Mau tiʼa tonohia i te ’Ēkālesia

’Aita i maoro roa aʼenei, i te hoʼiraʼa mai te hōʼē tuahine faʼaipoipo-ʼore-hia, ʼo Molly, i te fare nā te ʼohipa mai ’ua ʼite aʼera ʼoia ē ’ua nīnā te tahua raro o tōna fare i te pape, e pae teneti mētera. Hōʼē ā tāna tūio faʼaruʼeraʼa pape repo ’e te fare i pīha’i iho mai, nō reira ’oi’oi ’oia i te mana’o ē, ’ua rahi roa paha tā rātou pu’araʼa ʼahu ʼe te hopuraʼa pape i taua mahana ra, teie ïa te tāʼātoʼaraʼa o te pape repo i tōna fare.

’Ua niuniu atu ’oia i te hōʼē hoa vahine nō te haere mai e tauturu ē haʼamata a’era rāua i te taipu i te pape ʼe i te tāʼahu. Pātē mai nei te oe ʼōpani. Tuō aʼera tōna hoa : « Tō ʼoe mau taeaʼe hāhaere terā ! »

’Ua ʼata Molly. ’Ua parau a’era : « E mahana hopeʼa iho ā ïa teie nō te ’āvaʼe, pāpū roa rā ē, e ’ere tō’u mau taeaʼe hāhaere ».

’Aita e tīaʼa, te piripou rari, te rouru tāʼamuhia ’e te hōʼē pea rimarima uaua nehenehe, ’ua haere atu Molly i te ʼūputa. E ’ere ā ïa terā tōna hiʼoraʼa huru ʼē i mua i te hiʼoraʼa huru ʼē nō terā nā taeaʼe e tiʼa ra i mua iāna. ’Oia iho ā tōna mau taea’e hāhaere !

’Ua parau mai ’oia i muri iho ē, « fātata roa te fenua i te ta’ahuri nō te hitimahuta ! « E temeio hāhaereraʼa ʼutūafare teie—mai tā te mau hui mana faʼatere rahi e faʼaʼite i roto i te mau aʼoraʼa ʼo te ’āmuiraʼa rahi ! ’E tē parau ra ’oia : « ’E teie au e tāmata ra i te faʼaoti e ʼāpā ānei ia rāua ʼaore rā e hōroʼa atu i te tahi tāʼahu fare, nā ’ō mai nei raua, ‘’Aiā Molly ē, ʼeiaha ’oe e ʼinoʼino mai. Tē ʼite nei māua e mea ʼohipa roa ʼoe. E’ita māua e fa’ataupupu ia ’oe, e hoʼi mai māua i te tahi atu taime.ʼ ʼE ’ua haere atura. »

Tuō maira tōna hoa mai raro mai : « ʼO vai terā ? »

Tē parau ra Molly ē : « ’Ua hinaʼaro roa vau e pāhono atu : ‘E ʼere roa ’o nā ’āti Nephi e toru, ’aita rā vau i parau atu, ’ua parau hau noa vau : ‘ʼO tōʼu mau taeaʼe hāhaere, ’ua manaʼo rā rāua ē, e ʼere teie te taime tano nō te vaiiho mai i tā rāua parau poroʼi’ ».¹

E te mau taeaʼe, hiʼopoʼa poto na tātou i teie ʼohipa a te autahuʼaraʼa tei faʼaʼitehia ’ei « pū tauturura’a mātāmua a te ʼEkālesia » nō te mau melo ʼe te mau ʼutuāfare.² E uru rā’au tā’āto’a tei tāpūhia nō te pāpie e faʼanaho ’e e faʼanaho-faʼahou-hia ai te hāhaereraʼa ʼutuāfare. E tauasini rahira’a aʼoraʼa ’ū’ana tei hōroʼahia nō te tāmata i te faʼaitoito i te reira. ’Aita e tahu’a manava ʼaore rā e e ʼohipa e nehenehe e faʼahapa rahi atu ā i te mana’o taʼata maori rā te parau nō te hāhaereraʼa ʼutuāfare. Noa atu rā, tē fifi noa nei ā tātou i te faʼatupu i te hōʼē fāito maita’i i roto i te raveraʼa i te faʼaueraʼa a te Fatu ’ia « tīaʼi i te ʼekālesia i te mau taime atoʼa »³ nā roto i te hāhaereraʼa ʼutuāfare a te autahuʼaraʼa.

