2010–2019
Kōjem̧ eo Āliktata, Po eo Kein Kemān
Oktoba 2016


Kōjem̧ eo Āliktata, Po eo Kein Kemān

Anij “ej leļo̧k nōbar n̄an ro rej pukōt E,” kōn menin wōnm̧aanļo̧k wōt im kōļļaļaļ. Jab Ebbweer. Pukōt Anij kōn aolepān būruwōm̧.

Ewi jon̄an jeram̧m̧an in ad bwe jemaron̄ bar koba ippān doon ilo kweilo̧k in ipeļaakin laļ in ium̧win kappe im tōl an rikanaan eo ad ejitōn bōro im Būreejtōn, Thomas S. Monson. Būreejtōn, kōm̧ij iakwe eok im rejtake eok! Kōm̧ jeļā bwe kwoj iakwe kōrā ro ilo Kabun̄ in.

Em̧m̧an ippa pād ilo m̧wen̄an in eaiboojoj an kweilo̧k eo eļap kar kōm̧m̧ane n̄an kōrā ro jeid im jatid ilo Kabun̄ in.

Kōrā ro jeiū im jatū, ke ij lo kom̧, ijjab maron̄ dāpij aō ļōmņak wōt kōn kōrā ro rekar lukkuun ļap kilaer ilo mour e aō: jibū im jinō, ro rekar jinoin tata errā kōn kajjitōk eo im kar itok im lale ta unleplep eo an Kabun̄ in.1 En̄in ej kōrā eo pāleeō, Harriet, eo me ikar en̄jake aō iakwe e kein kajuon aō kar loe. Jinen Harriet, eo ekar kobatok ilo Kabun̄ in jidik iien ālkin an kar mej ļeo pāleen jāne kōn kāānjer. Innām leddik eo jatū, leddik eo nejū, leddik eo jibū, im leddik eo jibū jibū—aolep rein kajjojo rekar letok juon kareel em̧m̧an n̄an n̄a. Em̧ool rekar rom̧aak ilo mour eo aō. Rej im̧we eō bwe in juon em̧m̧aan em̧m̧an im juon ritōl an Kabun̄ in emeļeļe. Ewi jon̄an oktak in mour eo aō eļan̄n̄e eban kar er!

Bōlen ta eo eļap an kōttāik eō ej ilo aō jeļā bwe kareel eo aer ekajoor ej waļo̧k milien kōttan ipeļaakin laļ in ilo Kabun̄ in kōn maron̄ ko, tōļan ko, māletlet ko, im naan in kam̧ool an kōrā ro retōmak āinwōt kom̧.

Kiiō, jet iaami remaron̄ bōlen jab en̄jake kain nōbar in n̄an er. Komaron̄ ļōmņak bwe kwojjab lukkuun aorōk bwe ewōr juon am̧ kareel eļap n̄an ro jet. Bōlen kwojjab kile eok make āinwōt juon “kōrā in tōmak” kōnke jet iien kwoj ebbweer im mijak.

Rainin, ikōņaan kōnono n̄an jabdewōt eo ekar en̄jake wāween in—im bwe menin emaron̄ kitbuuj kōj aolep ilo juon iien ak bar juon. Ikōņaan kōnono kōn tōmak—ta in, ta emaron̄ im ejjab maron̄, im ta jej aikuj kōm̧m̧ane n̄an kōmourur kajoor in tōmak eo ilo mour ko ad.

Ta in Tōmak

Tōmak ej juon tōmak ekajoor kōn juon men jej tōmak kake—juon tōmak ekajoor ej im̧we kōj n̄an kōm̧m̧ane men ko bōlen jej jan̄in kar kōm̧m̧ani. “A tōmak ej āinwōt lōke kōn men ko jej kōjatdikdik kōj kaki, reel būruōd kōn men ko je jab loi.”2

Tōre in me meļeļein emaron̄ jejjet n̄an Rikūrijin ro, jet iien emaron̄ pok n̄an ro rejjab kūrijin. Rej kōjeboluul i bōrāer im kajjitōk, “Elmen an armej rein lukkuun jeļā ta eo me rejjab maron̄ loe?” N̄an er, menin ej kam̧ool in ļōmņak ko rejjab alikkar an kabun̄.

Ta eo me rekar likjab in meļeļe ej bwe ebar wōr wāween ko n̄an lale jān ad loe kōn mejād elōn̄ wāween ko jemaron̄ en̄jake kōn peid, elōn̄ wāween ko jemaron̄ en̄jake jān ad ron̄jaki.

