Fogafale Fa, Faitotoa Mulimuli
E “tauia e le Atua i latou e saili atu ma le naunautai ia te Ia,” o lea ia tu’itu’i ai pea. Tuafafine, aua le fiu. Saili atu i le Atua ma lou loto atoa.
Ou tuafafine pele, au uo pele, ua faamanuiaina lava i tatou e toe potopoto foi i lenei konafesi i le lalolagi atoa i lalo o le taitaiga ma le faamalumaluga a lo tatou perofeta pele, Peresitene Thomas S. Monson. Peresitene, matou te alolofa ia te oe ma lagolagoina oe! Matou te iloa e te alofa i tuafafine o le Ekalesia.
Ou te fiafia lava e auai i lenei sauniga matagofie o le konafesi aoao ua patino lava mo tuafafine o le Ekalesia.
Tuafafine, a ou vaai ia te outou, e le mataofiofia lo’u mafaufau i tamaitai na matua faatosinaina lo’u olaga: lo’u tinamatua ma lo’u tina, o e na muamua taliaina le valaaulia ia o mai ma vaavaai i le uiga moni o le Ekalesia.1 O loo i ai la‘u manamea pele, o Harriet, o le na ou alofa faamama‘i i ai i le taimi muamua na ou vaai ai ia te ia. O loo i ai le tina o Harriet, o le na auai i le Ekalesia ae lei leva ona maliu si ona toalua i le kanesa. Ona mai lea i lo’u tuafafine, lo’u afafine, le afafine o lo’u atalii, ma le afafine o le atalii o lo’u afafine—o nei tagata uma ua i ai ni faatosinaga lelei tele mo a’u. Latou te aumai moni lava le lasusulu i lo’u olaga. Latou te uunaia a’u ia avea ma se tagata lelei atu ma se taitai o le Ekalesia e sili atu ona nofouta i isi. Semanu e ese so’u olaga pe a na le seanoa ma i latou!
Masalo o le mea e sili ona faamaualalo ai a’u o le iloaina lea o le faatosinaga lava e tasi e faamiliona ona fai soo i le Ekalesia atoa e ala i tomai, taleni, atamai, ma le molimau a tamaitai o le faatuatua e pei o outou.
Ia, o nisi o outou atonu e lagonaina le le agavaa i le matua viia faapea. Atonu e te manatu e te le taua tele i le faia o se faatosinaga anoa i isi. Masalo e te le o manatu ia te oe lava ia o se “tamaitai o le faatuatua” ona o nisi taimi e te tauivi ma le masalosalo po o le fefe.
O le asō, ou te fia talanoa atu ai i soo se tasi o loo lagonaina sea lagona faapea—ma atonu e aafia uma ai tatou i nisi taimi. Ou te fia talanoa atu i le faatuatua—o le a le faatuatua, o le a se mea e mafai ma lē mafai ona ia faia, ma o le a se mea e tatau ona tatou faia e faaola ai le mana o le faatuatua i o tatou olaga.
O Le A Le Faatuatua
O le faatuatua o se talitonuga maumaututu malosi e uiga i se mea tatou te talitonu i ai—o se talitonuga maumaututu e matuai malosi lava lea e uunaia i tatou e fai ni mea ia e ono le mafai ona tatou faia. “O le faatuatua o le faalagolago lea i mea ua faamoemoe i ai, o le mautinoa lea o mea e le o vaaia.”2
E ui e sa’o lenei mea i tagata talitonu, ae tele ina fenumiai ai le au le talitonu. E lulu o latou ulu ma fesili, “E mafai faapefea e se tasi ona mautinoa i mea latou te le mafafai ona vāai i ai?” Ia i latou, o se faamaoniga lenei o le faavalevalea o tapuaiga.
Ae o le mea latou te le o malamalama i ai, o loo tele atu isi auala e vaai ai nai lo o tatou lava mata, tele atu auala e lagona ai nai lo o tatou lava lima, tele atu auala e faalogo ai nai lo o tatou lava taliga.
