2010–2019
Theem Plaub, Qhov Rooj Kawg
Kaum Hli Ntuj Xyoo 2016


Theem Plaub, Qhov Rooj Kawg

Vajtswv muab nqi zog rau cov uas rau siab nrhiav nws, yog li ntawd peb yuav tsum yeej meem khob qhov rooj. Cov muam, tsis txhob tso tseg. Nrhiav Vajtswv kawg nej lub siab ntsws.

Kuv cov muam, cov phooj ywg zoo, peb tau koob hmoov vim peb rov qab los koom ua ke nyob hauv lub rooj sab laj no raws li peb tus yaj saub thiab tus Thawj Tswj Hwm, Thomas S. Monson, coj. Thawj Tswj Hwm, peb hlub thiab txhawb nqa koj! Peb paub tias koj hlub cov muam ntawm lub Koom Txoos.

Kuv nyiam koom kev sib ntsib no hauv lub tuam rooj sab laj rau cov muam ntawm lub Koom Txoos.

Cov muam, thaum kuv pom nej, ua rau kuv xav txog cov poj niam uas tau pab kuv hauv kuv lub neej: xws li kuv niam tais thiab kuv niam, uas tau ua raws li lwm tus caw nkawd kom los saib lub Koom Txoos zoo li cas.1 Muaj kuv tus poj niam, Harriet, uas kuv hlub thawj thawj zaug kuv pom nws. Muaj Harriet niam, uas los ua mej zeej hauv lub Koom Txoos tsis ntev nws tus txiv xiam vim muaj mob cancer. Ces kuv tus muam, kuv tus ntxhais, kuv tus ntxhais xeeb ntxwv—tag nrho cov poj niam no tau coj yam ntxwv zoo rau kuv. Lawv ua rau kuv zoo siab kawg hauv kuv lub neej no. Lawv ua rau kuv xav ua ib tug txiv neej thiab ib tug thawj coj ntawm lub Koom Txoos zoo dua ntxiv. Kuv lub neej yuav txawv heev yog tsis muaj lawv!

Tej zaum qhov uas ua rau kuv txo hwj chim ntau tshaj plaws yog qhov uas muaj ntau tus poj niam uas muaj kev ntseeg nyob thoob plaws lub ntiaj teb uas coj yam ntxwv zoo ib yam li lawv los ntawm lawv tej txuj ci, kev txawj ntse, thiab zaj lus tim khawv.

Tej zaum nej ib txhia xav tias nej tsis tsim nyog kuv qhuas nej li ntawd. Tej zaum nej xav tias nej tsis tseem ceeb nej thiaj pab tsis tau lwm tus. Tej zaum nej xav tias nej tsis yog “cov poj niam uas muaj kev ntseeg” vim tej lub sij hawm nej ua xyem xyav los yog nej ntshai.

Hnub no, kuv xav hais lus rau txhua leej txhua tus uas tau xav li no—nyaj muaj tej lub sij hawm thaum peb txhua tus tau xav li no. Kuv xav hais txog kev ntseeg—kev ntseeg yog dab tsi, kev ntseeg ua tau li cas, thiab peb yuav tsum ua dab tsi kom muaj kev ntseeg hauv peb lub neej.

Kev Ntseeg Yog Dab Tsi

Kev ntseeg yog kev muaj siab xav txog ib yam dab tsi—yog kev ntseeg uas muaj zog heev ua rau peb ua tej yam uas ntshe peb tsis kam ua yog tsis xav li ntawd. “Kev ntseeg yog kev paub tias peb cia siab rau dab tsi thiab paub tseeb txog tej uas peb tsis pom.”2

Cov neeg ntseeg yeej to taub qhov no, tiam sis cov uas tsis ntseeg tsis to taub. Lawv xav tsis thoob thiab nug hais tias, “Leej twg yuav paub tseeb txog qhov uas lawv tsis pom?” Lawv xav tias qhov no qhia tias cov neeg uas ntseeg kev teev ntuj yeej vwm.

Lawv tsis to taub hais tias muaj lwm txoj kev pom tau uas tsis yog ntawm peb qhov muag, muaj lwm txoj kev kov uas tsis yog ntawm peb txhais tes, muaj lwm txoj kev hnov uas tsis yog ntawm peb pob ntseg.

