2010–2019
“Mei , e Moltirakl er Ngak” el Oubeltikelreng e Mesiou el Kristiano
October 2016


“Mei, e Moltirakl er Ngak” el Oubeltikelreng e Mesiou el Kristiano

Sel de chedal a Osobel er chelechal uriul klebesei, e kede mo er Ngii sel doubeltikelreng e dosiou er a rengelekel a Dios.

A Elie Wiesel el ngiluu a Nobel prize a mlara osbitar el ulbotk a chaidirengul ra bo loldingel er ngii a eim a rekil el ngelekel a ngelekel sechal. Ngkal ngalek ra lomes ra chelsul a medal a demal rubak, eng milsang el mle meringel. “Chedam,” nguleker, “alsekum a kuubeltikelreng er kau el mo klou, ng mo [diak msal meringel]?”1 Chelechal sils e a kuker ra osisiu el ker el merkid: “Alsekum ma beltikelreng er kid el mora Osobel a lemuut el kmo klou, eng mo diak kmal ringel el mei er kid?”

A Osobel er a lomekedong ra mo chedal el mo oltirakl er ngii, e tirka ultirakl a llechul a Moses, uldimukl a otireklel a ikang “o bechetir a medak e ak mechetir a medam, omcham a ungelem e ak ouam a ungelem,”2 eng di a Osobel a mlei el mo mengerungel er tial llach loba Tngakireng er Ngii. Ngulsisecheklii a beches el suobel: “Bol Betik a Rengum ra cherreuem, momekngeltengat ra remelbeakl er kau, moruul a ungil el mora roltuub er kau, e moluluuch el mortirkel lousibai er kau, e oldechelakl er kau.”3

A rechedal a mlosisechakl el diak lousbech a teletelir a re di chad e mo olab a beltikelreng el teletel a Osobel el miltechir kautok loba klausubes, ma blekokouii ma klechubechub. “Tial beches el llach” el mo “oubeltikereng ra tang”4 a dimlak el beot el tekoi. A rechedal ra lsal simbai el moues lobengterir a redengerenger ma kuk di bebil ra bedengir a rechad, ea Osobel a uleba kllouelreng e ulsisechakl, “Sel tal omngesuir a ta er tirka el odam, e ke mla rulii el merngak.”5 Malechub, eng uai sera losaod er ngii a profet er a Babier er a Mormon, “Sel mosiou er a rebebil er kemiu e kemiu a mesiou er a Dios er kemiu.”6

Sel de chedal a Osobel er chelechal uriul klebesei, e kede mo er Ngii sel doubeltikelreng e dosiou er a rengelekel a Dios. Sel doruul el uaisei, eng diak lak el sebeched el mocheroid er a uldikel, ringel, ongarm er a tech, eng di kid a bai mo diak de sal soiseb ra ringel ra reng. El ngii sel de ngara chelsel a ringel eng sebeched el nguu a deureng ma budech.

Sel oubeltikelreng el ua Kristiano ma omesiou a omuchel er a blai. Roungalek, kemiu a mla nguu a ngerachel el loubeltikelreng el sensei e misionari el mora rengelekiu ma rengeasek. Te melai a klemerang el molab. Ng ngerchelem el olngeseu er tir el mo mechell el beches. E klemerang, ke de rokui el louedikel el mo mechell el beches—el belkul a kmo kede mui er a beltikelreng er a Osobel.

Sel de chedal a Jesus Kristo, ea beltkil a rengul a oremelid el mo kaingeseu er a omerolled ra klengar. Ng diak el sebeched el di kid. 7 Ko mla rongesak el louchais er tial subelir a re Quaker: Ke kiuekuak, e ak kiuekuau, e kede merael morbab el terung el mo cherechar.8 Sel de chedal, e ke domuchel el meruul er tiang e sel de metecholb, e kede soad el “nguu a chelngelel a tang, me bol kebekakl.”9

“A [olsisechakl] ra ta ma tang a suobel er a tial renged”10 e teletelel a kaubeltikelreng e mesiou er a ta ma tang. Chedam ma chedil, ma chedam el rubak ma chedil el mechas, kede kora di mesaod a mekngit er tial beluulechad—ma skuul a diak lolsisechakl a ungil ma mekngit. Eng di kid a sebeched el remuul a betok. Kid a sebeched el olsisechakl sel desa techall er a chelsel a rekeblid—er chelechang. Lak ko bechei mel riid. Sel mnguu a techall el sebechem el olsisechakl ra ebangkelio ma suobel er a klengar, em terob a moruul, e bom dengchokl, e mongedecheduch er a rengelekem ma rengelekir a rengelekem.

