2010–2019
Mwet Aholyacn Alu uh
Ohktohpa 2016


Mwet Aholyacn Alu uh

Kuht siyuck suwos oacna mwet forfor luti luhn sucu in pa mwet aholyacn God nuh sin tuhlihk Nahtuhl, in luhngse ac karihngihn ac pruhe ke mwet kowos muhtwacta yohroh an.

Pacl fototo somlah ah sie tahmtahel lolacp, suc nga fah pahngon Molly, fohlohk nuh lohm sel tukun orekma ah in sokwack inches luo (5 cm) ke kof afuhnlah falfucl in basement lal ah nohfohn. Sana el akihlacnwack lah mwet tuhlan lal ah, suc el akacsruhi paip in drainage uh, sahp acna oruh luhpan owo na yohk ac yihyih ke srihpen kof ingacn oasr lun basement lal an.

Tukun Molly el pahngon sie kawuck lal in tuhkuh ac kahsruh, elos kwewa muhtwacwacack in yucuk kof an ac insrwacli. Na muh doorbell ah ring. Kawuck se lal ah muh, “Mwet forfor luti lom ah ngoh!”

Molly el isrwacsr. Mihsenge pa lwen sahflah ke mahlwem se inge,” el topuk, “tuhsruhk nga kuh in fahk na pwacye lah tiac mwet forfor luti luhk ah.”

Ke tiac sori, tuhrasis sroksrok, insifac kapihri ke skarf se, ac sie pair in latex glove arlac na stael, Molly el ikucslah sruhnguhl ah. Tuhsruhk atacn nuknuk lal an tiacna ma ac kapsrweyuck nuh ke mwet tu ke sruhnguhl lal an. Mwet forfor luti lal ah pa ngacn!

“Nuh muh na kom in puokyucwi ke sie plunger ah!” el fahk nuh sihk tok. “Ma usrnguck ke forfor luti uh pa inge—kain ma Tamuhlwel uh akacsruhi ke sramsram ke toeni luhlahp uh!” El kalweni: “Na ke nga srihke in sulaclah lah ngwac sang nuh selos sie kiss kuh sang nuh selos sie mwe insrwacl, elos fahk, ‘O, Molly, sislah koluk lasr. Kuht kuh in liye lah kom kahfofo. Kuht tiac ke ikucskom; kuht fah tuhkuh sie pac pacl.’ Ac elos som.”

“Suc ngoh?” kawuck se lal ah sasa tenyak ke basement ah.

“Nga ke fahk muh, ‘Pwacyena tiac Nephite Tolu ah,’” Molly el tuhkahkihn, “tuhsruhk nga kutongyucwi na ac fahsr kahkahsrihk, ‘Mwet forfor luti luhk ah, tuhsruhk elos puhla lah tiac pacl wo se in akacsruhi pweng lalos uh.’”1

Tamuhlwel, lwelah kuht in liye ahkwoye kihtin pacl kunohkohn luhn pristut ma ahkuhtweyucki in pa “ohiyac in kahsruh se emet ke Alu uh” nuh sin kais sie mwet kuh sucu uh.2Un sahk na fohn se kihsackihnyucklac in oraclah pwepuh uh in oreklac ac na sifil oreklac. Sramsram mokleyuck na pucspucs oreklac in srihke in ahkkweye forfor luti uh. Pwacyena wacngihn mukwikwi kuh in oruh mwet se in puhla auli ke kuhtwena ma oacna mwet forfor luti sucu inge kuh in oruh. Tuh kuht srwackna tihkuclkucl in oraclah wo apkuhran nuh ke ohiyac fal ke mukwikwi nuh ke masap luhn Leum “in karihngihn Alu uh pacl nuh kwewa”3 ke forfor luti yurin sucu luhn pristut uh.

