Ke Kapwack ac Lotwelah luhn Nguhnasr

Ke nga mukul fuhsr ah, pahpah ninac kiyuck ah elos eis mwe sang se ma pwacr nuh sin tuhlihk mukul wiyuck David ac nga. Mwe sang sac pa plwet srihsrihk ke atacn plwet kol ma mwet pahluh Joseph Smith el eis sin lihpufacn Moroni. Ke esam luhk uh, oasr sra puk osra 10 kuhtuh ma kahs uh sihmlac kac ke plwet srihsrihk inge. Tuhsruhktuh, tiac sra puk inge pa sruokyac nuhnak lasr ah.

Ke kuht kapwack ah kuht lohng mwe sramsram luhn fohlohkihnyuckyak luhn wosasuc ah. Kuht etuh kac ac on ke U luhn Tuhlihk Srihsrihk ke plwet kol ma ukunyucklac fin inging soko ah ac ituckyang sin lihpufacn Moroni nuh sel Joseph Smith.¹Ke nuhnak luhn nuhnak fuhsr lasr mukwikwiyak, oasr ma se kuht kena yohk in liye: meac sihmlac fin plwet srihsrihk ma siliyucki ke osra in losyuck srihsrihk luo?

Plwet ah oan ke tepuh srihsrihk se ke lwen puhspuhs met liki kena lasr in etuh uh kuhtangkuhtlac. Finne kuht etuh suwohs tuh ma inge tiacna plwet pwacye ma Moroni el sang, kuht kena yohk in liye ip siliyucki sac. Na oruh ke pacl pucspucs, nga mukul wiyuck ah srihke in orekmakihn mitmit in mongo, supun mahtuh, ac kuhtwena ma kuht kuh in nuhnkuh in ikacslah ip siliyucki luhn plwet ah in liye ma oasr kac uh—tuhsruhk tiac fal in tuh kuhnahoslah losyuck srihsrihk kac. Kuht lahlmwetmwet fal in tiac likiyac mwe akihlenyacn orekma suhlalwacl lasr. Ke mwe ahsor ac nuhnak toasr lasr, srihke inge in “srihke ikacslah plwet” uh tiac oreklac.

Nga srackna nihkihn lah meac oasr—fin kuhtwena ma—ukunyucklac ke ip siliyucki sac. Tuhsruhktuh mwe ahsor ke mwe sramsram lasr uh pa ingacn nuh mihsenge, wacngihn etuh luhk ke ma sihmlac ke ip ma kuh in ritiyuck kac. Nga kuh in nuhnkuh muhkwena tuh sihmlac ke sra puk inge mwe sramsram luhn fohlohkihnyuckyak luhn wosasuc uh ac mwe loh luhn Joseph Smith ac mwet loh tolu ac mwet loh alkosr, suc liye plwet na pwacye ma Moroni el sang ah.

E ke Oreklac luhn facluh se inge, Pahpah luhngse Tuhmasr inkuhsrao El use mwe kolyuck, mwet kol, ac mwe luti nuh sin tuhlihk Nahtuhl sin mwet pahluh. Kahs Lal tuh sihmihsyucklac sin mwet pahluh inge ac karihngihnyuckyang ke ma suhmuhslah nuh ke kapwack ac lotwelah lasr. Nephi el ahkuhtweyac ohinge:

“Tuh nguhnihk engan ke ma suhmuhslah, ac insiyuck motko ma inge, ac sihmlac ma inge nuh ke etwacack ac kapkapwack luhn tuhlihk nuhtihk.

“Liye, nguhnihk engan ke ma luhn Leum; ac insiyuck motko pacl nuhkwewa ke ma ma nga liye ac lohng.”²

Oacyacpac, ke fihl in pacl mahtuh ac ke wolacna luhn ohiyacn fihl in pacl sahflah se inge, mempucr nwacsnwacs luhn Alu luhn Leum uh ahkinsewowoyeyuck ke karihngihnyuck luhn Nguhn Muhtahl in weluhlos pacl nuh kwewa, suc kahsruh nuh ke kapwack ac lotwelah luhn nguhnasr.

Ke srihpen oaru luhn tuhlihk mukul wiyuck, nga nuhnkuh yohk lah el riti kahs nuhkwewa ma sihmlac fin plwet srihsrihk ke lohm sin pahpah ninac kiyacsr. Nga, tuhsruhk, tiacna loacng nuh ke ip pwacye ac sacohk inge ac sahyac na orekmakihn kuh luhk in suk ma ma tiacna ahkkahlwemyeyuck nuh sesr.

Ke ohiyac ahsor, kapwack ac lotwelah lasr ke kuhtuh pacl uh kuh in ikolyucki kuh tiac fahsr ke srihpen kena suhfal se in “ikacslah plwet.” Mukwikwi inge kuh in kol kuht in suk ma ma tiac enenuh in etweyuck ke pacl se inge, ac ke pacl se inge pac tiac loacng nuh ke ma pwacye kahto ma oasr kacsr ac ke moul lasr mihsenge—ma pwacye Nephi el sruhmuhn tuh sihmlac in mwe lotwelah ac kahsruh lasr.

