Eruanuen Sassar, ewe Saingon Asam
Kot epwe ngeni niwinin ir ekkewe mi kutta i, iwe mi namwot sipwe sopweno ne fichifich. Fefinei kana, ousap fangeta. Kutta Kot ren unusen netipemi.
Fefinei kana, pwan chienach kewe mi achengicheng sia fokkun feioch ne chusefan non ei mwichenap fan aurouren me emweneien ach soufos achengicheng me Preseten, Thomas S. Monson. Preseten, am mi tongeok me me etiwok non wisom! Am mi sinei pwe ka tongei ekkana fefin an ewe Mwichefen.
Ua men pwapwaiti ai tufichin fiti ei kinikinin ewe mwichenapen mwichefen fan iten ekkewe fefin non ewe Mwichefen.
Fefinei, nupwen ua nonnom remi, ua sou ekieki usun ekkewe fefin mi efeiochuei non manauei: inen inei me inei we, ir ekkewe ra aewin etiwa ewe tingor ne feito me kuna met usun ewe Mwichefen.1 Pwan punuwei, Harriet, ewe ua poputa ne tongei nupwen ua keran kuna i. Pwan inan Harriet, ewe a fiti ewe Mwichefen ekis fansoun mwirin punuan a mano ren semwenin kanser. Me pwan fefinei, nei we nengin, noun nei we, me noun noun nei we—ir meinisin mi fen ennetin efeiochuei. Ra ennetin awora saram non manauei. Ra esenipato ai winiti emon mwan murino me pwan anapano ai kirokiroch non wisei non ewe Mwichefen. Ennet manauei epwe fokkun sokono ika use sineir!
Nge met mi fokkun amwarar ngeniei pwe ar sokkun aninis mi chok pwan fis fan fitu minion non ewe Mwichefen me ren ewe tufich, nipwakoch, mirit me kapasen pwarata an fefin mi nuku usun chok ami.
Iei, ekkoch me neimi ousap mefi pwe oua nimenimoch pwe sipwe ingeitikemi iei usun. Naman oua ekikei pwe ami tufichin anisi aramas mi chok kukkun. Naman ouse ekieki pwe ami mi “fefin mi nuku” pokiten fan ekkoch oua osukosuk ren ami tipemwaramwar me nuokus.
Ikenei, ua mochen kapas ngeni ami meinisin mi fen mefi iei usun—me naman kich meinisin mi mefi iei usun fan ekkoch. Ua mochen kapas usun nuku—met wewen nuku, met nuku a tongeni fori me met ese tongeni fori, me met sipwe fori pwe sipwe anganga ewe manamanen nuku non manauach.
Met Wewen Nuku
Nuku a wewen pwe sia pochokun non eu mettoch sia nuku non—a fokkun watte ach nuku pwe a esenipato ach mochen fori mettoch sisap fori ika ese wor ach nuku. “Iei wewen nuku, pwe sipwe fakkun achifoua minne sia epinukunuku, pwan ekkewe mettoch sise tongeni kuna.”2
Chon nukuchar mi weweiti wewen nuku, nge fan chommong chon rese nuku rese weweiti. Ra uchuki mokurer me ra kapas eis, “Ifa usun emon a tongeni sinei usun met rese tongeni kuna?” Me rer, ra ekieki pwe ei a pwarata pwe namanam ese weweoch.
Nge met rese weweiti pwe mi pwan wor och tufichin kuna mettoch esap chok ren mesach, a wor tufichin mefi mettoch esap chok ren pouch, me pwan och tufichin rongorong mettoch esap chok ren seningach.
A usun chok porausen emon kukkun nengin mi fetan ren inenapan. Ewe kukkun nengin a fokkun sani ekkewe konun ekkewe machang, me a esina ekkewe mettoch a rongorong ngeni inenapan.
“En mi rong ena?” ewe kukkun nengin a kapas eis fan chommong. Nge mi pung seningan inanapan me ese tongeni rongorong.
Mwirn, ewe chinap a fotupukutiw me a apasa, “Omusano, nei achengicheing. Mi pung seningan mama chi.”
Ewe kukkun nengin a osukosuk me a komoch mesan inanapan ren poun kewe, me a nenong non mesan, me a apasa, “Mama chi, achocho ne ausening!”