Ng diak el kired el simbai lekid el dimlak de tobed er a osisechekel ebangkelio. Ng diak a bedengel olsisechakl ma babier el ngosukid el ua sel dosuub a chedaol llechukl, meluluuch, e domdasu, e dosiik ongetikaik er a Chedaol Reng. A Chedaol Reng a mo omekrael er kau. Ng yaksok er ngak lekor kau: a ngerachel el mo nguu a klechedam ma klechedil a uldimukl er ngii a sengk er a olsisechakl lokiu a ikel mo melemalt el kirem ma rengelekem. Ke le mobes, a klisichel a Dios el mo mengetikaik er kid ra llemalt a beltikelreng er Ngii. “Ng betik a rengud er Ngii, leng Ngii a dimla oubeltikereng er kid.”11

Rengeasek, kemiu a tara meduch el sensei er a ebangkelio. Ko mei ra ikelesia el mesuub meng sebechiu el mo remei e olsisechakl e mesiou ra rekeblimiu, tonari, ma resechelimiu. La ko medakt. Moba klaumerang el olecholt a modengei el klemerang. Momdasu er tirkel misionari sel mukeroul e le tir el blak a rengrir el loltirakl er a klengar ra omesiou—chemoit a temir ma duch er tir el louchais a klaumerang er tir el olngeseu e omekngeltengat ra rechad. Sel mouchais er a klaumerang er kau er a ebangkelio, ea klaumerang er kau a meral mo mesisiich e kau a mengai el mo ultebechel a rengum!

A tara klou a rellii el teletael ra omesiou el Kristiano sel de telungalek el mesuub chedaol llechukl, nglunguuch ra telungalek, ma omellach er a telungalek. Mla mo betok ra dart el rak, el mengeteklel a Ikelesia a melekoi er kid el mo chemoit a temed—el diak a mo osengkid er tial taem ra bek el sandei. Eng di betok er kid a dirkak el nguu tial klengeltengat. A ongdibel ra telungalek a diak el di longedecheduch a Chedam ma Chedil. Tiang a temel a telungalek el kauchais a beot el chedaol uldasu ma omeruul, el mo ngosuterir a rengeleked el mo meduch el omekerreu e omerk a ungil, mdak loldeu a rengmiu, e mkauchais a klaumerang er kemiu, e mukeroul e mdak el morael bedul uchel. Ngokiu a ongdibel ra telungalek ra bek el sandei, e a beltikereng el mora tang a merael mo mesisiich, e kid a modiak de sal ngara ringel.

Me lak dobes, sel kot el klou a belkul lurreor el doruul er ngii ra telungalk er kid a okiu a klisichel a Chedaol Reng. Sel tal bolklou a ngered leng kelsibelreng, ea Chedaol Reng a choitid ma telungalek er kid. Sel dongedecheduch loba beltikelreng, ea Chedaol Reng a sebechel lobengked. Dirrek el diak dobes el kmo a rengeleked ma rengelikir a omes ra klungel a beltikelreng er kid lokiu a taem el dechoit lobengterir. E sel kot el ngarbab, bo leklou a rengum e lak mchoit a ikal omeruul!

A chedaol llechukl ouchais er kid el kmo selsekum tirkel reng el ngelekel a Chedam ra Babeluades a melilt el mo choiit a uldesuel, ea babeluades a lmangel.12 A rebebil ra roungalek el mle betik a rengrir ra rengelekir a dirrek el lemangel alsekum a remeklungang el ngelekir lolilt el mo chemoit a uldesuel a Rubak. Me ngerang sebechir rulii a roungalek? Ng diak el sebeched el meluluuch lomtok ra llemeltel a tang. Ke dobedebekii a chedam el ngelekel a ngilai a daisang er ngii e merael, ma demal a milengiil er ngii mesel bocha“[lolchesuar] a loruul,”e ulmes er ngii. E di milengiil “meng milsang ra le dirk cheroid.13 Ng sebeched el meluluuch lolengit a ulekrael ra tekoi el bo dolekoi mesel belsechel, mesel kired el kuk di chelellakl. Di bo molatk el kmo a rengeleked ma retelungalek er kid a di mla melilt el oltirakl ra Osobel ruchei ra lemechell. Sel bebil ra taem eng ngultuil ra loruul ra klengar eng ngokiis a lolechesuar el chedaol tekoi. Engdi, omelilt el mo oubeltikelreng e oltirakl ra Rubak a kmal di ngar tir.

