Me Baleta Noda Vakatorocaketaki kei na Vuli Vakayalo

Niu se gonetagane voli, a ciqoma e dua na iloloma na noqu itubutubu ka veivakurabuitaki kivei David na taciqu kei au. Na iloloma a dua na ivakatakarakara lailai ni peleti koula ka a ciqoma na Parofita o Josefa Simici mai vua na agilosi o Moronai. Au nanuma rawa, ni a tiko ena ivakatakarakara ni peleti e 10 se so tale na tabana metali ka volai tu kina na vosa e so. Ia, keirau a sega ni kauwaitaka na veitabana oya.

Keirau a susugi cake ena rogoci voli ni talanoa e so me baleta na Veivakalesuimai. Keirau a kila ka sa lagata ena Lalai baleta na peleti koula ka ra vunitaki vakayawa tu ena dua na yasa ni ulunivanua ka a solia na agilosi o Moronai vei Josefa Simici.¹ Ni tubu cake na neirau lomatarotaro, a tiko e dua na ka keirau a via raica vakaidina: na cava a volai toka ena iwase lailai ni ivakatakarakara ni peleti ka vauci vakaukauwa tu ena rua na ibuki metali lalai?

A dabe toka ena mua ni teveli na peleti me vica na siga ni bera ni vakatotogani keirau na neirau lomatarotaro ni cakava e dua na ka. Dina ga ni keirau sa kila vakamatata tu ni oqo e sega ni peleti ka a solia taumada o Moronai, keirau a via raica na tikina a vauci tu. Ka mani vica na gauna, keirau a tovolea me vakayagataki na isele ni bata, sepuni makawa, kei na cava tale keirau nanuma me vaqaqai tani kina na tiki ni peleti ka vauci tu me rauta ga ni laurai na ka e tiko kina—ia me kakua ni vakarauta me vakamusutaka na ibuki lalai. Keirau a vuku vakarauta no ni sega ni biuta toka e dua na ivakaraitaki ni neirau lomatarotaro siosio vagone. Keirau a yalorarawa ka lomabibi, ni veisasaga kece me “vaqaqai kina na peleti” a sega ni rawa.

Au sega ni kila mada se cava—ke dua na ka—a vunitaki toka ena ruku ni tikina vauci oya. Ia na tikina vakatuburarawa ni neirau italanoa oya me yacova mai nikua, au sega ni vakasamataka rawa na ka a volai tu ena tiki ni veitabana metali ka sa dodonu me wiliki. Sa rawa niu raitayaloyalotaka ga ni veitabana oqo a tiko kina na italanoa e so me baleta na Veivakalesuimai kei na ivakadinadina nei Josefa Simici kei na Tolu kei na Walu na iVakadinadina, ka ra raica saraga na peleti a solia o Moronai.

Mai na Buli ni vuravura oqo, sa vakarautaka tu na Tamada Vakalomalagi dauloloma na idusidusi, veiliutaki, kei na ivakasala kivei ira na Luvena mai vei ira na parofita. Sa vakadewataki sobu mai na Nona vosa kivei ira na parofita oqo ka sa taqomaki tu vaka ivolanikalou me baleta na noda taraicake kei na vuli. A vakamacalataka vaka oqo o Nifai:

“Au sa dautaleitaka na ivolatabu ka vakananuma e lomaqu, kau sa vola me ivakavuvuli mera vinaka kina na noqu kawa.

“Raica au sa dautaleitaka na veika ni Turaga kau sa dauvakananuma e yaloqu na veika au sa raica ka rogoca.”²

Me ikuri, donuya na veitabagauna sa sivi yani kei na iotioti kecega ni gauna sa lokuci, sa ra vakalougatataki na lewenilotu bula kilikili ni Lotu ni Turaga ena veitokani tudei ni Yalo Tabu, ka dauveivuke ena noda vakatorocaketaki kei na vuli.

Ni kilai tu na ivalavala gumatua nei taciqu, au kilakasamitaka ni sa na rawa vua me wilika taucoko na veivosa ka volai tu ena ivakatakarakara ni peleti ena itikotiko ni neirau itubutubu. Ia, au a vakanadakuya na veitikina macala vinaka sara ka talei ka mai vakayaco lomaqu ena qarai ni veika ka a sega ni nakiti me vakatakilai.

