Kom Pab Peb txoj Kev Kawm Txuj Ci thiab Kev Txawj Ntse ntawm Sab Ntsuj Plig

Thaum kuv yog ib tug tub hluas, kuv niam kuv txiv tau txais ib qho khoom plig uas ua rau kuv thiab kuv tus kwv David xav tsis thoob. Qhov khoom plig ntawd yog ib tug mlom txog cov phiaj kub uas tus Yaj Saub Yauxej Xamiv txais los ntawm tus tim tswv Maulaunais. Raws li kuv nco qab, cov phiaj no muaj 10 daim phiaj uas muaj tej lus sau rau saud. Tiam sis, cov phiaj ntawd tsis yog qhov uas wb xav paub txog.

Wb niam wb txiv pheej qhia wb tej zaj dab neeg txog Kev Txum Tim Rov Qab Los. Wb tau paub thiab tau hu nkauj nyob hauv lub Koom Haum Me Nyuam Yaus txog cov phiaj kub uas tau muab zais cia hauv ib lub roob thiab tus tim tswv Maulaunais tau muab rau Yauxej Xamiv.¹ Thaum wb xav xav txog qhov no, wb xav pom ib qho xwb: muaj dab tsi sau cia rau hauv tej daim phiaj uas muab ob txoj saw hlau me me pav rau?

Cov phiaj nyob ntawm ib lub rooj tau ob peb hnub ua ntej wb xav paub heev. Txawm wb to taub hais tias cov phiaj no tsis yog cov phiaj uas Maulaunais muab rau Yauxej Xamiv, wb xav xav pom qhov uas tau muab pav cia lawm. Yog li ntawd muaj ob peb zaug uas kuv tus kwv thiab kuv wb sim siv rab riam, rab diav qub, thiab lwm yam uas wb xav tias wb siv tau kom muab qhov uas pav cia lawm daws qhib me ntsis xwb wb thiaj pom tau tej yam uas muaj nyob haud — tiam sis tsis txhob siv zog ua kom ob txoj saw hlau dam. Wb txawj ntse txaus kom tsis txhob ua tej yam uas lwm tus yuav paub txog wb txoj kev ua li no. Ua rau wb poob siab thiab ntxhov siab heev vim wb yeej daws tsis tau cov phiaj no.

Kuv tseem tsis paub yog tias muaj dab tsi nyob hauv qhov uas muab pav cia lawm. Tiam sis ua rau kuv txaj muag heev vim txij hnub ntawd los, kuv tseem tsis paub xyov puas muaj dab tsi sau cia rau cov phiaj hlau uas tau qhib rau txhua tus nyeem. Kuv xav tias tej zaum cov phiaj no muaj tej zaj dab neeg txog Kev Txum Tim txoj Moo Zoo Rov Qab Los thiab cov lus tim khawv ntawm Yauxej Xamiv thiab Peb tug thiab Yim tus Tim Khawv, cov uas pom cov phiaj tiag tiag uas Maulaunais nqa.

Txij thaum ntuj tsim teb raug, peb Leej Txiv Saum Ntuj Ceeb Tsheej tau siv cov yaj saub kom qhia Nws cov me nyuam thiab coj lawv kev. Cov yaj saub no tau qhia txog Nws tej lus no thiab sau cia nyob rau hauv cov vaj lug kub kom peb sab ntsuj plig muaj zog thiab kom peb kawm tau. Nifais piav li no hais tias:

“Vim kuv nyiam cov vaj lug kub heev, thiab kuv lub siab xav ntsoov txog lawv, thiab sau cov no cia rau kuv tej me nyuam tau kawm thiab cia tau pab lawv.

“Saib seb, kuv nyiam tej yam uas yog tus Tswv li heev; thiab kuv lub siab yeej xav ntsoov tsis tseg rau tej yam uas kuv tau pom thiab tau hnov lawm.”²

Tsis tas li ntawd xwb, nyob hauv tej lub caij nyoog dhau los thiab lub caij nyoog kawg uas muaj txhij txhua no, cov mej zeej ntawm tus Tswv lub Koom Txoos uas tsim nyog tau koob hmoov vim lawv muaj tus Vaj Ntsuj Plig Dawb Huv nrog nraim lawv nyob, es nws pab peb sab ntsuj plig muaj zog thiab pab peb kawm tau.

