Dake Kapahieu, Keimwseklahn Wenihmw
Koht kin “katingih irail kan me kin men rapahki Ih,” eri kitail anahnewie letelet. Riei lihoko, dehr pwangada. Rapahki Koht ni mohngiongomw unsek.
Riei lih akan, kempoakepahi kan, Ia wen kapai en atail pil pwurehng tuhpene nan kapokon lap wet pahn kaweid oh sounkaweid mwahu en atail soukohp Presiden, Thomas S. Monson. Presiden, se poakohng komwi oh se utung komwi! Se ese me ke poakohng lih akan nan Mwomwohdiso wet.
I kin perenki iang tiepene kaperen wet nan kapokon lap me kin wiawiheng lih akan nan Mwomwohdiso wet.
Riei lihoko, ansou me I kin kilang kumwail, I kin kalap medewe irail lih akan me wekidalahr ahi mour: ahi nohno kahlap oh ahi nohnou, me tepin alehda luhk en kohdo oh kilang duwen Mwomwohdiso wet.1Ahi pwoud kesemwpal, Harriet, me I nanmaskihda ansou me I tepin kilangadahu. En Hariet ah nohnou, me iangala Mwomwohdiso wet mwurinte ah pwoudo ah mehkihla kanser. Riei serepein, nei serepein, nein nei serepein, oh nei serepein dih kesilu—irail pwukat koaros me wia kahrepen ahi weliakapw. Irail, ni mehlel, kin wahdo popohl nan ahi mour. Irail me kin kamarainihie pwe I en wia ohl mwahumen oh soun kaweid en Mwomwohdiso lelepek men. Ia pahn mwoamwen ahi mour ma sohte irail!
Ele me keieu kihongie ien aktikitikla iei ahi esehla me mehn kakehlail wet kin wihwiawi pak dep kei nan Mwomwohdiso wet sang ni koahiek, talent kan, marain, oh kadehde en lih pwoson kan me duwehte kumwail.
Met, ekei kumwail mwein medewe me kumwail sohte warehng ale soangen kaping wet. Kumwail kak medewe me mwein sohte katepamwail oh kumwail sohte kak wekidala mehteikan. Kumwail mwein pil sohte medewe me kumwail “lih pwoson kei” pwehki amwail peikasal de masepwehk.
Rahn wet, I men koasoaieng koaros me ahnekiher soangen pepehm wet—oh mwein kakete iangahki kitail koaros ansou kis de ehu ansou. I men koasoaia duwen pwoson—dahkot pwoson, dahme e kak wia oh sohte kak wia, oh dahme kitail anahne wia pwehn kamwakid manaman en pwoson nan atail mour .
Pwoson Iei
Pwoson iei koapworopworki ni unsek mehkot me kitail kamehlele—uwen kehlail en koapworopworo e kak kamwakid kitail en wia mehkoat me kitail ele sohte kin wia. “Pwoson iei en ese ni mehlel dahme kitail kin kasik en wiawi oh kamehlele dahme kitail sohte kin kilang.”2
Detehn met wehwehiongme kin kamehlele kan, e kin kalap kapingada me sohte kamehlele kan. Re kin itik mongerail oh peidengki, Ia mwoamwen en aramaskak kamehlele dahme irail sohte kak kilang? Ong irail, met wia kasansalepen sapairair en mwomwohdiso.
Irail sohte wehwehki me kaidehn mesetail kan te me kitail kak kilangki wasa, kaidehn pehtailte me kitail kak kehnki wasa, oh kaidehn salengatailte me kitail kak rongki wasa.
Met duwehte irair ieu me kisin serepein men lelohng ansou me e ieiang ah nohnokahlapo alialu. Ngilen mahnpihr kan arail kokoul inenen kaselel ong kisin serepeino, kahrehda e kin kawehwe duwen ngihlko koaros ong ah nohnokahlapo.
“Ke rong mwo?” kisin serepeino kin kapwkapwurehieng. Ahpw eh nohnokalapo sohte kin rong wasa kahrehda e sohte kak rong ngihlko.
Ni ansouohte, nohnokahlapo itiekidi oh nda, Menlau mahk, nei seri. Nohnokahlap sohte kin rong mwahu wasa .
Kisin serepeino pwunodkihda, oh kolpene mesen ah nohnokahlapo nan pehko, kilang nan mesen liho oh nda, “Nohnokahlap, rong mwahu!”
