2010–2019
God Bae i Ravemaot Ol Wota blong Ae
Oktoba 2016


God Bae i Ravemaot Ol Wota blong Ae

Taem yumi eksasaesem fet blong yumi long Sevya, bae Hem i leftemap yumi mo karem yumi tru long ol tes blong yumi, mo long en, bae sevem yumi insaed long selestial kingdom.

Olsem we i stap long plan blong Papa long Heven, Hem i letem fasin blong harem nogud i stap insaed long ol eksperiens blong yumi long wol ia. 1 Bambae i luk olsem se samfala long yumi i pas tru long sam tes we i moa bigwan bitim ol narafala, tingbaot se yumi evriwan i safa mo stap traehad. Hem i prea blong mi se bae Tabu Spirit i gaedem yumi blong save andastanem from wanem i mas hapen olsem.

Taem yumi lukluk long ol had eksperiens blong laef ia wetem fet long Kraes, bae yumi save luksave se i gat wan gudfala stamba tingting insaed long ol safaring ia. Olgeta we oli fetful oli save eksperiensem trutok insaed long kaonsel blong Pita. Hem i raetem, “Sipos yufala i stap harem nogud long bodi blong yufala from ol gudfala fasin blong yufala, be long tingting blong yufala, yufala i save harem gud.”2 Taem yumi mekem “ol hat blong yumi blong andastanem,”3 bambae yumi save leftemap fasin blong stanap strong long ol tes mo lanem samting—mo kam moa gud—aot long ol samting ia. Andastaning olsem i save givim wan ansa long kwestin ia “?From wanem ol nogud samting i stap hapen long ol gudfala man?”

Evriwan we oli stap lisin tedei oli stap pas tru long hadtaem from oli stap olgetawan nomo, oli no moa gat hop, o stap filim sore. Sapos yumi no lukluk wetem “wan ae we i gat fet”4 mo andastanem tru tok ia we i no gat en blong hem, bambae yumi faenem se ol harem nogud mo ol safaring we yumi stap fesem long wol ia i save blokem yumi blong luksave se bigfala plan blong Papa long Heven hem i truplan blong glad ia we i no save finis. I no moa gat wan narafala rod blong save kasem glad ia we i fulwan.5

God i stap invaetem yumi evriwan blong ansa long ol hadtaem ia wetem fet, blong bambae yumi save kasem ol blesing mo kasem save ia we i no moa gat nara rod blong lanem. Yumi kasem instraksen blong mas kipim ol komanmen evri taem, from “hem we i stap fetful long ol hadtaem, hem i gat bigfala presen insaed long kingdom long heven.” 6 Mo olsem we yumi ridim insaed long skripja, “Sapos yufala i harem nogud, singaot long God we i Lod blong yu long prea, blong ol sol blong yufala i save faenem glad.”7

Aposol Pol, we hem i bin fesem plante hadtaem, hem i yusum ol eksperiens blong hem blong tijim impoten lesen ia we yumi save lanem taem yumi stanap strong kasem en wetem fasin blong save wet longtaem. Hem i talem, “Ol trabol we i kasem mifala i smol nomo, mo i no save stap longtaem, be frut blong olgeta i gud tumas i mekem mifala i rere blong joen long gudfala laef ia we i no save finis.” 8 Long nara toktok, yumi save lanem; long medel blong hadtaem blong yumi; se God i bin givim wan presen we i no save finis, blong pemaot yumi.

Fasin blong Pol blong save tokbaot ol tes, ol hadtaem, mo ol harem nogud long laef blong hem olsem ol “smol trabol nomo” i haedem ol bigfala safaring blong hem, we hem i draonem insaed long ol tijing blong gospel ia we i no save finis. Fet blong Pol long Jisas Kraes i mekem se hem i save fesem evri samting. Faev taem oli bin wipim hem, tri taem oli wipim hem wetem stik, wan taem oli bin stonem hem, tri taem hem i stap long sip we i rek, kolosap hem i ded long ol wota we i ron bigwan, mo long ol stil man, mo long han blong olgeta we oli talem se oli fren blong hem be oli giaman; bodi blong hem i soa from hem i wok had tumas, hem i hanggri mo tosta, mo oli sarem hem long kalabus long ples we i kolkol mo hem i nogat klos.9

