Ong Atail Keirdahn Palingehn oh Kamarain

Ni ei kisin pwutak o, ahi nohno oh pahpa alehdi kisakis ieu me inenen kaperenihda ngehi oh David riei pwutak tikitiko. Kisakiso wia kamwohmwdahn pileit kohl me Soukohp Joseph Smith alehdihsang tohnleng Moronio. I taman me nan pileit ko mie teh me mete eisek samwa me lepin lokaia kei ntingdi powe. Ahpw, kaidehn teh ko me karehda aht tehkada wasa.

Se epwelda ni kin rongorong koasoaiepen Kopwurpwurdohu. Se ese oh kin koulki nan Primary duwen pileit kohl ko me nekinekdi wasa rir en palio nahnao oh tohnleng Moroni eri kapwuredohng Joseph Smith.¹ Uwen lauden aht men esehla, soahng ehu me se udahn men kilang: dahme ntingdier pohn kisin wasa kis ni pileit ko me kisin mehn kateng tikitik riau katengepeneo?

Pileit ko mihmihki pohn imwin tehpel ieu rahn ekeimwohn aht men esedahro eh kipeikitedier kouahlap. Tehn se wehwehki mwahu me pileit pwukat kaidehn udahn pileit me Moroni wadohro, se men kilang wasa katengtengdio. Pak tohto, ngehi oh riei pwutako song doadoahngki kisin naip en leke pwete, supwuhn tok kei, oh soahng teikan me se kak medewehda pwe sen pwisikpeseng wasa katengpeneo pwe sen kak maur kilang dahme mi loale--ahpw sohte itar pwisikpeseng kisin mehn katengteng ko. Se mwur ekiste kak sohte kihdi lihpw ehu en aht lamalam keper en kisin pwutak. Pwehki aht nsensuwed oh pwunod, song “pwisikpeseng pileit ko” kalap sohte pweida.

I saikinte ese dah---ma mie mehkot---me ekiekla pahn wasa katengpeneo. Ahpw wasa kansensuwed en aht soai et iei me lelodo rahnwet, I sohte ese dahme ntingdieng pohn teh me pleit ko me kak wadawad ada. I kakete lemehieg me teh pwukat audaudkihda soai kei me pid Kapwurpwurdohu oh ahn Joseph Smith kadehde oh Soun kadehde Silimen oh Welimen ko, me kilangidi udahn pleit me Moroni kapwurehdo ko.

Sangete ni Kepikpikdahn sampah wet, Samatail Nanleng limpoako ketin ketikidohr ahl, koasoandi, oh kaweid ong Sapwellimahr seri kan sang rehn irail soukohp kan. Sapwellimahr mahsen kan pekederdohr sang rehn soukohp pwukat oh ahpw nekineklahr pwehn wia iren pwuhk sarawi ong atail keirda oh kamarain. Nephi kawehwedahr ni soangen mwohmw wet:

“Pwe palingeni pohlekihda iren pwuhk sarawi kan, oh mohngiongi kin doudouloale irail, oh ntingihraidi ong mehn kasukuhl oh kapai en nei seri kan.

“Kilang, ngeniet perenkihda soahng kan me pid Kauno; oh mohngiongi kin poaden medemedewe soahng kan me I kilangehr oh rongehr.”²

Ien pil kapatahieng, nan irair en ansou ko me nekier oh nan keimwseklahn dakehn irair en ansou unsek wet, Sapwellimen Koht tohn mwomwohdiso me warohng kan alehdier kapai en werek poatoapoat en Ngehn Sarawio, me kin ketin sewese atail keirdahn palingehn oh kamarain.

Wehwehki uwen ngoang me riei me tikitiko ahneki, I kasik me e wadekehr mahsen koaros me ntingdiengehr pohn pileit me mih nan imwen aht pahpao oh nohnohu. Ngehi, uhd, sohla tehk soahng me mehlel oh kesemwpwal ko oh ihte I uhd weikengkihla ei raparapahki soahng kan me sohte konehng kasansalda.

Me kapahtouo, atail keirda oh marain ekei ansou kakete luwetala de pil uhdi sang ni anahn me sohte konehng en“pwisikpeseng pileit ko.” Mwekid pwukat kak elehiong kitail en rapahki soahng teikan me sohte konehng sansalada ansou wet, ni ansouohte popounsehse lingan me mehlel kan me konehng kitail oh atail irair kan --- mehlel kan me Nephi kawehwedahr ni duwen me ntingdier ong atail kamarain oh kapai.