Kuv paub kuv tus kwv rau siab heev, kuv xav tias nws twb nyeem tag nrho tej lus ntawd uas tau muab sau cia rau cov phiaj nyob hauv wb niam wb txiv lub tsev. Tiam sis, kuv twb tsis quav ntsej txog cov lus tseeb uas meej thiab muaj nqi ntawd thiab kuv siv zog nrhiav tej yam uas Vajtswv tseem tsis tau muab tshwm sim.

Tiam sis, ntshe qhov uas peb xav ua yuam kev xav “daws cov phiaj” yeej tab kaum peb txoj kev kom sab ntsuj plig muaj zog thiab txoj kev kawm. Tej yam no ua rau peb nrhiav tej yam uas Vajtswv tsis xav kom peb to taub tam sim no, thiab ua rau peb saib tej yam tseeb uas tau npaj rau peb thiab peb lub caij nyoog tsis rau nqi—tej yam tseeb uas Nifais piav hais tias tau muab sau cia kom peb kawm tau thiab pab peb.

Nifais tus kwv Yakhauj qhia hais tias, “Saib seb, tus Tswv tej hauj lwm yog tej uas loj thiab zoo kawg nkaus uas xav tsis thoob. Nws tej txuj ci tib neeg yuav nrhiav tsis tau; thiab tib neeg yeej tsis muaj peev xwm nrhiav tau tag nrho nws tej kev li.”³

Yakhauj tej lus qhia peb tias peb yeej yuav tsis “daws cov phiaj” los sis yuam kom muab Vajtswv tej txuj ci tshwm sim rau peb. Tiam sis Vajtswv yuav nthuav Nws tej txuj ci rau peb tsuas yog raws li Nws lub siab nyiam thiab los ntawm tus Vaj Ntsuj Plig Dawb Huv lub hwj chim.⁴

Yakhauj hais ntxiv hais tias:

Thiab tsis muaj ib tug tib neeg twg yuav paub txog nws tej kev tsuas yog yuav raug qhia rau nws xwb; yog li ntawd, cov kwv tij, txhob muab Vajtswv tej kev tshwm sim saib tsis muaj nqis.

“Vim saib seb, los ntawm nws txoj lus lub hwj chim tib neeg tau los rau hauv lub ntiaj teb. … Au ces ua li cas thiaj li yuav tsis muaj cuab kav txib lub ntiaj teb, los sis txib nws tej tes tej hauj lwm nyob saum lub ntiaj teb, raws li nws lub siab xav thiab siab nyiam?

“Yog li ntawd, cov kwv tij, tsis txhob nrhiav yuav qhuab ntuas tus Tswv, tiam sis txais lus qhuab ntuas los ntawm nws txhais tes.”⁵

Yog peb xav to taub Vajtswv tej txuj ci uas neeg tsis paub txog, los yog tej yam uas peb yuav to taub dhau los ntawm kev tshwm sim xwb, peb yuav tsum ua raws li Nifais tus yam ntxwv, uas hais tias, “[Vim kuv] tseem hluas heev, tiam sis tseem muaj lub cev loj siab, thiab kuj muaj lub siab xav paub txog Vajtswv tej txuj ci uas neeg tsis paub txog thiab, yog li ntawd, kuv thiaj tau tsa ncauj quaj thov rau tus Tswv; thiab saib seb nws tau los xyuas kuv, thiab tau nplij kuv lub siab ces kuv txawm ntseeg txhua lo lus uas kuv txiv tau hais; yog li ntawd, kuv tseem tsis tau ntxeev siab tawm tsam nws li kuv cov tij laug.”⁶ Tus Tswv piav rau Nifais hais tias Nifais tau siv txoj kev ntseeg, kub siab lug nrhiav nrog lub siab mos siab muag, thiab ua raws li tus Tswv tej lus txib.⁷