Yeej zoo li ib tug me nyuam ntxhais uas nrog nws pog mus kev. Tus me nyuam ntxhais xav tias cov noog ua suab zoo nkauj, thiab txhua zaus lawv ua suab nws qhia nws pog.

Tus me nyuam ntxhais pheej nug hais tias, “Koj puas hnov lub suab ntawd?” Tus me nyuam ntxhais rov qab nug ntxiv. Tiam sis nws pog hnov lus tsis zoo thiab hnov tsis taus tej lub suab ntawd.

Ces nws pog txhos caug thiab hais tias, “Thov txim, me ntxhais. Koj pog hnov lus tsis zoo.”

Ua rau tus me nyuam ntxhais nyuaj siab, nws thiaj li tso nws txhais tes rau ntawm nws pog lub ntsej muag, ntsia nws qhov muag, thiab hais tias, “Pog, cia li siv zog mloog ’as!”

Muaj tej yam hauv zaj dab neeg no rau cov neeg tsis ntseeg thiab cov uas ntseeg kawm. Qhov uas peb tsis hnov ib yam dab tsi, tsis txhais hais tias tsis muaj yam ntawd. Ob tug neeg uas mloog tib zaj lus los yog nyeem tib nqe vaj lug kub, tej zaum ib tug yuav hnov tus Ntsuj Plig, thiab ib tug yuav tsis hnov.

Tiam sis, thaum peb xav pab cov uas peb hlub paub tus Ntsuj Plig lub suab, thiab Yexus Khetos txoj moo zoo uas nyob mus ib txhis, tej zaum qhov uas peb hais kom lawv “siv zog mloog” yuav tsis pab lawv ntau.

Tej zaum yuav zoo dua—rau tus uas xav ua rau nws txoj kev ntseeg loj dua ntxiv—yog nws mloog txawv. Tus Thwj Tim Povlauj yaum peb kom nrhiav lub suab uas hais lus rau peb sab ntsuj plig, tsis yog rau peb pob ntseg xwb. Nws qhia hais tias, “Tus neeg ntiaj teb yeej tsis tau txais tej uas Vajtswv tus Ntsuj Plig pub, rau qhov lawv pom hais tias tej ntawd tsis muaj qab hau dab tsi, thiab lawv tsis to taub txog tej ntawd, rau qhov lawv tsis muaj Vaj Ntsuj Plig lawv thiaj tsis to taub tej ntawd.”3 Los yog tej zaum peb yuav tsum xav txog tej lus uas Saint-Exupéry phau ntawv Little Prince hais tias: “Yus tsuas pom meej los ntawm yus lub siab. Yus qhov muag pom tsis tau txhua yam uas tseem ceeb.”4

Lub Hwj Chim thiab tej Ciaj Ciam ntawm Kev Ntseeg

Tej lub sij hawm tsis yooj yim rau peb ntseeg tej yam ntawm sab ntsuj plig thaum peb nyob hauv lub ntiaj teb no. Tiam sis tsim nyog uas peb sib zog muaj kev ntseeg vim lub hwj chim ntawd pab tau peb lub neej. Cov vaj lug kub qhia peb tias dhau los ntawm kev ntseeg tus Tswv tau tsim tej lub ntiaj teb, muaj neeg faib cov dej, muab cov tuag sawv rov los, thiab ua rau tej tus dej thiab cov roob txav mus.5

Tiam sis ib txhia yuav nug hais tias, “Yog kev ntseeg muaj hwj chim heev, vim li cas kuv tsis txais lus teb thaum kuv rau siab thov Vajtswv? Kuv tsis xav muab dej hiav txwv faib ua ob sab los yog muab lub roob txav mus. Kuv tsuas xav kom kuv qhov mob ploj mus los sis xav kom kuv niam kuv txiv ib leeg zam txim rau ib leeg los sis ib tug khub nyob mus ib txhis tuaj rau kuv lub tsev tuav ib co paj ntawm ib sab tes thiab tuav ib lub nplhaib ntawm ib sab tes. Vim li cas kuv txoj kev ntseeg ua tsis taus kom muaj li ntawd?”

Kev ntseeg yeej muaj hwj chim, thiab feem ntau yuav muaj txuj ci tseem ceeb. Tiam sis txawm peb muaj kev ntseeg npaum li cas, muaj ob qho uas kev ntseeg ua tsis taus. Qhov thib ib, kev ntseeg tsis muaj hwj chim yuam lwm tus txoj kev ywj siab xaiv.

