ដើម្បីភាពរីកចម្រើន និង ការរៀនសូត្រខាងវិញ្ញាណ
សេចក្ដីអាថ៌កំបាំងរបស់ព្រះបានលាតត្រដាងដល់យើងស្របតាមព្រះទ័យទ្រង់ និង ដោយព្រះចេស្តានៃព្រះវិញ្ញាណបរិសុទ្ធតែប៉ុណ្ណោះ ។
កាលខ្ញុំនៅក្មេង ឪពុកម្ដាយខ្ញុំបានទទួលអំណោយមួយដែលធ្វើឲ្យប្អូនប្រុសខ្ញុំ ដេវីឌ និង ខ្ញុំចាប់អារម្មណ៍យ៉ាងខ្លាំង ។ អំណោយនោះគឺជារូបចម្លាក់តូចមួយនៃផ្ទាំងមាសដែល យ៉ូសែប ស៊្មីធ បានទទួលពីទេវតាមរ៉ូណៃ ។ ខ្ញុំនៅចាំថា រូបចម្លាក់នោះមានសន្លឹកធ្វើពីដែកប្រហែល ១០ ទំព័រដែលមានចារឹកពាក្យនៅលើនោះ ។ ប៉ុន្តែយើងពុំបានចាប់អារម្មណ៍ពីអក្សរលើផ្ទាំងទាំងនោះទេ ។
យើងធំឡើងដោយបានឮរឿងការស្ដារឡើងវិញរួចទៅហើយ ។ យើងបានដឹង ហើយបានច្រៀងក្នុងថ្នាក់កុមារ អំពីផ្ទាំងមាសត្រូវបានកប់លាក់ទុកយ៉ាងជ្រៅនៅក្បែរជើងភ្នំ ហើយបានប្រទានដល់ យ៉ូសែប ស្ម៊ីធ ដោយទេវតាមរ៉ូណៃ ។១ កាលយើងបានចាប់ផ្ដើមចង់ដឹងអំពីវា មានអ្វីមួយដែលយើងពិតជាចង់ឃើញ ៖ តើអ្វីដែលបានសរសេរនៅលើផ្នែកតូចមួយនៃរូបចម្លាក់ ដែលបានភ្ជាប់យ៉ាងជិតទៅនឹងកងតូចៗធ្វើពីដែកនោះ ?
ផ្ទាំងនោះត្រូវបានទុកនៅលើតុតូចមួយអស់ពីរបីថ្ងៃពីមុនយើងបានចាប់ផ្ដើមធ្វើអ្វីមួយ ។ ទោះជាយើងដឹងយ៉ាងច្បាស់ថា ផ្ទាំងនេះមិនមែនជាផ្ទាំងពិតប្រគល់ដោយមរ៉ូណៃក៏ដោយ ក៏យើងនៅតែចង់ឃើញផ្នែកដែលបានភ្ជាប់នោះដដែល ។ ដូច្នេះពេលខ្លះ ប្អូនប្រុសខ្ញុំ និងខ្ញុំបានព្យាយាមប្រើកូនកាំបិត ស្លាបព្រា និងវត្ថុផ្សេងទៀតដើម្បីគាស់ផ្នែកដែលបានភ្ជាប់នោះចេញឲ្យបានឃើញអ្វីដែលបានសរសេរ—ប៉ុន្តែបំបែកកងតូចៗនោះមិនបានទេ ។ យ៉ាងហោចណាស់ យើងឆ្លាតល្មមក្នុងការបំបាត់ភស្ដុតាងនៃសកម្មភាពដែលយើងបានធ្វើនេះ ។ យើងខកចិត្ត ហើយមួរម៉ៅ ព្រោះព្យាយាម « គាស់ផ្ទាំងទាំងនេះ » តែពុំបានសម្រេចឡើយ ។
ខ្ញុំនៅតែពុំដឹង—ថាតើមានអ្វី—បានចារឹកលាក់ទុកនៅក្រោមផ្នែកដែលបានភ្ជាប់នោះទេ ។ ប៉ុន្តែរឿងគួរឲ្យខ្មាសនោះគឺរហូតមកដល់ថ្ងៃនេះ ខ្ញុំនៅតែមិនដឹងថាអ្វីដែលបានចារឹកនៅលើផ្នែកនៃទំព័រធ្វើពីដែកដែលបិទជិតនោះទេ ។ ខ្ញុំគ្រាន់តែអាចស្រមៃថា ទំព័រទាំងនេះមាននូវប្រវត្តិការស្ដារឡើងវិញ និង ទីបន្ទាល់របស់ យ៉ូសែប ស៊្មីធ ព្រមទាំងសាក្សីបីនាក់ និងសាក្សីប្រាំបីនាក់ ដែលបានឃើញផ្ទាំងដែលមរ៉ូណៃប្រទានឲ្យនេះផ្ទាល់ភ្នែក ។