Ej juon men eo im āinwōt en̄jake eo an juon jiron̄ ekar etetal ippān leļļap eo jibūn. Al eo an bao ko rekar aiboojoj n̄an jiron̄ in edik, im leddik eo ekar kwaļo̧k n̄an jibūn aolep ainikien ko.

“Kwaar ke ron̄jake men en?” leddik jidikdik eo ekar kajjitōk im bar kajjitōk. Ak jibūn ekar pen an ron̄ im ekar jab maron̄ ron̄ ainikien ko.

Āliktata, jibūn ekar bukwelōlō im ba, “Joļo̧k bōd, jibū. Bubu ejjab em̧m̧an an ron̄ļo̧kjeņ.”

Leddik eo ekar inepata, leddik jidikdik eo ekar jibwe turin mejān jibūn, kalimjōk mejān, im ba, “Bubu, lukkuun ron̄jake!”

Elōn̄ katak ko ilo bwebwenato in n̄an jim̧or ro rejjab tōmak im ro rej tōmak. Kōnke jejjab maron̄ ron̄ juon men ej jab meļeļein bwe ejjeļo̧k juon men jemaron̄ ron̄. Ruo armej remaron̄ ron̄jake ejja ennaan in wōt ak riiti ejja eoon in wōt, im juon emaron̄ en̄jake kam̧ool eo an Jetōb eo, eo juon ejjab maron̄.

Ilo bar juon wāween, kijejeto eo ad n̄an jipan̄ ro jej iakwe en̄jake ainikien Jetōb eo im aiboojoj eo eļap, indeeo, im em̧wilaļ an gospel eo an Jisōs Kraist, ej jiron̄ er n̄an “lukkuun ron̄jake” emaron̄ jab wāween leto letak meļeļe elukkuun jipan̄.

Bōlen kapilōk eo em̧m̧an—n̄an jabdewōt eo ekōņaan kōļapļo̧k an tōmak—ej ron̄jake ilo wāween ko roktak. Rijilōk Paul ej rōjan̄ kōj bwe jen pukōt ainikien eo ej kōnono n̄an jetōb eo ad ejjab baj ron̄jake kōn lo̧jiln̄id. Ekar katakin, “A armej kōn biktoken e jab bōk men ko an Jetōb an Anij, bwe re men in bwebwe ippān, im e jab maron̄ in jeļā, bwe re meļeļe kōn jetōb.”3 Ak jej aikuj ļōmņak kōn naan ko an Rijeje Boem in French eo ar je Little Prince, eo ekar ba: “Juon ej alikkar an loļo̧kjeņ n̄e ej kalimjōke kōn būruwōn. Jabdewōt men raorōk rejjab alikkar n̄an mej ko.”4

Kajoor Eo im Jon̄an Tōmak

Jet iien, ejjab pidodo n̄an ejaake tōmak ilo men ko an jetōb tōre in jej mour ilo laļ in. Ak ej juon jerbal eļap tokjān, kōnke kajoor in tōmak ilo mour ko ad emaron̄ alikkar. Jeje ko rekwojarjar rej katakin kōj bwe kōn tōmak laļ ekar ejaak, dān ko rekar jepelļo̧k, armej ro remej rekar jerkak, im reba ko im toļ ko rekar em̧m̧akūt jān jikier.5

Aaet jet remaron̄ kajjitōk, “Eļan̄n̄e tōmak elukkuun kajoor, etke ijjab maron̄ bōk juon uwaak n̄an jar eo aō? Ijjab aikuji lo̧jet eo n̄an kōjepļo̧k e ak juon toļ n̄an kōm̧akūt i. Ikōņaan bwe nan̄inmej eo aō en jako ak ro jinō im jema ren joļo̧k an doon bōd ak juon m̧ōttan enej m̧ōtta indeeo ej jutak iturin kōjem̧ eo aō kōn jet wūt ilo pein im juon riin̄ in m̧are ilo pā eo juon. Etke tōmak eo aō ejjab maron̄ kōttōbrak menin?”

Tōmak elukkuun kajoor, im jet ej waļo̧k ilo kabwilōn̄lōn̄ ko. Ak jekdo̧o̧n ta ewi jon̄an tōmak eo ad, ewōr ruo men ko me tōmak ejjab maron̄ kōm̧m̧ani. Eo juon, ejjab maron̄ kakkure anemkwoj eo an juon armej.

