Falfucl Ahkahkosr, Sruhngucl Sahflah
God El “oru wo nu selos suc sokol,” oruh kuht enenuh kalweni na in tongtong. Tahmtahel, met fuhlweack. Suk God ke insiyowos kwewa.
Tahmtahel sacohk wiyuhk, kawuck sacohk, kuht ahkinsewowoyeyuck na upac in sifil tuhkweni ke toeni fin facluh se inge ye karihngihnyuck ac kolyuck luhn mwet pahluh sacohk lasr ac Prestuhn, Thomas S. Monson, kuht luhngse kom ac kuht ahkkweye kom! Kuht etuh kom luhngse tahmtahel luhn Alu uh.
Nga luhngse wi miting wolacna se inge ke toeni luhlahp ma oreklac nuh sin tahmtahel luhn Alu uh.
Tahmtahel, ke nga liye kowos uh, nga tiac kuh in nuhnkuh ke ma sahyacn muhtwacn suc ekuhllah moul luhk yohk: ninac mahtuh ac ninac kiyuck, suc pa emet in lwelah solsol in tuhkuh ac liye lah meac kalmacn Alu uh.1 Muhtwacn kiyuck uh, Harriet, suc nga muhtwacwacack in luhngse ke pacl se emet nga liyacl. Ninac kiyacl Harriet uh, suc welah Alu uh tiac paht tukun mukul tuhmwacl ah misac ke cancer. Na muhtwacn wiyuck, tuhlihk muhtwacn nuhtihk, tuhlihk nuhtin muhtwacn nuhtihk, ac tuhlihk nuhtin nuhtin muhtwacn nuhtihk—mwet nuh kwewa inge moklweyuc nuh ke ma wo. Elos us mwe engan nuh ke moul luhk. Elos moklweyuc in eklac mukul wowo se ac sie mwet kol ke Alu suc etatwen likina met ah. Moul luhk ac arulacna sienna elos fin tiac oasr!
Sahp ma se ma ahkinsepuhsisaclye yuc yohk pa in etuh lah moklweyuck sacn pacna uh sikyak pacl million ke Alu uh nohfohn ke mukwikwi, talan, lahlmwetmwet, ac fahkwack luhlahlfongi luhn muhtwacn luhlahlfongi oacna kowos uh.
Ingena, kuhtuh suwos tiac puhla fal in eis kain kaksyak inge. Sahp kowos nuhnkuh lah kowos suhfal in moklwe mwet sahyac ke ohiyac wo. Sahp kowos tiac pahngon kowos sifacna sie “muhtwacn luhn luhlahlfongi” ke srihpen kowos muhnahs kuhtuh pacl ke suhlahlahlfongi kuh sahngweng.
Mihsenge, nga ke sramsram nuh sin kuhtwena mwet suc puhla ohinge—ac nga muh kuht nuh kwewa puhla ohinge kais kuhtuh pacl. Nga ke sramsram ke luhlahlfongi—meac kalmac, ma el kuh in oruh ac tiac oruh, ac lah meac kuht enenuh oruh in eis kuh luhn luhlahlfongi ke moul lasr uh.
Meac Kalmacn Luhlahlfongi
Luhlahlfongi el sie muhngnguh fokoko ke ma kuht etuh—sie muhngnguh ma arlac fokoko ma mokle kuht in oruh ma kuht nuhnkuh muh kuht koflah in oruh. “Kalmen lulalfongi pa kut etu suwohs ke ma su kut finsrak nu kac, ac oasr mwe akpwayeye lasr ke ma su kut tia ku in liye.”2
Ke ma inge ma na kahlwem nuh sin mwet luhlahlfongi uh, kwacna mwe fohs se nuh sin mwet seluhlahlfongi. Elos usrukye insifaclos ac siyuck, “Kuh sie mwet el kuh in etuh fuhkah ma se el fin tiac kuh in liye?” Nuh selos, ma inge mwe ahkpwacye se lah mwet alu uh tiac nuhnak wo ke ma.
Ma elos suhfal in kahlwem kac uh pa lah oasr ohiyac puhs in liye likina ke muhtahsr, ohiyac puhs in puhla likina orekmakihn pahosr, ohiyac puhs in lohng likina ke insrwacsr.
