E na Kaoi Rannimata te Uea ae Iehova man Maata ni Bane

Ngkai mwakoron ana babaire Tamara are i Karawa, E kariaia bwa ti na irianaki ma te karawawataki bwa a na kaoti inanon maiura n rabwata.¹ Ngkai e taraaki bwa a bwakariira kataaki aika kakaokoro, ti kona ni kakoaua bwa aron te maiu ae mamate e a kaman baireaki ni kainnanoakira bwa ti na korakai ao ni karawawataaki. Bon au tataro bwa te Tamnei ae Tabu e na kairii ara atatai aika korakora bwa e aera e riai arona aei.

Ngkana ti oota n taneiai n te maiu aika kaangaanga rinanon te onimaki iroun Kristo, ti kona n nooria bwa e kona n iai oin te kantaninga n atua inanon korakaira. Naake a kakaonimaki a kona n rinanon koauan ana reirei Betero. E koreia, “Ngkana kam maraki i bukin te raoiroi, ao kam a kabaia.”² Ngkai ti kamwakuri “nanora n atatai,”³ ti kona n rikirake inanon ara konabwai n teimatoa ni katairai kataaki ao n reiakinaki mai iai—ao ni kaitiakaki mai—iai. Te atatai n aron aei e katauraoa kaekaan te titiraki ae e a maan “Bukin tera baika a buakaka a riki nakoia aomata aika raoiroi?”

Aomata ni kabane ake a kakauongo n te bong aei a kinaaki ma tabeua mwaitin te maroaa, nanokawaki, rawawata, maraki, ke te korakai. Ma te “mata n onimaki”⁴ ao ataakin te koaua ae akea tokina, ti kunea n angin te tai bwa te rawawata ao te maraki ae ti rinanona ni maiura ae mamate e kona ni kananououa ke ni kamangora te kukurei ae akea tokina bwa ana babaire ae korakora Tamara ae i Karawa ngaia raoi te babaire ae akea tokina ibukin kukureira. Akea te kawai riki teuana ni karekea bwaninin te kimwareirei.⁵

Te Atua e kaoira bwa ti na kaeka ma te onimaki nakon oin karawawatakira aika onoti bwa ti aonga n tai uaan kakabwaia ao ni karekea te rabakau ake a kona n reiakinaki n akea riki te kawai. Ti tuangaki bwa ti na kawakin tuua inanon aroaro ma kaangaanga ibukina ngkana, ti kakaonimaki inanon te karawawataki, ti na karekei kaniwangara ae korakora n te abanuaea i karawa.”⁶ Ao ngkai ti warekia ni booki aika tabu, “Bwa ngkana ti nanokawaki, ti riai ni wetea te Uea Atuara ma te bubuti, bwa a na kimwareirei nanora.”⁷

Te Abotoro Bauro, are ngaia ae rinanon te karawawataki ae bati, e kamanena man oin ana taneiai n reirei ma nanon ao tamaroan ana taratara ae akea tokina are e kaoti ngke ti tauraoi ni kaitara ma te taotaonaki nano. E taku, “Ba rawawatara ae beebete, ae kai toki, e kume ni karika i bukira ni karaka rake, te mimitong ae ababaki ae aki totoki.”⁸ N taekana teuana, ti kona n ataia ribuakon karawawatakira bwa te Atua e a tia ni katauraoa te kaniwanga ni kaboomwi ae akea tokina.

Ana konabwai Bauro n taetae ibukin kakatai, te bwainikirinaki, ao kananokawakin maiuna bwa “karawawataki aika beebete” e anga te iango ae kewe ni kakaiakin marakina, are e ongaki n ana taratara te euangkerio ae akea tokina. Ana onimaki Bauro iroun Iesu Kristo a kona n taobaraaki bwaai ni kabane. Nimatai ana tai ni kataereaki ni baika a irariki, tentai ma te kai; tetaina e karebanaaki, tentai te tai ni koro man te kaibuke; angin te tai e kuri ni mate ngke e kabwabwaaki, irouia kamwarua, ao irouia naba taari aika kewe; e korakai ni kua ao ni maraki, e baki ao e taka, ao e kabebeekanaki ni kabureaki inanon te kamwaitorotoro.⁹