ចាប់តាំងពីផែនដីបានបង្កើតមក ព្រះវរបិតាគង់នៅស្ថានសួគ៌ជាទីស្រឡាញ់បានប្រទានទិសដៅ ការដឹកនាំ និងការណែនាំដល់បុត្រាបុត្រីទ្រង់តាមរយៈព្យាការី ។ បន្ទូលទ្រង់បានកត់ត្រាដោយព្យាការីទាំងនេះ ហើយបានរក្សាទុកជាព្រះគម្ពីរដើម្បីភាពរីកចម្រើន និង ការរៀនសូត្រដល់យើង ។ នីហ្វៃបានរៀបរាប់ដូចនេះ ៖
« ដ្បិតព្រលឹងខ្ញុំត្រេកអរចំពោះបទគម្ពីរទាំងឡាយ ឯចិត្តខ្ញុំរំពឹងគិតពីបទគម្ពីរទាំងនោះ ហើយខ្ញុំក៏សរសេរទុកដើម្បីជាការចេះដឹង និងជាប្រយោជន៍ដល់កូនចៅខ្ញុំ ។
« មើលចុះ ព្រលឹងខ្ញុំត្រេកអរចំពោះការណ៍ទាំងឡាយនៃព្រះអម្ចាស់ ឯចិត្តខ្ញុំរំពឹងគិតជារៀងរហូតអំពីការណ៍ទាំងឡាយដែលខ្ញុំបានឃើញ ហើយបានឮមក » ។២
មិនតែប៉ុណ្ណោះ អំឡុងគ្រាកាន់កាប់ត្រួតត្រាពីមុនៗ និង ក្នុងគ្រាកាន់កាប់ត្រួតត្រានៃពេលពេញកំណត់ចុងក្រោយនេះ សមាជិកសក្ដិសមក្នុងសាសនាចក្រព្រះអម្ចាស់មានពរដោយមានដៃគូជាព្រះវិញ្ញាណបរិសុទ្ធដ៏ស្មោះត្រង់ ដែលជួយដល់ភាពរីកចម្រើន និង ការរៀនសូត្រខាងវិញ្ញាណយើង ។
ដោយសារប្អូនប្រុសខ្ញុំជាក្មេងឧស្សាហ៍ ខ្ញុំគិតថាគាត់ទំនងជាបានអានពាក្យពេចន៍ទាំងអស់ដែលមាននៅលើផ្ទាំងនោះហើយ ។ ប៉ុន្តែខ្ញុំមិនយកចិត្តទុកដាក់ចំពោះសេចក្ដីពិតដ៏ច្បាស់ និងពិសេសៗទាំងនោះ ហើយបែរជាខិតខំស្វែងរកអ្វីទាំងឡាយដែលមិនត្រូវបានបើកសម្ដែងទៅវិញ ។
ជាអកុសល ពេលខ្លះភាពរីកចម្រើន និង ការរៀនសូត្រយើងអាចត្រូវបានពន្យឺត ឬបញ្ឈប់ដោយបំណងមិនសមស្របដែលចង់ « គាស់ផ្ទាំងទាំងនេះ » ។ ទង្វើទាំងនេះអាចនាំយើងទៅស្វែងរកអ្វីដែលមិនចាំបាច់ ដែលត្រូវយល់នៅពេលនេះ ទន្ទឹមនឹងនោះយើងបដិសេធក្ដីពិតដ៏អស្ចារ្យដែលមានសម្រាប់យើង និងស្ថានភាពយើង—គឺជាសេចក្ដីពិតដែលនីហ្វៃបានរៀបរាប់ថាចារឹកទុកជាការរៀនសូត្រ និង ប្រយោជន៍ដល់យើង ។