Muaj ib tug poj niam uas thov Vajtswv ntev heev hais tias nws tus ntxhais yuav rov qab los rau Khetos pab yaj thiab nws poob siab vim zoo li Vajtswv tsis teb nws tej lus thov. Yeej nyuaj rau nws heev thaum nws hnov txog lwm tus cov tub cov ntxhais uas tau hloov siab lees txim lawm.

Qhov teeb meem tsis yog vim nws tsis thov Vajtswv txaus los yog tsis muaj kev ntseeg txaus. Nws yuav tsum to taub hais tias, txawm ua rau peb Leej Txiv Saum Ntuj Ceeb Tsheej lub siab mob heev los, Nws yuav tsis yuam leej twg xaiv kev ncaj ncees. Vajtswv tsis tau yuam Nws cov me nyuam kom coj raws li Nws nyob hauv lub neej ua ntej lub neej no. Ua cas Nws yuav yuam peb tam sim no thaum peb ua neej nyob hauv lub ntiaj teb no?

Vajtswv yuav caw thiab yaum peb. Vajtswv yuav muaj siab hlub ncav tes tshoov peb lub siab thiab txhawb nqa peb. Tiam sis Vajtswv yeej yuav tsis yuam peb—ua li ntawd ntshe yuav ua rau Nws txoj hau kev kom peb vam meej ploj mus.

Qhov thib ob uas kev ntseeg ua tsis taus yog yuam Vajtswv kom ua raws li peb lub siab nyiam. Peb yeej yuam tsis taus Vajtswv kom ua raws li peb lub siab xav—txawm peb xav tias peb ncaj ncees npaum li cas los sis peb thov Vajtswv tiag tiag. Cia li xav txog Povlauj, uas thov tus Tswv ntau zaus kom tsis raug txom nyem—uas nws hais tias yog “ib qho mob” Tiam sis qhov ntawd tsis yog Vajtswv lub siab nyiam. Thaum kawg, Povlauj paub tias nws txoj kev raug txom nyem yog ib qho koob hmoov, thiab nws thov ua Vajtswv tsaug vim Vajtswv tsis tau teb nws tej lus thov raws li nws lub siab xav.6

Kev Tso Siab thiab Kev Ntseeg

Lub ntsiab ntawm kev ntseeg tsis yog kom hloov Vajtswv lub siab nyiam tiam sis yog kom peb muaj hwj chim ua raws li Vajtswv lub siab nyiam. Kev ntseeg yog kev tso siab—kev tso siab rau Vajtswv ntseeg tias Nws pom tej uas peb tsis pom thiab paub tej uas peb tsis paub.7 Tej lub sij hawm, kev ntseeg tej uas peb pom peb tus kheej thiab tej uas peb txiav txim yeej tsis txaus xwb.

Kuv kawm li no thaum kuv yog ib tug kws tsav nyab hoom thaum kuv yuav tsum tsav nyab hoom mus rau hauv cov huab thiab pom tau ob peb feet tom hauv ntej xwb. Kuv yuav tsum vam khom rau cov cuab yeej uas qhia kuv tias kuv nyob qhov twg thiab kuv mus rau qhov twg. Kuv yuav tsum mloog lub suab ntawm cov kws qhia nyab hoom khiav mus los. Kuv yuav tsum ua raws li cov neeg uas muaj xov xwm ntau tshaj kuv paub. Kuv yuav tsum tso siab rau ib tug uas pom tej yam uas kuv tsis pom. Ib tug uas pom tej yam uas kuv tsis pom. Kuv yuav tsum tso siab thiab ua tej yam kom thiaj li los txog qhov chaw uas kuv xav mus.

Kev ntseeg txhais hais tias peb tso siab rau Vajtswv lub tswv yim thiab peb tso siab rau Nws txoj kev hlub. Kev ntseeg txhais hais tias peb cia siab tias Vajtswv hlub peb, thiab txhua yam Nws ua—txhua txoj koob hmoov Nws foom pub rau peb, thiab txhua txoj koob hmoov uas Nws tos kom foom pub—yeej yuav ua rau peb zoo siab nyob mus ib txhis.8

Yog peb muaj kev ntseeg zoo li no, txawm peb tsis to taub vim li cas muaj tej xwm txheej los yog vim li cas Nws tseem tos tsis tau teb peb tej lus thov, peb yuav paub tias thaum kawg, peb yuav to taub txhua yam. “Txhua yam tsav yuav pab sawv daws tau qhov zoo yog tias lawv muaj lub siab hlub Vajtswv.”9

Txhua yam yuav zoo. Txhua yam yuav zoo.

