Dagiti Pannakabagi iti Simbaan

Iti di pay nabayag a panawen, maysa nga awan asawana a babai nga awagak ti Molly, nagawid manipud iti trabaho tapno laeng makitana ti dua a pulgada (5 cm) a danum a naglapunos iti intero a suelo ti basementna. Naammuanna a dagus a dagiti kaarrubana a kabingayna iti linia ti drainage, napalaluanda ti naglaba ken nagdigos a namaglayus iti kasta unay.

Kalpasan a naayaban ni Molly ti maysa a gayyem a tumulong, inrugida a dua ti nagtako ken naglampaso. Idi met a nagring ti doorbell. Impukkaw ti gayyemna, “Dagiti home teachermo!”

Nagkatawa ni Molly.”Ita ti maudi nga aldaw ti bulan,” insungbatna, “ngem isiguradok a saan a dagiti home teacherko.”

Sakasaka, nabasa ti sapinna, nakapunggos ti buok, ken nakaguantes iti uso a latex, linuktan ni Molly ti ridaw. Ngem ti karkarna a langana saan a maipada iti karkarna a bisita a nakatakder iti sangona. Isu dagiti home teacherna!

“Kasta unay ti siddaawko!” kinunana kaniak. “Daytoy ti milagro ti home teaching---ti kita ti padas nga ibinglay dagiti Kakabsat iti bitla iti sapasap a komperensia!” Intuloyna: Ngem iti panangpadasko nga ikeddeng no agkak wenno pagdalusek ida, kinunada, ‘O Molly, ladingitenmi. Makitami a busyka. Dimi kayat ti makibiang, isu nga umaykamto la no maminsanen.’ Ket pimmanawdan.”

“Asinoda?” dinamag ti gayyemna manipud iti basement.

“ Kayatko nga ibaga, ‘Sigurado a saan a dagiti Tallo a Nephite,’” kinuna ni Molly, “ngem tinengngelko ti bagik ket kinunak, ‘Isuda ti home teacherko, ngem nariknada a madi a gundaway ita ti mangted iti mensaheda.’”¹

Kakabsat, maamiristayo koma ti pagrebbengan iti priesthood a nailadawan “nga umuna a paggapuan ti tulong iti Simbaan” iti tunggal tao ken pamiliana.² Adu ti material a naipablaak iti papel a naaramid manipud iti kakaywan tapno buklen wenno uliten a buklen ti home teaching. Adun ti naited a makaguyugoy a bitla a mangyallukoy iti daytoy. Sigurado nga awan ti Freudian travel agency iti sadino man a makaurnos iti adu a guilt trip a gapuanan daytoy a topiko. Ngem marigatantayo pay laeng a gun-oden sadino man ti maawat a pagtuladan iti panangipatungpal iti bilin ti Apo a “mangkitkita a kanayon iti simbaan”³babaen ti priesthood home teaching.

Paset ti karit a sangsanguentayo ket ti agbaliwbaliw a demograpiko ti Simbaan. Ammotayo a gapu ta agnanaed dagiti miembrotayo iti 32,000 a ward ken branch, a masarakan iti agarup 188 a pagilian ken teritorio, dakdakkelen a karit ti agbisita iti pagtaengan dagiti kakabsattayo ngem iti nagkauna a panawen ti Simbaan a suruan ti kaarruba ti kaarrubana nga awaganda iti “block teaching.”

Maysa pay, iti adu a yunit ti Simbaan, bassit ti bilang dagiti priesthood bearer nga ag-home teaching, panawanda dagiti makapagserbi iti 18 wenno 20 a pamilia---wenno ad-adu pay---tapno aywanan. Adda met dagiti parikut ti atiddog a panagbiahe, nangina ken awan umdas a transportasion, ken ti napabayag nga aldaw ken lawas a panangtrabaho. Mainayon ditoy ti tignay a mainaig iti kultura a mangsupring iti di nayawis a panagbisita iti taeng, ken ti parikut iti saluad a makita iti adu a sangakarrubaan iti lubong---makitatayon ti rikut ti problema.