Jacob rien Nephio padahngki: “Kilang, Sapwellimen Kauno doadoahk kan me kouahlap oh koapwuriamwei. Uwen eh apwal ropada loal en manaman akan me pid ih; oh e apwal aramas en uhdahn wehwehkihla kupwure kan.”³

Ahn Jacob koasoai ko padahngki me kitail sohte kak “mwasahn audepen pileit ko” de ngihtehteieng manaman kan en Kauno en kasansal ong kitail. Ihte, manaman akan en Kauno pahn kin kasansalohng kitail ni duwen Kupwure oh sang ni manaman en Ngehn Sarawi.⁴

Jacob pousehlahte:

“Oh sohte aramas ese kupwure kan ihte ma e kasansaldohng ih; eri, riei ko, dehr kasohwe kaudiahl kan en Koht.

“Pwe kilang, sang ni manaman en sapwellime mahsen me kitail kohkihdo pohn sampah... Oh eri, dahme e sohte kak ketin ruwesehki sampah, de lipwen ni lime kan pohn sampah en sansal, ni duwen sapwellime manaman oh kupwur?

“Eri, riei ko, kedeh kadeik Kauno, ahpw ale kaweid sang ni lime.”⁵

Pwe kitail en kak wehwehkihla manaman kan en Kauno, de kan me kak sansal ihte sang ni kaudial, kitail anahne idawehn ahn Nephi karasaras, me koasoaia, “ Sang ni ei inenen pwulopwul douluhl, ahpw paliwar laud, oh pil ahneki anahn laud kan en esehla duwen me rir kan en Koht. eri, I ahpw lukweriong Kauno; oh e pil ketin pwarohngie oh ketin kamatarakala mohngiongi pwe I en kamehlele koasoai koaros me ahi pahpao koasoaiahier.”⁶ Pein Kauno pil ketin kawehwehda me Nephi doadoahngki pwoson, rapahki ni ngoang mohngiong karakarahk, oh kolokolete Sapwellim kosonned akan.⁷

Ahn Nephi karasaras en rapahki kamarain me audaudki (1) ineng mehlel, (2)  karakarahk, (3)  kapakap, (4)  kopworopworki soukohp, oh doadoahngki (5)  pwoson, (6)  ngoang oh (7)  peik. Wiepen ropirop wet wekisang mehlel ahi song “pwisikada udepen pleit ko,” de song wehwehkihla soang kan me konehng kapwarpwarda ni duwen sapwellien Kauno kosondi oh sang ni manaman en Ngehn Sarawi.

Nan mwehi kapw wet, kitail kasik me marain kak oh uhdahn pahn alahldi mwadang; ni ansou me iren kepehse kan sohte kin mengein sansalada de alahldi, e kin mengein manoknokla de sohla kopworopworpe. Pwehki eh tohto soangoasoangen iren sawas, ekei sohte kin dehde ahpw kin utungada dahme dierekdahr me sansal mendahte ma e kapwonopwon wasa e tepisangie sang arail kopworopworki sapwellimen Kauno wiepen alehdi pein ahn aramas kaudiahl. Jacob mwein kaukawehwe kitail ansou ni eh kosoia: “Eri Kilang, irail aramas keptakai kei; oh re kasohwe koasoai me sansal mwahu akan ... oh kin rapahki me irail sohte kak wehwehki kan. Eri, pwehki arail masukun, ni duwen arail maskunkihla raprapahki idin dahme sansalo, re udahn sohte pahn kak diarada; pwe Kauno ketkihsang irail sapwellime soahng kan me sansalehr, oh apw ketikihong irail soahng tohto me kapwonopwon, pwe iei met me re inengieng en me.”⁸

Me wekisang iei ahn President Dieter  F. Utchdorf kaweid. E koasoaia duwen misineri kan, ahpw ah koasoai ko pil dokehte koaros me kin rapahki mehlel en palingehn. “ Ansou...me misineri kan ahneki pwoson rehn Sises Krais,” he doula, “re pahn kopworopworki Kauno oh idawehn Sapwelime kosonned akan---mendahte arail sohte nohn wehweki kahrepe kan ong irail. Arail pwoson pahn kalaudla sang ni ahl mpahi oh sang ni doadoahk.”⁹