E tai pei o le aafiaga o se teineiitiiti sa ō e savavali ma lona tinamatua. Sa matua mamalu pesega a manulele i le teineiititi, ma sa ia faailoa atu leo uma i lona tinamatua.
“O e faalogo atu i le leo le la?” sa fesili atu ai pea lava pea le teineitiiti. Ae sa le lelei le faalogo a lona tinamatua ma sa le mafai ai ona ia lagonaina ia leo.
Mulimuli ane, sa tootuli ifo ai tinamatua ma fai atu, “Faamalie atu, la’u pele. E le lelei le faalogo a tinamatua.”
Sa tau le fiafia le teineitiiti ma tago atu i foliga o lona tinamatua, pulato’a i ai ma le naunautai i ona mata, ma fai i ai, “Tinamatua, faalogo atili!”
O loo i ai lesona i lenei tala mo ē uma e le talitonu ma ē foi e talitonu. E le faapea ua le mafai ona tatou faalogoina se mea ona faapea ai lea e le o i ai se mea e faalogo i ai. E mafai ona faalogo ni tagata se toalua i le savali lava e tasi pe faitau i le fuaiupu lava e tasi o se mau, ma e mafai ona lagona e le tasi le molimau a le Agaga, ae le lagonaina e le isi.
I se isi itu, i a tatou taumafaiga ia fesoasoani i e pele ia i tatou ia lagonaina le siufofoga o le Agaga atoa ai ma le matagofie tele, faavavau ma le loloto o le talalelei a Iesu Keriso, o le ta’u atu ia i latou ia “faalogo atili” atonu e le o le ala sili lea ona aoga.
Masalo o se fautuaga lelei atu—mo soo se tasi e fia manao e faateleina le faatuatua—o le faalogo lea i se auala e ese ai. O loo uunaia i tatou e le Aposetolo o Paulo ia saili atu i le siufofoga o loo fetalai mai i o tatou agaga ae le na o o tatou taliga. Sa ia aoao mai, “E le talia e le tagata faaletino o mea a le Agaga o le Atua; aua o mea valea ia ia te ia, na te le mafai foi ona iloa, aua e faamasinoina faaleagaga.”3 Pe tatau foi ona tatou mafaufau i upu a le tusi a Saint-Exupéry, le Little Prince, lea na fai mai: “E na o le loto e manino ai le vaai a se tasi. Soo se mea taua lava o le a le vaaia e mata.”4
O Le Mana ma Tapulaa o le Faatuatua
O nisi taimi e le faigofie le atiaeina o le faatuatua i mea faaleagaga a o ola ai i se lalolagi faaletino. Ae e tauia ia taumafaiga, ona o le mana o le faatuatua i o tatou olaga e mafai ona matua loloto lava. Ua aoao i tatou e tusitusiga paia e faapea o le faatuatua na foafoa ai le lalolagi, na vaevae ai vai, faatutu ai e na oti, na aveesea ai mauga ma vaitafe mai o latou ala.5
Ae e ono fesili nisi, “Afai e matua mamana tele le faatuatua, aisea e le mafai ai ona ou mauaina se tali i se tatalo faamaoni? Ou te le manaomia se sami e vaeluaina, po o se mauga ia aveese. Na o lo’u ma’i lava ou te manaomia ia aveesea pe, ia faamagalo e o’u matua le tasi ma le isi, po o se soa e faavavau e tu mai i lo’u faitotoa ma se teufugalaau i le tasi lima ma se mama faamau i le isi lima. Aisea e le mafai ai e lo’u faatuatua ona faia lena mea?”
O le faatuatua e mamana tele, ma e tele lava ina tupu ai vavega. Ae po o le a lava le tele o lo tatou faatuatua, e lua mea e le mafai e le faatuatua ona fai. Mo le tasi, e le mafai ona ia aiāina le faitalia o se tagata.
