2010–2019
Rikarejaran Anij n̄an Kabun̄ in
Oktoba 2016


Rikarejaran Anij n̄an Kabun̄ in

Jej kajjitōk ippāmi āinwōt rūkaki in loļo̧k mōko bwe kom̧ en rikajeran Anij n̄an ajri ro Nejin, n̄an iakwe im kea im jar kōn armej ro emōj kappeiki kom̧ n̄an loļo̧k.

Raan ko ļo̧k juon sister eo ejjeļo̧k pāleen, eo im Inaaj kūr etan Molly, eaar roolļo̧k n̄an m̧weo imōn jān jikin jerbal im ekar loe an ibūj (5 cm) lowaan m̧weo imōn kōn dān. Eaar mōkaj in kile ke ro rūtūrin, ro me rej jim̧or kōjerbal juon wōt iaļan an diwōjļo̧k dān, remaron̄ kar ļap aer kōjerbal dān in kwaļkwōļ im tutu raan eo kōnke aolep dān ko raar toorļo̧k jān m̧weo mōn ro rūtūrin n̄an lowaan m̧weo imōn ijo ilaļ.

Ālkin an kūr eo mōttan n̄an itok im jipan̄, erro jino ālimi dān ko im karreoik būloor eo. Ilo aerro karreo bell eo ilo kōjem̧ eo eaar riin̄. Eo mōttan eaar lamōj ļo̧k, “Emaron̄ rūkaki in loļo̧k m̧ōko!”

Molly eaar ettōn̄. “Rainin ejraan eo āliktata ilo allōn̄ in,” eaar uwaakļo̧k, “ak imaron̄ kallim̧ur eok ke ejjab rūkaki in loļo̧k m̧ōko.”

Ilo an jintōb, tutu nuknuk ko an, koļan bōran eaar bujōke, im jejjet in wōt pea in glove ko an, Molly eaar tōpar kōjem̧ eo. Ak paaktokin eaar jab āinwōt rūlotok ro an me rej jutak ilo kōjem̧ eo. Ekar rūkaki in loļo̧k m̧ōko!

“Komaron̄ kar dōn̄ļo̧k eō kōn kein kabboņboņ eo!” ekar ba tokālik. “En̄in kar juon mennin kabwilōn̄lōn̄ an rūkaki in loļo̧k mōko kain kan me em̧m̧aan ro rej kwaļo̧k ilo iien kweilo̧k ko reļļap!” Eaar wōnm̧aanļo̧k wōt: “Ak ke ij tin kajjieon̄ mejān māik er ak leļo̧k n̄an er juon maap, raar ba, ‘O Molly, jej joļo̧k ad bōd. Jej lo ke eļap am poub. Jejjab kōnaan kabōņōņōik eok, kōn menin jenaaj bar itok juon iien .’ Innem raar etal.”

“Wōn eo?” eo mōttan eaar kajjitōkļo̧k jān m̧weo ilaļ.

“Iaar kōnaan ba, ‘Ejjab Rinipai ro Jilu,’” Molly eaar ba, “ak iaar dāpij wōt aō ba im kar kamaanwa, ‘Ekar rūkaki in loļo̧k mōko, ak raar en̄jake ke ejjab jejjet iien eo n̄an kwaļo̧k enaan eo aer.’” 1

Em̧m̧aan ran, jemaron̄ ke lukkuun etaļe eddo ko an priesthood me emōj kōmeļeļeik āinwōt “kein jipan̄ eo jinointata an kabūn in” n̄an kajjojo im baam̧le ko.2 Ekanooj in lōn̄ im ļap peba ko kōjerbali n̄an kōm̧anm̧anļo̧k jerbal in loļo̧k mōko. Elōn̄ ekōnono ko reim̧we emōj kwalo̧k n̄an kōperan jerbal in loļo̧k mōko. Ejjeļo̧k juon rimālōtlōt emaron̄ kōm̧m̧an bwe en nana am mour ijjeļo̧kin wōt jerbal in loļo̧k mōko. Aaet jon̄an epen ad tōpar jon̄an eo ejim̧we ekkar n̄an kien ko an Irooj “n̄an emmejraake Kabun̄ in iien otemjej, im pād ippāer im kōkajoor er” 3 itok jān loļo̧k ko an priesthood ro.