Angiina ibuakora ti bubutia te Atua ni katoki bukin marakira, ngkana e aki roko buokara are ti tangiria, ti kariiriaki n iangoia bwa E aki ongo. I kakoaua bwa, e ngae inanon taai akanne, E ongo ara tataro, iai bukina ngkai E kariaia bwa a na reitinako karawawatakira,¹⁰ ao e na buokiira n ekinakoi.¹¹

N te kawai ae onoti ao ae iangoaki raoi, e tuangiira Bauro aran te bwai ni kateketeke” n irikona, e karika karawawatakina ae korakora ao ni kairia ni katorobubua teniua te tai, ni bubutia te Uea ni katokia mairouna. Ni kaekaan ana tataro Bauro, te Uea e aki kanakoa te kateketeke ma e taekina te rau ao n anganna te oota inanona, ni kangai, “E a tau au akoi i roum: ba e kakoroaki raoi m’akau n te mamara.” Ma te atatai ae boou, e a kona Bauro ni butimwaea ao ni kakaitau ibukin kateketeke ake e anganaki. E taku, “Mangaia ae moan te kukurei Ngai … ni kamoamoai ni mamarau, ba e aonga ni memena m’akani Kristo i aou.”¹²

Ngkai ti karekea te taratara ae akea tokina aei inanon maiura, ara konabwai n teimatoa e rikirake, ti reiakinaki bwa ti na kanga ni buokiia naake a kainnanoa buokaia,¹³ ao ti a roko ma ara kakaitau ao ni kaota ara karabwarabwa n taneiai ake e kariaia te Atua bwa ti na karekei bwa taan kairiiri n te kawai nakon te maiu ae akea tokina.

Ngkana ti kuneira ni mwakuri rinanon te karawawataki, e kona ni matoatoa iangoan ara kaangaanga bwa kanikina ni kawaira aika onoti ni karikiira bwa reirei. Ma, ngkana ti kuneira n tain namakinan te rawawata ke namakinan te kukurei ae korakora, n reiakinaki ma iai ao n namakina te nanoanga ibukin karawawatakia tabeman, e kona n riki bwa te kakabwaia.

N tain karaoan te Mwioko n te maungatabu n te titeiki ae nako ae I iria i Biribin, e uruaki nanou ngke I reiakinaki ana taneiai ae kananokawaki te Tari Daniel. Apilado. Te Tari Apilado ao buna a bwabetitoaki n 1974. A butimwaea te euangkerio ao a kabaeaki n te tembora. Mai imwiin te tai anne, a kakabwaiaki ma niman natiia aika tikiraoi. N Turai 7, 1997, ngke e beku te Tari Apilado bwa te beretitenti n te titeiki, e a karina naba n riki te urarake ni mweengaia ae uarereke. Natin te Tari Apilado ae ana karimoa ni mwaane, Michael, e kamaiua tamana, e katikua man te kabuebue, ao ngkanne e a manga biri n oki nako nanon te auti ni kamaiuia ake tabeman. Bon ana kabanea n tai te Tari Apilado n noora natina te mwaane ni maiu. Aomata ake a mate inanon te ai bon buun te Tari Apilado, Dominga, ao natiia ake niman.

Te koaua are maiun te Tari Apilado are e maiuakinna ae tau ma nanon te Atua ngke e riki te kabuanibwai e aki tuuka ke n aki kamanoa man te rawawata are e rimwiina. Ma ana kakaonimaki ni kawakinan ana berita ao kamwakuran ana onimaki iroun Kristo e anganna koauan te berita bwa e na manga ikotaki ma buuna ao ana utu. Te kantaninga aei e riki bwa kanga atin roon tamneina.¹⁴

Inanon rokou, te Tari Apilado, e riki ngkai bwa te tamanuea, e kabwarabwaraai nakon buuna ae boou, Simonette, ao nakon natiia mwaane aika uoman, Raphael ao Daniel. Ni kouana, Iesu Kristo e kona ni “bauti nanoia akana uruaki” ao n angania “te bau ae tamaroa n onea mwin te mannang.”¹⁵

N tibwauan ana rongorongo te Tari Apilado, I tabeaianga ni kakamaakun buana ni kona ni karaoia aika mwaiti bwa a na iangoi oin rawawataia ao korakaia e aki bati ni kakawaki ni kabotauaki. Taiaoka tai kabotaua, ma ukeuke n reiakinna ao ni maiuakin reirei aika akea tokiia ngkai kam nakonako rinanon oin ami ne ni kanaiai ni karawawataki.