Ip ke ma upac kuht sun uh pa ohiyac eklac luhn mwet ke Alu uh. Kuht etuh lah ke wi lasr uh ingena fahsrwelihk ahluhkwelah ward ac pracns tausin 30,000, oan ke sahp muhtuhnfacl ac pohloh acn 188, ma na upac se in muhtwacta ke lohm sin tamuhlwel ac tahmtahel wiyacsr uh likina pacl emet ke Alu uh ah ke mwet tuhlan uh luti mwet tuhlan uh ke sie ma pahngpahng “luti inmahsrol.”

Oacyacpac, ke acn puhkantwen ke Alu uh, oasr luhpah pakpucki ke mwet sruok pristut suc oasr in kuh in oruh forfor luti yurin sucu, fihliyac na nuh selos suc kuh in kuhlwacnsap uh sucu puhs oacna sucu 18 kuh 20—kuh puhs liki—in karihngihn. Kuh pac in oasr elyah ke acn loeloes in forfor, yohk moliyac ac suhpuhsiacn mwe kahsruhsr, ac puhlan pacl ke orekma ke lwen in acn sacn ac wik in orekma an. Weacng nuh ke kuhtuh facsin sruhngwacyuck lain muhtwacta tiac solsol in lohm uh ac elyah in sef ma oasr ke yen atuhlani pucspucs facluh uh—na, kuht muhtwacwacack in liye upaciyen elyah uh.

Tamuhlwel, ke ohiyac wo emet uh ac ke ohiyac ma ma ingacn kuh in oreklac uh, sie muhtwacta ke mahlwem nuh kwewa ke kais sie lohm el srwackna ma pwacye Alu uh kampare nuh kac. Tuhsruhk ke akihlen muh ke acn puhkantwen fin facluh in ahkfahsrye kain ma pwacye inge uh tiac kuh in oreklac ac lah kuht oruh tamuhlwel ingacn in puhla oacna mwet tiac oraclah wowo ke kuht siyuck selos in oruh ma koflah in oreklac uh, Prestuhnsi Se Met suhmuhslah nuh sin mwet kol pristut luhn Alu uh ke Tisacmpuh 2001 ah, sang kahs in kahsruh na mokleyuck, ac wowo inge: “Oasr kuhtuh acn ke Alu uh,” elos suhmuhslah, “ma … forfor luti yurin sucu kais sie mahlwem kuh in upac ke srihpen suhpuhs luhn tamuhlwel fokoko ke pristut uh ac ma upac puhs sahyac ke acn uh.” Kuht sruhmuhn kuhtuh ke ma ingacn. “Ke kain ohiyac inge sikyak,” elos ac som na, “mwet kol uh enenuh in oruh kuhiyaclos in orekmakihn kahsruh oasr lalos in karihngihn ac ahkkweye kais sie mempucr.”4

Tamuhlwel, fin nga sun kain ohiyac upac inge ke ward kuh pracns luhk uh, companion luhk ke Aaronic Pristut ac nga fah kapsra kahs in kahsruh luhn Prestuhnsi Se Met (ma ingena lutiyuck ke handbook uh) ke inkacnek se inge: Ma se met, finne mahlwem ekahsr in ahkfahsryelah, kuht fah ukwe ma sapkihnyuck ke ma suhmuhslah in muhtwacta nuh lohm sin kais sie mempucr,5 oraclah pacl ma ac uskuhtlac nuh ke lohm ingacn ke pacl ma kuh ac ma tiac upaclaclac. Oreklac nuh ke pacl lasr uh yohk srihpaciyen pacl oasr lasr ac fususiyen pahng lasr nuh sin mwet suc enenwe kuht emet uh—mwet sirape ma misineri uh luti, mwet tuhfahna pacptaislac, mwet suc mas, muhkahimtacl, suhkwac alu, sucu ninac kuh pahpah sena yurin tuhlihk oasr lohm an, ac kuhtuh pac.

