2010–2019
Di Kuater Piso, Lastu Porta
òktober 2016


Di Kuater Piso, Lastu Porta

Dios “ta premiá esnan ku diligentemente ta busk’e,” kermen nos mester sigui bati na e porta. Rumannan no entrega. Buska Dios ku tur bo kurason.

Rumannan stimá, amiganan stimá, Kon bendishoná nos ta di por ta reuní atrobe den e konferensia mundial aki bou di e direkshon i liderazgo di nos profeta kerí i Presidente, Thomas S. Monson. Presidente, nos stima bo i nos ta sostené bo! Nos sa ku bo ta stima e rumannan muhé di Iglesia.

Mi gusta asistí e seshon maravioso aki di konferensia general dediká na e hermananan di Iglesia.

Hermananan, ora mi wak boso, mi no por keda sin pensa riba e muhernan ku tabatin asina tantu influensia den mi bida: mi wela i mi mama, kende tabata e proménan pa akseptá e invitashon pa bin i mira kiko e Iglesia tin pa ofresé.1 Tin tambe mi kerida esposa, Harriet, di ken mi a enamorá for di promé biaha ku mi a mir’e. Tin e mama di Harriet, ku a uni na e Iglesia no muchu despues di a pèrdè su kasa dor di kanser. Tin mi ruman muhé, mi yu muhé, mi nieta, i mi bisa nieta – tur e personanan aki tabatin un influensia refiná riba mi. Berdaderamente nan ta trese klaridat den mi bida. Nan ta inspirá mi pa bira un hòmber mihó i un lider di Iglesia mas sensibel. Kon diferente mi bida lo tabata sin nan!

Kisas loke ta hasi mi mas humilde ta di sa ku e mesun influensia aki ta multipliká hopi biaha den Iglesia pa medio di abilidatnan, talentonan, inteligensia, i testimonio di e muhénan di fe manera bosonan.

Awor, algun di boso lo no sinti bo mes digno di un elogio tan haltu asin’ei. Kisas boso ta pensa ku boso ta demasiado insignifikante pa tin un influensia asina importante riba otronan. Kisas bo no ta ni konsiderá bo mes un “muhé di fe” pasó tin biaha bo ta lucha ku duda òf miedu.

Awe, mi ta deseá di papia na tur esnan ku a yega di sinti asin’aki- i probablemente esei ta inkluí nos tur sierto momento. Mi ta deseá di papia tokante fe – kiko e ta, kiko e por i no por hasi, i kiko nos tin ku hasi pa aktivá e poder di fe den nos bida.

Kiko Fe Ta

Fe ta un konvikshon fuerte tokante loke nos ta kere - un konvikshon asina fuerte ku e ta move nos pa hasi sierto kosnan ku normalmente nos lo no hasi. “Fe ta tin e seguridat ku loke nos tin speransa p’e i e sertesa di loke nos no ta mira.”2

Miéntras ku esaki tin sentido pa Kristiannan kreyente, hopi biaha e ta wòrdu konfundí pa esnan no kreyente. Nan ta sakudí nan kabes i puntra, “Kon un hende por tin seguridat den algu ku nan no ta mira?” Pa nan, esaki ta evidensia di irashonalidat di religion.

Loke nan nan no ta komprondé, ta ku tin mas manera di mira ku solamente ku nos wowonan. Tin otro maneranan pa sinti ku solamente nos mannan, tin otro maneranan pa tende ku solamente nos oreanan.

E ta algu manera e eksperensia ku un hobensita ku tabata kanando ku su wela. E kanto di e paranan tabata glorioso pa e hobensita, i e la señalá kada zonido na su wela.

“Bo ta tende esei?” e hobensita a puntra kada biaha. Pero su wela no por a skucha bon, i no por a sa di rekonosé e zonidonan.

Finalmente, e wela a bai na rudia i bisa, “diskulpá mi kariño. Bo wela no ta skucha masha bon.”