Mōttan apan̄ ko jej iooni ej oktak in jikin jokwe ko an ro uwaan Kabun̄ in. Jejeļā oran membōr ro kiiō rejepelōklōk ilo aolepān laļin elōn̄ļo̧k jān 30,000 ward ko im branch ko, ko rej pād ilo 188 laļ ko im jikin ko, epen ļo̧k n̄an loļo̧k mōko imōn ro jeid im jatid jān kar tōre ko etto ilo Kabun̄ in ilo an kar ro repaake doon loļo̧k doon ilo juon jekjek ņa etan “katakin rūtūrūm.”

Barāinwōt, ilo elōn̄ mōn jar ko ilo Kabun̄ in, jon̄an an jabwe priesthood ro n̄an kōm̧m̧an jerbal in loļo̧k mōko, juon pea in priesthood emaron̄ jipan̄ im loļo̧k 18 ak 20 baam̧le—ak elōn̄ļo̧k—n̄an loļo̧k er. Emaron̄ bar juon apan̄ n̄e ettoļo̧k jikin en n̄an jibadekļo̧k, ļap wōnaan kabbok iaļ, im aitokan juon raan in jerbal ilo juon wiik in jerbal. Kakobaik waj jet iaan manit ko me remo̧ kōm̧m̧ani ko rej kōbōjrak an armej loļo̧k mōko im apan̄ ko n̄an bōbrae an ļapļo̧k jorrāān ej waļo̧k jān ro rūtūrur—aaet, jej jino ad loe jorrāān ko reļļap.

Em̧m̧an ran, ilo em̧m̧an an aolepān laļin im ilo jekjek ko jet ijo remaron̄ dedeļo̧k ie, loļo̧k kajjojo allōn̄ n̄an kajjojo em̧ ko ej aorōk wōt ilo Kabun̄ in im enaaj wōnm̧aanļo̧k wōt. Ak jej kile ilo elōn̄ jikin ko ipeļaakin laļ in aer tōpar eļap men ko raorōk im bwe ritōl an priesthood ro rej kōm̧m̧an bwe em̧m̧aan ro rej en̄jake inepata ilo aer kajjitōk ippāer n̄an kōm̧m̧ani jet men ko me rejjab maron̄ kōm̧m̧ani, Būreejtōnji eo Kein Kajuon eaar jeje n̄an ritōl ro an priesthood ilo Kabun̄ in ilo Tijōm̧ba 2001, kar kwaļo̧k im̧we in, juon naan in kōketak eo eļaptokjen: “Ewōr jet jikin ko ilo Kabun̄ in,” raar je, “ijo … rūkaki in loļo̧k mōko kajjojo allōn̄ remaron̄ jab tōprak kōnke eiiōt oran priesthood ro rekajoor im jet iaan kapan̄pan̄ ko ilo jikin ko jet.” Emōj kōllaajraki jet iaier. “N̄e jet jekjek ko rej bōbrae, ritōl ro rej aikuj kōm̧m̧an ijoko koņaer n̄an kōjerbal kein jipan̄ kein me repojak n̄an mije ro jet im kakajoor kajjojo membōr ro.” 4

Em̧m̧aan ran, eļan̄n̄e ilo ward eo am̧ ak branch eo ej jelm̧ae jekjek kein reppen, Aaronic priesthood eo iaaō im n̄a komro ej kōjerbal naan in kapilōk kein an Būreejtōnji eo Eutiej (me epād kiiō ilo bok in tōl) ilo wāween in: Moktata, ijoke elōn̄ allōn̄ n̄an kōtōpare men in, jenaaj ļoor ta eo jeje ko rekwojarjar ej ba n̄an “loļo̧k m̧ōko im̧ōn kajjojo membōr,”5karōk iien bwe jen maron̄ tōpar mōko ilo iien eo ekkar im ļap tōprakin. Likūt ilo kalōnta en men ko reaorōk tata ilo iien ko rekkar im ekutkut ad tōpar ro relukkuun aikuji kōj—rikatak im mijinede ro rej katakin, membōr ro rekāāl, ro rinan̄inmej, ro rajimakeke, ro eto aer jab jar, baam̧le ko me ejako juon iaan jiner n̄e ejab jemer ro me ej wōr wōt nejier rej lale er, im ko jet.