Te tahi fifi tā tātou e faʼaruru nei, ʼo te nu’ura’a ïa i roto i te nūmera o te mau melo o te ʼEkālesia. ’Ua ’ite tātou ē, nō te purararaʼa o tō tātou mau melo i roto e 30 000 pāroisa ʼe ʼāmaʼa, i roto i te tahi 188 nūnaʼa ʼe fenua, e mea fifi roa atu ïa ’ia hāhaere i te mau ʼutuāfare o tō tātou mau taeaʼe ʼe mau tuahine, mai i te mau mahana mātāmua o te ʼEkālesia ʼa haʼapiʼi ai te taʼata i te tahi ʼe te tahi i roto i te faʼanahoraʼa tei piʼihia te « hāhaereraʼa tāaroā ».

Hau atu, e mea iti roa, i roto i te mau pāroisa ʼe te ʼāmaʼa, te rahiraʼa taeaʼe tei mau i te autahuʼaraʼa nō te rave i te hāhaereraʼa ʼutuāfare, ʼe nō reira, nō te feiā e nehenehe e hāhaere, e 18 ʼaore rā 20 ʼutuāfare—ʼaore rā hau atu—e aupuru atu. Tē vai atoʼa ra paha te mau fifi nō te āteara’a, te moni rahi ʼe te navaʼi ʼore o te faura’o, ʼe te rahira’a hora ʼe te rahiraʼa mahana ʼohipa i roto i te hebedoma. ’Āmui mai te mau ʼōpaniraʼa o te tahi mau ta’ere fenua e pāto’i nei i te mau tere hāhaere ani-ʼore-hia, ʼe tae noa atu i te parau nō te ataatara’a o te mau vāhi e rave rahi nā te ao—tē haʼamata ra ïa tātou i te ta’a ri’i mai i te hōhonuraʼa o te fifi.

E te mau taeaʼe, i terā fenua maita’i roa ra ʼe i te mau vāhi e nehenehe te reira ’ia ravehia, e hōʼē tere i te ’āvaʼe i roto i te ʼutuāfare tātaʼitahi te fāito maita’i tā te ʼEkālesia e tūtava nei. Terā rā, nō te ʼiteraʼahia ē, i te mau vāhi e rave rahi nā te ao nei e’ita e ra’ehia taua fāito maita’i ra, ’o tē fa’atupu nei ho’i i roto i te mau taea’e i te mana’o manuia ’ore i te ravera’a i te mea e’ita mau iho ā e noa’a ’ia rave, i pāpaʼi ai te Peresideniraʼa Mātāmua i te feiā faʼatere autahuʼaraʼa o te ʼEkālesia, i te ’āvaʼe tītema 2001 ra, i teie parau a’o fa’auruhia ’e te taururu rahi : ’Ua pāpaʼi rātou : « Tē vai nei te tahi mau vāhi tei reira te ʼEkālesia… e’ita te hāhaerera’a ’utuāfare e haere nō te mau ʼutuāfare atoʼa i te mau ’āvaʼe atoʼa nō te navaʼi ʼore o te mau taeaʼe itoito o te autahuʼaraʼa ʼe nō te tahi ato’a mau fifi i reira ». Nō fa’ahiti noa nei tātou te tahi. Tē parau nei ïa rātou : « Te reira anaʼe tō rātou vaira’a, e tiʼa ïa i te feiā faʼatere ’ia faʼaʼohipa maitaʼi i te mau rāveʼa e vai nei ia rātou nō te tīaʼi ʼe nō te faʼaitoito i te melo tātaʼitahi ».⁴

