Mo Lo Tatou Alualu i Luma ma le Aoaoina Faaleagaga

A o ou tama talavou, sa maua e ou matua se meaalofa lea sa matagofie i lou uso laitiiti o Tavita ma au. O le meaalofa o se faatusa laitiiti o papatusi auro na maua e le Perofeta o Iosefa Samita mai le agelu o Moronae. Ou te manatua, sa i ai i papatusi faatusa o itulau uamea e 10 pe a ma upu o loo tusia ai. Peitai, e le o itulau na sa ma gauai atu i ai.

A o ma tuputupu ae sa ma faalogo e uiga i le Toefuataiga. Sa ma iloa ma pepese i le Peraimeri e uiga i papatusi auro sa natia loloto i se mauga ma sa tuuina mai e le agelu o Moronae ia Iosefa Samita.¹ A o faateleina lo ma fia iloa [e uiga i nei papatusi], e tasi lava le mea sa ma fia vaai moni i ai: o a mea sa tusia i le vaega laitiiti o papatusi faatusa sa malupuipuia le faamaufaailogaina i noataga uamea laiti e lua?

Sa i ai papatusi i se laulau laitiiti [i lo matou fale] mo ni nai aso ao lei faamalosia i maua e fai se mea i lo ma fia iloa. E ui sa ma malamalama lelei e le o papatusi tonu ia na tuuina mai e Moronae, sa ma mananao e vaai i vaega na faamaufaailogaina. O lea i nisi taimi, sa ma taumafai ai ma lou uso e tatala e faaoga ai naifi faapata [falaoa], sipuni tuai, ma soo se mea sa ma mafaufau ai e tatala ai vaega na faamaufaailogaina o papatusi ia tau lava ia vaai i mea o loo i ai—ae ia le tele tele e gaui ai noataga laiti. Sa ma popoto tele ina ia le tuua se faailoga o mea sa ma faia e fa’amalie ai lo ma fia iloa. I le ma le fiafia ma le ita, o nei taumafaiga o le “fia iloaina ia papatusi” sa le manuia i taimi uma.

Ou te lei iloa po o le a—pe o i ai se mea—sa natia i lalo o lena vaega na faamaufaailogaina. Ae o le vaega maasiasi o la maua tala, e oo mai i le aso, ou te leiloa po o a mea na tusia i luga o vaega o itulau uamea lea sa tatau ona faitauina. E na o le mafai ona ou mafaufau, o nei itulau o loo i ai tala o le Toefuataiga ma le molimau a Iosefa Samita ma Mau a Molimau e Toatolu ma le Toavalu, o e na vaai moni i papatusi na tuuina mai e Moronae.

Talu mai le Foafoaga o lenei lalolagi, ua saunia e lo tatou Tama oi le Lagi alofa le taiala, taitaiga, ma le faatonuga i Lana fanau e ala i perofeta. O Ana afioga ua faamaumauina e nei perofeta ma ua puipuia o ni tusitusiga paia mo lo tatou alualu i luma ma le aoaoina. Sa faamatalaina e Nifae i le ala lenei:

“Ona ua fiafia lou agaga i tusitusiga paia, ma ua manatunatu loloto i ai lou loto, ma ua ou tusia mo le aoaoga ma le manuia o a’u fanau.

“Faauta, ua fiafia lo’u agaga i mea a le Alii; ma ua manatunatu loloto pea lo’u loto i mea sa ou vaaia ma faalogoina.”²

E le gata i lea, i le taimi o tisipenisione ua tuanai ma i lenei tisipenisione mulimuli o le atoaga o taimi, ua faamanuiaina tagata agavaa o le Ekalesia a le Alii i le mafutaga a le Agaga Paia, o loo fesoasoani i lo tatou alualu i luma faaleagaga ma le aoaoina.

O le iloaina o le natura filiga o lou uso laitiiti, ou te masalo sa ia faitauina uma upu sa tusia i luga o le papatusi faatusa i le fale a o maua matua. E ui i lea, o au, sa ou le amanaiaina na upumoni manino ma pele ae tuu atu lau taumafaiga e saili mo na mea sa lei faaali mai.

E faanoanoa ai, o lo tatou alualu i luma ma le aoaoina e mafai i nisi taimi ona faatelegese po o le taofia foi e se manao le talafeagai e “fia iloaina ia papatusi.” O nei faatinoga e mafai ona taitai atu i tatou e saili i mea e le manaomia ona malamalama i ai i lenei taimi, i le taimi lava e tasi o loo faatuatuana’i upumoni matagofie e tatau mo i tatou ma o tatou tulaga—o upumoni na faamatalaina e Nifae ua tusia mo lo tatou aoaoina ma le manuia.