យ៉ាកុប ជាប្អូនរបស់នីហ្វៃបានបង្រៀនថា « មើលចុះ កិច្ចការទាំងឡាយនៃព្រះអម្ចាស់សុទ្ធតែធំ ហើយអស្ចារ្យមែន ។ ឯជម្រៅនៃសេចក្ដីអាថ៌កំបាំងទាំងឡាយរបស់ទ្រង់ក៏ពុំអាចរកឃើញដែរ ហើយមនុស្សគ្មានលទ្ធភាពនឹងរកឃើញផ្លូវរបស់ទ្រង់បានអស់ឡើយ » ។៣
ពាក្យពេចន៍យ៉ាកុបបង្រៀនយើងថា យើងមិនអាច « គាស់ផ្ទាំងទាំងនេះ » បានដោយជោគជ័យ ឬបង្ខំឲ្យសេចក្ដីអាថ៌កំបាំងរបស់ព្រះបានបើកសម្ដែងដល់យើងឡើយ ។ ផ្ទុយទៅវិញ សេចក្ដីអាថ៌កំបាំងរបស់ព្រះបានលាតត្រដាងដល់យើងស្របតាមព្រះទ័យរបស់ទ្រង់ និង តាមរយៈព្រះចេស្តានៃព្រះវិញ្ញាណបរិសុទ្ធតែប៉ុណ្ណោះ ។៤
យ៉ាកុបបន្តបង្រៀន ៖
« ហើយគ្មានអ្នកណាម្នាក់ស្គាល់ផ្លូវទាំងឡាយរបស់ទ្រង់ទេ លើកលែងតែបានសម្ដែងដល់អ្នកនោះប៉ុណ្ណោះ ហេតុដូច្នោះហើយ ឱបងប្អូនរាល់គ្នាអើយ ចូរកុំមើលងាយដល់វិវរណៈទាំងឡាយនៃព្រះឡើយ ។
« ដ្បិតមើលចុះ ដោយព្រះចេស្ដានៃព្រះបន្ទូលរបស់ទ្រង់ នោះមានមនុស្សរស់នៅលើផ្ទៃផែនដីនេះ ។ … ចុះតើហេតុអ្វីក៏ទ្រង់មិនអាចចេញបញ្ជាដល់ផែនដី ឬផលនៃព្រះហស្តរបស់ទ្រង់ នៅលើផ្ទៃផែនដីតាមព្រះហឫទ័យ និងបំណងរបស់ទ្រង់បាន ?
« ហេតុដូច្នោះហើយ ឱបងប្អូនរាល់គ្នាអើយ ចូរកុំចង់ទូន្មានដល់ព្រះអម្ចាស់ឡើយ តែចូរទទួលដំបូន្មានពីព្រះហស្តរបស់ទ្រង់វិញ » ។៥
ដើម្បីយល់សេចក្ដីអាថ៌កំបាំងរបស់ព្រះ ឬ សេចក្ដីដែលអាចយល់បានតែតាមរយៈវិវរណៈ យើងត្រូវតែធ្វើតាមគំរូរបស់នីហ្វៃថា « ពេលនោះនៅក្មេងណាស់ ប៉ុន្តែមានមាឌធំមាំមួន ហើយមានចិត្តមោះមុត ចង់ដឹងនូវសេចក្ដីអាថ៌កំបាំងទាំងឡាយនៃព្រះ ហេតុដូច្នោះហើយ ខ្ញុំបានអំពាវនាវដល់ព្រះអម្ចាស់ ហើយមើលចុះ ទ្រង់បានយាងមកជួបនឹងខ្ញុំ ហើយបន្ទន់ចិត្តខ្ញុំ បណ្ដាលឲ្យខ្ញុំជឿអស់ទាំងពាក្យដែលបានពោលមកដោយឪពុកខ្ញុំ » ។៦ ព្រះអម្ចាស់ផ្ទាល់បានមានបន្ទូលបន្ថែមថា នីហ្វៃបានប្រើសេចក្ដីជំនឿ បានព្យាយាមស្វែងរកយើងដោយមានចិត្តសុភាពរាបសា ហើយកាន់តាមព្រះបញ្ញត្តិទ្រង់ ។៧