Ilo ad karōki wōt iien ko ad n̄an loļo̧k aolep mōko, ko me remaron̄ bōk elōn̄ allōn̄ n̄an kadedeļo̧k, jemaron̄ tōpar er ilo wāween ko jet ippān kajjojo im baam̧le ko me emōj kappeik kōj ilo jabdewōt wāween ko Irooj enaaj letok. Ilo an alikkar jenaaj mije im lale baam̧le ko ilo mōn jar eo im, āinwōt ilo an jeje ko rekwojarjar ba, naaj “kōnono ippān doon kōn em̧m̧anļo̧k eo an jetōb ko aer.” 6 N̄an kakobaba, jemaron̄ call e er, ak e-mail e ļo̧k er im jeje ļo̧k ilo taļeboon ko, emaron̄ bar jeje ļo̧k naan in jouj ilo elōn̄ wāween ko ilo iaļ in iaiiō ko imejatoto ko repojak n̄an kōj. N̄an jipan̄ kōn aikuj ko rejenoļo̧k, jemaron̄ jilkinļo̧k jet naan ko jān jeje ko rekwojarjar ak juon enaan jān ekōnono ko ilo iien kweilo̧k ko reļļap ak enaan ko an Mormon jān kein ekkatak ko ilo LDS.org. Ilo enaan ko an Būreejtōnji eo Kein Kajuon, jemaron̄ kōm̧m̧ane ijoko koņaer n̄an kōjerbal kein jipan̄ kein me repojak n̄an kōj.

Em̧m̧aan ran, kajjitōk in ij kajjitōk ilo jotenin ej n̄an kom n̄an kōketak kōlmenļo̧kjeņ ko ami ilo ami loļo̧k mōko. Jouj, ilo em̧m̧an, wāween eo em̧m̧an ej kalimjōk eok make āinwōt juon eo rikarejaran Irooj n̄an ro Nejin. Meļeļein meļo̧klo̧ki manit ko renana, āinwōt–kien ko an Moses, kōttar jemļo̧kin allōn̄ im kwoj jino kōkairiri im ekkwaļo̧k jet katak ko jān magazine ko an Kabun̄ in me emōj an baam̧le ko riiti kadede. Jej kōjatdikdik, ijjeļo̧kin, ke kwonaaj ejaake m̧wil em̧ool, eddo ko ilo gospel in me reppen n̄an membōr ro, mije im lale doon, kakke aikuj ko an jetōb im kanniek ilo wāween ko rekkar.

N̄an “ņa jikin” āinwōt mōttan jerbal in loļo̧k mōko, rej “ņa jikin” aolep jerbal ko rem̧m̧an, kōn menin repooti aolepāier! Ilo m̧ool, ripoot eo eaorōk tata ej wāween am kōjeram̧m̧an im kea kōn ro jet ro repād iumin kōjparok ko ad, remaron̄ jab lōlō ilo kōļanta ko ad ak jikin ko rejeņoļo̧k. Men eo aorōk ej bwe kwon iakwe armej ro am̧ im kakūrm̧ool kien eo n̄an “emmejraake Kabun̄ in iien otemjej.” 7

Ilo Māe 30 ilo iiō eo ļo̧k, eo mōtta Troy Russell eaar paak kōn peikaap eo waan jān kōraaj eo ilo iaļ eo an ļo̧k n̄an leļo̧k mennin jipan̄ n̄an jikin jipan̄ ko. Eaar en̄jake ke wiil eo ilik eaar ettōr ioon juon bump. Ej lōmņak jet iaan men ko raar wōtļo̧k jān wa eo, ke ej to im lale ej loe laddik eo nejin ejitōnbōro eo ruatimjuon an iiō, etan in, Austen, ej babu ilaļ ilo iaļ eo. Rekar leļo̧k kōjeram̧m̧an eo an priesthood, rijerbal in hospital raar mōkaj aer tōparļo̧k n̄an kajjieon̄—kōmour laddik eo, ak eaar jab tōprak. Austen emōj an jako.