Ke orekma ke pacl pakpucki lasr in muhtwacta nuh in lohm nuh kwewa uh, ma kuh in oruh mahlwem puhkantwen in ahkfahsrye, kuht fah oraclah kain asruoki sahyac yurin kais sie mwet kuh sucu ke list lasr ke orekmakihnyacn kuhtwena ma Leum El use. Pwacyena kuht fah karihngihn sucu lasr uh ke alu uh ac, oacna ma suhmuhslah uh fahk uh, fah “sramsram nuh sie sin siepac ke ohiyac wo luhn nguhnalos.”6In weacng, kuht kuh in tacluhfon, suhpwaclah email ac text message, finne taipiyac sie pwacngohk ke sie ohiyac puhkantwen ke social media uh oasr nuh sesr. In kahsruh enenuh yohk uh, kuht kuh in suhpwaclah sie quote ke ma suhmuhslah uh kuh sie lain in quote ke sramsram ke toeni luhlahp uh kuh sie Mormon Message itucklac ke kuhfa puhkantwen ke LDS.org uh. Ke kahs luhn Prestuhnsi Se Met, kuht ac oruh kuhiyacsr ke ohiyac kuht sun ke kahsruh oasr nuh sesr uh.

Tamuhlwel, nguhsr nga ac oruh ofong uh ma nuh suwos in ahkyohkye kahlwem lowos ke forfor luti yurin sucu. Nuhnak muhnahs, ke inkacnek sasuc, wo liki met ah liye kowos sifacna oacna mwet aholyacn Leum nuh sin tuhlihk Nahtuhl. Kalmac pa kuht ac enenuh in fuhlwelah atacn suhlahklahk oruh, ke mwena ahkfalye masap uh, ke sahflahiyacn mahlwem ma kowos ac silahklahk ac sang pweng na sruhmuhnyuck ke magazine an ma sucu sac riti tari. Kuht ac finsrakkihn, likina, tuh kowos in ahkfahsrye atac ingacn ke nuhnak wowo, akwucki ke wosasuc nuh sin mempucr uh, liyacacng ac karihngihn sie sin sie, sramsramkihn enenuh ke ma luhn nguhn ac mahno ke kuhtwena ohiyac ma a kahsruh.

Ingena, nuh ke ma “acwac” oacna forfor luti yurin sucu, ma wo nuh kwewa kowos oruh uh “acwac” oruh ripohrti nohfohn! Pwacyena, ripohrt ma yohk srihpac emet uh pa ohiyac ma kowos ahkinsewowoye ac liyacacng mwet kowos karihngihn an, ma wacngihn ma ac oruh nuh ke sie calendar kuh sie acn. Ma yohk srihpac uh pa lah kowos luhngse mwet kowos forfor luti an ac ahkfalye masap in karihngihn alu uh pacl nuh kwewa.7

Ke Mei 30 ke yac tari ah, kawuck se luhk Troy Russell el packiyac pickup soko ukwacl ah liki garage lal ah in som donate mwe kahsruh nuh ke local Deseret Industries in sac. El puhla wil se tok nahtuhl ah fanuhkyac fuhlwact se. Nuhnkuh lah kuhtuh ma el us ah puhtatlac liki stosah ah, el srolah in sokwack lah tuhlihk mukul na sacohk yac yuc se nahtuhl, Austen, oan ohnkiyucki ke pef ah. Mwe insewowo ke pristut uh ituckyang, paramedic uh tuhkuh, mwet orekma hospital uh—elos oruh kuhiyaclos, in molwellah, tuhsruhk tiacna kuh. Austen el misac.

Koflah in mutul, koflah in sokwack mihs, Troy el ahsor na upac. El fahk lah ngal na upac likina el kuh in muhtweng ac lah el koflahna kalweni in moul. Tuhsruhk ke pacl kweok sacn, tuhkuh mwe molwelah fokoko tolu.

