Vajtswv Yuav So Txhua lub Kua Muag
Thaum peb siv peb txoj kev ntseeg tus Cawm Seej, Nws yuav txhawb nqa thiab coj peb mus dhau peb tej kev cov nyom thiab, thaum kawg, yuav cawm peb dim es coj peb mus nyob hauv lub nceeg vaj xilethi-aus.
Ua ib qho ntawm peb Leej Txiv Saum Ntuj Ceeb Tsheej txoj hau kev, Nws cia peb muaj kev nyuaj siab hauv lub neej no.1 Zoo nkaus li peb sawv daws tsis muaj kev nyuaj siab tib yam nkaus los, peb yuav tsum paub hais tias txawm me los sis loj npaum li cas los, peb sawv daws yeej raug kev txom nyem thiab kev nyuaj siab. Kuv thov Vajtswv kom tus Vaj Ntsuj Plig Dawb Huv yuav coj peb kev thaum peb kawm paub yog vim li cas peb yuav tsum raug tej no.
Thaum peb saib tej kev nyuaj siab hauv lub neej no dhau ntawm qhov kev muaj kev ntseeg txog Yexus Khetos, peb thiaj muaj cuab kav pom tau hais tias Vajtswv muaj ib lub ntsiab rau peb txoj kev nyuaj siab. Cov uas rau siab ntseeg yuav pom qhov tseeb hauv Petus cov lus qhuab ntuas. Nws sau hais tias, “Yog nej ua nej lub neej zoo lawm, txawm yog muaj neeg tsim txom nej los nej yeej yuav muaj kev kaj siab.”2 Thaum peb kho peb “lub siab kom to taub,”3 peb haj yam yuav muaj cuab kav nyiaj mus dhau peb tej kev txom nyem thiab kawm tej yam zoo thiab— raug hloov hlo—los ntawm tej no. Thaum to taub li no yus thiaj paub teb lo lus nug uas hais tias “Vim li cas cov neeg zoo thiaj raug tej yam phem?”
Hnub no txhua tus neeg uas mloog kuv cov lus yeej paub me ntsis txog kev kho siab, kev poob siab, kev tu siab, kev mob, los sis kev nyuaj siab. Yog tias tsis tsa qhov muag muaj kev ntseeg4 thiab to taub qhov tseeb uas kav mus ib txhis, peb kawm paub hais tias kev txom nyem thiab kev nyuaj siab uas peb raug hauv lub neej no yuav npog los sis ua rau peb tsis nco qab txog txoj kev zoo siab uas nyob hauv peb Leej Txiv Saum Ntuj Ceeb Tsheej txoj hau kev uas tiag tiag yog txoj kev zoo siab uas kav mus ib txhis. Tsis muaj lwm txoj kev twg uas yuav ua rau peb zoo siab tag siab tag ntsws.5
Vajtswv caw peb los muaj kev ntseeg raws li peb tej kev xav xwv kom peb yuav txais koob hmoov thiab kawm paub tej yam uas kawm tsis tau ua lwm yam. Vajtswv hais kom peb ua raws li cov lus txib hauv txhua yam thiab txhua lub sij hawm, rau qhov “tus uas rau siab ntseeg thaum lawv tab tom raug txom nyem, tus ntawd haj yam yuav tau nqi zog hauv lub nceeg vaj saum ntuj ceeb tsheej.”6 Thiab xws li peb nyeem hauv vaj lug kub hais tias, “Yog tias nej tu siab, hu tus Tswv nej tus Vajtswv tag siab tag ntsws, xwv kom nej yuav muaj kev xyiv fab.”7
Tus Thwj Tim Pov Lauj, uas yeej paub txog tej kev txom nyem, paub zoo lawm thiaj li qhia txog lub neej uas kav mus ib txhis uas los thaum peb ua tib zoo nyiaj mus thiab muaj siab ntev nyiaj. Nws hais tias, “Tej teeb meem me me uas peb raug ib nyuag ntu no, yuav ua rau peb tau txoj koob hmoov zoo uas yuav nyob mus ib txhis, tej teeb meem uas peb raug yeej piv tsis tau rau txoj koob hmoov uas peb tau li.”8 Ua lwm yam lus hais, peb paub tau hais tias Vajtswv tau muab ib tug nqi zog uas kav mus ib txhis rau peb txawm peb tab tom raug kev txom nyem los xij.