Peb yeej paub tias peb yuav txais lus teb, thiab peb yeej paub tseeb tias peb yuav txaus siab peb txais lus teb li cas, thiab peb yuav zoo siab rau qhov Leej Txiv Saum Ntuj Ceeb Tsheej muaj siab hlub, kev tshav ntuj, Nws siab dawb siab zoo, thiab Nws hlub peb uas yog Nws cov me nyuam.

Khob Qhov Rooj Tsis Tu Ncua

Mus txog thaum lub sij hawm ntawd, txawm peb muaj kev ntseeg npaum li cas los,10 peb xav kom peb txoj kev ntseeg loj tuaj. Tej lub sij hawm qhov no tsis yog ib qho yooj yim. Cov uas siab luv, tsis rau siab, los yog tsis xyuam xim, tej zaum yuav nyuaj rau cov ntawd nrhiav kev ntseeg. Cov uas poob siab los yog yooj yim rau lawv hnov qab tej zaum cov ntawd yuav tsis muaj kev ntseeg. Kev ntseeg yeej los rau cov uas txo hwj chim, cov uas rau siab, thiab nyiaj mus kom txog thaum kawg.

Kev ntseeg yuav los rau cov uas them tus nqi.

Peb kawm txog qhov tseeb no nyob hauv ib zaj dab neeg txog ob tug tub txib uas ua hauj lwm nyob hauv Europe, nyob hauv ib cheeb tsam uas tsis tshua muaj neeg hloov siab los ntseeg. Kuv xav tias tej zaum tsim nyog uas nkawd xav tias nkawd pab tsis tau ntau heev.

Tiam sis ob tug tub txib no muaj kev ntseeg, thiab nkawd rau siab. Nkawd xav tias yog tsis muaj leej twg mloog nkawd zaj lus xov, ces yeej yuav tsis yog vim nkawd tsis sib zog khwv ua hauj lwm.

Muaj ib hnub nkawd xav tias nkawd yuav tsum mus xyuas cov neeg nyob hauv ib lub tsev apartment uas muaj plaub theem. Lawv pib khob txhua lub qhov rooj nyob theem ib, es nkawd hais zaj xov txog Yexus Khetos thiab Kev Muab Nws lub Koom Txoos Txum Tim Rov Qab Los.

Daim Duab
Muam Uchtdorf lub tsev kem thaum nws loj hlob tuaj

Tsis muaj leej twg nyob theem ib uas kam mloog nkawd.

Ntshe yuav yooj yim rau nkawd hais tias, “Wb twb sim ua lawm. Cia wb tsum tam sim no. Cia wb mus sim ib lub tsev ntxiv.”

Tiam sis ob tug tub txib no muaj kev ntseeg thiab txaus siab ua hauj lwm, thiab nkawd khob qhov rooj ntawm theem ob.

Tsis muaj leej twg kam mloog nkawd.

Theem peb zoo ib yam. Ces theem plaub zoo ib yam—mus txog thaum nkawd khob lub qhov rooj kawg nyob theem plaub.

Thaum lub qhov rooj qhib, ib tug me nyuam ntxhais luag nyav thiab thov kom nkawd tos thaum nws mus hais nws niam.

Nws niam, uas muaj 36 xyoo xwb, tsis ntev tas los nws xiam nws tus txiv, thiab nws tsis muaj siab xav nrog ob tug tub txib Maumoos tham, xav hais kom ob tug tub txib khiav mus. Yog li ntawd nws qhia nws tus ntxhais kom txib lawv mus.

Tiam sis tus ntxhais no taij thov nws. Nws hais tias, ob tug tub hluas no yeej muaj siab zoo heev. Thiab yuav siv ob peb feeb xwb.

Ces tus niam tsev pom zoo. Ob tug tub txib hais nkawd zaj lus thiab muab ib phau ntawv rau tus niam tsev nyeem—yog Phau Ntawv Maumoos.

Tom qab nkawd mus, tus niam tsev txiav txim siab tias nws yuav nyeem ob peb phab ntawv xwb.

