“Sau, Mulimuli Mai ia te A’u” e ala i le Ola i le Alofa ma le Auaunaga FaaKerisiano

O Elie Wiesel, sa manumalo i se taui taualoa, sa i ai i le falemai a o faasolo malosi mai se taotoga o le fatu ina ua asiasi atu i ai le atalii o lona atalii e lima tausaga le matua. A o tilotilo atu le tamaitiiti i fofoga o lona tamamatua, sa ia vaaia ai ona tiga. “Tamamatua,” sa ia fesili atu ai, “afai ou te alofa atili ia te oe, faamata o le a itiiti ai ou tiga?”¹ O le asō ou te fesili atu ai i se fesili faapena ia i tatou taitoatasi: “Afai tatou te alolofa atili i le Faaola, o le a itiiti ea o tatou puapuaga?”

Ina ua valaauina e le Faaola Ona soo ia mulimuli ia te Ia, sa latou ola i le tulafono a Mose, e aofia ai le sui “o le mata i le mata, ma le nifo i le nifo,”² ae sa afio mai le Faaola e faataunuu lena tulafono i Lana Togiola. Sa Ia aoao mai se aoaoga faavae fou: “Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou.”³

Sa aoaoina le au soo ia liliu ese mai ala o tagata natura i ala alofa ma le popole o le Faaola e ala i le suia o finauga i le faamagalo atu, agalelei, ma le agaalofa. O le “poloaiga fou” ia “fealofani”⁴ sa lei faigofie ona tausia i taimi uma. Ina ua popole le au soo e uiga i le fegalegaleai ma tagata agasala ma ni vaega patino o tagata, sa aoao atu i ai ma le onosai le Faaola, “Aua na faia e outou i le tasi o e aupito itiiti o o’u uso nei, o a’u lea na outou faia i ai.”⁵ Po o le faamatalaga a se perofeta o le Tusi a Mamona, “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua.”⁶

I le avea ai ma soo o le Faaola i aso e gata ai, tatou te o mai ia te Ia e ala i le alofa ma le auauna atu i fanau a le Atua. A o tatou faia, atonu o le a le mafai ona tatou aloese mai faafitauli, mafatiaga, ma puapuaga i la le tino, ae o le a itiiti o tatou puapuaga faaleagaga. E oo lava i o tatou tofotofoga e mafai lava ona tatou lagonaina le olioli ma le filemu.

O lo tatou alofa ma auaunaga FaaKerisiano e masani ona amata i le aiga. Matua, ua valaauina outou e avea ma ni faiaoga ma ni faifeautalai alolofa i a outou fanau ma le autalavou. O i latou o au tagata sailiili. Ua ia te oe le tiutetauave e fesoasoani ia i latou ia liuaina. O le mea moni, o loo tatou saili uma ina ia liuaina—o lona uiga ia faatumulia i le alofa o lo tatou Faaola.

I le avea ai ma soo o Iesu Keriso, e faaosofia e Lona alofa i tatou e lagolago le tasi ma le isi i la tatou malaga i le olaga nei. E le mafai ona tatou faia na o i tatou.⁷ Sa outou faafofoga muamua na ou faasoa atua le faataoto lenei [a le lotu Quaker]: E te lifiina a’u ae ou lifiina oe, ma o le a ta fe’aei faatasi e faavavau.”⁸ I le avea ai ma soo, tatou te amata ona faia lenei mea pe a papatisoina i tatou, i le faaali atu o lo tatou naunautaiga “e tauave avega a le tasi, ina ia mama.”⁹

“[Aoaoina o le tasi o le isi i] mataupu faavae o le malo”¹⁰ o se auala e alofa atu ai ma auauna le tasi i le isi. Matua ma matua matutua, ua tatou faaseā i le tulaga ua i ai le lalolagi—ua le o aoaoina e a’oga ia uiga mama faaletagata. Ae e tele lava mea e mafai ona tatou faia. E mafai ona tatou faaaogaina taimi e aoao atu ai i totonu o o tatou lava aiga—o lona uiga o le taimi nei. Aua ne’i ma’umaua na taimi. A oo mai se avanoa e faasoa atu ai ou mafaufauga e uiga i le talalelei ma lesona o le olaga, taofi mea uma ae nofo i lalo ma talanoa ma lau fanau ma fanau a fanau.