Ka ni rarawa, na noda vakatorocaketaki kei na vuli sa rawa ni vakamaluataki ena so na gauna se tarovi saraga mai na dua na gagadre tawamaqosa mo “vaqaqa na peleti.” Na veitovo oqo sa rawa ni muataki keda ni vakasaqara na veika ka a sega voli ni nakiti me kilai deivaki ena gauna oqo, ena gauna vataga ni kena vakanadakui voli na dina totoka e so ka a nakiti me baleti keda kei na noda veituvaki—na veidina e vakamacalataka o Nifai ni vola me ivakavuvuli ka [me da] vinaka kina.

A vakatavulica o Jekope na taci Nifai: “A ka levu ka veivakurabuitaki na nona cakacaka na Turaga. Sa sega ni kilai rawa na titobu ni nona veika vuni; ka sa sega ni kilai rawa na lomana.”³

Na vosa nei Jekope e vakatavulici keda ni da na sega vakadua ni rawata ni “vaqaqa na peleti” se vakasaurarataka na veika vuni ni Kalou mera vakatakilai vei keda. Ia, na veika vuni ni Kalou sa vakatakilai vei keda ena Lomana duadua ga vata kei na kaukauwa ni Yalo Tabu.⁴

E tomana o Jekope:

“Ia sa sega na tamata e kila rawa na lomana kevaka sa sega ni vakatakila vua ko Koya; ia, oi kemudou na wekaqu, dou kakua ni beca na ka sa vakatakila na Kalou.

“Raica ena kaukauwa ni nona vosa sa bula kina na tamata ena dela ni vuravura. … A cava me qai sega ni rawa kina vua me vunauca na vuravura kei na ka kece sa tu kina, me vaka na nona lewa kei na nona inaki?

“Oi kemudou na wekaqu, dou kakua ni vakalewa na Turaga, ia mo dou muria ga na nona vunau.”⁵

Me rawa ni da kila vakamatata na veika vuni ni Kalou, se na veika oya e rawa ni kilai deivaki duadua ga ena vakatakila, sa dodonu meda muria na ivakaraitaki nei Nifai, ka kaya, “Au tamata gone ga, ia kau tubu levu, au dau gadreva meu kila na veika vuni ni Kalou, kau sa dau masu kina vua na Turaga; a sa rogoci au ko Koya, ka vakamalumalumutaka na yaloqu, kau sa vakabauta kina na vosa kecega i tamaqu.”⁶ A vakamacalataka tale na Turaga ni a cakacakataka o Nifai na vakabauta, dauvakasaqaqara vagumatua ena yalomalumalumu, ka muria na Nona vunau.⁷

Na ivakaraitaki nei Nifai ena qarai ni kilaka e oka kina na (1) gagadre yalovinaka, (2) yalomalumalumu, (3) masumasu, (4) nuitaki ni parofita, kei na cakacakataki ni (5) vakabauta, (6) gugumatua, kei na (7) talairawarawa. Na ivakarau oqo ni vakasaqaqara e sa veibasai vakalevu sara ki na noqu “vaqaqa tiko na peleti,” se tovolea voli meda vakasaurarataka na kilai vakamatata ni veika a nakiti me na vakatakilai me vaka na ituvatuva ni Turaga kei na kaukauwa ni Yalo Tabu.

Ena itabagauna oqo, eda sa mai namaka tu ni kilaka e rawa ka dodonu me rawati kusarawa; ni sega soti ni kilai se rawati vakarawarawa tu ni itukutuku, e sa dau tawawili wasoma se nuicalati. Baleta ni sa rui levu na itukutuku, e so era navuca tawakila na ivurevure nuitaki e so sa tiko rawa ka sega ni kilai taumada na kena yavu, ka sega ni vakararavi voli ena ivalavala yavutaki ni Turaga ena ciqomi ni noda vakatakila. A rawa ni a vakamacalataka tiko o Jekope na noda gauna ni a kaya: “Raica, [era] sa tamata domodomoqa; era beca na ivakavuvuli dina … ka ra sa vinakata na ka era sega ni kila. Ia, ena nodra mataboko, ka sega ni raica na ka dina, era na lutu kina; ni sa kauta tani mai vei ira na Kalou na nona vunau, ka solia vei ira na veika era sa sega ni kila rawa, me vaka na ka era gadreva.”⁸

Na kena veibasai na ivakasala nei Peresitedi Dieter F. Uchtdorf. A vosa o koya baleti ira na daukaulotu, ia sa yaga vakatautauvata na nona vosa kivei ira taucoko na dauvakasaqara na dina vakayalo. “Ni … ra sa vakabauti Jisu Karisito na daukaulotu,” kaya o koya, “era na nuitaka cake na Turaga mera muria na Nona vunau—ena gauna madaga era sega ni kila matata vakaoti tu kina na kedra inaki me baleti ira. Ena vakatakilai na nodra vakabauta ena gugumatua kei na cakacaka.”⁹

