O Le a Soloiesea e le Atua o Loimata Uma

O se vaega o le fuafuaga a lo tatou Tama Faalelagi, na Ia faataga ai le faanoanoa ia lalagaina i o tatou aafiaga faaletino.¹ E ui e foliga e eseese uma tofotofoga tiga e oo mai ia i tatou taitoatasi, ae ia tatou mautinoa i se tasi tulaga po o le isi, tatou te oo uma lava i puapuaga ma tauiviga. Ou te tatalo o le a taialaina i tatou e le Agaga Paia i se malamalama sili atu i le mafuaaga ua tupu ai lenei mea.

A tatou vaavaai atu i aafiaga faigata o le olaga e ala atu i tioata o le faatuatua ia Keriso, o le a mafai ona tatou vaai atu e i ai se faamoemoega faaleatua i o tatou mafatiaga. E mafai ona aafia le au faamaoni i le moni o le fautuaga foliga feteenai a Peteru. Sa ia tusia, “Afai e tigaina outou ona o le amiotonu, amuia outou.”² Ao tatou faaaogaina o tatou “loto [ia] malamalama ai,”³ e mafai ona faalauteleina i tatou i lo tatou gafatia e onosaia ai o tatou tofotofoga ma le lelei ma aoao mai ai— ma toe faaleleia mai—ai. O lea ituaiga o malamalama ua maua mai ai se tali i le fesili faisoo “Aisea e tutupu ai mea le lelei i tagata lelei?”

Ua masani tagata uma o loo faalogologo mai i le asō i nisi o fuataga o le tuuatoatasi, faanoanoa, tiga, po o le faavauvau. A aunoa ma se “mata o le faatuatua”⁴ ma se malamalamaaga o le upumoni e faavavau, e masani ona tatou iloaina o le tiga ma le puapuaga ua lagonaina i le faaletino e mafai ona le iloa ai pe natia ai le olioli faavavau o le iloaina o le fuafuaga sili a lo tatou Tama oi le Lagi o le fuafuaga moni lava o le fiafia. E leai se isi lava auala e maua ai le atoaga o le olioli.⁵

Ua valaaulia i tatou e le Atua ina ia tali atu ma le faatuatua i o tatou lava puapuaga uiga ese ia mafai ai ona tatou seleseleina faamanuiaga ma maua le atamai lea e le mafai ona aoaoina i se isi lava auala. Ua faatonuina i tatou ia tausia poloaiga i soo se tulaga, aua “o le e faamaoni i puapuaga, ua sili atu le tele o le taui o lea lava tagata i totonu o le malo o le lagi.”⁶ Ma e pei ona tatou faitau i ai i tusitusiga paia, “Afai ua e faanoanoa, ole atu i le Alii lou Atua i le talosaga, ina ia olioli o outou agaga.”⁷

O le Aposetolo o Paulo, o se tagata ua masani i puapuaga, na faaaoga lona lava aafiaga e aoao atu ai ma le loloto ma le matagofie le vaaiga faavavau lea e oo mai pe a tatou tumau lelei ai ma le onosai. Na ia fai mai, “Aua o lo matou puapuaga mamasagia ma le vave mavae, e tupu mai ai mo i matou le manuia mamafa e matua silisili ese lava ma le faavavau.”⁸ I se isi faaupuga, e mafai ona tatou iloa i le lotolotoi o o tatou puapuaga ua saunia e le Atua se taui e faavavau.

O le tomai o Paulo e tautala atu ai e uiga i tofotofoga, sauaga, ma faanoanoaga o lona olaga ao aumaia e le puapuaga “mamasagia” ni manatu sese i le tulaga ogaoga o lona mafatiaga, lea na tofatumoanaina i vaaiga faavavau o le talalelei. O le faatuatua o Paulo ia Iesu Keriso na mafai ai ona lavatia mea uma. E faalima ona sasaina o ia i maea, faatolu i laau, faatasi ona fetogia: faatolu ona mafatia i luga o le vaa; e faatele ona i ai i le tulaga lamatia o le oti i le malemo, e tagata faomea, ma e oo lava i tagata pepelo; na ia mafatia i le vaivai ma le tiga, galala i le fiaai ma le fiainu, ma sa faafalepuipuiina i le malulu ma le le lavalava.⁹