Juon kōrā ekar jar elōn̄ iiō ko bwe leddik eo nejin ejebwābwe enaaj maron̄ jepļaaktok n̄an wōrwōr eo an Kraist im ekar inepata bwe jar ko an rekar jab uwaak. Menin ekar lukkuun kōmmetak ke ekar ron̄ kōn bwebwenato in nejin ro rejerwaan ro rekar ukweilo̧k jān jekjek ko aer.

Jorrāān eo ekar jab jān dik an jar ak juon tōmak eo elikjab. Liin ekar aikuj in meļeļe menin, āinwōt an kōmmetak āinwōt an maron̄ waļo̧k n̄an Jemed Ilan̄, E ej jāmin kipel jabdewōt n̄an kālet iaļ eo an wanōk. Anij ejjab kipel ajri ro Nejin make n̄an ļoor E ilo mour eo m̧okta. Ewi jon̄an An jab naaj kipel kōj kiiō ilo ad ito itak ilo mour in?

Anij ej karuwainene, im kareel. Enaaj pukot ļo̧k ilo ejjeļo̧k m̧ōk kōn iakwe im im̧we im rōjan̄. Ak Ej jāmin kipel—menin enaaj kwaļo̧k karōk eo eļap n̄an eddōkļo̧k eo ad indeeo.

Men eo kein karuo tōmak ejjab maron̄ kipel ankilaan Anij. Jejjab maron̄ kipel E bwe en reel ippān kōņaan ko ad—jekdo̧o̧n ewi jejjet in ļōmņak eo ad ak ewi m̧ool in ad jar. Ļōmņak kōn en̄jake in an Paul, eo ekar akweļap ippān Irooj elōn̄ kōttan bwen rōļo̧k jān juon kapo, eo ekar ņaetan “juon kalōklōk ilo kanniōk.” Ak menin ekar jab ankilaan Anij. Āliktata Paul ekar kile bwe mālijjon̄ eo ekar juon kōjeram̧m̧an, im ekar kam̧m̧oolol Anij kōn an jab kar uwaake jar ko an ilo wāween eo ekar kōjatdikdik kaki.6

Lōke im Tōmak

Jaab, jibadbad eo an tōmak ejjab bwen ukōt ankilaan Anij ak n̄an kōtļo̧k ad m̧akūtkūt ekkar n̄an ankilaan Anij. Tōmak ej lōke—lōke bwe Anij ej loe ta eo jejjab maron̄ im bwe Ejeļā ta jejjab jeļā.7 Jet iien, lōke visōn eo ad make im ekajet eo ad ejjab bwe.

Ikar katak ke ikar juon rikkāke paļuun, ilo raan ko ikar aikuj in kelōk ioon tab emejel ak kōdo̧ ko im imaron̄ kar loe wōt jejjo nee im̧aan. Ikar aikuj in likūt aō kōjatdikdik ilo kein jerbal ko me rekar kwaļo̧k n̄an eō ijo ikar pād ie im ij jibadōk ļo̧k. Iaar aikuj ron̄jake ainikien armej eo jān erboot eo, eo ej lale an jok im kelo̧k baļuun. Iaar aikuj in ļoor tōl an juon armej eo eļap ļo̧k meļeļe ko ippān jān n̄a. Juon armej eo ejjab maron̄ lo ak juon eo me ikar katak bwe in lōke. Juon armej eo emaron̄ loi ta ko ijjab maron̄ loi. Ikar aikuj lōke im jerbal ekkar bwe in itaakļo̧k mejān kajjik eo ilo ejjeļo̧k jorrāān.

Tōmak ej meļeļein bwe jejjab tōmak wōt mālōtlōt eo an Anij ak jej barāinwōt iakwe E. Ej meļeļein lōke bwe Anij ewāppen an iakwe kōj, bwe men otemjej Ej kōm̧m̧ani—aolep kōjeram̧m̧an ko Ej litok im E, ilo juon iien, ej dāpiji—ej n̄an m̧ōņōņō eo ad n̄an indeeo.8

Kōn kain tōmak in, jemaron̄ jab meļeļe etke elōn̄ men ko rej waļo̧k ak etke jar ko rejjab uwaak, jemaron̄ jeļā bwe āliktata men otemjej renaaj alikkar. “Bwe aolep men otemjej [renaaj] jim̧or jerbale em̧m̧an n̄an ro rej yokwe Anij.”9

Aolep men renaaj kōm̧m̧ani rejim̧we. Aolep renaaj em̧m̧an.