Mie mehn kaskuhl nan soai pwoatet ong me sohte kamehlele oh me kamehlele. Pwehki atail sohte kak rong wasa sohte wehwehki me sohte mehkoat peido. Aramas riemen kak rong padahk ehute de wadek iren pwuhk sarawi ehute, ahpw emen pahn kak pehm kadehde sang Ngehno, ah mehteio soh.
Ahpw ni atail kin sewsewese kempoakepatail kan en kasawiada ngilen Ngehno oh uwen kaselel, lingan oh kesempwal en rongamwahu en Sises Krais, e sohte wia iren sawas mwahu ehu ma kitail ndahieng irail en “rong mwahu.”
Mwein e pahn wia kaweid mwahu—ong mehmen me men kalaudehla ah pwoson—en rongki ehu soahng tohrohr. Wahnparon Paul kangoangei kitail en rong ngihlo ki ngenatail kaidehnte salengatail. E padahngki, “Pwe mehmen me sohte kin ahneki Ngehn Sarawi sohte kak alehda dahme kin pwilisang rehn Ngehn en kauno ahpwkin wiahki mehkot mwahl,oh sohte kak wehwehki soahng pwukat pwehki sangete ni kaweid en Ngehno me kitail pahn kak en wehwehki soahng pwukat koaros..”3 De kitail kak medewehki koasoi me Saint-Exupéry’s Little Prince koaosia: “Aramas men kak kilang mwahu ma re doadoahngki arail mongiong. Mehkoaros me kesempwal sohte kin sansal mwon meserail kan.”4
Manaman oh Imwilahn Pwoson
Ekei ansou e sohte mengei ni atail momour pohn sampa en pwoson mehkot ni pali ngehn. Ahpw kitail anahne soang pwehki manaman en pwoson nan atail mour kan me inenen kehlail. Pwuhk sarawi padahkiheng kitail me pwehki pwoson, sampa kan wiawihda, sehdo pwalpeseng, me mehlahr kan pwourda, pil lap oh nahna kan kemweki sang nan deuwarail kan.5
Ahpw ekei kak peidengki, “Ma pwoson inenen kehlail, dahme kahrehda I sohte kak ale pasapeng pen ahi kapakap ngidingido? I sohte anahne sehd en pwalpeseng de nahna en mwekid. I anahnehte ahi soumwahuo en mwahula de ahi nohno/pahpa en mahkpene de iengei soutuko en pwarada ni imweio weuwa dunen rohs ehu nan apali peh oh ehu rihng en inoun pwopwoud nan peh teio. Dahme kahrehda ahi pwoson sohte kak wiahda mepwukat?”
Pwoson iei manaman kehlail, oh kin kalapw pweida ni doadoahk kapwuriamwei kan. Ahpw sohte lipilipil uwen laud en atail pwoson, soang riau me pwoson sohte kak wia. Keieu, e sohte kak kauwehla en aramas saledek en pilipil.
Emen lih kin wie kapakapki sounpar kai nah serepein men me solahr iang sarawi en pwuredo rehn Krais oh mwaroskilahr eh sohte pasapengpen ah kapakap ko. E pil kin ehute kamedek ni eh kin rong rongen ekei seri salongalahr kan arail koluhla oh weksangehr arail wiewia kan.
Kahpwalo sohte mihmi ni seuitar en kapakap de pwoson. Liho anahnehte wehwehki me, detehn e pil kak kamedek ong Samatail Nanleng, E sohte pahn ketin iding ong emen aramas en pilada elen mour pwung. Koht sohte kin ketin iding Sapwellime seri kan en idawen Ih nan mour mwohn mour wet. Ia uwen E sohte pahn ketin iding kitail ni atail wie seiseilok nan mour wet.
Koht pahn kin ketin luke oh kamantik. Koht pahn kin ketin kapkapahdohte sapwellime limpoak oh kamarain oh kakehlail. Ahpw Koht sohte pahn ketin iding—pwe ede kasohwe Sapwellime koasondi lap ong atail keirda soutuk.