គំរូនីហ្វៃក្នុងការស្វែងរកចំណេះដឹងរួមមាន (១) បំណងដ៏ស្មោះ (២) ភាពរាបសា (៣) ការអធិស្ឋាន (៤) ការទុកចិត្តលើព្យាការី និងការប្រើ (៥) សេចក្ដីជំនឿ (៦) សេចក្ដីព្យាយាម និង (៧) ការគោរពប្រតិបត្តិ ។ វិធីសាស្ត្រស្វែងរកនេះខុសគ្នាស្រឡះពី « ការគាស់ផ្ទាំងទាំងនេះ » របស់ខ្ញុំ ឬ ការព្យាយាមបង្ខំឲ្យមានការយល់ដឹងលើអ្វីដែលត្រូវបើកសម្ដែងស្របតាមកាលវេលារបស់ព្រះអម្ចាស់ និង តាមរយៈព្រះចេស្តានៃព្រះវិញ្ញាណបរិសុទ្ធ ។
នៅសម័យទំនើបនេះ យើងបានរំពឹងថា ចំណេះដឹងអាច និងគួរតែទទួលបានភ្លាមៗ ដ្បិតកាលណាព័ត៌មានដែលពិបាកដឹង ឬ ពិបាកទទួលបាន នោះជារឿយៗត្រូវគេបដិសេធ ឬ មិនទុកចិត្ត ។ ដោយសារតែព័ត៌មានមានច្រើនបរិបូរ ទើបមនុស្សខ្លះគិតចង់ទុកចិត្តលើព័ត៌មានដែលមានប្រភពមិនច្បាស់លាស់ ជាងទុកចិត្តលើលំនាំដែលព្រះអម្ចាស់បានបង្កើតឡើងដើម្បីទទួលបានវិវរណៈផ្ទាល់ខ្លួន ។ យ៉ាកុបអាចនឹងបានរៀបរាប់ពីជំនាន់របស់យើងដូចនេះ ៖ « ប៉ុន្តែមើលចុះ [ ពួកគេ ] ជាមនុស្សរឹងក្បាល ហើយពួកគេបានមើលងាយដល់ព្រះបន្ទូលដ៏ច្បាស់លាស់ទាំងនេះ … ហើយបានស្វែងរករឿងទាំងឡាយដែលពួកគេមិនអាចយល់ ។ ហេតុដូច្នោះហើយ ព្រោះមកពីការខ្វាក់របស់ពួកគេ គឺជាការខ្វាក់ដោយមើលហួសទីដៅ នោះពួកគេត្រូវតែរលំ ដ្បិតព្រះទ្រង់បានដកយកភាពដ៏ច្បាស់លាស់របស់ទ្រង់ចេញពីគេហើយ ហើយបានប្រទានឲ្យពួកគេនូវអ្វីជាច្រើន ដែលពួកគេពុំអាចយល់វិញ ពីព្រោះពួកគេប្រាថ្នាចង់បានការណ៍នោះ។ ហើយពីព្រោះពួកគេប្រាថ្នាចង់បានការណ៍នោះ ទើបព្រះទ្រង់បានធ្វើការនោះ ដើម្បីឲ្យពួកគេអាចជំពប់ដួល » ។៨
ប្រធាន ឌៀរថើរ អេហ្វ អុជដូហ្វ បានទូន្មានផ្ទុយពីនេះ ។ លោកមានប្រសាសន៍អំពីអ្នកផ្សព្វផ្សាយសាសនា ប៉ុន្តែប្រសាសន៍របស់លោកក៏អនុវត្តចំពោះអ្នកដែលស្វែងរកសេចក្ដីពិតខាងវិញ្ញាណដែរ ។ លោកមានប្រសាសន៍ថា « នៅពេល … អ្នកផ្សព្វផ្សាយសាសនាមានសេចក្ដីជំនឿលើព្រះយេស៊ូវគ្រីស្ទ ពួកគេទុកចិត្តលើព្រះអម្ចាស់រហូតដល់ធ្វើតាមព្រះបញ្ញាត្តិទ្រង់—ទោះជាពួកគេពុំយល់ពីមូលហេតុក្ដី ។ សេចក្ដីជំនឿរបស់ពួកគេនឹងបង្ហាញតាមរយៈភាពឧស្សាហ៍ និងការប្រព្រឹត្ត » ។៩