Pov Lauj tham tau txog tej kev cov nyom, kev tsim txom, thiab kev nyuaj siab hauv nws lub neej ua tej “kev txom nyem uas sib” yeej tsis piav txog nws tej kev txom nyem loj loj, vim nws tsis nco qab tej ntawd pes tsawg rau qhov nws xav txog lub neej uas nyob mus ib txhis. Pov Lauj txoj kev ntseeg Yexus Khetos ua rau nws tiv taus txhua yam tsav. Muaj tsib zaug uas lawv muab nws nplawm, peb zaug siv pas ntaus nws, ib zaug txawb pob zeb rau; peb zaug nws lub nkoj tog mus; feem ntau mas nws raug xwm txheej yuav tuag mus vim yuav poob deg, muaj tub sab ntaus, thiab cov kwv tij cuav, nws qaug zog thiab raug mob, raug kev tshaib kev nqhis, thiab raug kaw hauv qhov taub nws yeej no thiab liab qab.9
Peb coob leej tau taij thov kom Vajtswv yuav tshem peb txoj kev txom nyem, thiab peb tsis tau txais kev dim ntawd, ces peb thiaj raug ntxias kom xav tias Nws tsis mloog peb cov lus thov. Kuv hais lus tim khawv tias, hauv tej lub sij hawm ntawd, Nws yeej hnov peb tej zaj lus thov, muaj ib lub ntsiab kom peb pheej raug tej kev txom nyem ntawd,10 thiab yuav pab peb nyiaj mus dhau tej ntawd.11
Nyob hauv ib nqes lus zoo, Pov Lauj qhia peb txog ib tug “pos” hauv nws cov tawv nqaij, uas ua rau nws mob heev thiab peb zaug ua rau nws txhos caug, taij thov kom tus Tswv yuav tshem ntawm nws mus. Kom teb tau Pov Lauj tej kev thov Vajtswv, tus Tswv tsis tau tshem tus pos ntawd tiam sis tau hais lus nyab xeeb thiab pab kom nws to taub, thaum hais tias, “Kuv pom zoo hlub koj ces txaus lawm. Kuv yuav pub kuv lub hwjchim rau tus uas qaug zog.” Thaum to taub tej yam tshiab no, Pov Lauj thiaj muaj cuab kav txais thiab muaj kev ris txiaj rau tus pos uas chob nws ntawd. Nws hais tias, “Qhov uas kuv qaug zog ua … rau kuv zoo siab kawg li, rau qhov Yexus Khetos lub hwj chim yuav tsom kwm kuv.”12
Thaum peb pom tau lub neej uas nyob mus ib txhis hauv peb lub neej, peb haj yam muaj cuab kav nyiaj mus, peb kawm yuav ua li cas thiaj tu tau cov neeg txom nyem,13 thiab peb pib muaj kev ris txiaj thiab xav ua Vajtswv tsaug rau tej yam uas Vajtswv cia peb raug thaum peb taug kev mus rau txoj sia nyob mus ib txhis.
Thaum peb pom peb tus kheej nyiaj mus dhau peb tej kev cov nyom, yuav nyuaj nyuaj rau peb pom peb tej teeb meem ua tej daim paib uas qhia txog txoj kev raug sim siab mus ua ib tug thwj tim. Tiam sis txawm peb tab tom nyob hauv lub hav tsaus ntuj nti thaum peb raug kev nyuaj siab los sis muaj kev zoo siab los, txoj kev kawm los ntawm thiab muaj kev khuv leej rau lwm tus uas tab tom raug kev nyuaj siab yuav ua ib txoj koob hmoov rau peb.