E te mau taeaʼe, mai te mea i roto i taʼu pāroita ’e ta’u ’āmaʼa tē fa’aruru nei au i teie huru vaira’a fifi, e faʼaʼohipa ïa māua tōʼu hoa nō te Autahuʼaraʼa a ʼAarona i te aʼo a te Peresidenira’a Mātāmua (e faʼatureraʼa buka arata’i i teienei), mai teie te huru : ’A tahi, noa atu te rahiraʼa ’āvaʼe e tītauhia nō te rave fa’aoti i te reira, e tāmau ïa māua i te haʼapaʼo i te faʼaueraʼa a te pāpaʼiraʼa moʼa ’ia « hāhaere i te mau fare o te mau melo atoʼa »,⁵ ma te haʼamau i te hōʼē tālena e faʼatae ia māua i taua mau ʼutuāfare ra, ma te rāveʼa au atoʼa. I ni’a i terā tālena, e fa’ata’a-nā-mua-hia ïa te taime vata roa ʼe te farereira’a pinepine nō te mau taʼata e hinaʼaro rahi ia māua—te melo ʼore tā te mau misiōnare e haʼapiʼi ra, te melo bapetizo-ʼāpī-hia, tei maʼihia, tei vai ’ōtahi noa, te melo māuiui, te ʼutuāfare e metua ’ōtahi ʼe te mau tamariʼi, ’e tē vai atu ra.

’A pe’e noa ai māua i tā māua tālena nō te hāhaereraʼa i te mau ʼutuāfare ato’a, e tau ’āvaʼe ïa te maoro, e ’imi ato’a ïa māua i te fārerei i te mau taʼata ʼe te mau ʼutuāfare i niʼa i te tābula nā roto i te mau rāveʼa ’ē atoʼa tā te Fatu i hōroʼa mai. E tīaʼi iho ā ïa māua i tā māua mau ʼutuāfare i te fare pureraʼa, ʼe mai tā te pāpaʼiraʼa moʼa i parau, « e parau [māua] te tahi i te tahi i te maitaʼi o tō rātou mau vārua ».⁶ Hau atu, e niuniu māua i te ta’ata, hāpono i te rata uira ʼe te mau poroʼi uira (SMS), ʼe fa’atae ato’a i te tāpa’o aroha nā roto i te hōʼē ʼo te mau rāveʼa natiraʼa sōtiare e vai nei. Nō te tauturu i te pāhonoraʼa i te mau hinaʼaro taʼa ʼē, e hāpono paha ïa māua i te hōʼē ’īrava ʼaore rā te hōʼē faʼahitiraʼa nō roto mai i te hōʼē aʼoraʼa o te ’āmuiraʼa rahi ʼaore rā te hōʼē Poroʼi mōmoni mai roto mai i te rahiraʼa mātēria i niʼa i te LDS.org. Mai te reo o te Peresidenira’a Mātāmua, e rave ïa māua i te mea tei maraʼa ia māua mai te huru i tō māua vaira’a ’e mai te au i te mau rāveʼa e vai ra.

E te mau taeaʼe, te piʼiraʼa tāʼu e piʼi nei i teie pō : ’ia faʼateitei ā ïa ʼoutou i tā ʼoutou hi’ora’a i te hāhaeraʼa ʼutuāfare. Hi’o ’āpī na ia ’outou, e hi’ora’a maita’i a’e, ’ei tiʼa tonohia e te Fatu i tāna ra mau tamariʼi. Te aura’a ra, e vaiiho i terā peu tahito ra, mai te huru e ture nā Mose, i te horo-haere-ra’a ma te rū i te hōpeʼa ’āvaʼe nō te hōroʼa i te hōʼē poroʼi nō roto mai i te veʼa a te ʼEkālesia, ʼo tā te ʼutuāfare hoʼi i taiʼo aʼena. Tā matou e tīa’i nei, maoti rā, e haʼamau ʼoutou i te hōʼē anotau e mānaʼonaʼoraʼa mau i te mau melo, tei faʼatumuhia i niʼa i te ʼevanelia, i te tīaʼiraʼa ʼe te aupururaʼa i te tahi ʼe te tahi, i te pāhonoraʼa i te mau hinaʼaro pae vārua ʼe pae tino nā roto i te rāveʼa atoʼa e tauturu mai.