Jemaron̄ jeļā bwe uwaak ko renaaj itok, im bōlen jemaron̄ lōke bwe eban ju būruwōd wōt kōn uwaak ko, jenaaj bwilōn̄ kōn tūriam̧o̧, jouj, meanwōd, im iakwe eo an Jemedwōj Ilan̄ n̄an kōj, ajri ro Nejin.

Wōnm̧aanļo̧k Wōt im Kōļļaļļal

Mae tōren, jej etetal kōn jabdewōt tōmak eo ewōr ippād,10 aolep iien kappukōt n̄an kōļapļo̧k tōmak eo ad. Jet iien, ejjab juon men epidodo. Ro me epidodo aer mōk, ro me rejjab kijenmej, rejjab kijejeto, ak rejerwaan remaron̄ loe bwe tōmak epen bōke. Jabdewōt ro emōkaj aer ebbweer ak ļokjenaer emaron̄ pen aer en̄jake menin. Tōmak ej ilo̧k n̄an ro rettā, retiljek, im ro rej kijenmej.

Ej ilo̧k n̄an ro rej kijejeto im tōmak wōt.

Mool in ej waļo̧k ilo en̄jake eo an ruo mijenede ro rej jerbal ilo juon bukwōn eo ijo me jejjo wōt ro rej peptaij ie. Ij ļōmņak renaaj meļeļe im ļōmņak bwe ta eo rekar kōm̧m̧ane eban kōm̧m̧an eļap oktak.

Ak mijenede rein ruo ekar wōr aer tōmak, im bwe ekar im̧we er n̄an jerbal. Ekar wōr juon m̧wil ippāero bwe eļan̄n̄e ejjeļo̧k juon ej ron̄jake ennaan eo aerro, ejjab kōnke erro kar jab lukkuun jerbal.

Juon raan, rekar pepe ippāero n̄an kepaake ro rej jokwe ilo juon abaatmen eo emān po ie im eaiboojoj. Rekar jino ilo po eo kein kajuon im kar kōļļaļaļ ilo kajjojo kōjem̧, kwaļo̧k naan in lo̧mo̧o̧r eo an Jisōs Kraist im Jepļaaktok eo an Kabun̄ in.

Pija
Abaatmen eo an Sister Uchtdorf

Ejjeļo̧k juon armej ilo po eo kein kajuon ekar ron̄jake er.

Emaron̄ kar lukkuun pidodo in ba, “Jem̧ōk. Jen bōjrak ijin. Jen etal im bar kajjieon̄ bar juon abaatmen.”

Ak mijenede rein ruo rekar tōmak im rekar m̧ōņōņō in jerbal, innām rekar kōļļaļaļ ilo aolep kōjem̧ ko ilo piļoor ruo.

Bar juon, ejjeļo̧k armej rekar ron̄jake.

Piļoor eo kein kajilu ekkar ejjeļo̧k oktak. Im ekar piļoor eo kein kemān—en̄in, m̧ae iien rekar kōļļaļaļ ilo kōjem̧ eo āliktata in piļoor emān.

Ke kōjem̧ eo ekar peļļo̧k, juon jiron̄ ekar ettōn̄ dikdik n̄an er im kar kajjitōk bwe ren kōttar wōt bwe ej kōnono ippān jinen.

Jinen ekar 36 wōt an iiō, ej kab mejļo̧k ļeo pāleen, im ekar ejjeļo̧k an kōņaan in kōnono ippān mijenede in Mormon ro. Liin ekar ba ļo̧k n̄an leddik eo nejin bwe en ba n̄an er bwe ren etal.

Ak leddik eo ekar akweļap ippān. Likao rein rem̧m̧an, leddik eo ekar ba. Im enaaj bōk wōt jejjo minit ko.

Makoko wōt, jinen ekar errā. Mijenede ro rekar kwaļo̧k ennaan eo aer im leļo̧k juon bok n̄an jinen leddik eo bwen riiti—Bok in Mormon.

Ālkin rekar etal, jinen leddik eo ekar pepe ippān bwen riiti wōt jejjo peij ko ie.