Oacna kain mukwikwi luhn muhtwacn fuhsr se suc forfor wi ninac mahtuh kiyacl ah. On luhn won uh wolacna nuh sin tuhlihk muhtwacn fuhsr sacn, ac el srihsrngiyac puhsra nuh kwewa nuh sin ninac mahtuh kiyacl an.
“Yac kom lohng?” tuhlihk muhtwacn srihsrihk sac siyuck na siyuck. Tuhsruhktuh ninac mahtuh se kiyacl ah sohlohngkahs ac tiac kuh in lohng puhsra uh.
Sahflahiyac, ninac mahtuh sac sikuckmuhtuhntei ac fahk, “Sislah koluk, kuloh luhk. Ninac mahtuh el tiac kuh in lohng wo.”
Ke puhla kohs, tuhlihk muhtwacn srihsrihk sac sruokyac muhtuhn ninac mahtuh kiyacl ke pahol, ngwetwacng nuh ke muhtahl, ac fahk, “Ninac mahtuh, porongo in wo!”
Oasr lesin ke sramsram se inge ma kuh in kahsruh kwewana mwet suhlahlahlfongi ac luhlahlfongi. Ke na kuht tiac kuh in lohng uh tiac kalmac pa wacngihn ma in lohng. Mwet luo kuh in kwewana lohng pweng sac pacna kuh riti ma suhmuhslah sac pacna, ac sahp sie kuh in puhla mwe lohoh luhn Nguhn, ke mwet se sahyac ah tiac.
Ke ohiyac sahyac, ke kuh lasr in kahsruh mwet sacohk lasr in lohng puhsren Nguhn ac ma yohk, ma pahtpaht, ac kahto ke wosasuc luhn Jisus Kraist, in fahk lah “porongo in wo” sahp tiac pa ohiyac wo emet in kahsrwelos.
Sahp kahs in kahsruh wo likina—nuh sin kuhtwena mwet suc kena ahkyohkye luhlahlfongi la—pa lohng siena uh. Mwet Sap Paul el kwacfe kuht in sokwack puhsra ma sramsram ke nguhnasr ac tiac nuh ke insrwacsr muhkwena. El luti, “Kutena mwet su Ngun Mutal tia oasr in el, el koflana eis mwe sang ma tuku sin Ngun lun God. El su ouinge koflana kalem kac: ma inge ma lalfon nu sel, mweyen saokiyen ma inge akilenyuk ke ngun mukena.”3 Kuh sahp kuht enenuh motko ke kahs luhn Saint-Exupéry ke Little Prince, suc fahk: “Mwet se liye suwohs muhkwena ke insiyac. Kuhtwena ma enenweyuck uh tiac kuh in liyeyuck ke muhta.”4
Kuh ac Sahflahiyacn Kuh luhn Luhlahlfongi
Kuhtuh pacl uh tiac fihsrwacsr in ahkyohkye luhlahlfongi ke ma luhn nguhn ke kuht moul ke facluh. Tuhsruhktuh oasr srihpac, ke srihpen kuh luhn luhlahlfongi ke moul lasr uh kuh in ma wolacna se. Ma suhmuhslah uh luti kuht lah ke srihpen luhlahlfongi, facluh oreklac, kof uh fahsrwelihk, mwet misac uh moulyak, ac infacl ac finohl uh itucklac nuh sahyac.5
Tuhsruhktuh kuhtuh siyuck, “Fin luhlahlfongi uh arulacna fokoko, efuh nga tiac kuh in eis top nuh ke sie pruhe sacohk? Nga tiac enenuh meoa uh in fahsrelihk kuh finohl uh in mukwikwi. Nga enenuh mas luhk in wacngihnlac kuh pahpah ac ninac kiyuck uh in nuhnak muhnahs sie sin sie kuh sie mukul tuhma ma pahtpaht uh in tulac ke sruhngucl luhk uh utuck rose ke paho se ac sie ring in pahyuck ke paho se sahyac ah. Efuh luhlahlfongi luhk uh in tiac kuh in oruh ma sacn?”