Sa tatalo le tasi fafine mo le tele o tausaga ina ia toefoi mai lana tama teine sa se ese mai le lafu a Keriso ma lagona ai le lotovaivai e faapea ua le taliina ana tatalo. Sa atili ai le tiga ina ua ia faalogo i tala o isi fanau faamaumau oa ua toe salamo i o latou ala sese.
O le faafitauli e le o le le lava o tatalo po o se leai o se faatuatua. Sa na o le pau le mea na manaomia ona ia malamalama i ai e faapea, e ui e ono tiga matuitui foi mo lo tatou Tama o i le Lagi, ae o le a Ia le fosia lava se tasi e filifili le ala o le amiotonu. Sa lei fosia e le Atua Lana lava fanau e mulimuli ia te Ia i le muai olaga. E mautinoa lava o le a Ia le fosia lava i tatou i le taimi nei a o tatou faimalaga ai i lenei olaga faaletino.
O le a valaaulia e le Atua, ma faatauanau. O le a aapa mai pea le Atua ma le le faavaivai ma le alofa ma musumusuga ma faamalosiauga. Ae o le a le fosia lava e le Atua—o le a faatoilaloina ai e lena mea Lana fuafuaga sili mo lo tatou tuputupu ae e faavavau.
O le mea lona lua e le mafai ona faia e le faatuatua o le fosi lea o o tatou loto i le finagalo o le Atua. E le mafai ona tatou fosia le Atua ia lolo mai i o tatou manaoga—e tusa lava pe sa’o o tatou manatu po o le faamaoni foi o a tatou tatalo. Mafaufau i le aafiaga o Paulo, lea na tele taimi na aioi atu ai i le Alii mo se toomaga mai se tofotofoga faaletagata lava ia—lea na ia ta’ua o “le mea matuitui i le tino.” Ae e le o se finagalo lena o le Atua. Mulimuli ane sa iloa e Paulo o lona tofotofoga o se faamanuiaga, ma sa ia faafetai atu i le Atua mo le le taliina o ana tatalo i le auala sa ia faamoemoe ai.6
Faalagolago ma le Faatuatua
Leai, o le faamoemoega o le faatuatua e le o le suia o le finagalo o le Atua ae ia faamanaina i tatou ia faatino le finagalo o le Atua. O le faatuatua o le faalagolago—faalagolago e silafia e le Atua mea e le mafai ona tatou vaaia ma Na te silafia mea tatou te le iloaina.7 O nisi taimi, o le faalagolago i la tatou lava vaai ma faaiuga ua le lava lea.
Sa ou aoaoina lenei mea a o avea ma se pailate vaalele, i aso pe a ou lele atu i ao mafiafia po o puao ma na o ni nai futu i luma atu sa mafai ona iloa atu. Sa ao ona ou faalagolago i meafaigaluega na ta’u maia ia te a’u po o fea o ou i ai ma le mea sa ou agai atu i ai. Sa ao ona ou faalogo i le leo o masini faatonutonu o le ea. Sa ao ona ou mulimuli i le taitaiga a se tasi e sili atu ona maoti ana faamatalaga nai lo au. O se tasi na le mafai ona ou vaaia ae sa ou aoao ia faalagolago i ai. O se tasi na mafai ona vaaia mea sa le mafai ona ou vaaia. Sa ao ona ou faalagolago ma faatino ma le tatau ina ia taunuu ai ma le saogalemu i lo’u taunuuga.