Nan Kapokon Lap en nan Epreilo, Elder Dallin H. Oaks kawehweda: “ Mwomwohdisoht wiewia ah kak koaros en kaselehda soahng koaros ni sansal sang ni soahng k moaros me ntingdier me se kolokol, ahpw mendahte uwen me kitail kak wiahda, neitail souleng kan kin ekei pak peidengki songen peidek kan me sohte kak epwella sang ni ropirop… Soahng kei aramas kak esehla sang ni pwoson.”¹⁰

Soukohp en mahsoko padahngkiher soangen koasondi mehlel wet, me kasalehdahr me sangete mahs mour en aramas saik wekidekla oh me Sapwellimen Kauno kosondi ong kamarain kesempwal nan ehu ehu ansou. Medewe lepin padahk en Kadehde Mering wet: “Likih Kauno ni mohngiongimw unsek; oh dehr kopworopworki mehkan me ke pein lemeleme me ke ese.” ¹¹

Aisea kawehwehda, ni eh koasoakoasoaiki Kauno, “Pwe duwen nanleng eh ileilesang sampah, iei duwen kupwurei oh wiewia kan arail ileilehsang amwail wiewia kan, oh ahi madamadau ileilehsang amwail madmadau kan.”¹²

Nephi kapatahieng pil ehu kadehde ni eh kalohki, “O Kaun, I kin likih komwi, oh I pahn likih komwi kohkohlahte.”¹³

Pwoson oh kopworopworki Kauno kin anahne kitail en kin pohnese me Sapwellime erepit inenen laud sang atail. Kitail udahn pahn pil pohnese me Sapwellime kosondi me kin keieu elehda keirda laud en palingehn oh kamarain.

Kitail sohte kin kasik kitail en “wehwehki mwahu soahng kan” nan mour wet. Ahpw, mie kesikpen kitail en “kopworopworki soahng kan me sohte sansal, me mehlel.”¹⁴

Mendahte en Nephi pwoson laudo, e wehwehki sohte itar en ah marain ni eh sapeng tohnlengo me kalelapak reh, “Ke wehwehki Koht eh ketin ereki mehkoaros?” Nephi sapengki, “I ese me e ketin poakohng sapwellime seri kan; ahpw, I sohte ese wehwehn soahng koaros.””¹⁵

Duwehtehte, Alma kawehwehieng nah pwutak Helaman, “ Ansouet soahng pwukat saikinte wehwehiengie ni unsek; kahrehda I pahn uhdi wasaht.”¹⁶

I kasalehda ahi kadehde me Samatail nanleng poakong sapwelime seri kan, oh, duwehte Nephi oh Alma, I sohte ese wehwehn soahng koaros. De me I anahne ese soahng koaros; I pil iang pwilikihdi oh awiawih ni meleilei Kauno, ni ei esehier “Mie rehi soahng koaros me I anahne me I wiahki ahi kadehde me mepwukat me mehlel; oh pil mie rehmwail soahng koaros me pahn kadehdehieng kumwail me irail mehlel. …

“... Pwuhk Sarawi kan kohieng kumwailehr, ei, oh soahng koaros kadehdehda me mie Koht; ei, duwehte sampah, oh soahng koaros me mih powe, ei, oh ah mwekid, ei, oh pil sampah kan koaros me kin mwekid ni pein mwomwerail kadehdehda me mie emen Soun Kepikipik me ileile mehlel.”¹⁷

Ni atail kin kapingki me kitail wia kapikipik en emen Sahm Nanleng me ketin erepit oh loaloapwoat, “O eri,” kitail seu peki Reh en ketin kaweid atail keirdahn palingehn oh kamarain “ni duwen pein kupwure oh popohl” a kaidehn pein atail?¹⁸

E ketin ieias. Sises Krais iei Sapwellimahr Iehros oh Soundor en aramas. Pwehki Sapwellimen Krais Tomw poatoapoato, E sapwellimaniki eripit oh kairoir mehn kaweid kitail nan keimwseklahn rahn pwukat. Joseph Smith iei Sapwellime soukohp, pilipildahr en kapwurehdo Sapwellim wehio pohn sampah ni unsek. Thomas  S. Monson iei Sapwellime soukohp ieias oh uhneipwa rahnwet. Sang ni met I wia ahi kadehde mehlel ni mwaren Sises Krais, amen