Oasr kuh ke luhlahlfongi, ac inkaiyacn pacl sikyak ke ma usrnguck. Tuhsruhktuh finne fuhkah luhpan luhlahlfongi yohrohsr, oasr ma luo ma luhlahlfongi uh tiac kuh in oruh. Ma se, el tiac kuh in ekuhllah sukohsohk in sulaclah luhn mwet sahyac.
Sie muhtwacn el pruhe ke yac pucspucs tuh tuhlihk muhtwacn se nahtuhl an in fah fohlohk nuh ke u luhn Kraist ac el puhla suhfal lah pruhe lal tiac topukyucklac. Ma se inge ngal yohk ke el lohng sramsram luhn mwet sahyac ke tuhlihk tuhlac suc auliyak ke ohiyaclos.
Elyah an tiac pa suhfal pruhe kuh suhfal luhlahlfongi uh. El enenuh na in kahlwem lah, finne mwe ahkngal se nuh sin Pahpah tuhmasr Inkuhsrao, El fah tiac ahkkohsye kuhtwena mwet in sulaclah inkacnek luhn suwohswohs. God El tiac ahkkohsye tuhlihk Nahtuhl in ukwe El ke moul lasr met liki kuht tuhkuh nuh facluh. Yac El ac tiac ahkkohsye kuht ke fuhfahsryucsr lasr nuh ke moul se inge uh?
God El fah suli, kwacfe. God El ac tiac tui in saplaklac ke luhngse ac moklweyuck ac ahkkweye. Tuhsruhktuh wacngihn pacl God El ac pahtok—ma sacn fah kuhnaoslah plwacn wolacna Lal ke kapwack ma pahtpaht lasr uh.
Ma se ahkluo ma luhlahlfongi uh tiac kuh in oruh pa ahkkohsye luhngse lasr nuh sin God. Kuht tiac kuh in pahtok God El in insese nuh ke kena lasr—finne kuht luhlahlfongi muh kuht pwacye kuh finne kuht pruhe yohk. Motko ke ma se sikyak nuh sel Paul, suc siyuck sin Leum pacl pucspucs in ahkwoye mwe upac sifacna lal—ma el pahngon “ituku nu in monuk.” Tuhsruhktuh ma sacn tiac ma luhngse luhn God. Tukun kuhtuh pacl Paul el akihlen lah ma upac lal pa sie mwe insewowo, ac el sang kuloh nuh sin God ke srihpen El tiac topuk pruhe lal ke ohiyac el luhngse an.6
Etuh ac Luhlahlfongi
Moh, srihpac luhn luhlahlfongi tiac in ekuhllah kena luhn God tuhsruhktuh in use kuh in ukwe kena luhn God. Luhlahlfongi pa etuh—etuh lah God El liye ma kuht tiac kuh in liye oacyacpac El etuh ma kuht nihkihn.7 Kuhtuh pacl, in luhlahlfongi ke mwe liye ac nuhnak lasr uh suhfal.
Nga lotwelah ma sacn ke nga sie airline pilot, ke lwen nga sohkwack nuh ke ohkohk kuh puhkuhnyeng mahtoltol ac nga tiac kuh in liye loes. Nga enenuh luhlahlfongi lah instrument uh ahkkahlwemye nuh sihk lah nga oasr oyac and lah piyac acn nga som nuh we uh. Nga enenuh lohng puhsren air traffic control. Nga enenuh ukwe kolyuck sin mwet se suc etuh suwohs liki yuc. Mwet se suc nga tiac kuh in liyac tuhsruhktuh nga lotwelah in luhlahlfongi. Mwet se suc kuh in liye ma nga tiac kuh. Nga enenuh luhlahlfongi ac mukwikwi pwacye in sun acn sahflah luhk.