Tsis ntev tas los lawm kuv raug txib mus ua hauj lwm hauv ceg txheem ntseeg ib lub rooj sab laj hauv Philippines teb, kuv lub siab puas tas thaum kuv hnov Tij Laug Daniel Apilado zaj dab neeg. Tij Laug Apilado thiab nws tus poj niam tau ua kev cai raus dej thaum xyoo 1974. Nkawd nyiam txoj moo zoo uas muab txum tim rov qab los lawm thiab raug muab sib khi ua ke hauv lub tuam tsev. Yav tom qab ntawd, lawv muaj hmoov yug tau tsib tug me nyuam. Thaum lub Xya Hli Ntuj hnub tim 7, 1997, thaum Tij Laug Apilado tab tom ua ceg txheem ntseeg tus thawj tswj hwm, txawm muaj hluav taws hauv lawv lub tsev. Tij Laug Apilado tus tub hlob, Michael, cawm tau nws txiv, tau tshem nws tawm ntawm lub tsev uas tab tom kub hnyiab, ces tau rov qab khiav mus hauv sim pab lwm tus neeg. Twb yog lub sij hawm kawg uas Tij Laug Apilado pom nws tus tub tseem muaj sia nyob. Nyob hauv qhov hluav taws ntawd nws tus poj niam, Dominga, thiab nkawd tsib tug me nyuam tau tuag.
Qhov uas Tij Laug Apilado tab tom ua neej uas haum Vajtswv lub siab thaum nws raug txom nyem tsis tau tiv thaiv nws ntawm txoj kev tu siab uas los rau hauv nws lub neej. Tiam sis nws txoj kev rau siab ntso ceev nws tej kev khi lus thiab muaj kev ntseeg txog Khetos ua rau nws cia siab rau txoj kev cog lus hais tias yuav muaj ib hnub twg thaum nws thiab nws tus poj niam thiab tsev neeg yuav rov qab los nyob ua ke dua. Txoj kev cia siab no tau peem los ua ib thauj tog rau nkoj rau ntawm nws sab ntsuj plig.14
Thaum kuv mus xyuas ntawd, Tij Laug Apilado, uas nim no yog ceg txheem ntseeg tus yawg suab, tau coj kuv mus ntsib nws tus poj niam tshiab, Simonette, thiab nkawd ob tug tub, Raphael thiab Daniel. Tiag tiag mas, Yexus Khetos muaj cuab kav thiab yuav “kho tau lub siab uas tawg rhe lawm.”15
Thaum qhia Tij Laug Apilado zaj dab neeg, kuv txhawj tsam ib txhia yuav muab lawv tej kev tu siab thiab kev txom nyem piv rau nws cov es yuav xav tias lawv tsis tshua raug tej yam xwm txheej pes tsawg. Thov kom nej tsis txhob muab sib piv, tiam sis sim kawm thiab muab tej ntsiab cai uas kav mus ib txhis nruab rau nej lub neej thaum nej tab tom nyiaj mus dhau nej tej kev txom nyem.
Kuv xav hais lus rau nej sawv daws tias—“nej cov uas sab sab vim nej ris nra hnyav”16—thov kom nej paub tias nej tej kev nyuaj siab—nej tej kev txom nyem, kev mob siab, kev cov nyom, thiab kev mob kev nkees txhua yam—yeej yog tej yam uas peb Leej Txiv Saum Ntuj Ceeb Tsheej thiab Nws Tib Leeg Tub paub. Ua siab loj! Cia li muaj kev ntseeg! Thiab tso siab rau Vajtswv cov lus cog tseg!