Donuya na koniferedi raraba ni Epereli sa oti, a vakamacalataka o Elder Dallin H. Oaks: “Sasaga tiko vakaukauwa na Lotu me kilai raraba na veitukutuku e tu kina, ia mai na veika e rawa ni tabaki, se tiko ga vei ira na lewenilotu na vakatataro ka na sega ni rawa ni saumi vakavuli. … E so na ka ena vulici walega ena vakabauta.”¹⁰

Era vakatavulica na ivakavuvuli vataga oqo na parofita ena gauna makawa, ni vakaraitaki ena toso ni gauna na ivakarau ni tamata e se sega ni veisau ka sa tawayaga na ivalavala ni Turaga ena vuli. Dikeva na vosa vakaibalebale oqo ena Veiyalayalati Makawa: “Mo vakararavi vei Jiova ena vu ni yalomu; ka mo kakua ni vakararavi ki na nomu yalomatua.”¹¹

A vakamacalataka o Aisea, ni vosa tiko ena vuku ni Turaga, “Me vaka na kena cecere cake na lomalagi ki vuravua, sa cecere cake vakakina na noqui valavala ki na nomudoui valavala, kei na noqu vakanananu ki na nomudou vakanananu.”¹²

A kuria o Nifai e dua tale na ivakadinadina ni a cauraka, “Oi kemuni na Turaga, au sa vakararavi vei kemuni, ia au na vakararavi tikoga vei kemuni me tawamuudu.”¹³

Sa gadreva vei keda na vakabauta kei na vakararavi vua na Turaga meda vakatakila ni Nona vuku e sa cecere cake ki na noda vakaikeda. Sa dodonu meda vakatakila talega ni Nona ituvatuva e vakarautaka na sasaga ka cecere duadua me baleta na vakatorocaketaki kei na vuli vakayalo.

A sega ni namaki vei keda “me vinaka sara na noda kilaka ena veika e so” donuya na bula vakayago eke. Ia, sa namaki vei keda meda “vakanuinuitaka na ka dina e sega ni rairai, ia e sa bera ni kilai sara.”¹⁴

Mai na vakabauta levu nei Nifai, a vakatakila o koya na nona lecaika ena nona sausaumi kivua na agilosi ka a tarogi koya, “Ko sa kila li na levu ni nona loloma na Kalou?” sauma o Nifai, “Io, au sa kila ni sa lomani ira na luvena; ia, au sega ga ni kila na ibalebale ni veika kece au sa raica.”¹⁵

Vakakina, a vakamacalata o Alama vua na luvena tagane o Ilamani, “Raica e se bera ni vakatakilai taucoko vei au na veika oqo; ia sa tei rauta mada ga na ka au sa tukuna oti.”¹⁶

Au tukuna na noqu ivakadinadina ni sa lomani ira na Luvena na Tamada mai Lomalagi, ia, vakataki Nifai kei Alama, au sega ga ni kila na ibalebale ni veika kece au sa raica. Se meu gadreva ni kila na ka kecega; O au talega sa na tei rauta mada ka waraka na Turaga ena yalovosota, ni kilai “sa tu e vuqa na ivakadinadina ni ka oqo; era sa kena ivakadinadina talega vei iko. …

“… Ko sa kila na ivola tabu, ia, na ivola oqo sa tukuna na Kalou; io na vuravura kei na veika kece sa tu kina, kei na toso ni vuravura kei na nodra toso na veika kece ga sa tu ena maliwa lala; a ka kecega oqo sa vakadinadinataka ni sa bula tiko na Kalou, o Koya sa bulia na ka kecega.”¹⁷

Ni da vakatakila eda sa ibulibuli ni dua na Tamada mai Lomalagi vuku ka dina, “A cava,” me qai sega ni vakatarai kina Vua me dusimaka na noda vakatorocaketaki kei na vuli vakayalo “me vaka na nona lewa kei na nona inaki” ka sega ni noda?¹⁸

Sa bula o Koya. Sa Luvena Duabau Ga o Jisu Karisito ka sa Dauveivueti ni kawatamata. Baleta na Veisorovaki vakalou i Karisito, sa Nona na vuku kei na raiyawa me tuberi keda ena veisiga oqo. Sa Nona parofita o Josefa Simici, digitaki me vakalesuya mai na Nona matanitu e vuravura ena kena taucoko. Sa Nona parofita bula voli o Thomas S. Monson ka daunivosa edaidai. Au vakadinadinataka ena yalovinaka na ka oqo ena yaca i Jisu Karisito, emeni.