អែលឌើរ ដាល្លិន អេក អូក បានពន្យល់នៅក្នុងសន្និសីទកាលពីខែមេសាដូចនេះ ៖ « សាសនាចក្រកំពុងខិតខំយ៉ាងខ្លាំងដើម្បីធ្វើឲ្យមានតម្លាភាពចំពោះកំណត់ត្រាដែលយើងមាន ប៉ុន្តែទោះជាយើងអាចបោះពុម្ពអ្វីៗទាំងអស់ក្ដី ក៏សមាជិករបស់យើង ពេលខ្លះនៅតែមានសំណួរមូលដ្ឋាន ដែលពុំអាចត្រូវបានដោះស្រាយដោយការសិក្សានោះដែរ ។ … មានរឿងខ្លះអាចរៀនតែតាមរយៈសេចក្ដីជំនឿប៉ុណ្ណោះ » ។១០
ព្យាការីពីបូរាណបានបង្រៀនគោលការណ៍ដូចគ្នានេះ ដោយបង្ហាញថា អស់រយៈពេលជាយូរមកហើយ និស្ស័យរបស់មនុស្សពុំបានផ្លាស់ប្ដូរឡើយ តែលំនាំរបស់ព្រះអម្ចាស់សម្រាប់ការរៀនសូត្រវិញមានមិនចេះចប់ ។ សូមពិចារណាសុភាសិតក្នុងគម្ពីរសញ្ញាចាស់ ៖ « ចូរទីពឹងដល់ព្រះយេហូវ៉ាឲ្យអស់អំពីចិត្ត កុំឲ្យពឹងផ្អែកលើយោបល់របស់ខ្លួនឡើយ » ។១១
អេសាយបានបកស្រាយថ្លែងជំនួសព្រះថា « ដ្បិតដែលផ្ទៃមេឃខ្ពស់ជាងផែនដីយ៉ាងណា នោះអស់ទាំងផ្លូវរបស់យើង ខ្ពស់ជាងផ្លូវរបស់អ្នក ហើយគំនិតយើង ក៏ខ្ពស់ជាងគំនិតអ្នកយ៉ាងនោះដែរ » ។១២
នីហ្វៃ បានធ្វើជាសាក្សីបន្ថែមម្នាក់ទៀត កាលលោកបានថ្លែងថា « ឱព្រះអម្ចាស់អើយ ទូលបង្គំបានទុកចិត្តទៅលើព្រះអង្គ ហើយទូលបង្គំនឹងទុកចិត្តទៅលើព្រះអង្គជារៀងដរាប » ។១៣
សេចក្តីជំនឿ និង ការទុកចិត្តលើព្រះអម្ចាស់ តម្រូវឲ្យយើងដឹងថា ព្រះបញ្ញាញាណរបស់ទ្រង់គឺប្រសើរជាងប្រាជ្ញារបស់យើង ។ យើងក៏ត្រូវតែដឹងដែរថា ផែនការទ្រង់ផ្ដល់ឲ្យយើងនូវសក្ដានុពលដ៏មហិមាសម្រាប់ភាពរីកចម្រើន និង ការរៀនសូត្រខាងវិញ្ញាណ ។
យើងមិនត្រូវរំពឹងឲ្យ « បាន [ ចំណេះដឹង ] ឥតខ្ចោះអំពីអ្វីៗទាំងឡាយ » ក្នុងជីវិតរមែងស្លាប់នេះឡើយ ។ ផ្ទុយទៅវិញ យើងរំពឹងថានឹង « សង្ឃឹមទៅលើអ្វីៗដែលមើលមិនឃើញ ហើយដែលពិត » ។១៤
ទោះជានីហ្វៃមានសេចក្ដីជំនឿខ្លាំងក្ដី ក៏លោកដឹងថា ការយល់ដឹងរបស់លោកមានកំណត់ដែរ កាលលោកឆ្លើយសំណួរទេវតាដែលសួរលោកថា « តើអ្នកយល់ពីការយាងចុះមកនៃព្រះឬទេ ? » នីហ្វៃឆ្លើយថា « ខ្ញុំដឹងថាព្រះអង្គទ្រង់ស្រឡាញ់កូនចៅរបស់ទ្រង់ ប៉ុន្តែទោះជាយ៉ាងណាក៏ដោយ គង់តែខ្ញុំមិនយល់ន័យនៃរឿងទាំងអស់នោះទេ » ។១៥