Ngar ngii a tara tokubets el teletael ea rechedal ocholt a beltkil a rengrir el mora Osobel. Chelechal sils e a kusus er tirkel mesiou ra Rubak el lomes ra resmecher. A Rubak a meral betik a rengul er kemiu! Tial diak le mesues el omesiou, e ke oltirakl er Ngii el mle yaksok, “A Demam el mes a berrotel, a chemolt el meskau omeksullem.”14

A kumdasu ra tonari el bechil a silecher ra secher el Alzheimer. Bek el Sandei eng ngolngseu er ngii loubail e mora Ikelesia, sondii a btelul, locha chesberberel a medal, e locha telul. Tial omesiou el loruul er ngii, eng ngii a ungil okesiu el mora bek el sechal ma redil er a ikelesia el ki mngarngii—ma, beluulechad el rokir A tara klebesei ea bechil a dilu er ngii, “Ng kmal di soak el lemuut el mesa bechik e obengkel.”

Ng dilu er ngii, “Ngak a bechim.”

Ng mle ungil longer, “O, ng meral lungil!”

Ng diak el sebechel el mesaud omesiou e diak delii a tokubets el lolengeseu er ngak—ng mlar Osobel el tokubets el chedal el beskak—ng kel keldemek el mo cherechar, Mary. Ng mla chemoit a rokui el kirel a klechubechub ma ulekerreu ma beltikelreng. A chimal a cholechotel a medemedemek, e melisiich el chimal. Ng diak el sebechek el ngartiang a lak ngii. Lobengkel, eng sebechek el melemolm el mo er a ulebongel e mo obengkel er sel diak a ulebengelel klengar.

Alsekum me ke ngara klou el ringel, lobengterir a rechad malechub engdi kau el tang, e a kulengit meng mnguu Osobel el mo omekerreu er kau. Bo multuil er a beltkil a rengul.15 Mnguu a tekingel: “Ng diak chitau me mcheloit: Ak mei er kau.”Ng mle yaksok.16

Rodam ma rodos, alsekum meng dirkak doruul er ngii, e dobult el bedul a klausubes, blekokouii, ma beltikelreng. Dechoit a mekngit el reng el ngii a blechoel ngara chad e douchais a urekereuil, beltikelreng, ma budech er a Kristo.17

Elecha el “bocha modengelii a klebkellel [ma klungiolel] a Dios”18 me a “Tngakireng el ngii a milkedmokl er a uchelel a beluulechad,”19 “e mo diak er a uldesuiu a melemall er a tara chad, e bai mo kiei el ngara budech. … e diak ko bechititerir a rengelekiu mel … lolemall a llechul a Dios e lokeuad e loutoketok er a tang, … Engdi ko bai … olsisechakl er tir el mo oubeltikelreng er a tang, e olngeseu er a ta ma tang.”20

Telkib ruchei er a Lemekerus Osobel, e ngulsisechakl er a re Apostol er Ngii: “Beches el llach ak beskemiu, El mo kaubeltikelreng; el diuai sel kubeltikelreng el merkemiu”21 me a “Alsekum, koubeltikelreng er ngak, e kemo olab a llechuk.”22

A kuchais el kmo sel meral teletelel a Osobel el me er kid a ulecholt er sel bliob el chaus ra Thorvaldsen el Kristus. Ng melemolem el blerk chimal,23 loleker, “Mei, e moltirakl er ngak.” Kid a oltirakl er Ngii lokiu a beltikelreng e mesiou er a ta ma tang e oltirakl a llechul.

A kuchotii a tokubets el sioning er ngak el kmo Ngii a kiei e betik a rengul er kid loba cherrungel el beltikelreng. Tiang a Ikelesia er Ngii. Thomas S. Monson a profet er Ngii el ngar tial beluulechad er chelechang. Me bo doubeltikelreng el mo klou el mora Demad er a Babeluades ma Ngelekel, me lak desal ngara ringel, a nglunguchek. El ngara ngklel a Jesus Kristo, amen.