Sa aoao mai Iakopo le uso o Nifae: “Faauta, ua silisili ma ofoofogia galuega a le Alii. Ua le masuesueina lava le loloto o ana mealilo; ma e le mafai e le tagata ona iloa ona ala uma.”³

Ua aoao mai e upu a Iakopo e le mafai ona tatou faamanuiaina e “fia iloaina ia papatusi” pe faamalosia le faaali mai ia i tatou o mealilo a le Atua. Nai lo lena, ua na o Lona finagalo ma e ala i le mana o le Agaga Paia o le a tatala mai ai mealilo a le Atua ia i tatou.⁴

Ua faaauau e Iakopo:

“Ma e leai se tasi na te iloa ona ala vagana ai ua faaalia ia te ia; o le mea lea, uso e, aua le inoino i faaaliga a le Atua.

“Aua faauta, o le mana o lana fetalaiga na sau ai le tagata i luga o le lalolagi. … O lea la, aisea e le mafai ai ona poloai atu i le lalolagi, po o galuega a ona aao i luga o le lalolagi, e tusa ma lona loto ma lona finagalo?

“O le mea lea, uso e, aua tou te saili e fautuaina le Alii, a ia outou talia fautuaga mai lona aao.”⁵

Ina ia malamalama i mealilo a le Atua, po o na mea e na o faaaliga e mafai ona malamalama ai, e tatau ona tatou mulimuli i le faataitaiga a Nifae, o le na faapea mai, “Ona sa ou talavou lava, e ui i lea sa ou tino ese, ma sa ia te a’u foi le naunau tele e fia iloa mealilo a le Atua, o le mea lea, na ou tagi atu ai i le Alii; ma faauta sa asiasi mai o ia ia te a’u, ma faamaluluina lo’u loto, o le mea lea na ou talitonu ai i upu uma na tautalaina e lo’u tama.”⁶ O le Alii Lava Ia na faamalamalama atili sa faatino e Nifae le faatuatua, saili ma le filiga ma le maualalo o le loto, ma tausi Ana poloaiga.⁷

O le faataitaiga a Nifae o le sailia o le malamalama e aofia ai (1) se manao faamaoni, (2) lotomaualalo, (3) tatalo, (4) faalagolago i le perofeta, ma se faatinoga o le (5) faatuatua, (6) filiga, ma le (7) usiusitai. O lenei auala o le sailia o loo i ai se eseesega tele i lou “fia iloaina o papatusi” po o le taumafai e faamalosia se malamalamaaga o mea e faaali mai e tusa ma le taimi a le Alii ma e ala i le mana o le Agaga Paia.

I lenei vaitau o aso nei, ua tatou faamoemoe e mafai ma e tatau lava ona vave ona maua le malamalama; pe a le faigofie le iloaina po o le mauaina o faamatalaga, e masani lava ona le amanaiaina pe le talitonuina. Ona o le anoanoai o faamatalaga, o nisi e aunoa ma le iloaina e mafaufau e sili atu ona talafeagai punaoa o loo mauaina [o faamatalaga] e ona le afuaga e lemailoa i lo le faalagolago i le mamanu ua faatulagaina a le Alii mo le mauaina o faaaliga faaletagata lava ia. E mafai ona faamatalaina e Iakopo lo tatou vaitaimi ina ua ia faapea mai: “Ae faauta, sa [latou] ua maaa; ma sa latou inoino i upu manino … ma saili mo mea sa le mafai ona latou malamalama i ai. O le mea lea, ona o lo latou tauaso, o se tauaso na oo mai i le latou vaai i tala atu o le faailoga, o lea o le a latou pauu ai; ona ua aveese e le Atua lana manino mai ia te i latou, ma tuu atu ia te i latou le tele o mea e le mafai ona latou malamalama i ai, ona sa latou mananao i ai.”⁸

I se faatusatusaga o le fautuaga lenei a Peresitene Dieter F. Uchtdorf. Sa ia saunoa e uiga i faifeautalai, ae o ana upu e tutusa le faatatau i tagata sailiili o le upumoni faaleagaga. “Pe a … maua e faifeautalai le faatuatua ia Iesu Keriso,” sa ia fai mai, “o le a latou faatuatuaina le Alii e mulimuli ai i Ana poloaiga—e tusa pe latou te le malamalama atoatoa i mafuaaga mo [na poloaiga]. O le a faailoa mai lo latou faatuatua e ala i le filiga ma e ala i le galuega.”⁹