Tamuhlwel wiyacl Nephi Jacob el luti, “Liye, yohk ac wolacna orekma luhn Leum. Fuhkah kuh koflah na in sukokyak loaliyacn ma lukmac Lal; ac tiac kuh tuh mwet in konwacack kwewa ohiyac Lal.”³

Kahs lal Jacob luti kuht lah kuht tiac kuh in “srihke ikacslah plwet” in wo kuh orek kuh nuh ke mwe lukmac luhn God in ahkkahlwemyeyuck nuh sesr. Sahyac na, lukmac luhn God uh utuckuh nuh sesr ke kena Lal muhkwena ac ke kuh luhn Nguhn Muhtahl.⁴

Jacob el kalweni:

“Ac wacngihn mwet etuh ke ohiyac Lal ne ke na ahkkahlwemyeyuck nuh sel; ohinge, mwet wiyuck, nikmet koase fwackyuck luhn God.

“Tuh Liye, ke kuh luhn kahs Lal mwet uh tuhkuh nuh fin facluh. … O na, efuh kuh in tiac kuh in sap nuh sin facluh, kuh orekma usrnguck luhn pahol fin facluh, in fal nuh ke luhngse ac pwacr Lal?

“Ohinge, mwet wiyuck, nikmet suk in kai Leum, tuhsruhk in eis kaiyuck ke pahol.”⁵

In kuh in kahlwem ke ma lukmac luhn God, kuh ma suc kuh in kahlwem muhkwena ke fwackyuck uh, kuht enenuh in ukwe srihkasrak lal Nephi, suc fahk, “Arulacna srack fuhsr, ne ohinge yohk pihsac, ac oacyacpac nga kena yohk in etuh ke ma lukmac luhn God, ohinge, nga tuh pruhe nuh sin Leum; ac liye El tuh tuhkuh nuh yuruk, ac tuh ahkfihsracsryelah insiyuck tuh nga tuh luhlahlfongi nohfohn kahs suc sruhmuhnyuck sin pahpah tuhmuhk.”⁶ Leum El sifacna kalweni sruhmuhn lah Nephi el orekmakihn luhlahlfongi, suk pwacye ke inse puhsisacl, ac ahkos masap Lal.⁷

Srihkasrak lal Nephi in suk etwacack uh wiwina (1) kena pwacye, (2) inse puhsisacl, (3) pruhe, (4) luhlahlfongi ke mwet pahluh, ac orekmakihniyacn (5) luhlahlfongi, (6) oaru, ac (7) ahkostwen. Ohiyac se inge in suk uh sienna na pwacye liki “srihke ikacslah plwet” se luhk ah, kuh in srihke in orwaclah in kahlwem ke kuh ma enenuh in fal nuh ke pacl luhn Leum ac ke kuh luhn Nguhn Muhtahl.

Ke pacl ingena uh, kuht muhtwacwacack finsrak muh etwacack uh kuh ac enenuh in eisyuck ke pacl na sa; ke pacl ma etwacack uh tiac fihsrwacsr in etuh kuh in eis, pacl pucspucs kuht tohllah kuh tiac luhlahlfongi kac. Ke srihpen puhkantwen ma etweyuck uh, kuhtuh mwet uh luhlahlfongi ke sie atacn etwaclah ma elos nihkihn lah mwe etuh tuhkuh oyac me, ac elos tiac loacng nuh ke atac ma Leum El akiyac in eis mwe fwackyuck sifacna. Jacob el kuh in sramsram ke pacl lasr uh ke el fahk: “Tuhsruhk liye, mwet Jew elos mwet lihkkeke; ac elos koase kahs kahlwem … ac suk ke ma elos tiac kuh in kahlwem kac. Ohinge, ke srihpen lohsr lalos, suc lohsr tuhkuh ke ngwetlah ahluhkwelah akucl sac, elos enenuh in puhtatlac tuh God El eislah kahlwem Lal luhkwelos, ac sang nuh selos ma pucspucs ma elos tiac kuh in kahlwem kac, ke srihpen kena lalos. Ac ke srihpen elos kena kac God El oraclah ohinge, tuh elos in tikuclkucl.”⁸

Prestuhn Dieter F. Uchtdorf el sang kuhtuh mwe kahsruh ma siena liki ma inge. El sramsram ke misineri, tuhsruhktuh kahs lal uh ma pac nuh sin mwet suk ke ma pwacye nuhkwewa luhn nguhn. “Ke … misineri uh luhlahlfongi ke Jisus Kraist,” el fahk, “elos ac fah luhlahlfongi in Leum yohk in ahkos masap Lal—finne elos tiac kahlwem ke srihpac sac in ahkos an. Luhlahlfongi lalos fah ahkkahlwemyeyuck ke oaru ac ke orekma.”⁹