Jab maron̄ kiki, ak lo ainem̧m̧an, Troy eaar lukkuun rub buruōn. Eaar ba bwe buromōj in eļapļo̧k jān jon̄an n̄an ineeke im ejjab maron̄e. Ak ilo tōre in epen n̄an e eaar en̄jake jilu jipan̄ ko rekajoor.

Kein kajuon kar iakwe im kam̧ool an jetōb eo an Jemedwōj Ilan̄, ekōnono an jetōb n̄an kainem̧m̧an Troy, kar katakin e ilo iakwe im unoojdikdik ke Anij ejeļā jabdewōt men ilo iien in emōj an jako laddik eo nejin ejitōnbōro. Kein karuo, kōrā eo pāleen, Deedra, eo eaar dāpiji atbakwōje ilo pein im iakwe e im kakeememej ke men̄e elooji laddik eo ak eaar kajjieon̄ bwe en jab bar looji leo pāleen. Kein kajilu ilo bwebwenato in ej John Manning, rūkaki in loļo̧k mōko eo em̧m̧an.

Iaar jab jeļā kōn karōk in iien ko an John im eo mōttan ke rekar loļo̧k m̧weo imōn Russell, ak ta enaan eo aer ke raar tōparlo̧k ijen, ak ewi wāween aer ripoot e en̄jake ko aer. Ta eo iaar jeļā ej bwe kar iiō eo ļo̧k ilo spring eo Brother Manning eaar kotak lōn̄tak Troy jān jorrāān āinwōt n̄e enkar kotak lōn̄tak laddik jidikdik eo Austen. Āinwōt rūkaki in loļo̧k mōko ak rimije ak juon būratōr eo ilo gospel in eo ej aikuj bwe en eindein, John eaar kōjerbal priesthood eo an ilo an kea im dāpij wōt Troy Russell. Eaar jino an ba, “Troy, Austen ekōnaan bwe kwon wōnm̧aanļo̧k wōt—ekōnaan bwe kwon bar ikkure basketball—kōn menin inaaj pād ijin aolep jibbon̄ 5:15 a.m. Pojak kōnke ijjab kōnņaan bwe in iwōj n̄an m̧weo imōm im karuj eok—im Ijeļā Deedra eban mōnōnō n̄e ikaruj eok.”

“Iaar jab kōnaan etal,” Troy eaar ba n̄an n̄a tokālik, “kōnke iaar likūt wōt Austen ilo n̄a ilo aolep jibbon̄ im ijeļā ke ememļo̧kjeņ ko rekōmetak. Ak John eaar akweļap, kōn menin iaar etal. Jān raan eo jinointata maantak, kom kar kōnnaan—ak ijjeļo̧kin ij kōnnaan—im John ej ron̄jake. Iaar kōnnaan eiten aolepān iaļ eo amro n̄an mōn jar eo innem bar roolļo̧k eo n̄an m̧weo. Jet iien ij kōnnaan n̄e kōm ej pōjrak im alooje an al tak ilo Las Vegas. Kar jinoin eaar lukkuun pen, ak iien ko raar eļļāļo̧k ke iaar jino kile kajoor ilo juon jekjek eo me juon rikkure an Kabun̄ in 6 ņe aitokan im 2 inij (1.88 m), eo ejaje kelōn̄ļo̧k im kowāleel, ak ej iakwe eō im ron̄jake eō m̧ae iien emaron̄ bar lo lan̄lōn̄ ilo mour eo an.” 8

Em̧m̧aan ro jeiū im jatū ilo priesthood, n̄e jej kōnono kōn loļo̧k mōko mōn ro jej rūkaki n̄an er ak lale er ak kōm̧m̧an jerbal in jipan̄ ko an priesthood—jabdewōt men konaaj ņa etan—en̄in ej men eo jej kōnono kake. Jej kajjitōkin kom rūkaki in loļo̧k mōko n̄an erom ro rikarejaran Anij n̄an ro Nejin, n̄an iakwe im kea im jar kōn armej ro emōj kappeiki kom̧ n̄an loļo̧k, ilo am iakwe im kea im jar kōn kom. Komaron̄ emmejrake sip ko nejin Anij ilo wāween eo ejjejjet n̄an kom, Ij jar, ilo etan Rilale Sip eo Em̧m̧an, ej Irooj Jisōs Kraist, amen.