Nō te uira’a, e aha te mea e « taiʼohia » ’ei hāhaereraʼa ʼutuāfare, e « taiʼohia » te mau mea maitaʼi atoʼa tā ʼoutou e rave, nō reira e fa’a’ite pauroa mai ! ’Oia mau, te parau fa’a’ite faufaʼa roa a’e, ʼo te huru ïa ʼoutou i haʼamaitaʼi ʼe i aupuru i te feiā i raro aʼe i tā ʼoutou tiʼa’auraʼa, ’e ’ia hi’ohia, ’aita ïa tā te tālena ’e te vāhi. Te mea faufaʼa rahi roa, ʼo tō ʼoutou ïa herera’a i tō ʼoutou mau taʼata ʼe tō ʼoutou faʼatupuraʼa i te faʼaueraʼa ’ia « tīaʼi i te ʼEkālesia i te mau taime atoʼa ».⁷

I te 30 nō mē nō te matahiti i maʼiri aʼenei, tē faʼahoro mārū ra tōʼu hoa ʼo Troy Russel i tōna pereo’o uta tauihaʼa mai roto mai i te fare vairaʼa pereoʼo nō te ’āfa’i i te tahi tauihaʼa i te Deseret Industries. ’E mai te huru ra ’ua nā ni’a tōna huira pereoʼo i te hōʼē puʼu. ’Ua manaʼo ʼoia ē, ’ua marua te tahi tauihaʼa nā niʼa mai i te pereoʼo, ’ua pou ʼoia ʼe ’ua ʼite atu ïa i tāna tamaiti iti here e iva matahiti, ʼo Austen, i te tāravaraʼa i niʼa i te tima. ʼAita te mau ʼauēraʼa, te haʼamaitaʼiraʼa autahuʼaraʼa, te pupu tuati rū ’e te feiā rave ʼohipa nō te fare maʼi i nava’i. ’Ua faʼaruʼe mai ʼo Austen.

ʼAita e topa te ta’oto, ’aita e topa te hau, ’ua heva noa Troy. ’Ua parau ʼoia ē, ’ua rahi roa teie, e’ita e maraʼa iāna ʼe e’ita e haere fa’ahou. I roto rā i taua taime ʼoto rahi ra ’ua tae mai e toru pūai faʼaora.

ʼA tahi, te here ʼe te vārua tāmarū o tō tātou Metua i te Ao ra, e mana tei faʼaʼitehia mai e te Vārua Maitaʼi tei tāmāhanahana ia Troy, tei haʼapiʼi iāna ma te here i te muhumuhura’a ē, ’ua ʼite te Atua i te mau mea atoʼa nō ni’a i te mo’era’a te hōʼē Tamaiti maitaʼi roa ʼe te nehenehe. Te piti, ’o tāna ïa vahine faʼaipoipo, tei tāpeʼa ia Troy i roto i tōna rima ʼe tei here iāna ʼe tei faʼahaʼamanaʼo iāna ē, nāna ato’a teie tamaiti i mo’e ʼe e’ita ʼoia e vaiiho ’ia mo’e atoʼa tāna tāne faʼaipoipo. Te toru i roto i teie nei ʼāʼamu, ʼo John Manning ïa, e taeaʼe hāhaere faʼahiahia roa ’ino.