Mi wor och nesen seni ei tutunap minne chon rese nuku me chon nuku mi tongeni keao. Pokiten sise tongeni rongorong och mettoch ese wewen pwe ese wor met sia tongeni rongorong. Ruemon aramas mi tongeni ausening ngeni och poraus are anneani pukfel, me emon mi tongeni mefi ewe Ngun mi Fel, me ewe emon ese.
Nge, non ach achocho ne anisi ekkewe aramas sia tongei ar repwe mefi ewe Ngun mi Fel me kuna ningochun ewe kapas allimin Jises Kraist ese much, naman ach erenir ar repwe “achocho ne ausening” esap ewe sokkun kapas epwe anisir.
Naman epwe fen och—ika emon a mochen anapano an nuku—epwe siwini ifa usun a ausening. Ewe Apostel Paul a pesei ngenikich pwe sipwe kuta ewe mongungu mi kapas ngeni ngunuch esap chok seningach. A aiti pwe, “Ion esemo angei ewe Ngunupin, iwe esap tongeni angei ekkewe niffang ra feito seni ewe Ngunun God. Ei sokkun aramas ese tongeni weweitir, ese wor namwoter ngeni i, pun aramas ra tongeni weweiti namwoter seni chok ewe Ngunupin.”3 Are sipwe ekieki usun ekkewe kapasen Saint-Exupéry’s Little Prince a apasa: “Sipwe kunaoch ren netipach chok. Ekkewe mettoch mi auchea sisap tongeni kuna ren mesach.”4
Ewe Manaman me Tufichin Nuku
Fan ekkoch ese mecheres ne awatteno ach nuku non mettochun ngun nupwen sia manau won ei fonufan. Nge sipwe feioch ika sia achocho, pokiten ewe manamanen nuku mi tongeni ennetin efeiochu manauach. Ekkewe pukfel ra aitikich pwe me ren nuku ewe fonufan a forata, ewe sat a imufessen, ekkewe mi mano mi manausefan, me chonupupu me chuuk mi mwokut seni nenier.5
Ekkoch repwe kapas eis, “Ika nuku mi kon manaman, pwata use tongeni angei punuen ai ennetin iotek? Use mochen pwe ewe sat epwe imufessen are pwe eu chuuk epwe mokut. Ua chok mochen chikar seni ai semwen are pwe semei me inei repwe omusomus fengen, are ua mochen pwe punuei ese much epwe pwato non ewe asam ren pon ira me pwan efou ringin apupunu. Pwata ai nuku ese tongeni fori ekkei mettoch?”
Nuku mi manaman, me fan chommong a efisata manaman. Nge ese nifinifin ifa ukukkun watten ach nuku, mi wor ru mettoch nuku ese tongeni fori. Ren eu, ese tongeni epeti an emon pungen finata.
Emon fefin a iotek ren fitu ier pwe noun nengin mi nukumach epwe niwin ngeni ewe Mwichefenin Kraist me a netipingau pwe an kewe iotek rese ponu. A fokkun weires pokiten a fen rong usun porausen semirit mi monucheno minne ra aier seni met ra fori.
Ewe osukosuk ese fis pokiten ese naf an kewe iotek are ese naf an nuku. Nge a namwot epwe weweiti pwe, inamo pwe a weires ngeni Semach won Nang, Esap echimwa emon ne finata ewe annen tupwen. Ika non ewe manau mwen ach uputiw Kot echimwa Noun kewe ar repwe tapweno mwirin I iwe ennet esap echimwa kich iei non manauach won fonufan.
Kot epwe pesei, ika achocho ne pesei kich. Kot epwe nikitu ne ngeni kich tong me mirit me kapasen pesepes. Nge Kot esap echimwa kich—ena epwe osukosuka An kokkot pwe sipwe mamarita feinfeino.