អាលម៉ាមានប្រសាសន៍ទៅកាន់កូនប្រុសរបស់លោកស្រដៀងគ្នានេះដែរថា « ឥឡូវនេះ សេចក្ដីអាថ៌កំបាំងទាំងនេះ មិនទាន់ធ្វើឲ្យឪពុកបានស្គាល់គ្រប់យ៉ាងនៅឡើយទេ ហេតុដូច្នេះហើយ ឪពុកនឹងអត់ធ្មត់រង់ចាំ » ។១៦
ខ្ញុំសូមធ្វើជាសាក្សីថា ព្រះវរបិតាសួគ៌មានព្រះទ័យស្រឡាញ់យើង ប៉ុន្តែដូចនីហ្វៃ និង អាលម៉ាដែរ ខ្ញុំមិនស្គាល់គ្រប់យ៉ាងនៅឡើយទេ ។ ហើយខ្ញុំក៏មិនចាំបាច់ស្គាល់គ្រប់យ៉ាងដែរ ខ្ញុំក៏សូមរង់ចាំព្រះអម្ចាស់ដោយអត់ធ្មត់ ដែរ ថា « ខ្ញុំមានគ្រប់ការណ៍ទាំងអស់ដែលជាទីបន្ទាល់ថា ការណ៍ទាំងនេះពិត ហើយអ្នកក៏មានគ្រប់ការណ៍ទាំងអស់ជាទីបន្ទាល់ដល់អ្នកថា ការណ៍ទាំងនោះពិតដែរ ។ …
« … បទគម្ពីរទាំងឡាយត្រូវបានបើកត្រដាងនៅចំពោះអ្នក មែនហើយ ហើយគ្រប់ការណ៍ទាំងអស់បង្ហាញថា មានព្រះមួយអង្គមែន មែនហើយ ហើយសូម្បីតែផែនដី និងរបស់សព្វសារពើដែលនៅលើផ្ទៃផែនដី មែនហើយ និងចលនារបស់ផែនដី មែនហើយ ព្រមទាំងពិភពទាំងអស់ ដែលធ្វើចលនាតាមទម្រង់ធម្មតារបស់គេ ក៏ធ្វើជាសាក្សីថា មានព្រះបង្កបង្កើតដ៏មហិមាមួយអង្គ » ។១៧
ពេលយើងទទួលស្គាល់ថា យើងគឺជាការបង្កបង្កើតរបស់ព្រះវរបិតាសួគ៌ដ៏ប្រកបដោយព្រះបញ្ញាញាណ និង ការលះបង់ « ចុះ » ហេតុអ្វីបានជាយើងមិនអនុញ្ញាតឲ្យទ្រង់ដឹកនាំភាពរីកចម្រើន និង ការរៀនសូត្រខាងវិញ្ញាណយើង « តាមព្រះហឫទ័យ និងបំណងរបស់ទ្រង់ » ជាជាងតាមបំណងរបស់យើងដូច្នេះ ?១៨
ទ្រង់មានព្រះជន្មរស់ ។ ព្រះយេស៊ូវគ្រីស្ទគឺជាព្រះរាជបុត្រាបង្កើតតែមួយ និង ជាព្រះអង្គប្រោសលោះមនុស្សលោក ។ ដោយសារតែដង្វាយធួនដ៏និរន្តរ៍របស់ព្រះគ្រីស្ទ ទ្រង់មានព្រះបញ្ញាញាណ និង ការត្រាស់ដឹងខ្ពស់ដើម្បីដឹកនាំយើងនៅថ្ងៃចុងក្រោយនេះ ។ យ៉ូសែប ស៊្មីធ គឺជាព្យាការីរបស់ទ្រង់ ដែលត្រូវបានជ្រើសរើសឲ្យស្ដារនគរទ្រង់លើផែនដីនេះឲ្យមានភាពពេញលេញ ។ ថូម៉ាស អេស ម៉នសុន គឺជាព្យាការីកំពុងរស់នៅ និង ជាអ្នកនាំបន្ទូលទ្រង់សព្វថ្ងៃនេះ ។ ខ្ញុំសូមធ្វើសាក្សីដ៏ស្មោះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។