Kalmacn luhlahlfongi pa kuht tiac luhlahlfongi lahlmwetmwet luhn God muhkwena tuhsruhktuh kuht luhlahlfongi pac luhngse Lal. Kalmac pa in luhlahlfongi lah God El luhngse kuht suwohs, tuh ma nuh kwewa El oruh—mwe insewowo nuh kwewa El sang ac mwe insewowo El, ke lusen pacl uh, tiac sang—sikyak in ahkyohkye engan ma pahtpaht lasr.8
Ke kain luhlahlfongi inge, finne ke kuht tiac kahlwem lah efuh kuhtuh ma inge sikyak kuh efuh kuhtuh pruhe uh tiac topukyuck, kuht kuh in etuh lah sahflahiyac ma nuh kwewa fah kahlwem. “God El oru tuh in oasr wo tuku kac nu selos su lungse El.”9
Ma nuh kwewa fah ahksuwohsyeyucklac. Ma nuh kwewa fah wolac.
Kuht kuh in etuh lah top uh fac tuhkuh, ac kuht kuh in luhlahlfongi kuh lah kuht ac tiac puhla fal muhkwena ke top an, tuhsruhk kuht ac puhla pac sesseslah ke kuhlwacng, pahkomuhta, pahkotwen, ac luhngse luhn Pahpah tuhmasr Inkuhsrao nuh sesr, tuhlihk Nahtuhl.
Kalweni in Tongtong Na
Nuh ke pacl sacn, kuht fahsr ke kuhtwena luhlahlfongi oasr yohrohsr,10 suk pacl nuh kwewa in ahkyohkye luhlahlfongi lasr. Kuhtuh pacl uh ma se inge tiac fihsracsr. Elos suc semuhtweng, wacngihn otwelah, kuh ingunyacr uh ac konwacack lah luhlahlfongi uh upac in eis. Elos suc fihsrwacsr in fuhlweack kuh lohlah tiac arlac puhlakihn. Luhlahlfongi tuhkuh nuh ke mwet inse puhsisacl, mwet kalweni, mwet oaru.
Ma ingacn tuhkuh nuh selos suc kalweni in sang kuh lalos ke luhlahlfongi.
Ma pwacye se inge kuh in liyeyuck ke mukwikwi luhn misineri fuhsr luo suc kuhlwacnsap fin acn Europe, ke eria ma suhpuhs mwet eklac pacptaislac. Nga muh fihsracsr in nuhnkuh lah orekma lalos tiac kahsruh ma yohk.
Tuhsruhktuh oasr luhlahlfongi sin misineri luo inge, ac ma ingacn moklwaclos in orekma. Oasr ohiyac se lalos lah finne wacngihn mwet lohng pweng lalos uh, ac tiac ke srihpen elos tiacna sang kuh na fal se.
Sie lwen ah, oasr puhla se lalos in som nuh ke apartment loslos ke falfucl ahkosr ah. Elos muhtwacwacack ke falfucl se emet ah ac tongol kais sie sruhngucl, ahkkahlwemye pweng lalos ke molwelah luhn Jisus Kraist ac Fohlohkyak luhn Alu Lal.
Wacngihn mwet ke falfucl se emet ah ke lohngohlos.
Ma na fihsracsr se in fahk, “Kuht srihke. Lwelah kuht in tui inse. Lwelah kuht in som nuh ke lohm sahyac.”
Tuhsruhktuh oasr luhlahlfongi luhn misineri luo inge ac elos oaru nuh ke orekma uh, oruh elos tongtong ke sruhngucl nuh kwewa fin falfucl ahkluo.
Na sifilpac, wacngihn mwet ke lohng.
Falfucl ahktolu oacpacna. Ac oacyacpac ma ahkahkosr sac—pa na ohinge, nuh ke pacl elos tongtong ke sruhngucl sahflah ke falfucl ahkahkosr.
Ke sruhngucl sac ikacklah, muhtwacn fuhsr se isracsrelihk nuh selos ac siyuck elos in sano nuh ke el sramsram nuh sin ninac kiyacl ah.
Ninac kiyacl ah yac na 36 matwac, mukul tuhmwacl ah tuhfahna misac ac el tiac puhla wo in sramsram nuh sin misineri Mormon uh ac fahk nuh sin tuhlihk muhtwacn nahtuhl in suhpwacltahllah.
Tuhsruhktuh muhtwacn se nahtuhl ah kwacfel yohk. Mukul fuhsr inge elos kuhlwacng, el fahk. Ac e kihtihn pacl na.