Kakabsat,iti kasayaatan ti amin a kasasaad ken iti paspasamak a pakaaramidan ti home teaching, ti binulan a panagbisita iti tunggal balay ket ulidan nga ikalikagum ti Simbaan. Ngem iti pannakaammo nga iti adu a lugar ti lubong, di mabalin a gun-oden dayta nga ulidan ken datay ti gapu ti pannakapaay dagiti kakabsat no paaramidtayo kadakuada ti ditay pudno a maaramid, nagsurat ti Umuna a Panguluen kadagiti priesthood leader ti Simbaan idi Disiembre 2001, a nangted iti daytoy naparegta, makatulong unay a balakad: “Adda dagiti lugar iti Simbaan,” insuratda, a di mabalin ti binulan a panag-home teaching iti tunggal pagtaengan gapu ta awan umdas a bilang dagiti aktibo a kakabsat iti priesthood ken agduduma a sabali pay karit.” Nadakamatmi ti sumagmamano kadagitoy. “No agtalinaed ti kasta a kasasaad,” intuloyda, “nasken nga aramiden dagiti lider ti amin a kabaelanda a mangusar iti resources nga adda kadakuada a mangaywan ken mangpatibker iti tunggal miembro.” ⁴

Kakabsat, no mapadasak dagitoy narigat a kasasaad iti ward wenno branchko, usarenmi iti kaduak iti Aaronic Priesthood ti balakad ti Umuna a Panguluen (nga annuroten itan iti handbook) iti kastoy: Umuna, nupay adu a bulan sakbay a magun-od daytoy, tungpalenmi koma ti bilin iti nasantuan a kasuratan a “mangsarungkar ti balay ti tunggal kameng,”⁵ nga agaramid iti schedule ti ipapanmi kadagiti pagtaengan iti kalendario nga agpada a posible ken praktikal. Nabukel ti dayta nga schedule ti panangipangruna iti sidadaan nga orasmi ken kasansan ti panagbisita kadagiti kangrunaan a makasapul kadakami---dagiti investigator a sursuruan dagiti misionario, kabumbuniag a miembro, masaksakit, malmalday, di unay aktibo, agmaymaysa a nagannak iti pamilia nga adda pay la dagiti annak iti pagtaengan, ken dadduma pay.

Iti panangsaggaysami iti iskediul nga agbisita iti amin a pagtaengan, a mangbubos iti adu a bulan a mangipatungpal, agaramidkami iti sabali pay a kita ti pannakikontak iti tunggal tao ken pamilia iti listaanmi babaen ti wagas nga inted ti Apo. Awan duadua a maaywananmi dagiti pamiliami iti simbaan ken kas iti kuna ti nasantuan a kasuratan, “kasao ti tunggal maysa maipanggep ti pagimbagan dagiti kararuada.”⁶ Maysa pay, agtawagkami iti telepono, ag-email ken agteks iti mensahe, ag-type iti kablaawmi babaen ti maysa a kita ti social media a magun-odmi. Tapno maited ti espesial a kasapulan, maipatulodmi ti scripture quote wenno binatog iti bitla ti sapasap a komperesia wenno Mormon Message a naala iti adu a material iti LDS.org. Kas iti kinuna ti Umuna a Panguluen, aramidenmi amin a kabaelanmi iti kasasaad a sanguenmi nga usaren dagiti tulong wenno resource nga adda kadakami.

Kakabsat, kiddawek kadakayo ita nga ad-adda koma a maawatanyo ti home teaching. Iti nabarbaro, nasaysayaat a wagas, makitayo koma ti bagiyo a kas pannakabagi ti Apo iti annakna. Kayatna a sawen dayta ti saan a panangusar iti tradision ti panagdardaras a kas iti linteg ni Moises, nga ungto ti bulan a panagbisita a pagdardarasanyo a mangted iti naisurat a mensahe manipud iti magasin ti Simbaan a nabasan ti pamilia. Sapay koma ketdi ta ugalienyo ti napudno, naitunos iti ebanghelio a pannakaseknan kadagiti miembro, mangkitkita ken mangay-aywan iti tunggal maysa, mangipaay iti espiritual ken temporal a kasapulanda iti wagas a makatulong.

