nws mus thaum peb ib leeg hlub ib leeg thiab ua raws li Nws tej lus txib.

Kuv ua tim khawv hais tias Nws muaj txoj sia nyob thiab hlub peb nrog ib txoj kev hlub zoo tag nrho. Nov yog Nws lub Koom Txoos. Hnub no Thomas S. Monson yog Nws tus yaj saub hauv lub ntiaj teb no. Kuv thov kom peb yuav hlub peb Leej Txiv Saum Ntuj Ceeb Tsheej thiab Nws Leej Tub ntau zog kom peb raug txom nyem tsawg me ntsis. Los ntawm Yexus Khetos lub npe, amees.