O le faatuatua o lona uiga e le gata tatou te faalagolago i le poto o le Atua ae faapena foi i Lona alofa. O lona uiga o le faalagolago lea i le Atua e alofa ma le atoatoa ia i tatou, o mea uma Na te faia—o faamanuiaga uma Na te foai mai ma faamanuiaga uma Na te taofia mo se taimi—e mo lo tatou fiafia e faavavau.8
Faatasi ai ma lenei ituaiga o faatuatua, e ui atonu tatou te le malamalama i le mafuaaga e tutupu ai ni mea patino po o le mafuaaga e le taliina ai ni fesili patino, ae mafai lava ona tatou iloa i le taimi mulimuli o le a malamalama mea uma. “E galue ... mea uma lava mo le lelei faatasi ma i latou o e ua alolofa [i le Atua].”9
O le a tonu mea uma. O le a lelei mea uma.
E mafai ona tatou mautinoa o le a oo mai tali, ma e mafai ona tatou talitonuina e le gata o le a faamalieina i tatou i tali, ae o le a faagaeetiaina foi i tatou i le alofa tunoa, alofa mutimutivale, agaalofa, ma le alofa o lo tatou Tama Faalelagi mo i tatou, o Lana fanau.
Ia Tu’itu’i Pea.
Seia oo i lena taimi, tatou te savavali pea i soo se faatuatua ua ia i tatou,10 ma saili pea i taimi uma ia faateleina lo tatou faatuatua. O nisi taimi, e le o se sailiga faigofie lenei mea. O i latou e lē onosai, e lē tuuto, pe lē faaeteete e ono iloaina e faigata ona maua le faatuatua. O i latou e vave ona faalotovaivaia pe faalavelaveina e faigata ona lagonaina. O le faatuatua e oo mai i ē lotomaualalo, filiga, ma tumau.
E oo mai ia i latou e totogia le tau o le faatuatua.
O lenei upumoni ua faaalia i le aafiaga o ni faifeautalai talavou se toalua na auauna atu i se eria sa toalaiti lava ni papatisoga liliu mai. Ou te manatu e ono malamalama mo i laua le mafaufau o le mea sa la faia o le a le faia ai se eseesega tele.
Ae o nei faifeautalai e toalua sa i ai le faatuatua, ma sa tuuto atu. Sa ia i laua le uiga e faapea afai e leai se tasi e faalogo i le la savali, o le a le mafua ona sa la le’i faia se taumafaiga sili la te mafaia.
I se tasi aso, na tonu ai ia i laua e o atu i tagata o loo nonofo i se fale mautotogi fogafale fa manaia lava. Sa la amata i le foafale muamua ma sa tu’itu’i i faitotoa taitasi, ma tuu atu i ai le savali lavea’i a Iesu Kerso ma le Toefuataiga o Lana Ekalesia.
Sa leai ma se tasi i le fogafale muamua na faalogo ia i laua.
Sa faigofie lava le faapea mai, “Sa ta taumafai. Ta faamuta ai loa ii. Ta ō ia e faataitai se isi fale.”
Ae o nei faifeautalai e toalua sa i ai le faatuatua ma sa naunau e galulue, ma o lea sa la tu’itu’i ai i faitotoa uma i le fogafale lua.
Sa faapena foi, na leai se tasi na faalogo.
Sa faapena foi ma le fogafale tolu. Ma sa faapena foi ma le lona fa—seia oo ina la tu’itu’i i le faitotoa mulimuli i le fogafale fa.
Ina ua matala mai lena faitotoa, sa ataata mai se teineitiiti ia i laua ma fai mai ia i laua e faatali ae se’i talanoa atu i lona tina.
Sa na o le 36 tausaga o lona tina i lena taimi, ae faato’a maliu atu lava lana tane, ma sa leai ma sona fia talanoa i ni faifeautalai Mamona. Ae sa ia fai atu i lana tama teine e tutuli ese i laua.
Ae sa aioi atu pea i ai lana tama. O le lelei ia o nai alii talavou ia, o lana tala lea. Ma e na o ni nai minute lava e alu ai.
Sa malie i ai le tina ma le musuā. Sa tuu atu e faifeautalai le la savali ma tauaao atu i ai se tusi i le tina e faitau—le Tusi a Mamona.