Ma se met pa luhngse ac sifil ahkkweye nguhn luhn Pahpah tuhmasr Lucng, aetuhi oasr ke Nguhn Muhtahl ma ahkkweyacl Troy, lotwel, luhngse el, ac mahmahacng lah God El etuh ma nuh kwewa ke misac luhn sie Wen wolacna ac suwohswohs. Ahkluo pa muhtwacn kiacl ah, Deedra, suc sruokuhl Troy in pahol ac luhngse el ac ahkacsmakihnyacl lah el pac wacngihnlac wen se nahtuhl ac puhla fokoko tuh in tiac wacngihnlac pac mukul tuhmwacl uh. Ahk tolu ke sramsram soko inge pa John Manning, mwet forfor luti yurin sucu na wolacna se.

Nga nihkihn na pwacye lah ngac John ac companion fuhsr se lal ah oraclah muhtwacta nuh lohm sin sucu Russell ah, kuh pweng ituckyang ke elos sun acn we, kuh elos ripohrti fuhkah muhtwacta sac. Ma nga etuh uh pa lah spring tari ah Tamuhlwel Manning el saplaki nuh ten ac sruhkuhlwack Troy Russell liki ma upac ke inkacnek soko ah oacna elan sruhkuhlwack Austen srihsrihk sifacna. Oacna mwet forfor luti yurin sucu kuh mwet karihngihn kuh tamuhlwel ke wosasuc uh ma el enenuh in oacna, John el ana eis karihngihnyuck luhn pristut uh ac liyaclacng Troy Russell. El muhtwacwacack ke el fahk, “Troy, Austen el ke kom in sifilpac tuyak—weacng pac ke basketball court an—oruh nga fah oasr inge lututacng nuh kwewa ke ao 5:15 a.m. Ahkolah ke srihpen nga tiac ke tuhkuh nuh lohm sum ah okaskomyak—ac nga etuh lah Deedra el ac tiac luhngse nga in oruh ma ingacn pac.”

“Nga tiac ke wi,” Troy el fahk nuh sihk tohkoh, “ke srihpen nga kwacna usacl Austen wiyuc ke lututacng ingacn ac nga etuh lah mwe esamyac kac uh ac upac pacna. Tuhsruhk John el ngihsre, oruh nga tari wi. Ke lwen se emet in fohlohk ah, kuht sramsram—kuh nga pa sramsram ah—ac John el porongo. Nga sramsram ke kahsruhsr sac nohfohn nuh lohm alu ah ac na ke fohlohk nuh lohm ah. Kuhtuh pacl uh nga sramsram ke kuht tui ke muhtuhn lohm ah ac liye ke faht ah takwack fin Las Vegas. Pacl se emet ah arlac upac, tuhsruhk tohkohyang nga akihlen lah nga sokwack kuh luhk ke atacn sie mwet nihkihn sritacl pahsket ke Alu uh suc feet 6 ins 2 (1.88 m), ke nihkihn na pwacye oruh jump shot uh, suc luhngse nga ac lohme nuh sihk nuh ke nga kuh in sifil engankihn moul luhk uh.”8

Tamuhlwel wiyuck ke pristut muhtahl uh, ke kuht sramsram ke forfor luti yurin sucu kuh karihngihn kuh kais sie mwet kol luhn pristut—ma na kom pahngon an—pa inge ma kuht sramsram kac uh. Kuht siyuck suwos oacna mwet forfor luti luhn sucu in pa mwet aholyacn God nuh sin tuhlihk Nahtuhl, in luhngse ac karihngihn ac pruhe ke mwet kowos muhtwacta yohroh, oacna kuht luhngse ac karihngihn ac pruhe keiwos. Lwelah kowos in oaru in liyacacng un sip luhn God ke inkacnek oacna sie ke ohiyac lowos an, nga pruhe, ke inen Mwet Shepherd Wowo lasr nohfohn uh, suc nga mwet lohoh Kacl, finne Leum Jisus Kraist, amen.