Keriau, pwoson sohte kak idingki Koht insenatail. Kitail sohte kak idingki Koht en kapwaiahda atail ineng kan—menda ma kitail medewe me kitail pwung oh kin kapakap ni ngidingid. Medewe en Paul ah peki rehn Kauno ni ngidingid pangkei en kapitasang ih nan ah kahpwal ehu me e karasahieng “mehkot takatek mih nan uduk.” Ahpw kaidehn kupwuren Koht met. Ni ansouohte Paul ahpw diarada me kahpwalo wia kapai ehu, oh ih eri kapingkihong koht pwehki Eh sohte sapeng ah kapakap nin duen dahme e kasik.6
Likilik oh Pwoson
Soh, kaidehn kahrepen pwoson en wekidala kupwuren Koht ahpw en kakehlailih kitail en kapwaiada kupwuren Koht. Pwoson iei liki—liki me Koht ketin mahsani dahme kitail sohte kakehng oh E ketin mwahngi dahme kitail sohte kinwia.7 Ekei ansou, liki dahme kitail wehwehki oh pein kasawiada sohte itar.
I esehla met ni ansou me I wia pilot men ni rahn kan me I kin mihla nan pwoki de depwek mosul kan oh kak kilang uwen reirei en piht keite mwohi. I kin doadoahngki dipwisou kan me padahkiheng ie ia wasa I mihmi ie oh ia wasa I kohkohla ie. I kin anahne rong kaweid sang wasahn kaweid sompihr kan. I kin anahne idawehn kaweid me kohsang emen me esehsangie irehn mesen leng. Emen me I sohte kak kilang ahpw me I esehla liki. I anahne liki oh idawehn ni pwungih pwe I en kak lel wasa me I kokohlahng ie.
Pwoson wehwehki me kitail anahne liki kaidente eripit en Koht ahpw pil Sapwellime limpoak. E wehwehki liki me Koht ketin poakehng kitail ni unsek, oh mehkoaros me E ketin wia—kapai koaros me E ketkiheng kitail, kapai koaros me E ketin, ekei ansou, koledi sang kitail—kin wiawi pwe kitail en ahneki peren poatoapoat.8
Ma kitail pahn kolokol soangen pwoson wet, kitail kak sohte wehwehki dahme kahrehda soahngkan kin wiawi de ekei kapakap sohte kin pasapengla, kitail kak ese me ni imwilaho mehkoaros pan sansalda. “Soahng koaros pahn doadoahkpenen ohng kamwahupen irail akan me kin poakohng koht.”9
Mehkoaros pahn kapwungpwungla. Mehkoaros pahn mwahula.
Kitail kak ese ni mehlel me pasapeng pahn kohdo, oh kitail kak kamehlele me kaidehnte kitail pahn itarkihla pasapengko, ahpw kitail pahn pil direkihla uwen kalahngan, mahk, kadek, oh limpoak me Samatail Nanleng sapwellimanikiong kitail, Sapwellime serihkan.
En Wie Letelet
Lao lel met, kitail kin mwekmwekid nin duwen atail pwoson,10,raparapahki ansou koaros en kalaudehla atail pwoson. Ekei ansou, doadoahk wet sohte kin mengei. Irail kan me mwadang pwangada, sohte kanengama, sohte nseno de soukautih, pahn diar me sohte arail pwoson. Irail kan me mwadang mwarosala de loalmasarang sohte pahn kak kehn pwoson. Irail kan me karakarahk, pwerisek oh kanengama me kin ahneki pwoson.
E kin kohien irail kan me kin nanantiong en pwosonla.
Mwekid wet sansalda sang nan irair me mesneri riemen alehdi ni ara wie doadoahk nan Europe, nan wasa ehu me aramas malaulau pepdaislahr. I kak inda me ira medewe me dahme ira wiadahr sohte pahn kahrehda wekidekla laud ehu.
Ahpw mie en misneri riemenet ara pwoson, oh ira udahn mehleliong ara doadoahk. Ira kamehlele me ma sohte me men rong ara kalohk, kaidehn pwehki dene ira sohte nantiheng uwen ara kak koaros.
Ehu rahno, ira medewehda ira en kalohk ong tohn ihmw en apartment kaselel ehu poseke pahieu. Ira tepda ni dake keieuo oh letelet ni wenihmw koaros, wie kalkalohngki duwen rongamwahu en Sises Krais oh Kapwurpwurdohn Sapwellime Mwomwohdisou.
Sohte mehmen nan dake keieuo men rong ira.
E mengei ong ira en nda, “Se pwangehr. Kita uhdi met. Kita kohla rapahkihda ehu ihmw tohrohr.”
Ahpw mesneri riemenet ahniki pwoson oh ira eri nantilahte wia ara doadoahk, wie letelet ni wenihmw koaros nan posoke keriauo.
Sohte mehmen pil men rong ira.
Pohn dake kesiluho pil duwehte. Oh pil duehte dake kapahieu—e wihwia soahngo, lao letelet ni keimwseklahn wenihmw pohn dake kapahieuo.