Un poko iritá, e hobensita a pone e wela su kara den su mannan, wak intenso den su wowonan, i bisa, wela, skucha mas duru!

Tin lèsnan den e historia aki tantu pa esnan ku no ta kere i esnan ku ta kere. No ta pasombra nos no por skucha algu, no ta nifiká ku no tin nada di skucha. Dos hende por skucha e mesun mensahe òf lesa e mesun versíkulo di eskritura, i un por sinti e testimonio di e Espíritu miéntras ku e otro no.

Na otro un banda den nos esfuerso pa yuda nos sernan kere eksperensiá e bos di e Espíritu i e beyesa amplio, eterno i profundo di e evangelio di Jesucristo, bisando nan pa skucha mas duru kisas no ta e manera mas mihó pa yuda.

Kisas un mihó konseho – pa tur esnan ku ke engrandese nan fe – ta di skucha diferente. E Apòstel Pablo a enkurashá nos pa buska e bos ku ta papia ku nos espíritu, no solamente na nos orea. E la siña, “E persona sin e Espíritu no ta akseptá e kosnan ku ta bini for di e Espíritu di Dios pero ta konsiderá nan komo lokura, i no por komprondé nan pasobra nan por wòrdu diserní solamente pa medio di e Espíritu.”3 Òf nos por konsiderá e palabranan di Saint-Exupéry’s Little Prince (trad. Saint-Exupery su Prinsesa Chikitu), ku a bisa: “Un hende por wak klaramente ku e kurason. Kualke kos esensial ta invisibel pa e wowonan.”4

E Poder i Límitenan di Fe

Tin biaha, no ta fásil pa desaroyá fe den e kosnan spiritual miéntras bibando den e mundu físiko. Pero ta bale la pena e esfuerso pasobra e poder di fe den nos bida por ta profundo. E eskrituranan ta siña nos pa medio di fe e mundu a wòrdu krea, awanan a wòrdu parti, mortonan a wòrdu lanta, riunan i serunan a wòrdu move for di nan kurso.5

Ainda algun por puntra, “Si fe ta asina poderoso, dikon ami no por risibí un kontesta na un orashon ferviente? Mi no mester parti laman òf move seru. Solamente mi mester di mi malesa pa bai or mi mayornan pa pordoná otro òf un kompañero eterno pa aparesé na mi porta ku un bukèt di flor den un man i un renchi di kompromiso na e otro. Dikon mi fe no por logra esaki?”

Fe ta poderoso, i hopi biaha ta resultá den milagernan. Pero ni maske kuantu fe nos tin, tin dos kos ku fe no por hasi. Un di nan, e no por viola un persona su albedrio.

Un hende muhé a hasi orashon pa añanan largu pa su yu muhé ku a bai pe por regresá bek na e redil di Señor i a sinti deskurashá ku aparentemente su orashonnan no a haña kontesta. Esaki tabata spesialmente doloroso ora e la skucha historia di otro yunan prodigio ku a arepentí di nan echonan.

E problema no tabata un falta di orashon òf un falta di fe. Solamente e ta tin ku komprondé, ounke kon doloroso ku e por ta pa nos Tata Selestial, E no por forsa ningun hende pa skohe e kaminda di rektitut. Dios no a forsa su propio yunan pa siguié den e mundu premortal. Kuantu ménos E lo forsa nos aworakí den nos biahe den e bida mortal?

Dios lo invitá i persuadi. E lo saka un man inkansablemente ku amor i inspirashon i enkurashamentu. Pero e nunka lo obligá – esei lo mina Su gran plan pa nos progreso eterno.