E le tatau ona tatou popole faapea e le o i tatou o ni faiaoga o le talalelei ua aoaoina faalematata. E leai ma se vasega faaleaoaoga po o se tusi lesona e sili atu ona aoga nai lo a tatou lava suesuega faaletagata lava ia o tusitusiga paia, tatalo, mafaufau loloto, ma le saili atu i le taitaiga a le Agaga. O le a taitaiina oe e le Agaga. Ou te folafola atu ia te oe: o le valaauga o le avea ma se matua e aofia ai le meaalofa o le aoao atu i auala e sa’o mo oe ma lau fanau. Manatua, o le mana o le Atua e faatosina ai i tatou i le amiotonu, o Lona alofa lea. “Tatou te alolofa ia te Ia, aua na Ia muai alofa mai ia te i tatou.”¹¹

Autalavou, o outou o nisi o a matou faiaoga sili ona mataalia o le talalelei. Tou te o mai i le lotu e aoao ina ia mafai ai ona outou ō atu i le fale e aoao atu ma auauna atu i o outou aiga, tuaoi, ma uo. Aua le fefe. Ia i ai le faatuatua e molimau atu ai i mea e te iloaina e moni. Mafaufau i le auala e tuputupu ae ai faifeautalai faamisiona ona latou te ola ma le faamaoni i se olaga faapaiaina—i le faaaogaina o a latou taimi ma taleni ma le tuuina atu o molimau e auauna ai ma faamanuiaina isi. A e faasoa atu lau molimau o le talalelei, o le a tuputupu ae lou faatuatua ma o le a faateleina lou talitonuga.

O nisi o a tatou auaunaga FaaKerisiano e sili ona anoa, e tuuina atu e ala i le faia o suesuega faaleaiga o tusitusiga paia, tatalo faaleaiga, ma fonotaga faaleaiga. Mo le silia ma le selau tausaga, o loo valaau mai pea taitai o le Ekalesia ia faatulaga ese se taimi e le faalavelaveina i vaiaso taitasi. Ae e toatele lava i tatou o loo misia ia faamanuiaga. O le afiafi faaleaiga e le o se otegiaga mai ia Tina ma Tama. O le tatou taimi faaleaiga lea e fefaasoaai ai ni manatu faaleagaga faigofie ma ni aafiaga, e fesoasoani ai i a tatou fanau e aoao ia fetausia’i ma fetufaa’i, fiafia faatasi, femolimaua’i faatasi, ma tuputupu ae ma agai faatasi i luma. E ala i le faia o afiafi faaleaiga i vaiaso uma, o le a faatupulaia ai le malosi o lo tatou alolofa mo le tasi ma le isi, ma o le a itiiti o tatou puapuaga.

Ia tatou manatua, o le galuega aupito sili ona taua tatou te faia i totonu o o tatou aiga e faia lea i le mana o le Agaga Paia. Soo se taimi lava tatou te sii ai o tatou leo i le ita, e aluese le Agaga mai ia tatou mafutaga [faaleulugalii] ma aiga. A tatou tautatala atu ma le alofa, e mafai ona faatasi mai le Agaga ma i tatou. Ia tatou manatua foi e fuatiaina e a tatou fanau ma fanau a fanau lo tatou alofa i le tele o lo tatou taimi e tuuto atu ia i latou. E sili i lo mea uma, ia onosai ma aua le faavaivai!

Ua ta’u mai e tusitusiga paia ia i tatou ina ua filifili nisi o fanau agaga a le Tama Faalelagi e le mulimuli i Lana fuafuaga, sa tutulu le lagi.¹² O nisi matua na alolofa ma aoao a latou fanau, e tutulu foi pe a filifili a latou fanau ua matutua e le mulimuli i le fuafuaga a le Alii. O le a se mea e mafai ona faia e matua? E le mafai ona tatou tatalo ia aveesea le faitalia o se isi tagata. Manatua le tamā o le atalii faamaumauoa, o lē sa faatalitali ma le onosai mo lona atalii ia “atamai ... o ia,” i le taimi atoa sa tauautilo mo ia. Ae sa “mamao [ese] atu o ia,” sa ia tamoe atu ia te ia.¹³ E mafai ona tatou tatalo mo le taitaiga po o le a le taimi e tautala ai ma mea e ta’u atu, ae ioe, o nisi taimi, ia iloa le taimi e filemu ai. Manatua, ua uma ona filifili a tatou fanau ma tagata o le aiga e mulimuli i le Faaola i lo latou muai olaga. O nisi taimi ua na o aafiaga o o latou lava olaga e toe fagua ai na lagona paia. I le faaiuga, o le filifiliga o le alofa ma le mulimuli i le Alii e ao ona avea ma a latou lava filifiliga.