Ni wenihmwo ah ritida, kisin serepein kis sireilahng ira oh peki ira en awi pwe e pahn koasoaieng ah nohnou.
En serepeino nohnou sounpar 36— ah pwoudo apwtehn kepinsalehdala oh e sohte men koasoaieng mesneri en Mormon ko, eri e ndahieng nah serepeino en kadar irahla.
Ahpw serepeino peki rehn ah nohnou en tuhong ira. Serepeino nda, mwahnakapwko inenen mwahu. Oh e pahn reireikihte minit kei.
Nohnou eri seirenla oh pwungkihla. Mesneriko wiahieng ara kalohk oh kiheng nohnou en wadek pwuhk ehu—Pwuken Mormon.
Mwurin ara mweselda, nohnou koasonehdi me e pahn wadek ekis pwuhko.
Liho kanekehla pwuhko pwon mwurin rahn kei.
Mwurin ansou kis, sin peneinei tikitik et ahpw pepdaisla.
Ni ansou me peneinei tikitik wet iang sarawi nan arail ward nan Frankfurt, Germany, emen dihken pwulepwulo kilangada uwen kaselel en emen serepeinko oh medewehieng pein ih, Mesneri pwukat uhdahn wiewia doadoahk kaselel ehu.
Eden dihken pwulepwulo iei Dieter Uchtdorf. Oh peinakapw kaselelo—iei ih me peki ah nohnou en rong mahs mesneriko—me adaniki ahd kaselel iei Harriet. Koaros me kin tuheng kin poakepoake ni ah iangie seiloak. E kapaiada mohngiong en aramas tohto sang ni ah limpoak ong rongamwahu wet oh ah wia aramas mwahu. Udahn e wia kalingan pen ahi mour.
I kin kalap perenda oh kaping kalahnganki en mesneri riemeno ara sohte uhdihte ni dake keieuo! I pil kin kalap kaping kalahnganki ara pwoson oh aradoadoahk. Pak tohto me I kapingki ara sohte uhdi lau lel posoke kapahieu ni keimwseklahn wenihmw.
E Ahpw Pahn Ritidahng Kumwai
Ni atail kin raparapahki pwoson poatopot, ni atail wie soangosoang en ehuiengla Koht oh Sapwellime koasondihkan, kitail anahne tamataman en Kauno inouo: “Letelet, e ahpw pahn ritidahng kumwail.”11
Da kitail pahn uhdi mwurin atail letelet pohn wenihmw ehu de riau? Dake ehu de riau?
De kitail pahn wie ropirop lao kitail lel pohn dake kapahieu, ni keimwseklahn wenihmw?
Koht “kin ketin katingih irail kan me kin raparapahki Ih,”12 ahpw katingo sohte kin kalapw kohda mwurin keieun wenihmwo. Eri kitail anahne wie letelette. Riei lihoko dehr uhdi. Rapahki Koht ki ahmw mohngiong unsek. Doadoahngki pwoson. Weweid nan mour pwung.
I inouki me ma kumwail pahn wia met—lao lel ni keimwseklahn wenihmw pohn dake kapahieuo—kumwail pahn ale pasapeng me kumwail raprapahki. Kumwail pahn diar pwoson. Oh ehu rahn kumwail pahn audaudkihda marain me wie “marmarainla oh pahn marainla lao lel ni rahn kaselelo.”13
Riei lih kesempwalkan rehn Krais, Koht uhdahn mie.
Eketin Ieias.
E poakohng kumwail.
E mwahngih ihs kumwail.
E ketin wehwehkin kumwail.
E ketin mwahngi mengmengloal en amwail mohngiong kan. .
E sohte pohnsehseikumwail la.
E sohte pahn keseikumwail la.
Iei ahi kadehde oh kapai sarawi ong kumwail koaros me kumwail pahn kehn nan amwail mohngiong oh madamadau kan duen pwung kesemwpwal wet ohng pein kumwail. Momour ki pwoson, kempoakepai kan, riei lih kesempwal kan, oh “Kauno Koht [pahn] kakair kumwailda pak kid kei oh kapai kumwailda nin duwen sapwellime inou!”14
I pwilikihdieng kumwail ahi pwoson, ahi koapworopwor, oh ahi kadehde teng oh kehlail me sapwelimen kauno doadoahk met. Ni lengileng sarawi en atail Sounkomour Kempoakeo, ni mwaren Sises Krais, amen.