Ke toeni luhlahp luhn Eprel tari ac, Elder Dallin H. Oaks el sruhmuhn: “Alu uh orekma yohk in ahkkahlwemye ma sihmlac ma oasr sesr, tuhsruhktuh tukun ma nuh kwewa kuht kuh in publishi, oasr kihsensiyuck fihsracsr luhn mempucr lasr ma tiac kuh in topukyucklac ke lutlut. … Kuhtuh ma kuh in etweyucklac ke luhlahlfongi muhkwena.”¹⁰

Mwet Pahluh emet ah elos luti ip yohk se inge pac, ahkkahlwemye lah ohiyacn mwet facluh uh tiacna eklac na lah atacn Leum ke luti uh oacna sie ke kuhtwena pacl. Nuhnkuh ke fahk soko ke Wuhlweacng Mahtuh inge: “Lulalfongi Leum God ke insiom kewa. Nimet lulalfongi etu lom sifacna.”¹¹

Isaiah el ahkuhtweyac, sramsram ahol Leum “Oana ke kusrao arulana fulat liki faclu, ouinge inkanek luk fulat liki inkanek lowos, Ac nunak luk liki nunak lowos.”¹²

Nephi el sang pac mwe loh sahyac ke el fahkwack, “O Leum, nga luhlahlfongi Kom, ac nga ac fah luhlahlfongi Kom ne tok ma pahtpaht.”¹³

Luhlahlfongi ke Leum uh enenuh kuht in akihlen lah lahlmwetmwet Lal uh yohk liki ma lasr. Kuht enenuh pac in akihlen lah plwacn Lal uh use nuh sesr kuh yohk emet nuh ke kapwack ac lotwelah ke nguhn uh.

Tiacna enenweyuck kuht in oasr “etuh suwos se ke ma uh” ke moul se inge. Tuhsruhk, kuht enenuh in “finsrak nuh ke ma suc tiacna liyeyuck, suc pwacye.”¹⁴

Finne ke luhlahlfongi yohk lal Nephi, el akihlen kahlwem tiac suwos lal ke el topuk lihpufacn se suc siyuck sel, “Yac kom etuh ke puhsisacl luhn God?” Nephi el topuk, “Nga etuh lah El luhngse tuhlihk nahtuhl; ne ohinge, nga tiac etuh kalmeyacn ma inge nuhkwewa.”¹⁵

Oacpacna, Alma el sruhmuhn nuh sin tuhlihk nahtuhl Helaman, “Inge ma lukmac inge soenna ahkkahlwemyeyuck nohfohn nuh sihk; ke ma inge nga fah tiac fahkwack kac.”¹⁶

Nga fahkwack mwe loh luhk lah Pahpah tuhmasr Inkuhsrao El luhngse tuhlihk Nahtuhl, ac finne ohinge, oacna Nephi ac Alma, nga tiac etuh kalmeyacn ma nuhkwewa. Ac nga tiac enenuh in etuh ma nuhkwewa; “ngapac fah tiac fahkwack kac” ac sano ke mong fihsrwacsr ke Leum, etuh na lah “oasr ma nuhkwewa yuruk in oacna sie luhlahlfongi kuh lah ma inge pwacye; ac oacyacpac oasr yurum ma nuhkwewa in oacna sie luhlahlfongi kuh nuh sum lah ma inge pwacye. …

“… Ma suhmuhslah uh likiyucki ye motom, ahok, ac ma inge nuhkwewa fahk lah oasr sie God; ahok, finne facluh, ac ma nuhkwewa ma oasr fin facluh, ahok, ac srihpac la, ahok, ac oacyacpac facl nuhkwewa ma mukwi ke ohiyac fal la in ahkpwacyeiye lah oasr sie Mwet Oraclah Fuhlwactlacna.”¹⁷

Ke kuht akihlen lah kuht oreklac sin Pahpah lahlmwetmwet ac oaru Inkuhsrao, “O na,” efuh tiac lwelah El in kol kapwack ac lotwelah luhn nguhn lasr “in fal nuh ke luhngse ac pwacr Lal” likina lasr sifacna?¹⁸

El moul. Jisus Kraist el Wen Sefanna Nahtuhl ac Mwet Molwelah luhn mwet uh. Ke srihpen Iwaclah suwohs luhn Kraist, oasr lahlmwetmwet ac liye suwohs Lal in kol kuht ke lwen sahflah inge. Joseph Smith el mwet pahluh Lal, suleyucklac in fohlohkohnwack tohkohsrahi Lal nohfohn fin facluh uh. Thomas S. Monson el mwet pahluh moul ac mwet sramsram Lal mihsenge. Ke ma inge nga fahk mwe loh luhk ke inen Jisus Kraist, amen.