E di dos kos ku fe no por hasi ta forsa nos boluntat riba Dios. Nos no por forse pa kumpli ku nos deseonan – ni maske kuantu rason nos ta kere nos tin of kon sinseramente nos hasi orashon. Konsiderá e eksperensia di Pablo, ku a roga na Señor vários biaha pa alivio di un tribulashon personal – loke e la yama “un sumpiña den e kueru.” Pero esei no tabata Señor su boluntat. Eventualmente Pablo a realisá ku su tribulashon tabata un bendishon, i e la gradesí Dios pa no a kontesta su orashon manera e la spera.6

Konfiansa i Fe

No, e propósito di fe no ta pa kambia Dios su boluntat pero pa empoderá nos pa aktua riba Dios su boluntat. Fe ta konfiansa – konfiansa ku Dios ta mira loke nos no por i ku E sa loke nos no sa.7 Tin biaha, konfia den nos propio vishon i huisio no ta sufisiente.

Mi a siña esaki komo un piloto di aerolínea den dianan ku mi ta tin ku bula den neblina pisa òf nubianan di kua mi visibilidat tabata solamente algun meter. Mi mester a konfia den e instrumentonan ku ta indiká mi unda mi ta i unda mi ta bayendo. Mi mester a skucha na e bos di e kontrol aéreo. I mi ta tin ku sigui e guia di un persona ku ta tin e informashon mas korekto ku ami tabatin; Un hende ku mi no por a mira pero ku ma siña konfia. UN hende ku por mira loke ami no ta mira. Mi mester a konfia i aktua komo tal pa por a yega mi destinashon.

Fe ta nifiká ku nos ta konfia no solamente de Dios su sabiduria pero tambe den su amor. E ta nifiká konfia ku Dios stima nos perfektamente, ku tur kos ku E hasi – kada bendishon ku E duna i kada bendishon ku E, pa un tempu, tene atras – ta pa nos felisidat eterno.8

Ku e tipo di fe, ounke nos no por komprondé dikon sierto kosnan ta pasa or dikon sierto orashonnan no ta wòrdu kontesta, nos por sa ku finalmente  tur kos lo tin sentido. “Tur kos [lo] bin na su lugá pa bon pa esnan ku stima Dios.”9

Tur kos lo bin na su lugá. Tur kos lo bai bon.

Nos por ta sigur ku e kontesta lo bin, i nos por tin e konfiansa ku no solamente nos lo ta kontentu ku e kontestanan, nos lo ta abruma pa grasia, miserikòrdia, generosidat, i amor ku nos Tata Selestial tin pa nos, Su Yunan.

Sigui bati e porta

Te na e ora ei nos ta kana pa medio di kualke fe ku nos tin,10 buskando semper pa engrandese nos fe. Tin biaha, esaki no ta un tarea fásil. Esnan ku ta kansa fásil, òf no tin pasenshi, no ta komprometé, òf no tin kunes, por haña ku fe ta difísil pa enkontra. Esnan ku ta deskurashá lihé òf distraí kasi lo no eksperensia. Fe ta bin pa esnan humilde, esnan diligente, esnan ku ta perseverá.

E ta bin na esnan ku ta paga e preis di fidelidat.

E bèrdat ta ilustrá den e eksperensia di dos misionero yòn sirbiendo na Oropa, den un área kaminda no ta tin hopi konverso. Mi ta suponé ku lo tabata di komprondé pa nan pa pensa ku loke nan a hasi lo no hasi masha diferensia.

Pero e dos misioneronan aki tabata tin fe, i nan tabata komprometé. Nan tabata tin e aktitut di si ningun hende no ta skucha nan mensahe, esaki ta pasobra nan no a hasi nan máksimo esfuerso.

Riba un dia nan tabatin e sentimentu pa aserka e residentenan di un edifisio di apartamento bon mantené. Nan a kuminsá na promé piso i a bati na kada porta, presentando nan mensahe salbador di JesuCristo i e Restourashon di Su Iglesia.

Imagen
E edifisio di apartamento di Hermana Uchtdorf

Ningun hende den e promé piso ker a skucha nan.

Kon fásil por tabata pa bisa, “Nos a purba. Laga nos stòp akinan. Laga nos bai i purba den otro edifisio.”