Ewe oruan mettoch nuku ese tongeni fori pwe ese tongeni echimwa Kot ne fori met sia mochen. Sise tongeni echimwa I ne fori met sia mochen—ese nifinifin ika sia ekieki pwe kich mi pung are ika sia ennetin iotek. Ekieki usun porausen Paul, a tingorei ewe Samon fan chommong pwe epwe ngasano seni an osukosuk, met a iteni “och cheuchen inis.” Nge esap ena netipan Kot. Mwirin Paul a weweiti pwe an osukosuk mi eu feioch, iwe a kinisou ngeni Kot pokiten ese punueni an iotek non ewe napanap a mochen.6
Apinukunuk me Nuku
Ap, ewe popun nuku esap pwe sipwe siwini netipan Kot nge pwe epwe apochokuna kich ach sipwe fori netipen Kot. Nuku mi wewen apinukunuk—sia apinukunuk pwe Kot A kuna met sise tongeni kuna me A sinei met sise sinei.7 Fan ekkoch, ese naf ach sipwe chok apinukunuk non ach pwisin weweiti me mirit.
Ua keao usun ei nupwen ngang emon chon wawa sepenin, won ekkewe ran ua sai nein ekkewe kuchu me use tongeni kuna. Ua chok apinukunuk non ekkewe pisekin emwen non ewe sepenin, ra aitiei ia ua nom ia me ia upwe feino ia. Mi namwot ai upwe ausening ngeni mongungun ekkewe aramas won ewe radio. Mi namwot ai upwe apinukunuk non non miritin emon a fen watte an sinei seni ai sinei. Emon a tongeni kuna met use tongeni kuna. Mi namwot ai upwe apinukunuk me fori met mi pung, upwe tori ia upwe feino ia me usap feiengau.
Nuku a wewen pwe sise chok nuku non An Kot mirit nge sipwe pwan nuku non An tong. A wewen pwe sia nuku pwe Kot A tongeikich, me mettoch meinisin A fori—meinisin ekkewe feioch A ngenikich me meinisin ekkewe feioch Ese ngenikich ren och fansoun—a fis pwe sipwe pwapwa feinfeino.8
Ren ei sokkun nuku, ina mo pwe sise weweiti pwata och mettoch a fis are pwata ekkoch ach kewe iotek rese ponu, sia tongeni sinei pwe non ewe nesoponon sipwe weweiti mettoch meinisin. “Mettoch meinisin God a fori fanasengesin mi murinno ren ir ekkewe mi tongei i.”9
Mettoch meinisin epwe pung sefan. Mettoch meinisin epwe och.
Sia sinei pwe sipwe angei ponuen ach kapas eis, me sia sinei pwe sisap chok pwapwa ren ponuen ach kapas eis, nge sipwe fokkun mwar ren ewe chen, kirokiroch, me tong an Semach won Nang fan itach, Noun kewe semirit.
Sopweno ne Fichifich
Seni iei tori ena fansoun, sipwe fetan ren ach nuku,10 sipwe achocho ne awatteno ach nuku fansoun meinisin. Fan ekkoch ei sai ese mecheres. Naman ekkewe rese mochen witiwit, ekkewe rese nukuchar, are ekkewe rese tumunuoch repwe angei nuku. Naman ekkewe ra mwitir ne mefi netipengau are ra ekieki usun pwan och mettoch resap angei nuku. Ekkewe mi tipetekison, nukuchar, me nikitu ir ekkewe repwe angei nuku.
Ekkewe mi achocho ar repwe nukuchar ir ekkewe mi angei nuku.
Porausen ruemon misineri mi angang non Europe, ian ese chommong chon papatais mi aitikich usun ei nongonong mi ennet. Ua weweiti pwata ra ekikei pwe ese auchea met ra fori. Usun ita ir mi tongeni chipwang ne fori wiser.
Nge ekkei ruemon misineri mi nuku, me a esenipato ar mochen angang. Ra ekieki pwe ika ese wor emon a ausening ngeni ar afanafan, esap fis pokiten rese angang weires.
Eu ran, ra mefi pwe repwe churi ekkewe aramas non eu imw mi nimenimoch me mi wor ruanu sassarin. Ra poputa won ewe aewin sassar me ra fichifich won iteiten asam, ra afanafan usun Jises Kraist me ewe Niwinsefaniton An Mwichefen.
Chon ewe aewin sassar rese ausening ngeniir.
Epwe fen mecheres ar repwe apasa, “Sia fen sotuni. Sipwe kouno ikei. Sano pwan sossot ew imw.”
Nge ekkei ruemon misineri mi nuku me ra ennetin mochen fori ei angang, iwe ra fichifich won iteiten asam won ewe oruan sassar.