Nifais tus yam ntxwv txog kev nrhiav kev txawj ntse yog li no, nws (1) xav paub tiag tiag, (2) txo hwj chim, (3) thov Vajtswv, (4) ntseeg tus yaj saub, thiab siv (5) kev ntseeg, (6) rau siab, thiab (7) mloog lus. Tus txheej txheem nrhiav no yeej txawv ntawm kuv txoj kev “daws cov phiaj” los yog kev yuam kom to taub tej yam uas tus Tswv yuav tshwm sim raws li Nws lub sij hawm thiab dhau los ntawm tus Vaj Ntsuj Plig Dawb Huv lub hwj chim.

Nyob hauv lub caij nyoog no, peb xav tias peb yuav tsum txais tau kev txawj ntse tam sim no; thaum peb tsis paub tej yam los yog peb nrhiav tsis tau tej yam ntawd, ces ua rau peb tsis ntseeg los yog muab yam ntawd tso tseg. Vim muaj xov xwm ntau heev, ib txhia ntseeg cov uas hais tej yam txawm lawv tsis paub cov hais li ntawd yog leej twg thiab tsis tso siab rau tus Tswv tus txheej txheem qhia kev tshwm sim. Tej zaum Yakhauj piav txog peb lub caij nyoog thaum nws hais tias: “Tiam sis saib seb, [lawv] yog ib cov neeg tawv ncauj; thiab lawv thuam tej lus ntawm qhov tseeb meej, … thiab tau nrhiav tej yam uas lawv tsis to taub. Yog li ntawd, vim yog lawv txoj kev dig muag, uas yog txoj kev dig muag uas tau los ntawm txoj kev uas pheej nrhiav tej uas dhau kev cai, lawv yuav tsum raug poob; vim Vajtswv tau muab nws txoj kev tseeb meej rho tawm ntawm lawv mus lawm, thiab tau coj ntau yam uas tsis yooj yim to taub los rau lawv, vim yog lawv xav tau tej ntawd.”⁸

Thawj Tswj Hwm Dieter F. Uchtdorf tej lus ntuas yeej txawv ntawm tej yam lawv ua li ntawd. Nws hais txog cov tub txib, tiam sis nws tej lus muaj nqi rau tag nrho cov uas nrhiav tej yam tseeb ntawm sab ntsuj plig. Nws hais tias, “Thaum … cov tub txib muaj kev ntseeg Yexus Khetos, lawv yuav ntseeg tus Tswv txaus kom ua raws li Nws cov lus txib—txawm lawv tsis to taub tag nrho vim li cas. Peb yuav pom lawv txoj kev ntseeg los ntawm lawv txoj kev rau siab thiab lawv tej hauj lwm.”⁹

Nyob hauv lub tuam rooj sab laj thaum lub Plaub Hlis Ntuj, Txwj Laug Dallin H. Oaks piav hais tias: “Lub Koom Txoos siv zog kom tshaj tawm peb cov ntaub ntawv, tiam sis tom qab peb muab tshaj tawm tag nrho, tej lub sij hawm peb cov mej zeej tseem muaj lus nug uas teb tsis tau thaum kawm ntawv xwb. … Muaj tej yam uas peb yuav kawm los ntawm kev ntseeg xwb.”¹⁰

Cov yaj saub puag thaum ub tau qhia lub ntsiab cai no, peb thiaj li paub hais tias tib neeg yeej tsis tau hloov siab thiab tus Tswv tus txheej txheem kawm yeej nyob mus ib txhis. Cia li xav txog paj lug no nyob hauv Phau Qub: “Cia siab rau tus Tswv kom kawg koj lub siab lub ntsws. Tsis txhob cia siab rau koj tej kev txawj ntse.”¹¹

Yaxayas hais tus Tswv tej lus piav hais tias, “Lub ntuj nyob siab lub ntiaj teb no li cas, tej uas kuv ua thiab kuv xav nyob siab tshaj tej uas nej ua thiab nej xav npaum li ntawd.”¹²

Nifais yog ib tug tim khawv ntxiv vim nws tshaj tawm hais tias, “Au tus Tswv es, kuv tau tso siab plhuav rau koj, thiab kuv yuav cia siab rau koj mus ib txhis li.”¹³

Yov peb ntseeg thiab tso siab rau tus Tswv peb yuav tsum lees hais tias Nws lub tswv yim yeej zoo dua li peb lub tswv yim. Peb kuj yuav tsum lees hais tias Nws txoj hau kev yog qhov zoo tshaj plaws kom peb sab ntsuj plig muaj zog thiab kom peb kawm tau.