O le toatele o i tatou ua aioi atu i le Atua ina ia aveese le pogai o o tatou puapuaga, ma pe a le oo mai le toomaga na tatou sailia, ua faaosoosoina i tatou i le mafaufau faapea e le o faafofoga mai o Ia. Ou te molimau atu, e oo lava i na taimi, e faafofoga o Ia ia tatou tatalo, e i ai se mafuaaga mo le faatagaina o o tatou puapuaga ia faaauau,¹⁰ ma o le a fesoasoani mai ia i tatou ia tauaveina.¹¹

I se fuaitau patino ma le loloto ua ta’uina mai e Paulo ia i tatou se “mea matuitui i le tino” e leai se igoa lea na aumaia ia te ia le tiga tele ma faatolu ona ave ai o ia i ona tulivae, ma aioi atu i le Alii ina ia aveesea mai ia te ia. O le tali atu i tatalo a Paulo, e lei aveesea e le Alii le mea matuitui ae sa fetalai atu i le filemu ma tuu atu le malamalama i lona loto, faapea atu, “O lo’u nei alofa tunoa e lava lea e fesoasoani ia te oe; aua o le vaivai e faaatoaina ai lo’u mana.” O le i ai o se malamalamaaga fou, na mafai ai e Paulo ona talia ma maua le loto faafetai mo le mea matuitui na tuuina mai ia te ia. Na ia fai mai,“O lea ua tele ai lava lo’u fiafia … i mea ua ou vaivai ai, ina ia tumau i o’u luga le mana o Keriso.”¹²

A o tatou mauaina lenei vaaiga faavavau i o tatou olaga, ua tuputupu ae lo tatou gafatia e onosai ai, ua tatou aoao e fesoasoani atu i e manaomia le fesoasoani,¹³ ma e tatou te talisapaia ma faaalia le lotofaafetai   mo aafiaga na tuuina mai e le Atua ia i tatou e avea ma ni aoaoga i le ala o le ola e faavavau.

Pe a tatou mauaina i tatou lava o galulue e ala i puapuaga, e mafai ona faigata ona iloa atu o tatou tofotofoga o ni faailoga i luga o o tatou auala patino i le avea ai ma soo. Ae pe o le mauaina o i tatou lava i nisi taimi i le lagonaina o le faanoanoa po o luga o le ala tanu o le fiafia, o le aoao mai ma lagona le alofa mo puapuaga o isi e mafai ona avea ma se faamanuiaga.

I le taimi o se tofiga o le konafesi faalesiteki talu ai sa ou auai atu ai i le atu Filipaina, sa ootia lou loto ina ua ou iloaina se aafiaga matautia sa oo ia Brother Daniel Apilado. Sa papatisoina Brother Apilado ma lona faletua i le 1974. Sa la taliaina ma le naunautai le talalelei toefuataiina ma faamauina i le malumalu. Mulimuli ane, sa faamanuiaina i laua i se fanau aulelei e toalima. I le aso 7 Iulai, 1997, ao auauna atu Brother Apilado o se peresitene o se siteki, sa sasao ai se afi i lo latou tamai fale. Na laveai e le atalii ulumatua o Brother Apilado o Michael lona tama, toso ese mai o ia mai le fale ua mu, ona toe tamoe lea i le fale e laveai mai isi. O le taimi mulimuli lena na vaai ai Brother Apilado i lona atalii o ola. O i latou na maliliu i le afi o le faletua lea o Brother Apilado , o Dominga, ma le la fanau uma e toalima.

O le iloaina sa soifua Brother Apilado i se olaga sa fiafia i ai le Atua i le taimi na tupu ai le faalavelave sa lei taofia ai le faalavelave, pe na sao mai ai o ia i le faanoanoaga lea na mulimuli mai ai. Ae o lona faamaoni i le tausiga o ana feagaiga ma le faatinoina o le faatuatua ia Keriso na tuuina atu ai ia te ia le faamautinoaga i le folafolaga o le a ia toe faatasia ma lona toalua ma le aiga. Na avea lenei faamoemoe ma se taula i lona agaga.¹⁴

I le taimi o la’u asiasiga, ua avea Brother Apilado, i le taimi nei ma peteriaka o le siteki, na faailoa atu a’u i lona faletua fou, o Simonette, ma i le la fanau tama e toalua, o Lafaele ma Tanielu. E moni, e mafai ma o le a “fufusi [e Iesu Keriso] i e loto momomo”.¹⁵

I le faasoaina atu o le tala ia Brother Apilado, ou te popole i le tele o mea na toesea mai ia te ia e ono faapea ai le toatele o o latou faanoanoaga ma mafatiaga e leai se afaina i le faatusatusa i ai. Faamolemole aua le faatusatusa, ae ia saili ina ia iloa ma faaaoga ia mataupu faavae e faavavau ao tou savavali atu i le ogaumu o o outou lava puapuaga.