Plante long yumi i bin krae long God blong karemaot ol samting we i stap mekem yumi safa, mo taem harem gud ia we yumi stap wantem i no kam, yumi stap tingting se Hem i no stap lisin long yumi. Mi testifae se, iven long ol taem olsem, Hem i stap harem ol prea blong yumi, Hem i gat wan risen blong letem ol hadtaem blong yumi i gohed10mo bae hem i helpem yumi blong fesem. 11

Long wan toktok blong hem, Pol i talem long yumi wan trabol we i kam long hem oltaem, olsem “nil blong aranis” we i stap stikim hem mo mekem hem i harem nogud tumas. Tri taem hem i askem long Masta blong hem i tekemaot. Be long ansa blong ol prea blong Pol, Lod i no karemaot trabol ia be hem i givim pis mo andastaning long hat blong Pol, hem i talem, “Mi save givhan long yu long gladhat blong mi, mo hemia i naf blong holem yu. Taem we yu nogat paoa, paoa blong mi i save kam strong moa long yu.” Wetem niufala andastaning ia, Pol hem i save akseptem mo stap glad long trabol we i bin kasem hem. Hem i talem, “From samting ia, mi mi glad blong tok flas from ol samting we i soemaot we mi mi nogat paoa. Long fasin ia mi save we Kraes i stap lukaot long mi long paoa blong hem.”12

Taem yumi kasem impoten lukluk ia long laef blong yumi, fasin blong yumi blong save stanap strong kasem en bae i gro, bae yu lanem blong helpem olgeta we oli nidim help13 mo bae yumi glad mo iven talem tangkyu from ol eksperiens we God i givim long yumi blong tijim yumi long rod blong kasem laef we i no save finis.

Taem yumi stap traehad long ol hadtaem, bae i no isi blong luksave ol tes blong yumi olsem ol saen blong yumi wanwan long tes ia blong kam olsem wan disaepol. Be, i no mata se yumi stap long tudak blong harem nogud o long rod blong hapines, blesing i save kam taem yumi stap gat sore mo stap lanem samting aot long ol safaring blong ol narafala man.

Long wan asaenmen blong mi long wan stek konfrens long Filipin i no longtaem i pas, hat blong mi i bin brok taem mi harem eksperiens blong Brata Daniel Apilado. Brata Apilado mo waef blong hem i bin kasem baptaes long 1974. Tufala i laekem tumas gospel we i bin kambak mo tufala i bin sil insaed long tempol. Tufala i bin gat faev naesfala pikinini. Long Julae 7, 1997, taem we Brata Apilado i stap givim seves olsem stek presiden, wan faea i bin bonem smol haos blong olgeta. Bigfala boe blong Brata Apilado i bin pulumaot papa blong hem long faea mi i bin ron i go bak blong pulumaot ol narawan. Hemia i las taem we Brata Apilado i luk boe blong hem i laef. Faea i kakae waef blong Brata Apilado , Dominga, mo faevfala pikinini blong tufala.

From se Brata Apilado i bin stap long wan laef we God i glad long hem, i no minim se bae trabol ia i no mekem hem i harem nogud. Be fasin blong hem blong stap fetful blong kipim ol kavenan blong hem mo blong eksasaesem fet blong hem long Kraes i leftemap tingting blong hem long promes ia se bae hem i save stap wetem famli blong hem bakegen. Hop ia i stap olsem wan angka long sol blong hem.14

Long taem blong visit blong mi, Brata Apilado, we naoia hem i stap olsem stek petriak, hem i introdiusum mi long niufala waef blong hem, Simonette, wetem tufala boe blong tufala, Rafael mo Daniel. Hem i tru, Jisas Kraes i save mo bambae i “mekem olgeta we oli stap harem nogud bambae oli harem gud bakegen.”15

Taem mi stap serem stori blong Brata Apilado, mi stap wari se bae bigfala lus blong hem bae mi mekem plante long yumi blong gat tingting se ol smolsmol harem nogud o safaring blong yumi oli no impoten. Plis no traem blong komperem, be stap lanem mo folem ol stamba tingting blong taem we i no save finis, taem yu stap wokbaot tru long ol trabol taem blong yuwan.