’Aita vau i ʼite e aha te tālena a John rāua tōna hoa taure’are’a nō te hāhaerera’a i te ʼutuāfare Russell, ʼaore rā e aha tā raua parau poroʼi i reira, ʼaore rā e aha tā rāua parau fa’a’ite nō ni’a i teie ’ohipa. Te mea rā tāʼu i ʼite, ’oia ho’i, i te tau tupuraʼa rāʼau i maʼiri aʼenei ’ua haere atu te taeaʼe Manning nō te rave ia Troy Russell mai roto i teie ʼati purūmu ra, mai te huru ra tē rave ra ʼoia iho ia Austen naʼinaʼi. Mai te taeaʼe hāhaere ʼaore rā te tīaʼi ʼaore rā te taeaʼe i roto i te ʼevānelia e tiʼa iāna ’ia riro, ’ua rave noa ʼo John i te hōpoʼia autahuʼaraʼa e aupuru ʼe e tīaʼi ia Troy Russell. ’Ua haʼamata ʼoia ma te parau ē, « E Troy, tē hinaʼaro nei Austen ’ia ti’a mai ’oe i ni’a—’ia ho’i ato’a mai i niʼa i te tahua tāoraraʼa pōpō—nō reira e haere mai au i te mau poʼipoʼi atoʼa i te hora 5:15. Fa’aineine mai ia ’oe nō te mea ’eiaha vau e haere roa atu e faʼa’ara ia ʼoe—’ua ʼite ato’a vau e’ita Deedra e hinaʼaro i te reira ».

’Ua parau mai ʼo Troy iāʼu i muri mai ē, « ʼAita vau i hinaʼaro ’ia haere nō te mea ’o māua noa Austen te haere i taua mau poʼipoʼi ra ʼe ’ua ʼite au ē e māuiui au. ’Ua onoono rā John, nō reira ’ua haere atu vau. Mai taua mahana mātāmua ra, ’ua paraparau māua—ʼo vau iho ā rā te paraparau, ’o John te fa’aro’o. ’Ua paraparau noa vau ʼa tere noa ai māua i te fare pureraʼa ʼe i muri iho ’ia hoʼi mai māua i te fare. I te tahi mau taime ’ia tāpae māua i te fare, e paraparau noa vau, ’e e mātaʼitaʼi māua i te hitiraʼa mahana i niʼa ia Las Vegas. ʼE mea fifi roa i te haʼamataraʼa, i muri mai rā ’ua ʼite au ē, ’ua ’iteahia iāʼu tōʼu pūai i roto i te hōʼē taʼata ha’uti pōpō tāere, 1,88 mētera te roa, tei ’ite ’ore i te ’ōu’a nō te tītō i te pānie, ’o tei here rā iā’u ʼe tei faʼaroʼo iāʼu ē tae noa atu ’ua hiti fa’ahou mai te mahana i roto i tō’u oraraʼa.⁸

E tōʼu mau taeaʼe nō te autahuʼaraʼa, ’ia paraparau anaʼe tātou nō niʼa i te hāhaereraʼa ʼutuāfare ʼaore rā te tīaʼiraʼa ʼaore rā te tāvinira’a autahuʼaraʼa a te hō’ē ta’ata—ʼa piʼi mai tā ʼoutou e hinaʼaro—’o teie ïa te mea tā tātou e paraparau nei. Tē ani nei mātou ia ʼoutou te mau taeaʼe hāhaere ’ia riro ʼei mau tiʼa tonohia e te Atua i tāna mau tamari’i, i te herera’a, i te aupurura’a ’e i te purera’a nō te ta’ata tei fa’ata’ahia nā ’outou, mai tā mātou e here, e aupuru ’e e pure nei nō ʼoutou. ’Ia vai ara ’outou i te tīaʼira’a i te nana a te Atua nā roto i te mau rāveʼa e au i tō ʼoutou huru oraraʼa, tē pure nei au, i te iʼoa ʼo te Tīaʼi māmoe maitaʼi nō tātou pāʼātoʼa, e ’ite ho’i au nōna, ’oia hoʼi te Fatu ra ʼo Iesu Mesia, ’āmene.