Afai e mafai ona ou tautala atu ia te outou taitoatasi—“outou uma o e tigaina ma mafatia i avega”¹⁶—e mafai ona ou fautua atu o tou tauiviga—faanoanoaga taitoatasi, tiga, faigata, ma vaivaiga o soo se ituaiga—ua silafia uma e lo tatou Tama oi le Lagi ma Lona Alo. Ia lototele! Ia faatuatua! Ma ia talitonu i folafolaga a le Atua!

O le faamoemoega ma le misiona a Iesu Keriso e aofia ai Lona “ave i ona luga o tiga ma ma’i o ona tagata,” “ave i ona luga o latou vaivaiga,” ma “fesoasoani ai i ona tagata e tusa ma o latou vaivaiga.”¹⁷

Ina ia mauaina atoatoa nei meaalofa ua ofo fua mai e lo tatou Faaola, e tatau ona tatou aoao uma o mafatiaga lava ia e le aoaoina pe tuuina mai ai ia i tatou se mea e umi le taua seiloga ua tatou aofia ma le faaeteete i le faagasologa o le aoaoina mai o tatou puapuaga e ala i le faatinoina o le faatuatua.

Na faasoa mai i se tasi taimi e Elder Neal A. Maxwell se mea na ia aoaoina e uiga i le puapuaga mausali i upu nei:

“O nisi tulaga o le puapuaga, pe a onosai lelei, e mafai moni lava ona faalelei atili ai i tatou. …

“… O se vaega o le onosaia lelei e aofia ai le agamalu, i lotolotoi o o tatou mafatiaga, ia aoao mai o tatou aafiaga talafeagai. Nai lo le na o le ui atu i nei mea, e tatau ona latou ui mai ia i tatou … i auala lea e faapaiaina ai i [tatou].”¹⁸

Na ou vaaia i olaga ma faataitaiga a isi o le faatinoina o le faatuatua malosi ma tumau ia Iesu Keriso ma Ana folafolaga e aumai ai se faamoemoega mausali o le oo mai o mea silisili. O lenei faamoemoe mautinoa e faato’aina i tatou, aumaia le malosi ma le mana lea tatou te manaomia e tumau ai.¹⁹ A mafai ona tatou faafesootaia o tatou puapuaga i se faamautinoaga o le faamoemoe i lo tatou tulaga faaletino ma faapitoa lava i le taui o loo faatalitali mai mo i tatou i nofoaga faalelagi, o le a faateleina lo tatou faatuatua ia Keriso ma maua le toafimalie i o tatou agaga.

O le a mafai loa ona tatou iloa atu le faamoemoe pe a mavae faigata. Na aoao mai Elder Jeffrey R. Holland: “E i ai moni lavale faamoemoe pe a mavae faigata. O le Malamalama lea o le Lalolagi, o le Fetuao Pupula, o le ‘malamalama e leai sona iuga, e le faapouliuligia’ [Mosaea 16:9]. O le Alo lava lea o le Atua Lava Ia.”²⁰

E mafai ona tatou maua le malosi i le iloaina o aafiaga faigata uma i lenei olaga e le tumau; e oo lava i po sili ona pouliuli e liua i le tafa o ata.

Pe a maea mea uma ma ua tatou onosaia mea uma ma le faatuatua ia Iesu Keriso, ua tatou maua le folafolaga o le a “Soloiesea foi e le Atua o loimata uma nai o [tatou] mata.”²¹

Ou te molimau atu o le Atua lo tatou Tama ma Lona Alo, o Iesu Keriso, o loo soifua ma o i Laua o ni tausi folafolaga. Ou te molimau atu o loo valaaulia i tatou uma e le Faaola ia o mai ma aai ma feinu i Lona Togiola. Ao tatou faatinoina lo tatou faatuatua ia te Ia, o le a Ia siitiaina i tatou i luga ma taitaiina i tatou e ala i o tatou tofotofoga ma, iu ai, ina faasaoina i tatou i le malo selesitila. Ou te valaaulia outou ia o mai ia Keriso, tumau lelei i le faatuatua, ma ia faaatoatoa ia te Ia. I le suafa paia o Iesu Keriso, amene.