I le taimi o le konafesi aoao ua tuanai ia Aperila, sa faamatala mai e Elder Dallin H. Oaks: “O loo faia e le Ekalesia ni taumafaiga tele ina ia faamaoni ia faamaumauga uma o i ai ia i tatou, ae i le uma ai ona tatou faia o mea uma e mafai ona tatou lolomiina, e tuua ai lava o tatou tagata o le ekalesia i nisi taimi ma ni fesili autu e le mafai ona taliina e suesuega. … O nisi mea e na o le faatuatua e mafai ona aoaoina ai.”¹⁰

Sa aoao mai e perofeta o anamua lenei mataupu faavae e tasi, ma taua i le aluga o le taimi e le suia le natura o le tagata ma e aoga le mamanu a le Alii mo le aoaoina i vaitau o taimi uma. Mafaufau i lenei faataoto o le Feagaiga Tuai: “Ia e faatuatua ia Ieova ma lou loto atoa; a e aua le faalagolago i lou lava atamai.”¹¹

Sa faamatala mai e Isaia, i le saunoa ai mo le Alii, “Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu.”¹²

Sa faaopoopo e Nifae le isi molimau ina ua ia taua, “Le Alii e, ua ou faalagolago ia te oe, ma o le a ou faalagolago pea ia te oe e faavavau.”¹³

O le faatuatua ma le faalagolago i le Alii e manaomia ai ona tatou faailoa atu o Lona atamai e sili atu i lo tatou lava atamai. E tatau foi ona tatou faailoa atu o Lona fuafuaga ua tuuina mai ai le gafatia silisili mo le alualu i luma ma le aoaoina faaleagaga.

Sa lei faamoemoe lava tatou te “maua lea o se malamalama atoatoa i mea” i lenei olaga faaletino. I lo lena, ua faamoemoeina i tatou e “faamoemoe mo mea e le vaaia, a e moni.”¹⁴

E oo lava i le faatuatua maoae o Nifae, sa ia faailoa mai lona malamalama tapulaa ina ua tali atu i le agelu o le na fesili ia te ia, “Pe ua e iloa ea le faamaualalo o le Atua?” Sa tali Nifae, “Ua ou iloa e alofa o ia i ana fanau; e ui i lea, ou te le iloa le uiga o mea uma.”¹⁵

E faapena foi, sa faailoa atu e Alema i lona atalii o Helamana, “O lenei o nei mea lilo e lei faailoa atoatoa mai ia ia te au i le taimi nei; o lea o le a ou taofia ai.”¹⁶

Ou te tuuina atu lou molimau e alofa le Tama oi le Lagi i Lana fanau, ma e ui, e pei o Nifae ma Alema, ou te le iloa le uiga o mea uma. Ou te le manaomia foi le iloa o mea uma; O au foi o le a aloese le talanoa i ai ma faatalitali ma le onosai i le Alii, ma le iloaina “Ua ia te au mea uma o se molimau ua moni nei mea; ma ua ia te oe foi mea uma o se molimau ia te oe ua moni i latou. …

“… Ua folasia i ou luma tusitusiga paia, ioe, ma ua faailoa mai i mea uma o loo i ai se Atua; ioe, e oo i le lalolagi, ma mea uma ua i ona luga, ioe, ma lona faataamilosaga, ioe, ma paneta uma foi o loo i o latou ala masani ai ua molimau mai o loo i ai se Foafoa Silisiliese.”¹⁷

Ao tatou faailoa atu o i tatou o foafoaga o se Tama oi le Lagi atamai ma tuuto, “O le mea lea,” aisea e le faataga ai o Ia e taitaia lo tatou alualu i luma ma le aoaoina faaleagaga “e tusa ma lona loto ma lona finagalo” nai lo tatou lava [loto]?¹⁸

O loo soifua o Ia. O Iesu Keriso o Lona Alo Pele e Toatasi na Fanaua ma o le Togiola o tagata uma. Ona o le Togiola le iu a Keriso, ua ia te Ia le malamalama ma le muai silafia e taitaia ai i tatou i nei aso e gata ai. O Iosefa Samita o Lana perofeta, sa filifilia e toefuatai mai Lona malo i le lalolagi i lona atoaga. O Thomas S. Monson o Lona perofeta ma le failauga i le aso. O lenei ou te molimau faamaoni atu ai i le suafa o Iesu Keriso, amene.