Pwan iei usun, ese wor emon mi ausening ngeniir.
Ewe aunungatin sassar mi nonno chok. Me pwan ewe eruanuen sassar—tori ra fichifich won ewe saingon asam won ewe eruanuen sassar.
Nupwen emon a suki ewe asam, emon fopun a emenimen ngeniir me a tingorer ar repwe witiwit pwe epwe a fos ngeni inan.
Inan we a chok 36 ierin, punuan a chok keran mano o ese mochen fos ngeni ekkewe misineri an chon Mormon. Iwe a ereni noun we nengin an epwe asueno ekkewe misinieri.
Nge ewe fopun a tungor ren inan. Ekkei anuon mi murino, a apasa. Me epwe chok fitu minich.
Iwe, ese mochen, nge ewe in a tipew ngeni. Ekkewe misineri ra afanafan ngeniir me ra ngeni ewe fefin echo puk pwe epwe anneani—ewe Puken Mormon.
Mwirin ra feino, ewe in a finata epwe anneani fitu peich chok.
A anneani unusan ewe puk non fitu chok ran.
Ekkis fansoun mwirin, ei famini mi mano punuan ewe in ra papatais.
Nupwen ewe famini mi kukkun ra fiti ar pranch non Frankfurt, Germany, emon tiken a kuna niochun emon nein ekkewe nengin me a pwisin ekieki, “Ekkei misinieri mi angangoch!”
Iten ena tiken a Dieter Uchtdorf. Me ewe fopun mi kirokirooch—ewe emon a tungor ren inan pwe epwe ausening ngeni ekkewe misineri—a iteni ewe it mi ningoch Harriet. Meinisin ra churi i ra kan tongei o a kan fitiei non ai kewe sai. A fen afeiochu chommongen manauen aramas seni an tongei ewe kapas allim me pwapwa. I ennetin popun ai pwapwa.
Fan chommong ua ennetin mefi kinisou non netipei fan iten ekkei ruemon misineri rese kouno won ewe aewin sassar! Fan chommong ua mefi kinisou ren ar nuku me angang. Fan chommong ua kinisou ngeni Kot pwe ra sopweno—pwan mo ngeni ewe eruanuen sassar, ewe saingon asam.
Epwe Suk Ngonuk
Non ach kutta nuku ese much, non ach mochen ne sinei ngeni Kot me An kewe popon, sipwe chechemeni ewe pwon an ewe Samon: “Oupwe fichifich, iwe ewe asam epwe suk ngeni kemi.”11
Sipwe fangeta mwirin sia fichifich won eu ika ru asam? Eu ika ru sassar?
Are sipwe sopweno tori sia tori ewe eruanuen sassar, ewe saingon asam?
Kot “epwe ngeni niwinin ir ekkewe mi kutta i,”12 nge napengeni ena niwinin ese nom non ewe aewin asam. Iwe sipwe sopweno ne fichifich. Fefinei kana, ousap fangeta. Kutta Kot ren unusen netipemi. Anganga ami nuku. Fetan non wenechar.
Ua pwon pwe ika oua fori ekkei mettoch—pwan mo tori ewe eruanuen sassar, ewe saingon asam—oupwe angei ekkewe ponu oua kutta. Oupwe kuna nuku. Iwe eu ran oupwe ur ren saram minne a saramano tori ewe ran a unusoch.13
Fefinei mi acheingicheing non Kraist, Kot mi ennet.
A manau.
A tongei kemi.
A sinei kemi.
A weweiti ami osukosuk.
A sinei ekkewe tingorun netipemi.
Ese nikitikemino tori iei.
Esap nikitikemino feinfeino.
Ina ai kapasen pwarata me efeiochun emon aposen ngeni ami meinisin pwe oupwe pwisin mefi non netipemi me ami ekiei usun ei ennet mi napanap. Oupwe manau non nuku, chienei kewe me fefinei kana mi achengicheng, me “ewe Samon [ach] Kot [Epwe] fakkun achommongakemino o efeiochu kemi usun a pwonei!” 14
Ua pwarata ngeni kemi ai nuku, ai pochokunen ekiek, me ai ennetin kapasen pwarata mi pochokun pwe iei ewe angangen Kot. Fan iten ach Chon Amanau mi achengicheng, non itan Jises Kraist, amen.