Yexus Khetos txoj hauj lwm thiab lub ntsiab muaj qhov uas Nws yuav “raug tej kev mob nkeeg thiab tej kev txom nyem thiab tej kev dag ntxias txhua yam,” “yuav ris lawv tej kev qaug dag qaug zog,” thiab “kom nws yuav paub pab nws cov neeg raws li lawv tej kev qaug dag qaug zog.”17
Kom txais tau tej khoom plig uas peb tus Cawm Seej xav muab, peb yuav tsum kawm hais tias kev txom nyem nkaus xwb tsis qhia los sis tsis muab ib yam dab tsi uas kav mus ib txhis rau peb tsuas yog peb yuav txhob txwm pib kawm paub los ntawm peb tej kev cov nyom thaum uas peb siv peb txoj kev ntseeg.
Txwj Laug Neal A. Maxwell qhia tias nws tau kawm li cas txog lub ntsiab ntawm kev txom nyem thaum nws hais tias:
“Tej kev raug txom nyem, uas peb ua tib zoo nyiaj, yuav tsa tau peb kom nto. …
“… Ib qho ntawm txoj kev nyiaj mus zoo yog kom peb ua siab mos siab muag, thaum peb tab tom raug kev nyuaj siab, es kawm los ntawm tej yam uas peb raug ntawd. Es tsis yog lam nyiaj mus dhau tej yam no xwb, tej ntawd yuav tsum mus hauv peb lub siab … kom pab [peb] ua tau neeg dawb huv.”18
Kuv tau pom lwm tus neeg lub neej thiab tus yam ntxwv hais tias txoj kev rau siab ntseeg Yexus Khetos thiab Nws tej kev cog lus twb yog kev cia siab rau tej yam zoo uas tseem yuav los. Txoj kev cia siab khov kho no, ua rau peb muaj zog thiab tau hwj chim uas pab tau peb nyiaj mus dhau.19 Ces peb thiaj to taub tias peb txoj kev raug txom nyem hauv lub neej no thiab muaj tseeb tiag yeej muaj nqi zog rau peb saum ntuj ceeb tsheej, peb txoj kev ntseeg Yexus, yuav loj tuaj thiab peb yuav txais txoj kev nplij siab.
Ces peb thiaj pom tau qhov kaj uas nyob tom kawg. Txwj Laug Jeffrey R. Holland tau qhia tias: “Yeej muaj ib qho kaj uas nyob tom kawg. Nws yog Qhov Kaj rau lub Ntiaj Teb, lub Hnub uas Ci thaum Kaj Ntug, yog ‘qhov kaj uas ci tas mus ib txhis, uas yuav tsis tsaus hlo li’ [Mauxiyas 16:9]. Nws twb yog Vajtswv tus Vajtswv Kiag.”20
Peb yuav tau dag zog thaum peb nco qab tias txhua yam teeb meem hauv lub neej no tsuas kav ib nyuag ntu xwb; tej hmo uas tsaus ntuj nti yeej yuav pauv ua kaj ntug rau cov uas rau siab ntseeg.
Thaum kawg thiab peb tau muaj kev ntseeg Yexus Khetos pab peb nyiaj mus dhau txhua yam, peb tau lus cog tseg hais tias “Vajtswv yuav so [tej] kua muag huv tib si ntawm [peb] qhov muag.”21
Kuv hais lus tim khawv tias Vajtswv peb Leej Txiv thiab Nws Tib Leeg Tub, Yexus Khetos, muaj sia nyob thiab Nkawd yeej ua raws li Nkawd cog lus tseg. Kuv hais lus tim khawv tias tus Cawm Seej caw peb txhua tus kom los thiab txais yuav Nws txoj Kev Theej Txhoj. Thaum peb siv peb txoj kev ntseeg Nws, Nws yuav txhawb nqa thiab coj peb mus dhau peb tej kev cov nyom thiab, thaum kawg, yuav cawm peb dim es coj peb mus nyob hauv lub nceeg vaj xilethi-aus. Kuv thov caw nej los cuag Khetos, muaj kev ntseeg nyiaj mus dhau, thiab ua neeg zoo tag nrho rau ntawm Nws thiab muaj kev zoo siab tag nrho hauv Nws. Los ntawm Yexus Khetos lub npe dawb ceev, amees.