Vajtswv yeej tsis xav tias peb yuav “paub tej yam dab tsi tseeb tseeb [tag nrho]” thaum peb nyob hauv lub ntiaj teb no. Tiam sis Vajtswv xav kom peb “cia siab rau tej yam uas peb tsis pom tiam sis muaj tseeb.”¹⁴

Txawm Nifais ntseeg heev, nws lees hais tias nws tsis to taub tag nrho thaum nws teb tus tim tswv uas nug nws hais tias, “Koj puas paub hais tias Vajtswv twb yuav nqis los nrog neeg nyob?” Nifais teb hais tias, “Kuv paub tias nws yeej hlub nws cov me nyuam; txawm li ntawd los, kuv twb tsis paub tej ntsiab lus ntawm txhua yam.”¹⁵

Zoo ib yam li ntawd, Amas hais rau nws tus tub Hilamas hais tias, “Nim no tej txuj ci uas neeg paub tsis txog no tseem tsis tau … ua rau kuv paub tag; yog li ntawd kuv yuav tsis hais ntxiv lawm.”¹⁶

Kuv ua tim khawv hais tias peb Leej Txiv Saum Ntuj Ceeb Tsheej hlub Nws cov me nyuam, tiam sis, ib yam li Nifais thiab Amas, kuv tsis paub tej ntsiab lus ntawm txhua yam. Thiab kuv tsis tas paub txhua yam; kuv kuj yuav ua siab ntev thiab tos ntsoov tus Tswv, vim kuv paub tias “Kuv muaj txhua yam tsav uas ua tim khawv tias tej yam no muaj tseeb; thiab [nej] kuj muaj txhua yam ua tim khawv rau [nej] tias [tej yam no] yeej muaj tseeb. …

“… Tej vaj lug kub muaj nyob ntawm koj xub ntiag, muaj tseeb tiag, thiab txhua yam qhia tias muaj ib tug Vajtswv; muaj tseeb tiag, lub ntiaj teb, thiab tag nrho txhua yam uas nyob saum nws, muaj tseeb tiag, thiab nws txoj kev tig, muaj tseeb tiag, thiab tag nrho tej ntiaj teb uas txav li lawv ib txwm txav twb ua tim khawv tias muaj ib tug Tswv Tsim Siab Kawg nkaus.”¹⁷

Thaum peb lees hais tias peb yog los ntawm ib Leej Txiv Saum Ntuj Ceeb Tsheej uas muaj tswv yim thiab hlub peb, “Au ces,” ua cas peb tsis xav cia Nws coj peb sab ntsuj plig muaj zog thiab coj peb txoj kev kawm txuj ci “raws li nws lub siab xav thiab siab nyiam” thiab tsis yog raws li peb lub siab nyiam?¹⁸

Nws muaj txoj sia nyob. Yexus Khetos yog Nws Tib Leeg Tub thaib tib neeg tus Txhiv Dim. Vim muaj Yexus Khetos txoj Kev Theej Txhoj mus ib txhis, Nws muaj tswv yim thiab txawj pom tom hauv ntej kom coj peb hauv lub caij nyoog kawg no. Yauxej Xamiv yog Nws tus yaj saub, uas Nws xaiv kom muab Nws lub nceeg vaj txum tim rov qab los nyob rau hauv lub ntiaj teb no. Thomas S. Monson yog Nws tus yaj saub thiab tus uas sawv Nws cev hais lus hnub no. Kuv ua tim khawv txog qhov no, los ntawm Yexus Khetos lub npe, amees.