Nws twb siv ob peb hnub nyeem phau ntawv ntawd tag nrho.

Daim Duab
Muam Uchtdorf tsev neeg nrog cov tub txib

Tsis ntev tom qab ntawd, tsev neeg uas tsuas muaj leej niam xwb tau ua kev cai raus dej.

Thaum tsev neeg no mus koom lawv ceg ntseeg nyob hauv Frankfurt, Germany, ib tug dikas pom tias ib tug ntxhais zoo nkauj heev thiab xav rau nws tus kheej hais tias, “Ob tug tub txib no yeej rau siab ua hauj lwm zoo!”

Tus dikas ntawd lub npe hu ua Dieter Uchtdorf. Thiab tus ntxhais hluas zoo nkauj ntawd—tus uas tau thov nws niam mloog ob tug tub txib—nws lub npe zoo nkauj hu ua Harriet. Txhua tus uas ntsib thaum nws koom nrog kuv mus ub mus no hlub nws. Nws twb tau foom koob hmoov rau neeg coob vim nws qhia txog txoj moo zoo thiab nws coj yam ntxwv zoo. Nws yeej yog kuv nplooj siab.

Daim Duab
Muam Uchtdorf hais lus nyob hauv Norway

Kuv yeej ib txwm ua Vajtswv tsaug rau ob tug tub txib uas tsis tau tsum thaum nkawd nyob theem ib xwb! Kuv lub siab xav ua nkawd tsaug rau nkawd txoj kev ntseeg thiab kev ua hauj lwm. Kuv ua Vajtswv tsaug vim nkawd yeej meem mus ntxiv—mus txog theem plaub, qhov rooj kawg.

Yuav Qhib rau Nej

Thaum peb nrhiav kev ntseeg uas kav ntev, thaum peb nrhiav Vajtswv thiab Nws cov hom phiaj, thov kom peb nco ntsoov tus Tswv txoj kev cog lus hais tias: “Khob, thiab yuav qhib rau nej.”11

Peb puas yuav tso tseg tom qab peb khob ob peb lub qhov rooj xwb? Nce ob peb theem xwb?

Los yog peb puas nrhiav mus txog thaum peb los txog theem thib plaub, thiab qhov rooj kawg?

Vajtswv “muab nqi zog rau cov uas rau siab nrhiav nws,”12 tiam sis feem ntau lub nqi zog tsis nyob ntawm lub qhov rooj thib ib. Yog li ntawd peb yuav tsum yeej meem khob qhov rooj. Cov muam, tsis txhob tso tseg. Nrhiav Vajtswv kawg nej lub siab ntsws. Rau siab ntseeg. Ua raws li kev ncaj ncees.

Kuv cog lus tias yog nej ua li no—kom txog thaum nej mus txog theem plaub, qhov rooj kawg—nej yuav txais tej lus teb uas nej nrhiav. Nej yuav nrhiav tau kev ntseeg. Thiab muaj ib hnub nej yuav txais qhov kaj uas “ci kaj zus kaj zus mus txog hnub zoo tag nrho.”13

Kuv cov muam uas koom siab ntseeg Khetos, Vajtswv yeej muaj tseeb.

Nws muaj txoj sia nyob.

Nws hlub nej.

Nws paub nej.

Nws to taub nej.

Nws paub nej tej kev xav hauv nej lub siab.

Nws tsis tau tso nej tseg.

Nws yuav tsis tso nej tseg hlo li.

Kuv ua tim khawv thiab foom koob hmoov li ib tug thwj tim rau nej txhua tus kom nej yuav paub qhov no muaj tseeb hauv nej lub siab lub ntsws. Cov phooj ywg zoo, cia li ua neej raws li kev ntseeg, thiab “tus Tswv uas yog nej cov yawg koob tus Vajtswv, [yuav] pub kom nej huab vam ib txhiab npaug ntxiv, thiab kom nej lub neej vam meej raws li Vajtswv tau cog lus tseg lawm.”14

Kuv hais rau nej txog kuv txoj kev ntseeg, kuv txoj kev tso siab, thiab kuv zaj lus tim khawv uas muaj tseeb tiag hais tias nov yog Vajtswv txoj hauj lwm. Los ntawm peb tus Cawm Seej lub npe dawb ceev, los ntawm Yexus Khetos lub npe, amees.