Ekar kam̧ōj aolepān bok eo ilowaan wōt jejjo raan ko.

Pija
Baam̧le eo an Sister Uchtdorf ippān mijenede ro

Ejjab etto, baam̧le in ejjeļo̧k jemāer rekar peptaij.

Ke baam̧le in edik rekar etal n̄an ward eo ilo Frankfurt, Germany, juon tikōn ekar loe aiboojoj eo an leddik ro im ļōmņak ippān make, “Mijenede rein elukkuun em̧m̧an aer jerbal!”

Tikōn in ekar etan in Dieter Uchtdorf. Im jiron̄ in eaiboojoj—leddik eo ekar akweļap ippān jinen bwen ron̄jake mijenede ro—kar etan et eo eaiboojoj etan in Harriet. Aolep ro rekar ioone e rekar iakwe ilo an mije eō ilo ito itak ko aō. Emōj an kōjeraam̧m̧an mour ko an elōn̄ armej ro kōn iakwe eo an n̄an gospel in im m̧wil eo ekam̧ōņōņō. Em̧ool e ej meram eo an mour e aō.

Pija
Sister Uchtdorf ej kōnono ilo kajin Norway

Ewi jon̄an emakijkij in aō kar kotak būruwō im kam̧oolol kōn mijenede ruo rekar jab bōjrak ilo piļoor eo kein kajuon! Emakijkij aō kotak būruwō kōn kam̧m̧oolol tōmak eo aer im jerbal. Ewi jon̄an emakijkij in aō leļo̧k kam̧m̧oolol bwe rekar wōnm̧aanļo̧k wōt—aaet n̄an piļoor emān, kōjem̧ eo āliktata.

Enaaj Peļļok N̄an Eok.

Ilo ad pukōt niknik ilo tōmak, ilo kijejeto ko ad n̄an kakobaik kōj n̄an Anij, jen keememej kallim̧ur eo an Irooj: “Kōļļalļlaļ, im naaj kōppeļļok n̄an eok.”11

Jenaaj ke ebbweer ālkin ad kōļļaļaļ ilo juon ak ruo kōjem̧? Juon piļoor ak ruo?

Ak jenaaj ke kappukōt e wōt m̧ae iien jej tōpar piļoor emān, kōjem̧ eo āliktata?

Anij “ej leļo̧k jinōkjeej n̄an ro rej kappukōt E,”12 bwe jinōkjeej in ejjab aolep pād iturin kōjem̧ eo kein kajuon. Kōn menin jej aikuj in kōļļaļ wōt. Jab Ebbweer. Pukōt Anij kōn aolepān būruwōm̧. Kōjerbal tōmak. Etetal ilo jim̧we.

Ij kallim̧ur bwe eļan̄n̄e kom̧ naaj kōm̧m̧ane menin—m̧ae iien piļoor eo kein kemān, kōjem̧ eo āliktata—kom̧ naaj bōk uwaak eo kom̧ij pukōte. Kwonaaj lo tōmak eo. Im juon raan kwonaaj obrak kōn meram eo ej ebbōļ “ej meramļo̧k im meramļo̧k m̧ae raan eo eweeppān.”13

Ro jeiū im jatū ilo Kraist, ewōr Anij.

E ej mour.

Ej iakwe kom̧.

Ejeļā kajjeem̧.

Emeļeļe kōn kwe.

E ejeļā kōn akweļap eo an būruwōm̧.

Ejjan̄in kōjojoļāār e eok.

Ej jāmin meļo̧kļo̧k eok.

En̄in ej naan in kam̧ool eo aō im kōjeraam̧m̧an eo aō n̄an kom̧ kajjojo bwe kom̧ naaj en̄jake ilo būruwōm̧i im ļōmņak eo ami kam̧ool in eļap n̄an kom̧ make. Kom̧win mour kōn tōmak, ro jera, im “Irooj, Anij an ro jim̧m̧ami, [naaj] korļo̧k kom̧ juon to̧ujin alen jān kiiō im kōjeraam̧m̧an kom̧ āinwōt Ear kallim̧ur n̄an kom̧!”14

Ij likūt aō tōmak, aō kam̧ool, im aō kam̧ool em̧ool im ejjab pijpij bwe Anij Indeeo an tūriam̧o im aiboojoj ej mour. Ilo et eo ekwojarjar etan Rilo̧mo̧o̧r eo Ejitōn Bōro, Jisōs Kraist, amen.