Ngkana I kona n taetae nakoimi n tatabemani ngkami nako—“ngkami akana kam kua ao kam rawawata,”¹⁶—I bia taekinna bwa korakaimi aika onoti—rawawatami n tatabemani ngkami nako; namakinan te maroaa, bwarannano; maraki, bwanikirinaki, ao aoraki n aekaia nako—a kinaaki iroun Tamara are i Karawa ao irounn Natina. Bwaina te ninikoria! Baina te onimaki! Ao kakoauai ana berita te Atua!

Oin bukin ana mwakuri Iesu Kristo bwa e na “uota iaona marakiia ao aorakiia ana aomata” e na “uota iaona mamaaraia,” bwa e na “buokiia ana aomata ni kaineti ma mamaaraia.”¹⁷

Ni kabwanina reken ana bwaintituaraoi te Tia Kamaiu are e a tia n anga, ti riai n reiakina te karawawataki mai iai e aki reireia ke n anganiira bwaai aika teimaan bonganaia ma tii ngkana ti karaoia n ira aron te waaki n reiakinaki man oin karawatwaakira rinanon kamwakuran ara onimaki.

N tetaina Unimwaane Neal A. Maxwell e tibwaua are e reiakinna ni karawawata aika iai bukiia n taeka aikai:

“Aekakin karawawata aika koaua, a taobaraaki raoi, a kanakoraoira riki. …

“… Mwakoron tauraoira ni kaitarai e raonaki ma te nimamnnei ae tau, ribuakon korakaira, n reiakinaki man ara taneiai aika riai. Riki nakon rinanoan bwaai aikai, a riai n rin inanora … ni kawai ake a na katabui [ra].”¹⁸

I kamataua n tarai maiuia ao aia katooto tabeman ake a kamwakura aia onimaki ae matoatoa ao ae teimatoa iroun Iesu Kristo ao Ana berita e katauraoa te kantaninga ae koaua ibukin bwaai aika raoiroi aika a na roko. Te kantaninga ae koaua aei e kateimatoaira, e uota te korakora ao te mwaaka are ti kainnanoia n teimatoa. ¹⁹ Ngkana ti reita karawawatakira n te kantaninga ae iai bukina ni maiura ae mamate ao ae kakawaki riki nakon kaniwanga ake a tataningaira n taabo i karawa, ara onimaki iroun Kristo e rikirake ao ti karekea raun tamneira.

Ngkanne ti kona n noora te oota n tokin te kawai iantano. E reirei Unimwaane Jeffrey R. Holland: “Bon iai te oota n tokin te kawai iantano. Bon Ootan te Aonaaba, Itoin te Moaningabong ae Ootamwaaka, te ‘oota ae akea tokina, are e aki kona n rotongitong.’ [Motiaea 16:9.] Bon Natin te Atua raoi n tii Ngaia.”²⁰

Ti kona n anaa te korakora n ataakina bwa taneiai ni kabane aika kaangaanga n te maiu aei a aki teimaan, e ngae ngke inanon rotongitongin te tairiki a bitaki nakon te ngaina ibukiia aika kakaonimaki.

Ngkana a taubobonga bwaai ao ti tauraoi ni kaitarai bwaai ni kabane ma te onimaki iroun Iesu Kristo, ti karekea te berita bwa “Te Atua e na kaoi rannimatara ni kabane mai mata[ra].”²¹

I kakoaua bwa te Atua ao Natina, Iesu Kristo, a maiu ao bwa Ngaiia taan kawakin berita. I kakoaua bwa te Tia Kamaiu e kaoira ni kabane bwa ti na roko ao ni katoonga uaan Ana Mwakuri ni Kamaiu. Ngkai ti kamwakura ara onimaki Irouna, E na tabekira rake ao ni uouotira rinanon kataakira ao, n te kabane, e na kamaiuira n te abanuea are te tiretio. I bia kaoi ngkami n nakomai nakon Kristo, teimatoa raoi inanon te onimaki, ao ni kakororaoaki Irouna, ao ni karekea te kimwareirei ae kororaoi Inanona. N aran Iesu Kristo ae tabu, amen.