Pero e dos misioneronan aki tabata tin fe i deseo di traha, i nan a sigui bati na tur porta den e di dos piso.

Atrobe, ningun hende no ker a skucha.

E terser piso tabata mesun kos. I e di kuater tambe – te ora nan a bati na e lastu porta na piso kuater.

Ora e porta a habri, un hobensita a sonreí ku nan i bisa nan pa warda miéntras e ta papia ku su mama.

E mama, ku tabatin solamente 36 aña, resientemente a perde su kasa. E no tabatin deseo di papia ku misioneronan Mormon i a bisé pa kore ku nan.

Pero e yu muhé a rog’e. E dos hóbennan aki ta asina bon, e la bisa. I solamente lo tuma algun minüt.

Sin masha gana, e mama a bai di akuerdo. E misioneronan a kompartí e mensahe i a duna e mama un buki pa lesa - E Buki di Mormon.

Ora nan a bai, e mama a disidí di lesa sikiera algun pagina.

E la terminá hinter e buki den algun dia.

Imagen
Famia di Hermana Uchtdorf ku misioneronan

No masha despues, e i su dos yu muhénan a drenta den e awa di boutismo.

Ora e famia chikí aki a asistí na e rama chikitu na Frankfurt, Alemania, un diákono hóben a ripara un di e yu muhénan i a bisa su mes, “ E misioneronan aki ta hasiendo un bon trabou!”

E diákono ei su nòmber tabata Dieter Uchtdorf. I e hobensita bunita ei – esun ku a roga su mama pa skucha e misioneronan – tin e nòmber selestial di Harriet. E a hasi un impakto rònt mundu miéntras e ta kompañá mi den mi biahenan. E la bendishoná bida di hopi hende pa medio di su amor pa e evangelio i su personalidat briante. Berdaderamente e ta e rayo di solo den mi bida.

Imagen
Hermana Uchtdorf papiando na Noruega

Kuantu biaha mi a halsa mi kurason den gratitut pa e dos misioneronan ku no a stòp na e promé piso! Kuantu mi kurason ta agradesido pa nan fe i nan obra. Kuantu biaha mi ta duna danki ku nan a sigui – hasta te na e lastu porta di e di kuater piso.

E lo wòrdu habri p’abo

Den nos búskeda di fe duradero, den nos búskeda pa konektá ku e infinito, laga nos kòrda e promesa di Señor: “Bati i lo habri p’abo.”11

Nos lo rindi despues di a bati riba un porta òf dos? Un piso of dos?

Òf nos ta sigui buska te ora nos yega e di kuater piso, e lastu porta?

Dios “a premio esnan ku ta busk’e sinseramente,”12 pero e premio ei usualmente no ta tras di e prome porta. Kermen nos tin ku sigui bati. Rumannan no entrega. Buska Dios ku tur bo kurason. Ehersé fe. Anda den rektitut.

Mi ta primintí bo ku si bo hasi esaki – te na e di kuater piso, e lastu porta – lo bo risibí e konosementu ku bo ta buska. Lo bo haña fe. I un dia lo bo ta yena ku e lus ku ta krese “mas briante te e dia perfekto.”13

Mi hermananan stima den Kristu, Dios ta real.

E ta bibu

E stima bo.

E konosé bo.

E ta komprondé bo.

E konosé e súplika silensioso di bo kurason.

E no a bandoná bo.

E lo no laga bo desampará.

Ta mi testimonio i mi bendishon apostóliko ku kada un di boso por sinti den bo kurason i mente e bèrdat sublime aki pa boso mes. Biba den fe, mi kerido amigunan, kerido hermananan, i “Señor [nos] Dios [lo] inkrementá bo mil biaha i bendishoná bo manera e la primintí!” 14

Mi laga ku bo mi fe, mi konvikshon, mi sertesa, mi testimonio inmovibel ku esaki ta e obra di Dios. Den e sagrado nòmber di nos Kerido Señor, Jesucristo, amèn.