O loo i ai se isi ala faapitoa e faaalia ai e soo lo latou alofa mo le Faaola. O le asō ou te faamamaluina ai i latou uma o e auauna atu i le Alii o ni tausima’i. E maeu le alofa o le Alii ia te outou! I a outou auaunaga leleoa ma le le amanaiaina, o loo outou mulimuli ia te Ia o lē na folafola mai, “O lou Tama o le e silasila mai i mealilo, o ia lava o le a tauia faaaliali oe.”¹⁴

Ou te mafaufau i lo’u tuaoi o lona toalua sa mafatia i le faamai o le mafaufau. O Aso Sa uma e fesoasoani ai o ia ia te ia e fai ona lavalava mo sauniga Lotu, selu lona ao, fai ana vali, ma fai ona tautaliga. I le tuuina atu ai o lenei auaunaga, sa avea ai o ia ma se faataitaiga i alii ma tamaitai uma i la matou uarota—o le mea moni, mo le lalolagi. I se tasi aso sa fai atu ai lona toalua ia te ia, “Ou te toe fia vaai lava i si o’u toalua ma faatasi ma ia.”

Sa ia tali atu, “O a’u o lou toalua.”

Ma sa ia tali fiafia mai, “Oi, ta’i lelei!”

E le mafai ona ou tautala atu e uiga i le tuuina atu o le tausiga e aunoa ma le faamamaluina o le tausima’i faapitoa i lo’u olaga—le soo faapitoa o le Faaola mo au—la’u soa e faavavau, o Mary. Ua ia tuuina mai mea uma i le faafailelega agaalofa ma le alofa. O ona lima ua iloa atu ai le aao lagolago ma le agamalu o le [Alii]. Se manu ou te le i ai iinei pe a na le aunoa ma ia. Ma ona o ia, o le a mafai ai ona ou tumau e oo i le iuga ma faatasi ai ma ia i le ola e faavavau.

Afai o loo e puapuagatia tele, ma isi pe na o oe, ou te uunaia oe ia faataga le Faaola e avea ma au tausima’i. Faalagolago atu i Lona alofa naua.¹⁵ Talia Lana faamautinoaga. “Ou te le tuua outou o matuaoti: Ou te sau ia te outou.” Ua Ia folafola mai.¹⁶

Uso e ma tuafafine, afai tatou te le o faia atoatoa lava, ia tatou liliu atili atu i le faamagalo atu, agalelei, ma le alofa. Ia tatou lafoai ese taua o le feitaga’i ia e tele ina sasao i o tatou loto o tagata natura ae folafola atu le tausiga, alofa, ma le filemu o Keriso.¹⁷

Afai “ua outou o mai i le malamalama o le mamalu [ma le agalelei] o le Atua”¹⁸ faapea foi ma “le togiola na saunia mai le faavaega o le lalolagi,”¹⁹ “o le a le i ai ia te outou se manatu e faamanu’a i le tasi, ae outou nonofo i le filemu. ... Ma o le a outou le tuu a outou fanau ... ia latou soli tulafono a le Atua, ma misa ma fefinauai ma le tasi. ... Ae tou te aoao i latou ia alofa le tasi i le isi, ma auauna le tasi i le isi.”²⁰

A o lumanai le faasatauroga o le Faaola, sa Ia aoao ai Ana Aposetolo: “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou”²¹ ma “Afai tou te alofa mai ia te au, ia outou tausi mai i au poloaiga.”²²

Ou te molimau atu o le uiga moni o le Faaola ia i tatou o le uiga lea e faatino mai e le faatusa a Thorvaldsen, le Keriso (Christus). O loo faaauau pea ona Ia faaloaloa mai Ona aao,²³  ma augani mai, “Sau, mulimuli mai ia te au.” Tatou te mulimuli ia te Ia e ala i le alofa ma le auauna atu i le tasi ma le isi ma le tausiaina o Ana poloaiga.

Ou te tuu atu la’u molimau faapitoa o loo soifua o Ia ma e alofa ia i tatou i se alofa atoatoa. O Lana Ekalesia lenei. O Thomas S. Monson o Lana perofeta i le lalolagi i aso nei. Tau ina ia faateleina atili lo tatou alolofa i lo tatou Tama Faalelagi ma Lona Alo, ma ititii ai o tatou puapuaga, o la’u tatalo lea. I le suafa o Iesu Keriso, amene.