Sapos mi save toktok i go long wanwan man─ “yufala we i stap wok tumas mo i stap karem ol hevi samting”16—bambae mi talem olsem se ol hadtaem blong yuwan, ol harem nogud blong wanwan man, ol soa long bodi, ol trabol taem, mo evri kaen wiknes— Papa blong yumi long Heven mo Pikinini blong Hem i save evriwan. !Gat fet!!Leftemap tingting!!Mo biliv long ol promes blong God!

Stamba tingting mo misin blong Jisas Kraes hem i blong “tekem long hem ol soa blong bodi mo ol siknes blong ol pipol blong hem,” “tekem long hem ol wiknes blong olgeta,” mo “blong helpem ol man blong hem long ol wiknes blong olgeta.”17

Blong kasem fulwan ol presen we Sevya blong yumi i givim, yumi evriwan i mas lanem se safaring hemwan i no tijim o givim long yumi eni gudfala samting we bae i save stap longtaem kasem taem we yumi wantem blong eksasaesem fet blong yumi blong lanem wan samting aot long ol trabol ia.

Elda Nil A. Makswel i serem wanem we hem i bin lanem long fasin blong lanem samting aot long safaring long ol toktok ia:

“Ol defren kaen safaring, sapos yumi stanap strong, i save bildimap yumi. …

“…Wan pat blong stanap strong hem i blong putum tingting i stap daon, long medel blong ol safaring ia, blong lanem samting aot long ol eksperiens ia. I no minim nomo se bae yumi mas pas tru long ol samting olsem, be tu se ol samting olsem oli mas pas tru long yumi … long ol fasin we bae i mekem yumi kam moa klin.” 18

Mi bin luk long ol laef mo eksampol blong ol narafala man se taem oli eksasaesem mo stanap strong long fet long Jisas Kraes mo promes blong Hem, bae i givim wan stret hop se bae ol gudfala samting bae i kam. Stret hop ia i no mekem yumi seksek, i givim paoa we yumi nidim blong save stanap strong kasem en.19 Taem yumi save joenem safaring blong yumi wetem wan gud tinging se hem i pat blong long laef blong yumi long wol ia mo moa impoten long presen ia we i stap wet long yumi long heven, bae i leftemap fet blong yumi long Kraes mo bae yumi kasem kamfot long ol sol blong yumi.

Afta bae yumi save luk laet long en blong tudak ia. Elda Jefri R. Holan i bin tijim: “I tru, i gat laet long en blong tudak ia. Hem i Laet blong Wol, Moning Sta, ‘laet ia we i nogat en blong hem, we tudak i no save kasem’ [Mosaea 16:9]. Hem i Pikinini blong God Hemwan.” 20

Yumi save faenem paoa long save ia se hadtaem long laef ia hem i blong sot taem nomo; iven ol naet we i tudak tumas i save kam dei laet bakegen blong olgeta we oli stap fetful

Taem evri samting ia i finis mo yumi bin stanap strong kasem en long evri samting, wetem fet long Jisas Kraes, yumi gat promes ia se “Bambae God i ravemaot wota blong ae blong [yumi]” 21

Mi testifae se God Papa blong yumi mo Pikinini blong Hem, Jisas Kraes, i laef mo Tufala i stap kipim ol promes. Mi testifae se Sevya i stap invaetem yumi evriwan blong kam tekpat long Atonmen blong Hem. Taem yumi eksasaesem fet blong yumi long Hem, bae Hem i leftemap yumi mo karem yumi i go tru long ol tes blong yumi, mo long en, sevem yumi insaed long selestial kingdom. Mi invaetem yu blong kam long Kraes, stanap strong kasem en wetem fet, kam moa gud long Hem, mo kasem glad we i stret mo gud long Hem. Long tabu nem blong Jisas Kraes, amen.