Ina ua la o ese, sa tonu i le tina o le a ia faitaua na o ni nai itulau.
Sa ia faaumaina le tusi atoa i totonu i ni nai aso.
Sa lei pine, ae ulu atu lenei aiga ma le tina nofotoatasi i vai o le papatisoga.
Ina ua auai lea aiga toalaiti i lo latou paranesi i Frankfurt, Siamani, sa matauina e se tiakono talavou le lalelei o se tasi o ana tama teine ma manatu ifo ia te ia, “O loo faia e nei faifeautalai se galuega maoae!”
O le igoa o le tiakono talavou lea o Dieter Uchtdorf. Ma o le tamaitai talavou lalelei—lea na aioi atu i lona tina ia faalogo i faifeautalai—o lona igoa matagofie o Harriet. E alofagia o ia e tagata uma latou te feiloai a o ia faafeaoina au i au malaga. Ua ia faamanuiaina ia olaga o le toatele o tagata e ala i lona alofa mo le talalelei ma ona uiga tausaafia. O ia moni lava o le lasusulu i lo’u olaga.
Ua faafia ona ou siitia lo’u loto i le faafetai mo faifeautalai e toalua sa le’i taofi i le faitotoa muamua! Ua faatele lo’u agaga faafetai mo lo la faatuatua ma galuega. Ua faatele ona ou faafetai i lo la faaauau pea—ma oo atu ai i le fogafale fa, ma le faitotoa mulimuli.
O Le A Tatala atu ia te Outou
I la tatou sailiga mo le faatuatua tumau, i la tatou sailiga ia fesootai atu i le Atua ma Ona faamoemoega, ia tatou manatua le folafolaga a le Alii: “Tu’itu’i atu, ona [tatalaina] ai lea ia te outou.”11
Pe o le a tatou fiu ea pe a uma ona tu’itu’i i se faitotoa se tasi pe lua? Se fogafale se tasi pe lua?
Pe o le a tatou saili pea seia oo ina tatou tau atu i le fogafale fa, le faitotoa mulimuli?
O le Atua “na te tauia mai o e matuā saili ia te ia,”12 ae o lena taui e le masani ona maua i tua atu o le faitotoa muamua. O lea ia tatou tu’itu’i ai pea. Tuafafine, aua le fiu. Saili atu i le Atua ma lou loto atoa. Faatino le faatuatua. Savali i le amiotonu.
Ou te folafola atu afai o le a e faia lenei mea—seia oo atu i le fogafale fa, i le faitotoa mulimuli—o le a e mauaina ia tali o loo e sailia. O le a e mauaina le faatuatua. Ma o le a i ai se aso o le a faatumulia ai oe i le malamalama e tuputupu “susulu ... tele pea lava pea seia oo i le aso e atoatoa ai.”13
Ou tuafafine pele ia Keriso, e moni le Atua.
O loo soifua o Ia.
E alofa o Ia ia te oe.
E silafia e Ia oe.
E malamalama o Ia ia te oe.
E silafia e Ia aioiga leleoa o lou loto.
Na te le i tuulafoaia lava oe.
O le a Ia le lafoai ese lava oe.
O la’u molimau ma le faamanuiaga faaaposetolo lea ia te outou taitoatasi ina ia outou lagona i o outou loto ma le mafaufau lenei upumoni paia mo outou lava. Ola i le faatuatua, uo pele, tuafafine pele, ma “[o le a] atili faatoateleina outou e le Alii [lo tatou] Atua ia faatoaafeina, ma ia manuia outou e pei ona fetalai mai o ia ia te outou!”14
Ou te tuua ia te outou lo’u faatuatua, lo’u talitonuga maumaututu, ma la’u molimau mautinoa ma le le maluelue o le galuega lenei a le Atua. I le suafa paia o lo tatou Faaola pele, i le suafa o Iesu Keriso, amene.