Na, finne suhpwacr kac, ninac sac insese. Misineri an sruhmuhn pweng lalos ac sang puk se nuh sin ninac sac in riti—Puk luhn Mormon an.
Tukun elos som, ninac sac sulaclah in riti na kuhtuh sra puk uh.
El ahksahfyelah puk sac nohfohn tukun lwen na ekahsr.
Tiac paht tohkoh, sucu wowo wacngihn pahpah se inge ah utyak nuh ke kof in pacptais uh.
Ke sucu srihsrihk sac wi toeni ke pracns lalos fin acn Frankfurt, Germany, sie tikin fuhsr el akihlen luhman kahto luhn sie sin tuhlihk muhtwacn an ac motko sifacna, “Misineri inge oruh orekma wo!”
Inen tikin fuhsr se ingacn pa Dieter Uchtdorf. Ac muhtwacn fuhsr ac kahto sacn—mwet se suc siyuck ninac kiyacl an in lohng pweng luhn misineri ah—oasr ine kahto se la pa Harriet. El luhngseyuck sin mwet nuh kwewa suc sonol ke el wiyuc ke forfor luhk uh. El ahkinsewowoye moul luhn mwet puhkantwen ke luhngse lal ke wosasuc uh ac ohiyac wolacna lal uh. Pwacyena el pa faht ke moul luhk.
Inkaiyacn pacl uh nga puhla tarilacna yohk ke insiyuck nuh sin misineri luo suc tiac tui ke falfucl se emet ah! Inkaiyacn pacl uh insiuck tarilacna ke luhlahlfongi ac orekma lalos. Inkaiyacn pacl uh nga sang kuloh lah elos kalweni in orekma—finne nuh ke falfucl ahkahkosr, sruhngucl sahflah.
Ac Fah Ikacklah nuh Suwos
Ke suk lasr nuh ke luhlahlfongi oaru, ke fuhfahsryucsr lasr in kuhpahsr nuh sin God ac srihpac Lal uh, lwelah kuht in esam olwelah luhn Leum: “Towolak na srungul uh ac fah ikakla nu suwos.”11
Yac kuht ac fuhlweack tukun kuht tongtong ke sruhngucl se kuh luo? Falfucl se kuh luo?
Kuh kuht ac kalweni suk nuh ke kuht sun falfucl ahkahkosr, sruhngucl sahflah?
God “El oru wo nu selos su sokol,”12 tuhsruhktuh opi uh tiac oasr pacl nuh kwewa ke sruhngucl se emet uh. Oruh kuht enenuh kalweni na in tongtong. Tahmtahel, met fuhlweack. Suk God ke insiyowos kwewa. Orekmakihn luhlahlfongi. Fahsr ke ohiyac suwohs.
Nga olwelah lah kowos fin oruh ma se inge—finne nuh ke falfucl ahkahkosr, sruhngucl sahflah—kowos ac fah eis top ma kowos suk an. Kowos fah konwacack luhlahlfongi. Ac sie lwen kowos fah nwacnwaclah ke kahlwem ma lihksreni na kahlwemi ne ke na eklac suwohswohs.”13
Tahmtahel sacohk wiyuck in Kraist, God El pwacye.
El moul.
El luhngse kowos.
El etwekowos.
El kahlwem suwos.
El etuh siyuck fihsracsr insiyowos uh.
El tiac som liki kowos.
Wacngihn pacl El ac som liki kowos.
Pa mwe fahkwack luhlahlfongi ac mwe insewowo luhk ke mwet tuhma lutlut uh nuh sin mwet nuh kwewa tuh kowos fah puhla insiyowos ac nuhnak lowos ma pwacye wolacna se inge nuh suwos sifacna. Moul ke luhlahlfongi, kawuck sacohk, tahmtahel sacohk, ac “Leum God [lasr] [El fah] ahkyohkye ma lom pacl tausin se ac ahkinsewowoye kowos oacna El olwelah!”14
Nga fihliyac yuruwos luhlahlfongi luhk, etuh luhk, ac mwe lohoh suwohs ac tiac kuh in eklac luhk lah pa inge orekma luhn God. Ke ine muhtahl luhn Mwet Lahngo Sacohk lasr, ke inen Jisus Kraist, amen.