Ita, no ania dagiti “mabilang” iti home teaching, “mabilang” met ti amin a nasayaat nga aramidenyo, isu nga ireport amin! Kaskenan a report ti no kasano a naparaburan ken naaywananyo dagiti naipaaywan kadakayo, nga awan pakainaiganna iti schedule wenno naitudo a lugar. Ti kaskenan ket patpatgenyo dagiti aywanyo ken tungpalenyo ti bilin a “mangkitkita a kanayon iti Simbaan.”⁷

Idi Mayo  30 ti naglabas a tawen, inruar ni Troy Russel a gayyemko ti pickup truckna iti garahe tapno mapan agidonar iti goods iti local Deseret Industries. Nariknana nga adda nalidlidan ti akinlikud a ligayna. Iti pagarupna nga adda natnag a banag, rimmuar tapno makitana ti ipatpateg a siam-ti-tawenna nga anakna, ni Austen, a nakapakleb iti semento. Dagiti ikkis, priesthood blessing, paramedic crew, ti hospital staff—iti kastoy a kaso, awan maaramidda. Natay ni Austen.

Saan a makaturog, saan a makasarak iti talna, saan a maliwliwaan ni Troy. Kinunana a dinan madaeran ti saem ket dinan kayat ti agpatuloy pay. Ngem iti dayta a nakaro a panagladingit immay ti tallo a pangsubbot a bileg.

Umuna ti ayat ken mangpatpatalged nga espiritu ti Amatayo iti Langit, a naidanon babaen ti Espiritu Santo a nangliwliwa ken Troy, nangisuro kenkuana, nangipateg kenkuana ken nangyarasaas nga ammo ti Dios ti amin maipapan ti pannakapukaw ti naimbag ken perpekto nga Anak. Maikadua ti asawana, ni Deedra, a nangarakup ken Troy ken nangipateg ken nangipalagip kenkuana a napukawan met iti anak ken determinado a saan met mapukaw ti asawana. Maikatlo ditoy nga estoria ni John Manning, nalaing a home teacher.

Diak ammo ti iskediul ti panagbisita ni John ken ti junior kompanionna iti balay dagiti Russell, wenno ania ti mensahe a naited idi nagbisitada, wenno kasano nga inreportda ti padas. Ngem ti ammok iti naudi a panagsusulbod binangon ni Brother Manning ni Troy Russell manipud iti trahedia iti garahe a kas iti panangbangonna mismo iti ubing nga Austen. Kas iti home teacher wenno agbambantay wenno kabsat iti ebanghelio a pagbalinanna koma, inako ni John ti panangaywan iti priesthood ken ni Troy. Kinunana, “Troy, kayat ni Austen nga agpatuloyka manen---agraman iti basketball court---isu nga addaak ditoy iti 5:15 iti bigat. Agsaganaka gapu ta diakon sumrek tapno riingenka---ken ammok a di kayat ni Deedra nga aramidek met dayta.”

“Diak kayat ti mapan,” imbaga kaniak ni Troy idi agangay, “gapu ta kanayon nga ikuyogko ni Austen kadagidi a bigat ket ammok a nasaem unay dagita a lagip. Ngem impilit ni John isu a napanak. Manipud iti dayta umuna nga aldaw, nagsaritakami---wenno nagsaritaak ket dimngeg ni John. Nagsaritaak bayat panagmanehok a napan iti simbaan ken iti panagawidmi. No dadduma agsaritaak idi bayat ti panagparadami iti garahe a mangbuybuya iti ilulutuad ti init iti La Vegas. Narigat idi damo, ngem in-inut a naaddaanak iti pigsa babaen iti maysa a nakapuy unay a 6-kadapan-2-pulgada (1.88 m) a basketball player ti Simbaan, a piman ti panag-jumpshotna, a nangipateg ken dimngeg kaniak agingga a nasarakak manen ti rag-o iti biagko.”⁸

Kakabsatko iti nasantuan a priesthood, no saritaenmi ti home teaching wenno panagaywan wenno bukod a panagserbi iti priesthood---ania man ti awagyo---dayta ti pagsasaritaantayo. Dawatenmi kadakayo a kas home teacher nga agbalinkayo a pannakabagi ti Dios iti annakna, tapno ayaten, aywanan ken ikararaganyo dagiti tao a naipaaywan kadakayo, a kas panagayat ken panangaywan ken panangikararagmi kadakayo. Sapay ta naannadkayo nga agaywan iti arban ti Dios iti wagas a mainugot iti kasasaadyo, ikararagko, iti nagan ti Naimbag a Pastor kadatayo amin, a pagsaksiak, kas ken Apotayo a Jesucristo, amen.